Read Ȧŋlemrȧnɛ Ȧfu Kȧŋȧibinɛ 5 Bible Online

Kȧŋȧibinɛ 5 - Ȧŋlemrȧnɛ Ȧfu bible

Kȧŋȧibinɛ 5

¹Ka i nənk ka kȧta kədiɔ ka kɔn ɔwe yirȧ ka kawaŋ ka rȧbȧy kafa ȧke a po gbal rokor yi romuth, ka a po mathlɛ ki rə ɛmȧthlɛ tȧmthədɛrəŋ.

²Ka i nənk umȧleka ubaki mədɛr ɔ tam rə rim rəbana, Kanɛ yi ubeki tə kəkanthi akafa-e, dɛ yi tə kəsim ɛmȧthlɛ-e?

³Ka wuni o wuni ɔ yi hɛ ro riyana, thalɔm ka ȧdȧru, thalɔm ka ȧdȧru ratha, ɔwe yi ubeki tə kəkanthi ȧkȧfȧ, thalɔm tə kəkəli rokor kati.

⁴Ɔwa minɛŋ i bok kəbok kəbana pəkasifɛ wuni o wuni ɔ yi hɛ ɔwe yi ubeki tə kəkanthi ȧkȧfȧ thalɔm tə kəkəli ki.

⁵Kɛrɛ ukin ka aŋbȧki ɔ kanɛ mi, Te bok; ȧŋSɔyila ŋa ȧŋbɔnshɔ ŋa Yuda, aŋThəŋk ŋa Debid, ɔ po tham tə kəkanthi ȧkȧfȧ, dɛ yi tə kəsim ɛmȧthlɛ tȧmthədɛrəŋ.

⁶Ka i kəli, ɔwa kəlo, kətɔŋ ka kawaŋ ka rȧbȧy yi ɛwuka akəli ŋanlɛ, dɛ yi aŋbȧki-e, i nənk kaLɔmɛ kəfɛth ɔ təmȧ, ka pə bȧlȧnɛ mɔ a po fai kɔ sathka. Ɔwa ɔ ba ɛlɛn tȧmthədɛrəŋ, dɛ yi ɛfɔr tȧmthədɛrəŋ, ɔwa ɛye yi ɛyina tȧmthədɛrəŋ ya Kuru ɛyɛ a po somra ka ȧdȧru bɛ.

⁷kɔ der, ɔ gbasi ȧkȧfȧ ka kȧta kədiyɔ ka kɔn ɔwe yirȧ ka kȧwaŋ ka rȧbȧy-e,

⁸ɔwa ma ɔ po gbasi akafa-e, ɛwuka ŋanlɛ yi aŋbȧki kəgba ŋanlɛ aŋ fumpɔ rodi ka kȧLɔmɛ kəfɛth, ukin o kin ɔ ba agbulu, dɛ yi ɛlanka ya mȧbɔŋɔ ɛla ɛgboŋgbo ɛyɛ yi mɔ tȧramnɛ ta aŋsəm.

⁹kaŋ leŋ aleŋ afu, kəpa, Munɔ mə yi ubeki tə kəgbasi ȧkȧfȧ, yi tə kəsim ɛmȧthlɛ; kotȧy-e a po fai mu sathka, ɔwa mə po bani afəm ka Kuru kətȧŋȧnɛ ka mȧtir ma mu, pə yi mɔ-e afəm kəwur kətɔŋ ka təkomra, yi tənt, yi afəm, yi təbona bɛ.

¹⁰Mə po səki ŋa rəbȧy dɛ yi afode ka ɔKuru kȧsu; ɔwa aŋ tə gbəka ka ȧdȧru.

¹¹Ka i kəli, ɔwa i təl ȧsim ta amaleka agbȧthi aŋa gbətɔ kawaŋ ka rȧbȧy, yi ɛwuka akəli ŋanlɛ dɛ yi aŋbȧki. Amɔlɔ maŋ mə yi ɛwul tɔfɔt tətəp ɛwul tɔfɔt dɛ yi ɛwul ɛwul.

¹²kaŋ pa rə rim rəbana, KaLɔmɛ kəfɛth ɔwe a fay sathka ɔ yi ubeki tə kəsɔthɔ afɔsɔ, yi rəyola, yi kətemp, yi kətham, yi ayiki, yi kəthɔkəs, dɛ yi aruba.

¹³Ka rəka o rəka bɛ ro riyana, yi ka ȧdȧru, yi ratha ka ȧdȧru, yi ro bȧŋ, dɛ yi koko bɛ ara yi ri, i təl ma aŋ pa-e, Aruba-o, ayiki-o, kȧthɔkəs-o, dɛ yi aŋfɔsɔ ɛ yi do rɔŋɔŋ ɔwe yirȧ ka kawaŋ ka rȧbȧy, yi ka kaLɔmɛ kəfɛth thȧnkȧŋ o thȧnkȧŋ.

¹⁴Ka ɛwuka ŋanlɛ aŋ pa, Amina. Ɔwa aŋbȧki kəgba ŋanlɛ aŋ sanɛ kəbatho kɔn ɔwe ba aŋesəm haŋ thȧbana.