Read Tibetan — པོད་སྐད་Tibetan Old Testament 2011 བཀོད་པ 1 Bible Online

བཀོད་པ 1 - Tibetan — པོད་སྐད་Tibetan Old Testament 2011 bible

བཀོད་པ 1

¹ཐོག་མར་དཀོན་མཆོག་གིས་ནམ་མཁའ་དང་འཛམ་གླིང་བཀོད་དུས།

²ས་ནི་དབྱིབས་མེད་སྟོང་པ་ཡོད་པ་དང་། ས་གནས་གང་སར་རྒྱ་མཚོའི་ཆུའི་ཁྱབ་ཡོད་ཅིང་མུན་ནག་ཡོད་པ་དང་། དཀོན་མཆོག་གི་ཐུགས་ཉིད་ནི་ཆུ་རྣམས་ཀྱི་སྟེང་དུ་ལྡིང་བཞིན་ཡོད་དོ།

³དཀོན་མཆོག་གིས་འོད་བྱུང་ཞིག་ཅེས་བཀའ་གནང་བ་དང་། འོད་བྱུང་ངོ་།

⁴དཀོན་མཆོག་གིས་འོད་ལེགས་པ་ཡིན་པར་གཟིགས་ནས་ཐུགས་མཉེས་ཏེ། མུན་པ་ལས་འོད་དབྱེའོ།

⁵དཀོན་མཆོག་གིས་འོད་ཀྱི་མིང་ལ་ཉིན་མོ་དང་། མུན་པའི་མིང་ལ་མཚན་མོ་ཞེས་བཏགས་གནང་ངོ། ས་རུབ་ནས་སྔ་དྲོ་བྱུང་བ་དེ་ནི་ཉིན་དང་པོའོ།

⁶དཀོན་མཆོག་གིས་ཆུ་རྣམས་ཁག་གཉིས་སུ་འགྱུར་ཕྱིར་དེའི་དཀྱིལ་ནས་བར་ཚམ་ཅིག་བྱུང་ཞིག་ཅེས་བཀའ་གནང་བ་དང་། དེ་བཞིན་བྱུང་ངོ་།

⁷དཀོན་མཆོག་གིས་བར་ཚམ་མཛད་དེ། བར་ཚམ་གི་འོག་ཏུ་ཡོད་པའི་ཆུ་རྣམས་བར་ཚམ་གི་སྟེང་དུ་ཡོད་པའི་ཆུ་རྣམས་ལས་དབྱེ་བར་གནང་ནས། དེ་བཞིན་བྱུང་ངོ་།

⁸དཀོན་མཆོག་གིས་བར་ཚམ་གི་མིང་ལ་ནམ་མཁའ་བཏགས་གནང་ངོ། ས་རུབ་ནས་སྔ་དྲོ་བྱུང་བ་དེ་ནི་ཉིན་གཉིས་པའོ།

⁹དཀོན་མཆོག་གིས་ས་གཞི་མཐོང་བའི་ཕྱིར་ནམ་མཁའི་འོག་ཏུ་ཡོད་པའི་ཆུ་རྣམས་གནས་གཅིག་ཏུ་འདུས་ཤིག་ཅེས་བཀའ་གནང་བས། དེ་བཞིན་བྱུང་ངོ་།

¹⁰དཀོན་མཆོག་གིས་ས་གཞི་ལ་འཛམ་གླིང་ཞེས་མིང་བཏགས་གནང་བ་དང་། ཆུ་རྣམས་གནས་གཅིག་ཏུ་འདུས་པ་དེ་ལ་རྒྱ་མཚོ་ཞེས་མིང་བཏགས་གནང་ངོ། དཀོན་མཆོག་གིས་དེ་གཟིགས་ནས་ཐུགས་མཉེས་སོ།

¹¹དེ་ནས་དཀོན་མཆོག་གིས་ས་གཞིས་འབྲུ་དང་འབྲས་བུ་སྐྱེ་བའི་རྩི་ཤིང་སྣ་ཚོགས་སྐྱེ་བར་བྱོས་ཤིག་གསུངས་པ་དང་། དེ་བཞིན་དུ་བྱུང་ངོ་།

¹²དེར་བརྟེན་རྩི་ཤིང་སྣ་ཚོགས་སྐྱེ་བར་བྱས་པ་དང་། དེ་གཟིགས་ནས་དཀོན་མཆོག་ཐུགས་མཉེས་སོ།

¹³ས་རུབ་པ་དང་སྔ་དྲོ་བྱུང་བ་དེ་ནི་ཉིན་གསུམ་པའོ།

¹⁴དཀོན་མཆོག་གིས་གསུངས་པ། ཉིན་མཚན་དབྱེ་བའི་ཕྱིར་ནམ་མཁར་འོད་རྣམས་བྱུང་ཞིག ནམ་དུས་རྣམས་དང་། ཉིན་རྣམས་དང་ལོ་འཁོར་སོགས་དབྱེ་བའི་ཕྱིར་འོད་དེ་རྣམས་རྟགས་མཚན་གྱི་ཚུལ་དུ་ལས་བྱོས་ཤིག།

¹⁵ས་གཞིར་འོད་ཕོག་པའི་ཕྱིར་ནམ་མཁར་འོད་དེ་རྣམས་འཕྲོ་བར་འགྱུར། དེ་བཞིན་དུ་བྱུང་ངོ་།

¹⁶དེར་བརྟེན་དཀོན་མཆོག་གིས་ཉིན་མོར་དབང་བྱེད་པའི་ཕྱིར་ཉི་མ་དང་། མཚན་མོར་དབང་བྱེད་པའི་ཟླ་བ་ཟེར་བའི་འོད་ཆེན་པོ་གཉིས་མཛད་གནང་ངོ་། ཁོང་གིས་སྐར་མ་རྣམས་ཀྱང་མཛད་གནང་ངོ།

¹⁷ས་ལ་འོད་ཤར་བའི་ཕྱིར་དང་ཉིན་དང་མཚན་ལ་དབང་བྱེད་པའི་ཕྱིར་དང་། འོད་དང་མུན་པ་དབྱེ་བའི་ཕྱིར་དཀོན་མཆོག་གིས་དེ་དག་ནམ་མཁར་འཇོགས་གནང་ངོ་། དཀོན་མཆོག་གིས་དེ་གཟིགས་ནས་ཐུགས་མཉེས་སོ།

¹⁹ས་རུབ་ནས་སྔ་དྲོ་བྱུང་བ་དེ་ནི་ཉིན་བཞི་པའོ།

²⁰དཀོན་མཆོག་གིས་ཆུ་རྣམས་ཀྱི་ནང་དུ་སྲོག་དང་ལྡན་པའི་སེམས་ཅན་གྱི་རིགས་སྣ་ཚོགས་བྱུང་ཞིག་དང་། གནམ་ལ་བྱ་རྣམས་ཀྱི་གང་བར་བྱོས་ཤིག་ཅེས་བཀའ་གནང་ངོ་།

²¹དེར་བརྟེན་དཀོན་མཆོག་གིས་རྒྱ་མཚོའི་ནང་གི་སེམས་ཅན་ཆེན་པོ་རྣམས་དང་། ཆུའི་ནང་གནས་མཁན་སེམས་ཅན་དང་བྱ་སྣ་ཚོགས་བཀོད་གནང་ངོ་། དཀོན་མཆོག་གིས་དེ་གཟིགས་ནས་ཐུགས་མཉེས་སོ།

²²དཀོན་མཆོག་གིས་དེ་དག་ལ་བྱིན་རླབས་གནང་ཞིང་གསུངས་པ། སྐྱེས་ཞིང་མང་པོ་འཕེལ་ནས་རྒྱ་མཚོ་རྣམས་གང་བར་བྱོས་ཤིག་དང་། བྱ་རྣམས་ཡང་འཕེལ་བར་འགྱུར་ཅིག་ཅེས་བཀའ་གནང་ངོ་།

²³ས་རུབ་པ་དང་སྔ་དྲོ་བྱུང་བ་དེ་ནི་ཉིན་ལྔ་པའོ།

²⁴དཀོན་མཆོག་གིས་ས་གཞིས་ཁྱིམ་གྱི་སྒོ་ཕྱུགས་དང་ནགས་ཀྱི་གཅན་གཟན་ཆེ་ཆུང་སྣ་ཚོགས་རྣམས་སྐྱེ་བར་བྱོས་ཤིག་ཅེས་བཀའ་གནང་བ་དང་། དེ་བཞིན་དུ་བྱུང་ངོ་།

²⁵དེར་བརྟེན་དཀོན་མཆོག་གིས་དེ་རྣམས་བཟོས་པ་གནང་ནས། ཁོང་གི་དེ་རྣམས་གཟིགས་ནས་ཐུགས་མཉེས་སོ།

²⁶དེ་ནས་དཀོན་མཆོག་གིས་ཉ་རྣམས་དང་། བྱ་རྣམས་དང་། ཁྱིམ་ནང་གི་སྒོ་ཕྱུགས་ཆེ་ཚུང་ཆང་མ་དང་ནགས་ཀྱི་གཅན་གཟན་རྣམས་ལ་དབང་བྱེད་པའི་ཕྱིར་ང་ཚོའི་དབྱིབས་དང་འདྲ་བ་མིའི་རིགས་ལ་བཟོ་བར་བྱ་ཞེས་གསུངས་སོ།

²⁷དེ་ལྟར་དཀོན་མཆོག་གིས་མིའི་རིགས་ལ་ཉིད་ཀྱི་དབྱིབས་ལྟར་མི་ཕོ་མོ་གཉིས་བཀོད་དོ།

²⁸ཁོང་གིས་དེ་དག་ལ་བྱིན་རླབས་གནང་ནས་གསུངས་སོ། ཁྱོད་ཚོའི་རིགས་བརྒྱུད་མང་པོ་འཕེལ་ནས། ས་གཞི་ཚང་མ་ཁྱབ་ཏེ། དེའི་སྟེང་དབང་བྱོས་ཤིག། ཉ་དང་། བྱ་དང་། གཅན་གཟན་ཚང་མ་ངས་ཁྱོད་ཀྱི་ལག་ཏུ་སྤྲོད་ཀྱི་ཡོད།

²⁹ངས་འབྲུའི་རིགས་ཐམས་ཅད་དང་། ཤིང་འབྲས་ཀྱི་རིགས་སྣ་ཚོགས་ཁྱོད་ཚོའི་ཟས་སུ་སྟེར་ཡོད།

³⁰འོན་ཀྱང་གཅན་གཟན་དང་བྱ་ཐམས་ཅད་ཀྱི་ཟ་བའི་ཕྱིར་རྩྭ་དང་ལོ་མ་ཡོད་པའི་རྩི་ཤིང་རྣམས་ངས་སྟེར་ཡོད།

³¹དཀོན་མཆོག་གིས་ཇི་མཛད་གནང་བ་ཐམས་ཅད་གཟིགས་གནང་ནས་ཧ་ཅང་ཐུགས་དགྱེས་སོ། ས་རུབ་ནས་སྔ་དྲོ་བྱུང་བ་དེ་ནི་ཉིན་དྲུག་པའོ༎