Read Ȧŋlemrȧnɛ Ȧfu Kȧŋȧibinɛ 7 Bible Online

Kȧŋȧibinɛ 7 - Ȧŋlemrȧnɛ Ȧfu bible

Kȧŋȧibinɛ 7

¹Kədarəŋ ka mȧtȧy ame-e, i nənk amaleka ŋanlɛ aŋ bɔ təmȧ ka ɛkoŋ yanlɛ ya ȧdȧru, tə kəwop ɛfef yanlɛ ya ȧdȧru, kȧmȧ afef o fef aŋ te fɛŋ ka ȧŋthɔf thalɔm ro bȧŋ, ta a pa ras ka ŋənt o ŋənt.

²Ɔwa i nənk umȧleka ulɔm ɔ ŋat kəwur rothɔrɔŋ, kɔ ba ȧŋmȧthlɛ ŋa ɔKuru ukəli; ɔ tela rə rim rəbana ka aŋmȧleka ŋanlɛ aŋa po sɔthɔ afɔsɔ tə kələsər ȧŋthɔf yi kȧbȧŋ.

³Kɔ pa, Te nu ləsər ȧŋthɔf, thalɔm kȧbȧŋ, thalɔm ɛyint haŋ sə po mathlɛ ɛbɔy ya ɔKuru kȧsu ka mabuŋ maŋ.

⁴Ɔwa i təl amɔlɔ ma kagbath ka ŋaŋ aŋa a po mathlɛ; aŋ mathlɛ ɛwul kɛmɛ kin ɛwul təgba tərəŋ yi ɛwul yanlɛ ka ɛbɔnsɔŋ bɛ ya Isrɛl.

⁵Ka ȧŋbɔnshɔ ŋa Yuda aŋ mathlɛ ɛwul tɔfɔt yɛrəŋ. Ka ȧŋbɔnshɔ ŋa Rubɛn aŋ mȧthlɛ ɛwul tɔfɔt yɛrəŋ. Ka ȧŋbɔnshɔ ŋa Kad aŋ mathlɛ ɛwul tɔfɔt yɛrəŋ.

⁶Ka ȧŋbɔnshɔ ŋa Asar aŋ mathlɛ ɛwul tɔfɔt yɛrəŋ. Ka ȧŋbɔnshɔ ŋa Nafthali aŋ mathlɛ ɛwul tɔfɔt yɛrəŋ. Ka ȧŋbɔnshɔ ŋa Menasi aŋ mathlɛ ɛwul tɔfɔt yɛrəŋ.

⁷Ka ȧŋbɔnshɔ ŋa Simiyɔn aŋ mathlɛ ɛwul tɔfɔt yɛrəŋ. Ka ȧŋbɔnshɔ ŋa Libay aŋ mathlɛ ɛwul tɔfɔt yɛrəŋ. Ka ȧŋbɔnshɔ ŋa Isakar aŋ mathlɛ ɛwul tɔfɔt yɛrəŋ.

⁸Ka ȧŋbɔnshɔ ŋa Sɛbulɔn aŋ mathlɛ ɛwul tɔfɔt yɛrəŋ. Ka ȧŋbɔnshɔ ŋa Yosɛf aŋ mathlɛ ɛwul tɔfɔt yɛrəŋ. Ka ȧŋbɔnshɔ ŋa Bɛnyamin aŋ mathlɛ ɛwul tɔfɔt yɛrəŋ.

⁹Kədarəŋ kati, i nənk runiya rəbana ara wuni ɔ gbəli hɛ lɔm kəwur ka təbona bɛ, yi ka ɛbɔnsɔŋ bɛ, yi ka afəm o afəm, dɛ yi kənt o kənt, aŋ təmȧ rodi ka kawaŋ ka rȧbȧy, dɛ yi rodi ka kaLɔmɛ kəfɛth, kaŋ lopra suma təfera, kaŋ wop ɛrɔŋkɔ ka mȧta maŋ.

¹⁰kaŋ ŋata sim gbaŋkəlo, aŋ pa, Kakisi kə yi ka ɔKuru kȧsu ɔwe yirȧ ka kawaŋ ka rȧbȧy, dɛ yi ka kaLɔmɛ kəfɛth.

¹¹Ka aŋmȧleka bɛ aŋ təmȧ kəgbətɔ kawaŋ ka rȧbȧy, yi aŋbȧki dɛ yi ɛwuka akəli ŋanlɛ; ɔwa aŋ fumpɔ ka aser taŋ rodi ka kawaŋ ka rȧbȧy, kaŋ thɔkəs Kuru Məsaba.

¹²Kaŋ pa, Amina; aruba, yi kəthɔkəs, yi kətemp, yi mɔmɔ, yi ayiki, yi afɔsɔ, yi kəgbəli tȧy ɛ yi ka ɔKuru kȧsu thȧnkȧŋ thəbana. Amina.

¹³Ɔwa ubaki ukin ɔ yif mi, Kanɛ yi aŋfəm aŋe aŋa lopra suma təfera-e, ɔwa reke aŋ wur-e?

¹⁴Ka i pa do rɔŋɔŋ, “Pa, munɔ tȧrȧ.” Kɔ kȧl kanɛ mi hɔ, “Aŋe-e, aŋ wur ka ansɔmpanɛ abana, kaŋ po yak ȧsuma taŋ, ɔwa aŋ po fethər ti ka mȧtir ma kaLɔmɛ kəfɛth.

¹⁵Tiyȧŋ aŋ yi rodi ka kawaŋ ka rȧbȧy ra Kuru, kaŋ bȧtho kɔ pali gbɛs-əŋ ka ȧŋseth ŋa Kuru; ɔwa kɔn ɔwe yirȧ ka kawaŋ-e, ɔ tə fɔlnɛ ŋa.

¹⁶Dor yi rəmun rə wop hɛ ŋa sɔ thȧnkȧŋ, ɔwa aret, thalɔm ɔfey usȧnk ɛ sɔmpa hɛ ŋa.

¹⁷Kotȧy-e kaLɔmɛ kəfɛth ɔwe təmȧ rodi ka kawaŋ ka rȧbȧy ɔ tə yi utɔl ka ŋaŋ, ɔ tə kɔtha ŋa ka təfɔr ta mȧnt ma aŋesəm; ɔwa Kuru ɔ tə nasi ȧmȧntər bɛ ka ɛfɔr yaŋ.”