Read Ȧŋlemrȧnɛ Ȧfu Kȧŋȧibinɛ 19 Bible Online

Kȧŋȧibinɛ 19 - Ȧŋlemrȧnɛ Ȧfu bible

Kȧŋȧibinɛ 19

¹Kədarəŋ ka mȧtȧy ame-e, i təlȧ sim təbana ta afəm agbȧthi ro riyana, kaŋ pa, Aleluya; kəkisi, yi ayiki, dɛ yi afɔsɔ ɛ yi ka ɔMarki ɔKuru kȧsu;

²pəkasifɛ kathoŋkas kɔŋ kə yi kəlompi dɛ yi təteŋ, kotȧy-e ɔ po thonkas ɔbɛra urəpi ubana ɔwe po ləsər ȧdȧru bɛ ka karəp kɔŋ, kɔ po kala kɔ ta mȧtir ma ɛbɔy yɔŋ ama ɔ po loŋ.

³kaŋ kȧl pa sɔ-e, Aleluya. Ɔwa akimɔ kɔŋ kə ŋat rokɔm thȧnkȧŋ o thȧnkȧŋ.

⁴Ka aŋbȧki kəgba ŋanlɛ dɛ yi ɛwuka akəli ŋanlɛ aŋ sanɛ ro thɔf, kaŋ bȧtho Kuru ɔwe yirȧ ka kawaŋ ka rȧbȧy, kaŋ pa, Amina, Aleluya.

⁵Ka rim rə wur ka kawaŋ ka rȧbȧy, rə pa, Thɔkəs nu ɔKuru kȧsu, naŋ ɛbɔy yɔŋ bɛ, aŋa nesa kɔ, aŋlɔl dɛ yi aŋbana.

⁶Ka i təlȧ mɔ ȧsim ta runiya rəbana, dɛ yi mɔ katɔŋa ka kəthəntha, dɛ yi mɔ sɛŋ təbana, kaŋ pa, Aleluya; pəkasifɛ ɔMarki ɔKuru kȧsu ka afɔsɔ bɛ ɔ po sɔthɔ rȧbȧy.

⁷Maŋ yasanɛ nu rə kəsel məbɔnɛ məthasər. Ɔwa maŋ sɔŋ kɔ nu ayiki, ȧtesoma-e kanantə ka kaLɔmɛ kəfɛth kə po bek, ka ɔbɛra ufath ɔ po bɛnɛnɛ.

⁸Ka a sɔŋ kɔ mamari tə kəlopra kotha kənɔfthɔ kəfera laf laf; kotȧy-e akotha kəfinɔ kati kə yi mȧyɔs məlompi ma aŋfəm asəm.

⁹kɔ kanɛ mi, Gbal ȧte, Afəm ŋa aruba ŋaŋ, aŋa a tela ka ȧmet ma kȧnȧntȧnɛ ka kȧLɔmɛ kəfɛth. Kɔ pa sɔ do rɔmi, hɔ, Ȧsim atəteŋ ta Kuru, ti ȧte.

¹⁰Ka i sanɛ ka ȧtatək tɔŋ tə kəbatho kɔ, kɛrɛ ɔ pa, Te yɔ yi, minɛŋ sɔ i yi ukos mu ȧbɔy, dɛ yi ukos ka aŋwɔnt mu aŋa ba maseri ma Yisɔs. Bȧtho Kuru, kotȧy-e maseri ma Yisɔs mə yi aŋyina ŋa kanabi.

¹¹Ka i nənk kȧriyana kə kanthɛ, ɔwa kəlo, ȧsoy ȧferȧ ɔ wur, ka a tela ɔwe rensa kɔ-e, ƆBɔthi lanɛ dɛ yi utǝteŋ, ɔwa kɔnɔ mə thonkas, ɔ kȧl tim ka məlompi.

¹²Ɛfɔr yɔŋ ɛ yi mɔ nȧnt nəmara, dɛ yi ka rȧbomp rɔŋ ɔ ba ɛniɔ ɛgbathi; kɔ ba thɔŋ ŋes aŋa a gbal-e, kɛrɛ wuni o wuni ɔ tɛ hɛ ŋi thambe kɔn son.

¹³kɔ lopra ruma ara a po wɔnsir mətir; ɔwa ȧŋes ŋɔŋ nə yi ȧRim ra Kuru.

¹⁴Ɔwa tobali ȧtȧ yi ro riyana tə tȧŋ kɔ ka təsoy afera, tə lopra totha tənɔfthɔ təfera laf laf.

¹⁵Ɔwa agbathɔ awɔŋi aŋ wur ka kȧsəŋ kɔŋ kȧmȧ ɔ gbəli gbasi ŋi tə kəgbantha təbona. Ɔwa ɔ tə gbəka ŋa rə kətək ka rəfat; ɔwa ɔ nas nas ɔdɛr ɔwɛkəs wa mawayn ma rabaŋ dəbana ra ɔKuru ka afɔsɔ bɛ.

¹⁶Ɔwa ka ɛlopra yɔŋ dɛ yi ka aŋlənk ŋɔŋ a gbal ȧŋes aŋe, ƆBȦY KA AŊBȦY, YI ƆMARKI KA AŊMARKI.

¹⁷Ka i nənk umȧleka ɔ təmȧ ka aret, ɔ tela rə rim rəbana ka ɛbȧmp bɛ aŋa fal ka aŋfena, Der nu-e, gbanɛ nu rɔkin ta aŋfantha abana ŋa Kuru;

¹⁸kȧmȧ nə di tabel ta aŋbȧy yi aŋkɛlfa, yi tabel ta aŋfəm ŋa afɔsɔ, yi ta tȧsoy, yi ta ŋaŋ aŋa rensa ŋa, dɛ yi tabel ta aŋfəm bɛ, ɔwaŋkom-o, ɔtar-o, ɔbana-o, dɛ yi ɔlɔl.

¹⁹Ka i nənk ɔsɛm ubaŋ, yi aŋbȧy ŋa ȧdȧru, dɛ yi atobali taŋ, ŋa bɛ aŋ po thoŋklanɛ rɔkin tə kətim kɔn ɔwe rensa ka ȧŋsoy, dɛ yi atobali tɔŋ.

²⁰Ɔwa a gbip ɔsɛm ubaŋ, dɛ yi ɔnȧbi uyem ɔwe la yɔ mȧyɔs məkabanɛ rodi kɔŋ, pə yi mɔ-e mȧyɔs ama la tɔns ŋaŋ aŋa la sɔthɔ aŋlomar ŋa ɔsɛm ubaŋ, dɛ yi ŋaŋ aŋa la bȧtho mȧbȧlȧnɛ mɔŋ. Kaŋ fitha ŋa ŋarəŋ akəli ka ȧŋbonka ŋa nȧnt ana mara rɛ ȧsɔlfɔ.

²¹kaŋ dif aŋlɔm aŋa tiyȧ rə aŋgbathɔ ŋa ɔwe rensa ȧŋsoy, pə yi mɔ-e aŋgbathɔ aŋa wur ka kȧsəŋ kɔŋ. Ka ɛbȧmp bɛ-e, aŋ namra yi tabel taŋ.