Read Ȧŋlemrȧnɛ Ȧfu Kȧŋȧibinɛ 20 Bible Online

Kȧŋȧibinɛ 20 - Ȧŋlemrȧnɛ Ȧfu bible

Kȧŋȧibinɛ 20

¹Ka i nənk umȧleka ɔ thor kəwur ro riyana, kɔ ba aŋsapɔ ŋa ȧŋbi aŋa te ba ɔthalnɛ, yi kɔrɛntha kəbana ka kȧta kɔŋ.

²Ɔwa ɔ wop ȧŋninkinanka, ȧŋbok ubaki kati, ɔwe yi ɔkərəfi dɛ yi Sethani, kɔ tand kɔ ta təren awul ŋin.

³kɔ fitha kɔ ka ȧŋbi aŋa te ba ɔthalnɛ, kɔ kantha ŋi, ɔ kȧl mathlɛ ŋi kȧmȧ ɔ te sɔ gbəli tɔns tȧbona haŋ təren awul ŋin tə poŋ; rodarəŋ kati a tə ter kɔ ta alɔkɔ agbut.

⁴Ka i nənk təwaŋ ta rȧbȧy, ɔwa a sɔŋ ŋaŋ aŋa yirȧ ri afɔsɔ tə kəthoŋkas; ka i nənk ɛŋesəm ya ŋaŋ aŋa a la gbetha təbomp salata maseri ma Yisɔs yi ta ȧrim ra Kuru, pəkasifɛ aŋ la kasi tə kəbatho ɔsɛm utuy tȧy thalɔm mȧbȧlȧnɛ mɔŋ, kaŋ la pɛnsa sɔ aŋlomar ŋɔŋ ka mabuŋ maŋ, ɔwa aŋ kȧl yi akəli sɔ, kaŋ gbəka dɛ yi Kraystȧŋ təren awul ŋin.

⁵Kayokanɛ ka aŋfi kətɔtɔkɔ ki ake. Kɛrɛ aŋfi alɔm aŋ yokanɛ hɛ haŋ təren awul ŋin tə poŋ.

⁶Afəm aruba dɛ yi asəm ŋaŋ aŋa bəpər ka kȧyokanɛ ka aŋfi kətɔtɔkɔ; rafi ara bekȧ mȧrəŋ rə ba hɛ afɔsɔ rokɔm ka ŋaŋ, kɛrɛ aŋ tə yi afode ŋa Kuru dɛ yi Kraystȧŋ, ɔwa aŋ tə gbəka rɛ kɔn təren awul ŋin.

⁷Ma təren awul ŋin tə poŋ-e, a tə ter Sethani kəwur ka ɔfəndȧnɛ wɔŋ.

⁸Ɔwa ɔ tə kɔnɛ tə kəyɛthas tȧbona ka ɛgbap yanlɛ ya ȧdȧru, pə yi mɔ-e, Kɔk yi Mekɔk, tə kəthoŋkla ŋa dɛr rɔkin tə kətim; amɔlɔ maŋ mə yi mɔ kasənt ka kȧbȧŋ.

⁹Ɔwa aŋ gbanthɛ ȧŋthɔf bɛ, kaŋ gbətɔ aŋkɔbɛ ŋa aŋfəm asəm, dɛ yi kȧpet kəbɔthər. Kɛrɛ nȧnt nə wur ka kȧriyana, nə thɔy ŋa.

¹⁰Ka a fitha Sethani ɔwe yɛthas ŋa-e ka ȧŋbonka ŋa nȧnt dɛ yi ȧsɔlfɔ, ro ɔsɛm utuy tȧy dɛ yi ɔnȧbi uyem aŋ yi; ɔwa a tə gbaŋar ŋa ri pali gbɛs-əŋ haŋ thȧnkȧŋ thəbana.

¹¹Rodarəŋ kati i nənk kəwaŋ ka rȧbȧy kəbana kəfera pər dɛ yi kɔn ɔwe yirȧ ri; ɔwa ȧdȧru dɛ yi kȧriyana ɛ gbukɛ kəwur ka kȧbəprȧnɛ kɔŋ. Ɔwa dɛr rə yi hɛ sɔ ta yi.

¹²Ka i nənk aŋfi alɔl dɛ yi abana, aŋ təmȧ rodi ka Kuru-e, ka a kanthi tafa; ka a kanthi sɔ kafa kəlɔm ȧke yi ȧkȧfȧ ka aŋesəm. Ɔwa a thonkas aŋfi kətȧŋȧnɛ ka mȧtȧy ama a po gbal ka ȧtȧfȧ, mɔlɔ ma mȧyɔs maŋ mə yi.

¹³Ɔwa kȧbȧŋ kəbana kə sɔŋ aŋfi aŋa yi ri, ka rəfi dɛ yi Kərəfi aŋ sɔŋ aŋfi aŋa yi ri sɔ; ka a thonkas wuni o wuni mɔlɔ ma mȧyɔs mɔŋ mə yi.

¹⁴Ka a fitha rəfi yi Kərəfi ka ȧŋbonka ŋa nȧnt. Ɔwa rafi ara bekȧ mȧrəŋ riyȧŋ.

¹⁵Ɔwa wuni o wuni ɔwe te ba ȧŋes ŋɔŋ ka ȧkȧfȧ ka aŋesəm-e, a tǝ fitha kɔ ka ȧŋbonka ŋa nȧnt.