Read Ȧŋlemrȧnɛ Ȧfu Kȧŋȧibinɛ 6 Bible Online

Kȧŋȧibinɛ 6 - Ȧŋlemrȧnɛ Ȧfu bible

Kȧŋȧibinɛ 6

¹Ɔwa i nənk ma kaLɔmɛ kəfɛth ɔ sim ȧŋmȧthlɛ ȧtɔtɔkɔ, ka i təlȧ ukin ka ɛwuka akəli ŋanlɛ ɔ pa rə rim mɔ rɛŋ, Der kəli.

²Ɔwa i kəli, ka i nənk ȧsoy uferȧ pər, ka ɔwe rensa kɔ ɔ ba abənta; ka a sɔŋ kɔ ȧniyɔ, ɔwa ɔ wur rə kətham tə kəkɔ tham.

³Ma ɔ sim ȧŋmȧthlɛ aŋa bekȧ yɛrəŋ-e, i təlȧ ɔwuka ukəli ɔwe bekȧ ŋarəŋ ɔ pa, Der kəli.

⁴Ɔwa ȧsoy ulɔm ɔ wur ɔwe yi uyim, ka a sɔŋ ɔwe rensa kɔ afɔsɔ tə kənɔi məthɔfəl ka ȧdȧru, kȧmȧ afəm aŋ difthȧnɛ; ka a sɔŋ kɔ agbathɔ abana.

⁵Ma ɔ sim ȧŋmȧthlɛ aŋa bekȧ ɛsas-e, i təlȧ ɔwuka ukəli ɔwe bekȧ asas ɔ pa, Der kəli. Ɔwa ma i kəli i nənk ȧsoy ubi, ɔwa ɔwe rensa kɔ-e ɔ ba ȧthunthȧ ka kȧta kɔŋ.

⁶Ka i təl rim kətɔŋ ka ɛwuka ŋanlɛ rə pa, Athunth ŋin ŋa awit ta asiliŋ-e, dɛ yi kəthunth məsas ka pȧbali ta asiliŋ. Ɔwa te ləsər ȧmȧro thalɔm məwain.

⁷Ɔwa ma ɔ sim ȧŋmȧthlɛ aŋa bekȧ yanlɛ-e, i təl ȧrim ra ɔwuka ukəli ɔwe bekȧ ŋanlɛ ɔ pa, Der kəli.

⁸Ka i kəli, ɔwa i nənk ȧsoy ȧferȧ pər; ȧŋes ŋa ɔwe rensa kɔ aŋ yi Rəfi, dɛ yi Kərəfi kə tȧŋ kɔ. Ɔwa a sɔŋ ŋa afɔsɔ rokɔm ka ȧgbȧp ŋin ŋa ɛgbap yanlɛ ya ȧdȧru tə kədif rə agbathɔ yi dor, dɛ yi rəfi, rɛ tȧsɛm abaŋ aŋ ro kanth.

⁹Ma ɔ sim ȧŋmȧthlɛ aŋa bekȧ tamath-e, i nənk roratha ka ȧŋbɛsɛ ɛŋesəm ya ŋaŋ aŋa a po dif salata ȧrim ra Kuru, yi ta maseri ama aŋ po sɔŋ.

¹⁰kaŋ gbelegbele aŋ pa, ƆMariki usəm, dɛ yi utəteŋ, to pə ba tə kəwon sɔ-e yeŋka mə thonkas tə kəkala mȧtir ma su ka ŋaŋ aŋa yi ka ȧdȧru-e?

¹¹Ɔwa a sɔŋ kin o kin ka ŋaŋ ruma rəfera, ka a kanɛ ŋa kȧmȧ aŋ muyu ras ta alɔkɔ agbut, haŋ a dif aŋkas rɛ yi aŋwɔnt ŋaŋ mɔ mə a po dif ŋa gbeŋ-e, kȧmȧ a lasər amɔlɔ maŋ.

¹²Ka i kəli ma ɔ sim ȧŋmȧthlɛ aŋa bekȧ tamthərukin, ɔwa kəla, kətən kəbana ka ȧŋthɔf kə yi; aret rə biyȧ thi mɔ afɔrɔ akur, dɛ yi aŋof ȧferȧ aŋ yiməra mɔ mətir.

¹³Ɔwa atɔs ta kȧriyana tə fumpɔ ka ȧŋthɔf mɔ mə mȧkomi məfɛth ma aŋgbɔnɔ gbɔnɔ mȧ mə koŋȧ ma kənkəl kəbana kə yiŋktha ma.

¹⁴Ka ȧkȧriyana kə thas mɔ mə a kump areka; ɔwa kəteŋ o kəteŋ dɛ yi ayel o yel ɛ tɔnɛ ka ɔdɛr wati.

¹⁵Ka ȧŋlɔkɔ ŋati aŋbȧy ŋa ȧdȧru-o, yi aŋfəm abana-o, aŋyola-o, aŋkɛlfa abana-o, aŋfəm ŋa afɔsɔ-o, antar-o yi aŋwuth a kom-o, ŋa bɛ aŋ maŋknɛ ka tayaŋka dɛ yi ka ɛgbalaŋ ya tȧteŋ.

¹⁶kaŋ pa ka tȧteŋ dɛ yi ka ɛgbalaŋ-e, Fumpər su kȧmȧ nə maŋk su ka ɛfɔr ya kɔn ɔwe yirȧ ka kawaŋ ka rȧbȧy, dɛ yi ka rabaŋ da kaLɔmɛ kəfɛth.

¹⁷kotȧy-e ȧŋrey abana ŋa rabaŋ dɔŋ aŋ bek; ɔwa kanɛ gbəli təmȧ rodi kati-e?