Tibetan — པོད་སྐད་Tibetan Old Testament 2011 bible online

བཀོད་པ 24

¹ད་ཨབ་ར་ཧམ་ཤིན་ཏུ་རྒས་ཏེ། གཙོ་བོ་དཀོན་མཆོག་གིས་ཁོའི་ལས་ཀ་ཐམས་ཅད་ལ་བྱིན་རླབས་གནང་ཡོད་ཅིང་།

²ཁོང་གི་ཁང་པའི་ནང་ཡོད་པའི་ནོར་ཐམས་ཅད་ཀྱི་ཕྱག་མཛོད་ཡིན་པ། གཡོག་པོ་རྒན་ཤོས་དེ་ལ་འབོད་དེ་ཁོ་ལ། ངའི་བརླ་ཤའི་བར་ལ་ཁྱོད་ཀྱི་ལག་པ་བཞག་ནས་མནའ་ཞིག་སྐྱེལ་དགོས།

³ཀ་ནན་ཡུལ་ནང་ཡོད་པའི་མི་རིགས་ཚང་མའི་ནང་ནས་ངའི་བུ་ཨི་སཱག་གི་ཕྱིར་ཆུང་མར་སུའང་མི་ལེན་ཞེས་གནམ་ས་གཉིས་ཀྱི་དཀོན་མཆོག་གཙོ་བོ་དཀོན་མཆོག་གི་མཚན་ལེན་ནས་མནའ་འཁུར་ཞིག

⁴ངའི་ཕ་ཡུལ་དུ་ཕྱིན་ནས་ངའི་གཉེན་མཚན་གྱི་ནང་ནས་ཨི་སཱག་ལ་ཆུང་མ་ཞིག་ལེན་དགོས་ཞེས་སྨྲས་པ་དང་།

⁵འོན་ཀྱང་གཡོག་པོས། གལ་ཏེ་བུ་མོ་དེ་ང་ཚོའི་ས་གནས་འདིར་ཡོང་བ་མ་དགའ་ན། ཁྱེད་ཀྱི་བུ་ལ་ས་གནས་དེར་བཏང་ཐུབ་བམ་ཞེས་དྲིས་པས།

⁶ཨབ་རམ་གྱིས་ལན་དུ། ས་གནས་དེར་ངའི་བུ་ནམ་ཡང་མ་གཏོང་ཞིག

⁷ནམ་མཁའི་གཙོ་བོ་དཀོན་མཆོག་གིས་ང་ལ་ངའི་ཕ་ཡི་ཁྱིམ་དང་གཉེན་མཚན་གྱི་ཡུལ་ནས་འཁྲིད་གནང་ཡོད་པ་དང་། ཡུལ་འདི་ཁོང་གིས་ངའི་བུ་བརྒྱུད་ལ་གནང་བར་བྱའོ་ཞེས་ང་ལ་ངེས་གཏན་གྱིས་དམ་བཅའ་བཞེས་ཡོད་པ་དང་། ངའི་བུ་ལ་ཆུང་མ་ཞིག་ལེན་པ་ལ་ཁོང་རང་གི་ཕོ་ཉ་ཞིག་ཁྱོད་ཀྱི་མདུན་དུ་གཏོང་གནང་ཡོང་།

⁸གལ་ཏེ་བུ་མོ་དེ་ཁྱོད་ཀྱི་རྗེས་སུ་ཡོང་བ་མ་དགའ་ན། ཁྱོད་ཀྱི་མནའ་སྐྱེལ་བ་དེ་ལས་ཐར་བར་འགྱུར། འོན་ཀྱང་གནས་ཚུལ་གང་འདྲ་ཞིག་ཡིན་རུང་ངའི་བུ་ལ་ས་གནས་དེར་ཕྱིར་ལོག་མ་འཁྲིད་ཅིག་ཅེས་གསུངས་སོ།

⁹དེར་བརྟེན་གཡོག་པོ་དེས་ཁོའི་སྦྱིན་བདག་ཨབ་ར་ཧམ་གྱི་བརླ་ཤའི་བར་ལ་ལག་པ་བཞག་ཅིང་ཁོང་གིས་གང་གསུངས་པ་ལྟར་བྱེད་པའི་མནའ་སྐྱེལ་ལོ།

¹⁰ཨབ་ར་ཧམ་གྱི་རྒྱུ་ནོར་གྱི་ཕྱག་མཛོད་དེས་རང་གི་སྦྱིན་བདག་གི་རྔ་མོང་ནང་ནས་བཅུ་འཁྲིད་དེ། ཨབ་ར་ཧམ་གྱི་སྤུན་ན་ཧོར་སྡོད་ཡུལ་བྱང་ཕྱོགས་མེ་སོ་པོ་ཊ་མི་ཡའི་གྲོང་ཁྱེར་དུ་སོང་ངོ་།

¹¹ཁོང་གྲོང་ཁྱེར་ཕྱི་རོལ་གྱི་ཁྲོན་པ་ཡོད་སར་བསླེབས་པ་དང་། རྔ་མོང་རྣམས་ངལ་གསོ་རྒྱབ་བཅུག་གོ བུད་མེད་རྣམས་ཁྲོན་པ་ནས་ཆུ་ལེན་པར་ཡོང་སྐབས། དགོང་དྲོའི་དུས་རན་ཡོད་པ་ཡིན་ནོ།

¹²ཁོས་ངའི་སྦྱིན་བདག་ཨབ་ར་ཧམ་གྱི་དཀོན་མཆོག་གཙོ་བོ་དཀོན་མཆོག་ལགས། ཁྱེད་ཀྱིས་ངའི་སྦྱིན་བདག་ཨབ་ར་ཧམ་ལ་དམ་བཅའ་གནང་བ་ལྟར་དེ་རིང་ངའི་ལས་དོན་དེ་སྒྲུབ་པར་མཛོད་ཅིག་ཅེས་སྨོན་ལམ་འདེབས་སོ།

¹³གྲོང་ཁྱེར་གྱི་བུད་མེད་ན་གཞོན་རྣམས་ཆུ་ལེན་པར་ཡོང་སའི་ཁྲོན་པའི་འགྲམ་དུ་ང་བསྡད་ཡོདཔ་དང་།

¹⁴ངས་དེ་ཚོའི་ནང་ནས་གཅིག་ལ་ཁྱོད་ཀྱི་རྫ་སྣོད་བཀང་ནས་ང་ལ་འཐུང་བའི་ཕྱིར་ཆུ་གནོང་ཞིག གལ་ཏེ་མོས་ང་དང་ངའི་རྔ་མོང་རྣམས་ལ་ཆུ་སྟེར་བ་བྱ་ཞེས་ལབ་ན། མོ་ནི་ཁྱེད་ཀྱི་བྲན་གཡོག་ཨི་སཱག་གི་ཆེད་དུ་ཁྱེད་ཀྱིས་འདམས་གནང་བ་དེ་ཡིན་པར་ཤོག གལ་ཏེ་དེ་ལྟར་བྱུང་ན་ངའི་སྦྱིན་བདག་ལ་ཁྱེེད་ཀྱིས་དབུ་མནའ་བཞེས་པ་དེ་སྒྲུབ་པ་ངས་ཤེས་པར་འགྱུར།

¹⁵ཁོས་སྨོན་ལམ་བཏབ་ཚར་འགྲོ་ཡོད་སྐབས་ཨབ་ར་ཧམ་གྱི་སྤུན་ན་ཧོར་གྱི་ཆུང་མ་མིལ་ཀཱའི་བུ་བེ་ཐུ་ཨེལ་གྱི་བུ་མོ་རེ་བྷེ་ཀ་ཞེས་བྱ་བ་རྫ་མ་ཞིག་དཔུང་པར་འཁྱེར་ཏེ་ཁྲོན་པའི་རྩར་ཡོང་ངོ་།

¹⁶བུ་མོ་དེ་ནི་ཧ་ཅང་མཛེས་ཤིང་ན་ཆུང་མ་ཡིན་པ་དང་། མོ་ཁྲོན་པའི་རྩར་ཕྱིན་ནས་རྫ་མ་ཆུས་གང་ནས་མོ་རང་ཕྱིར་འགྲོ་གྲབ་བྱེད་དོ།

¹⁷གཡོག་པོ་དེ་རྒྱུགས་ཤིང་མོ་དང་ཐུག་ནས། མོ་ལ། ཁྱེད་ཀྱི་རྫ་མ་ནས་ང་ལ་འཐུང་བ་ལ་ཆུ་གནང་ཞེས་སྨྲས་པ་དང་།

¹⁸མོས་མགྱོགས་པོར་རྫ་མ་དེ་མར་ཕབ་ནས། སྐུ་ཞབས་ལགས་ཆུ་འཐུང་ཞིག་ཅེས་ཁོང་ལ་ཆུ་སྟེར་རོ།

¹⁹ཁོས་ཆུ་འཐུང་ཚར་བའི་རྗེས་སུ་མོས་ཁོ་ལ། ཁྱེད་ཀྱི་རྔ་མོང་རྣམས་མ་ངོམས་པའི་བར་ངས་དེ་ཚོ་ལའང་ཆུ་སྟེར་གྱི་ཡིན་ཞེས་སྨྲས་པ་དང་།

²⁰མྱུར་དུ་མོས་རྫ་མའི་ཆུ་དེ་སེམས་ཅན་གྱི་ཆུ་འཐུང་སའི་གཞོང་པའི་ནང་བླུགས་ནས་། ཁོང་གི་རྔ་མོང་རྣམས་ལ་ཆུ་སྤྲད་མ་ཚར་བའི་བར་དུ་མོས་ཡང་ནས་ཡང་དུ་རྒྱུག་ནས་ཁྲོན་པ་ནས་ཆུ་ལེན་ནས་འཁྱེར་ཡོང་ངོ་།

²¹མི་དེས་གཙོ་བོ་དཀོན་ནམཆོག་གིས་ཁོའི་ལས་དོན་སྒྲུབ་ཡོད་མེད་རྟོགས་ཕྱིར་མོ་ལ་ཁུ་སིམ་མེར་ལྟ་ཞིང་བསྡད་དོ།

²²ཆུ་སྟེར་བའི་རྗེས་སུ། མི་དེས་རིན་ཐང་ཅན་གྱི་གསེར་གྱི་ཨ་ལོང་ཞིག་བཏོན་ནས་མོའི་རྣ་བར་བཀོན་པ་དང་། གསེར་གྱི་སྒྲོག་གདུབ་གཉིས་ལག་པར་རྒྱུས་ཏེ།

²³ཁོས་མོ་ལ། ཁྱོད་ཀྱི་ཕ་་སུ་ཡིན་ནམ་ང་ལ་ཤོད་དང་། དེ་རིང་གི་མཚན་མོ་ཁོང་གི་ཁང་པར་ངའི་མི་ཚོ་དང་ང་ལ་སྡོད་ཁང་ཞིག་ཡོད་དམ་ཞེས་དྲིས་པས།

²⁴མོས་ལན་དུ། ངའི་ཕའི་མིང་ལ་བེ་ཐུ་ཨེལ་ཞེས་པ་དང་། ཁོང་ནི་ན་ཧོར་དང་མིལ་ཀཱའི་བུ་ཡིན་ནོ།

²⁵ང་ཚོའི་ཁང་པའི་ནང་རྩ་དང་ཆག་མང་པོ་ཡོད་པ་མ་ཟད་ཁྱེད་ཚོ་ལའང་སྡོད་ས་ཞིག་ཡང་ཡོད་ཅེས་སྨྲས་པ་དང་།

²⁶གཡོག་པོ་དེས་པུས་མོ་བཙུགས་ཤིང་གཙོ་བོ་དཀོན་མཆོག་ལ་མཆོད་དོ།

²⁷ངའི་སྦྱིན་བདག་ཨབ་ར་ཧམ་གྱི་གཉེན་མཚན་གྱི་སར་ཤར་རྒྱག་འཁྲིད་གནང་ནས་ཁྱེད་ཀྱིས་དམ་བཅའ་གནང་བ་བཞིན་སྒྲུབ་པར་མཛད་མཁན་ངའི་སྦྱིན་བདག་ཨབ་ར་ཧམ་གྱི་གཙོ་བོ་དཀོན་མཆོག་ལ་བསྟོད་བསྔགས་པར་འགྱུར་ཅིག

²⁸བུ་མོ་དེ་རང་གི་མའི་ཁང་པར་རྒྱུགས་ཤིང་གང་བྱུང་བ་ཐམས་ཅད་ཀྱི་སྐོར་བཤད་དོ།

²⁹རེ་བྷེ་ཀའི་ཨ་ཇོ་ལ་བན་ཞེས་པ་དེ་ཨབ་ར་ཧམ་གྱི་གཡོག་པོ་དང་འཕྲད་པར་ཁྲོན་པ་ཡོད་སར་སོང་ངོ་།

³⁰གང་ལ་ཟེར་ན། ཁོའི་སྲིང་མོ་ལ་གསེར་གྱི་རྣ་ལོང་དང་ལག་པར་སྒྲོག་གདུབ་རྒྱུས་ཡོད་པ་མཐོང་ཡོད། མོས་ཨབ་ར་ཧམ་གྱི་གཡོག་པོའི་གང་སྨྲས་པ་དེ་ཐོས་ཡོད་དོ། ཨབ་ར་ཧམ་གྱི་གཡོག་པོ་དང་རྔ་མོང་དང་མཉམ་དུ་ཁྲོན་པའི་འགྲམ་དུ་བསྡད་ཡོད་པ་དང་། ལ་བན་ཁོའི་རྩར་ཡོང་ནས་ཁོ་ལ།

³¹གཙོ་བོ་དཀོན་མཆོག་གི་བྱིན་གྱི་རླབས་པ་ཁྱེད་ང་ཚོའི་ནང་དུ་ཤོག། ཁྱེད་ཀྱི་ཆེད་དུ་སྡོད་ཁང་ཞིག་དང་། ཁྱེད་ཀྱི་རྔ་མོང་གི་ཕྱིར་བསྡད་ས་ཞིག་གྲ་སྒྲིགས་བྱས་ཡོད་པས། ཁྲོན་པའི་འགྲམ་དུ་གང་གི་དོན་དུ་བསྡད་དམ་ཞེས་སྨྲས་སོ།

³²དེ་ནས་ཨབ་ར་ཧམ་གྱི་གཡོག་པོ་དེ་ལ་བན་གྱི་ཁང་པར་ཡོང་ནས། ལ་བན་གྱིས་རྔ་མོང་རྣམས་ཀྱི་སྒ་བཀྲོལ་ནས། རྩ་ཆག་སོགས་སྤྲད་དོ། དེ་རྗེས་ཁོས་ཨབ་ར་ཧམ་གྱི་གཡོག་པོ་དང་ཁོ་མཉམ་དུ་ཡོད་པའི་མི་རྣམས་ཀྱི་རྐང་པ་འཁྲུ་བའི་ཕྱིར་ཆུ་སྟེར་རོ།

³³དེ་ཚོའི་ཆེད་དུ་མགྲོན་ཞིག་བཤམས་པ་དང་། གཡོག་པོ་དེས་ངས་རང་གི་ལས་དོན་མ་བཤད་པའི་བར་དུ་ཁ་ལག་མི་ཟའོ་ཞེས་སྨྲས་པ་དང་། ལ་བན་གྱིས་ཁོ་ལ། ཁྱོད་ཀྱི་གཏམ་དེ་ཤོད་ཅིག་ཅེས་སྨྲས་པས།

³⁴དེ་ནས་ཁོས། ང་ནི་ཨབ་ར་ཧམ་གྱི་གཡོག་པོ་ཡིན།

³⁵གཙོ་བོ་དཀོན་མཆོག་གིས་ངའི་སྦྱིན་བདག་ཨབ་ར་ཧམ་ལ་ཤིན་ཏུ་བྱིན་རླབས་གནང་ཞིང་ཕྱུག་པོར་འགྱུར་ཏེ། ར་ལུག་དང་། བ་གླང་དང་། གསེར་དངུལ་དང་། གཡོག་པོ་གཡོག་མོ་དང་། རྔ་མོང་དང་བོང་བུ་སོགས་གནང་ཡོད།

³⁶ངའི་སྦྱིན་བདག་གི་ཆུང་མ་ས་རཱ་རྒས་པའི་ཚེ་ངའི་སྦྱིན་བདག་གི་ཆེད་དུ་བུ་ཞིག་སྐྱེས་པ་དང་། བུ་དེ་ནོར་བདག་ཏུ་འགྱུར་ནས་ཡོད།

³⁷ཡུལ་ཀ་ནན་གྱི་བུད་མེད་རྣམས་ནས་བུ་དེ་ལ་ཆུང་མ་ཞིག་མི་ལེན་ཞེས་ངའི་སྦྱིན་བདག་གི་ང་ལ་མནའ་འཁུར་བཅུག་གོ འོན་ཀྱང་ཁོང་གི་ཕའི་ཁང་པ་དང་། གཉེན་མཚན་རྣམས་ཀྱི་ཁང་པར་འོང་ནས་ཁོང་གི་བུ་ལ་ཆུང་མ་ཞིག་བླངས་དགོས་ཞེས་བཀའ་གནང་ཡོད།

³⁸

³⁹གལ་ཏེ་བུ་མོ་དེ་ང་དང་མཉམ་དུ་ཡོང་བ་མ་དགའ་ན་ངས་ག་རེ་བྱས་དགོས་སམ་ཞེས་ངས་དྲིས་པས།

⁴⁰ཁོང་གིས་ང་ལ། ངས་དུས་རྒྱུན་དུ་གཙོ་བོ་དཀོན་མཆོག་གི་བཀའ་ལ་ཉན་ཡོད་པ་དང་། ཁོང་གི་ཕོ་ཉས་ཁྱོད་ཀྱི་ལམ་སྟོན་གནང་ཞིང་ངའི་གཉེན་མཚན་གྱི་ནང་ནས་ངའི་བུ་ལ་ཆུང་མ་ཞིག་བླངས་པ་ལ་བྱིན་རླབས་གནང་བར་འགྱུར།

⁴¹དམ་བཅའ་དེ་ལས་ཐར་བའི་ལམ་གཅིག་ཡོད། གལ་ཏེ་ངའི་གཉེན་མཚན་སར་སོང་ནས་དེ་ཚོས་བུ་མོ་སྤྲད་པར་ཁས་ལེན་མ་བྱས་པ་ཡིན་ན། ཁྱོད་ལ་མནའ་འདི་ཕོག་པར་མི་འགྱུར།

⁴²དེ་རིང་ང་ཁྲོན་པའི་རྩར་སླེབས་སྐབས་ངས་སྨོན་ལམ་འདི་ལྟར་ཞུས་པ་ཡིན། ངའི་སྦྱིན་བདག་ཨབ་ར་ཧམ་གྱི་དཀོན་མཆོག་གཙོ་བོ་དཀོན་མཆོག་གྱིས་ཐུགས་རྫེ་གཟིགས་ནས་ངའི་ལས་དོན་དེ་སྒྲུབ་བཅུག་པར་མཛོད་ཅིག

⁴³ང་དེ་ཁྲོན་པའི་རྩར་ཡོད། བུད་མོ་ན་ཆུང་མ་སུ་ཞིག་ཆུ་ལེན་པར་ཡོང་ན། ངས་མོ་ལ་ཆུ་འཐུང་བར་སྟེར་ཞེས་ལབ་ཀྱི་ཡིན་པས།

⁴⁴ང་དང་ངའི་རྔ་མོང་རྣམས་ལའང་ཆུ་སྟེར་གྱི་ཡིན་ཞེས་ཁས་ལེན་བྱས་ན། བུ་མོ་དེ་ནི་ཁྱེད་ཀྱི་ངའི་སྦྱིན་བདག་གི་བུའི་ཆུང་མར་འདམས་པ་ཡིན་ཞེས་བསམ་རྒྱུ་ཡིན།

⁴⁵ངས་སྨོན་ལམ་བཏབ་ཚར་འགྲོ་ཡོད་སྐབས་རེ་བྷེ་ཀས་དཔུང་པར་རྫ་མ་འཁུར་སྟེ་ཆུ་ལེན་པར་ཁྲོན་པར་ཡོང་བ་མཐོང་ནས། ཐུགས་རྫེ་གཟིགས་ནས་ང་ལ་ཆུ་ཞིག་གནང་ཞེས་ངས་སྨྲས་པས།

⁴⁶མོས་མྱུར་དུ་རང་གི་དཔུང་པ་ནས་ཆུ་སྣོད་དེ་མར་པབ་ནས་འཐུང་རོགས་གནང་དང་། ངའི་རྔ་མོང་རྣམས་ལའང་སྟེར་བར་བྱ་ཞེས་སྨྲས་སོ། དེ་ལྟར་ངས་ཆུ་འཐུང་བ་དང་མོས་རྔ་མོང་རྣམས་ལའང་ཆུ་སྟེར་རོ།

⁴⁷ངས་མོའི་ཕ་སུ་ཡིན་པའི་སྐོར་དྲིས་པས། མོས་ན་ཧོར་དང་མིལ་ཀཱའི་བུ་བེ་ཐུ་ཨེལ་ཡིན་ཞེས་ལབ་པ་དང་། ངས་མོ་ལ་རྣ་ལོང་ཞིག་དང་ལག་པར་སྒྲོག་གདུབ་རྒྱུས་པ་ཡིན།

⁴⁸ངས་པུས་མོ་བཙུགས་ནས་གཙོ་བོ་དཀོན་མཆོག་ལ་མཆོད་འབུལ་བྱེད་པ་དང་། ངས་ངའི་སྦྱིན་བདག་གི་དཀོན་མཆོག་གཙོ་བོ་དཀོན་མཆོག་ལ་བསྟོད་བསྔགས་འབུལ་བ་ཡིན། དེ་ལྟར་དཀོན་མཆོག་གིས་ང་ལ་ངའི་སྦྱིན་བདག་གི་ནང་མིའི་ཁང་པར་ཤར་ཀྱག་འཁྲིད་གནང་བ་དང་དེར་ངའི་སྦྱིན་བདག་གི་བུའི་ཆེད་དུ་ཁོང་གི་བུ་མོའང་ཐུག་བྱུང་།

⁴⁹ད་ཁྱེད་ཀྱི་ངའི་སྦྱིན་བདག་དང་མཉམ་དུ་དྲང་བདེན་དང་སྙིང་རྗེའི་སྤྱོད་ཚུལ་གནང་བ་ཡིན་ན་ང་ལ་གསུངས་རོགས་གནང་། གལ་སྲིད་དེ་ལྟར་མ་ཡིན་ན་ཡང་ང་ལ་གསུངས་རོགས་གནང་། གལ་སྲིད་དེ་ལྟར་མ་ཡིན་ན་གང་བྱེད་དགོས་པ་དེ་ང་རང་གི་ཐག་གཅོད་བྱ་རྒྱུ་ཡིན་ནོ་ཞེས་སྨྲས་སོ།

⁵⁰ལ་བན་དང་བེ་ཐུ་ཨེལ་གྱིས་ལན་དུ། བྱ་བ་འདི་ནི་གཙོ་བོ་དཀོན་མཆོག་ནས་བྱུང་བས། ང་ཚོ་རང་གི་ཐག་གཅོད་བྱེད་མི་ཐུབ།

⁵¹རེ་བྷེ་ཀ་འདིར་ཡོད་པས་མོ་ལ་འཁྲིད་ནས་སོང་ཞིག གཙོ་བོ་དཀོན་མཆོག་གིས་གསུངས་པ་བཞིན་དུ་མོ་ཁྱོད་ཀྱི་སྦྱིན་བདག་གི་བུའི་ཆུང་མར་འགྱུར་བཅུག་ཅིག

⁵²ཨབ་ར་ཧམ་གྱི་གཡོག་པོས། དེ་ཐོས་པ་དང་དཀོན་མཆོག་ལ་ཕྱག་འཚལ་ནས་མཆོད་པ་འཕུལ་ལོ།

⁵³དེ་ནས་གཡོག་པོ་དེས་གསེར་དངུལ་གྱི་རྒྱན་ཆ་རྣམས་དང་། ཁོས་གོས་རྣམས་རེ་བྷེ་ཀ་ལ་སྟེར་བ་དང་། མོ་རང་གི་ཨ་ཇོ་དང་མ་ལའང་རིན་ཐང་ཆེ་བའི་ལག་བཏགས་བཏང་ངོ་།

⁵⁴དེ་ནས་གཡོག་པོ་དེ་དང་ཁོ་དང་མཉམ་དུ་ཡོད་པའི་མི་རྣམས་ཀྱིས་བཟའ་བཏུང་བྱས་ཏེ། མཚན་མོ་དེར་བསྡད་དོ། ཁོ་ཚོ་སྔ་དྲོ་ལངས་སྐབས་གཡོག་པོ་དེས་ད་ང་རང་གི་སྦྱིན་བདག་གི་སར་འགྲོ་བཅུག་རོགས་གནང་ཞེས་སྨྲས་སོ།

⁵⁵རེ་བྷེ་ཀའི་ཨ་ཇོ་དང་ཨ་མས་ཁོ་ལ། བུ་མོ་དེ་ང་ཚོ་མཉམ་དུ་བདུན་གཅིག་གམ་ཉིན་བཅུ་ཙམ་བསྡད་བཅུག་རོགས་གནང་། དེ་ནས་མོ་རང་འགྲོ་ནའང་ཆོག་ཅེས་སྨྲས་སོ།

⁵⁶ཁོས་དེ་དག་ལ། དཀོན་མཆོག་གིས་ངའི་ལས་དོན་དེ་སྒྲུབ་བཅུག་པར་མཛད་པས། ང་སྦྱིན་བདག་གི་རྩར་ལོག་འགྲོ་བཅུག་རོགས་གནང་། བསྡད་པར་ཨུ་ཆུག་མ་གནང་རོགས་གནང་ཞེས་སྨྲས་པ་དང་།

⁵⁷ཁོང་ཚོས་ལན་དུ། ད་ང་ཚོའི་བུ་མོ་དེ་འབོད་དེ་དྲི་བ་དྲིས་དགོས་ཞེས་སྨྲས་སོ། མོ་རང་གི་བསམ་བློ་ག་རེ་ཡོད་མེད་བལྟ་དགོས།

⁵⁸རེ་བྷེ་ཀ་ལ་འབོད་དེ་མོ་ལ། ཁྱོད་མི་འདི་དང་མཉམ་དུ་འགྲོ་འདོད་དམ་ཞེས་དྲིས་པས། མོས། ང་འགྲོ་བར་འདོད་དོ་ཞེས་ལན་རྒྱབ་པ་དང་།

⁵⁹དེར་བརྟེན་ཁོང་ཚོས་མོ་རང་གི་འདོད་པ་བཞིན་མོ་དང་མོའི་གཡོག་མོ་གཅིག་ཨབ་ར་ཧམ་གྱི་གཡོག་པོ་དང་ཁོའི་མི་ཚོ་མཉམ་དུ་འགྲོ་བཅུག་གོ

⁶⁰དེ་ནས་ཁོ་ཚོས་རེ་བྷེ་ཀ་ལ་འདི་ལྟར་བྱིན་རླབས་སྤྲད་ནས། ང་ཚོའི་སྲིང་མོ་ཁྱོད་ནི་ཕྲུ་གུ་ཁྲི་མང་པོའི་མ་རུ་འགྱུར་ཅིག ཁྱོད་ཀྱི་བུ་བརྒྱུད་ཐམས་ཅད་ཀྱིས་དགྲ་བོ་རྣམས་ཀྱི་གྲོང་ཁྱེར་དབང་བཟུང་བྱེད་པར་འགྱུར་རོ།

⁶¹དེ་ནས་རེ་བྷེ་ཀ་དང་མོའི་རོགས་པ་རྣམས་ཀྱིས་རྔ་མོང་བཞོན་ཏེ་ཨབ་ར་ཧམ་གྱི་གཡོག་པོ་དང་མཉམ་དུ་སོང་ངོ་།

⁶²འབྲོག་སྟོང་ནང་ཡོད་པའི་ང་ལ་མངོན་སུམ་མཐོང་བར་གནང་མཁན་དཀོན་མཆོག་གི་ཁྲོན་པ་ཞེས་བྱ་བར་ཨི་སཱག་ཡོང་བ་དང་། ཁོང་ཡུལ་ཀ་ནན་གྱི་ལྷོ་ཕྱོགས་སུ་གནས་ཡོད་དོ།

⁶³ཨི་སཱག་ཉི་མ་ནུབ་པའི་དུས་སུ་ཐང་དུ་སྐྱོ་སངས་ལ་འགྲོ་སྐབས། རྔ་མོང་མང་པོ་ཚུར་ཡོང་བ་མཐོང་ངོ་།

⁶⁴རེ་བྷེ་ཀས་ཨི་སཱག་མཐོང་བ་དང་། མོ་རང་རྔ་མོང་ནས་བབས་ཏེ།

⁶⁵ཨབ་ར་ཧམ་གྱི་གཡོག་པོ་ལ། ང་ཚོར་ཐུག་པར་ཡོང་མཁན་མི་དེ་སུ་ཡིན་ནམ་ཞེས་དྲིས་པ་དང་། གཡོག་པོ་དེས། ཁོང་ནི་ངའི་སྦྱིན་བདག་ཡིན་ཞེས་ལབ་པས། དེར་བརྟེན་མོས་གདོང་ཁེབས་བླངས་ཏེ་རང་གི་གདོང་བཀབ་བོ།

⁶⁶དེ་ནས་གཡོག་པོས་རང་གི་བྱས་པའི་བྱ་བ་ཐམས་ཅད་ཨི་སཱག་ལ་བཤད་དོ།

⁶⁷ཨི་སཱག་གིས་རེ་བྷེ་ཀ་ལ་རང་གི་ཨ་མ་ས་རཱའི་གུར་ནང་འཁྲིད་དེ་ཆང་ས་བརྒྱབ་བོ། རེ་བྷེ་ཀ་ཁོང་གི་ཆུང་མར་འགྱུར་རོ། ཁོས་མོ་ལ་བྱམས་སོ། དེ་ལྟར་ཨི་སཱག་གི་ཨ་མ་གྲོངས་པའི་སེམས་གསོ་ཐོབ་བོ༎

Read Tibetan — པོད་སྐད་Tibetan Old Testament 2011 བཀོད་པ 24 Bible Online

བཀོད་པ 24 - Tibetan — པོད་སྐད་Tibetan Old Testament 2011 bible

བཀོད་པ 24