Read Tibetan — པོད་སྐད་Tibetan Old Testament 2011 བཀོད་པ 34 Bible Online

བཀོད་པ 34 - Tibetan — པོད་སྐད་Tibetan Old Testament 2011 bible

བཀོད་པ 34

¹ཉིན་གཅིག་ཡ་ཀོབ་དང་ལེ་ཨའི་བུ་མོ་དྷི་ནཱ་ཀ་ནན་པའི་བུད་མེད་འགའ་ཞིག་ཐུག་པར་སོང་བས།

²ཧི་ཝི་པ་ཧ་མོར་ཞེས་པའི་བུ་ཤེ་ཀེམ་ཡུལ་དེའི་འགོ་པ་ཡིན་པ་དང་། ཁོས་དཱི་ན་ལ་མཐོང་བ་དང་མོ་འཁྱེར་ནས་མོ་དང་མཉམ་དུ་བཙན་གཡེམ་བྱེད་དོ།

³འོན་ཀྱང་དཱི་ན་ཤིན་ཏུ་མཛེས་མོ་ཡོད་པའི་རྐྱེན་གྱིས་ཁོས་མོ་ལ་སེམས་ཤོར་ནས། ཁོས་མོའི་བྱམས་པ་ཐབ་པར་ཐབས་ཤེས་བྱས་སོ།

⁴ཁོས་རང་གི་ཕ་ལ། བུ་མོ་དེ་ངའི་ཆེད་དུ་ཆང་ས་བརྒྱབ་པར་འཁྱེར་ཡོང་རོགས་ཞེས་སྨྲས་སོ།

⁵དཱི་ན་ལ་བཙན་གཡེམ་བྱེད་པའི་སྐོར་ཡ་ཀོབ་ཀྱིས་ཐོས་སོ། འོན་ཀྱང་ཁོའི་བུ་རྣམས་བ་ཕྱུགས་འཚོ་བར་ཐག་རིང་ཐང་དུ་སོང་ཡོད་པས། དེ་ཚོ་ཕྱིར་མ་ཡོང་བར་དུ་ཁོས་གང་ཡང་མ་བྱས་སོ།

⁶ཤེ་ཀེམ་གྱི་ཕ་ཧ་མོར་ཡ་ཀོབ་དང་གྲོས་བྱེད་ཕྱིར་སོང་བའི་སྐབས་སུ།

⁷ཡ་ཀོབ་ཀྱི་བུ་ཚོ་ཡང་ཐང་ནས་ཡོང་བཞིན་ཡོད་པ་དང་། གཏམ་དེ་ཐོས་མ་ཐག་ཏུ་ཁོང་ཚོ་ཚང་མ་ཧོན་འཐོར་ནས། ཤེ་ཀེམ་གྱིས་འདི་ལྟར་ལས་བྱས་པར་ཧ་ཅང་ཁྲོས་ཤིང་། ཡ་ཀོབ་ཀྱི་བུ་མོའི་ཐོག་ཏུ་བཙན་གཡེམ་བྱེད་པའི་སྒོ་ནས། ཨིསི་རཱཨེལ་གྱི་མི་རྣམས་ལ་སྨད་ར་བཏང་ཡོད་དོ།

⁸ཧ་མོར་གྱིས་ཡ་ཀོབ་ལ་། ངའི་བུ་ཤེ་ཀེམ་གྱིས་ཁྱེད་ཀྱི་བུ་མོ་ལ་ཤིན་ཏུ་བྱམས་པས་མོ་དང་ཆང་ས་རྒྱབ་བཅུག་རོགས་གནང་།

⁹ཁྱེད་ཚོ་དང་ང་ཚོའི་མི་རིགས་ཀྱི་བར་ལ་ཆང་ས་རྒྱབ་པར་ཁ་ཆད་བྱའོ། ཁྱེད་ཚོའི་བུ་མོ་ང་ཚོར་སྤྲོད་རོགས་གནང་། ང་ཚོའི་བུ་མོ་ཁྱེད་ཚོས་བཞེས་རོགས་གནང་།

¹⁰དེ་ནས་ཁྱེད་རྣམས་ང་ཚོ་དང་མཉམ་དུ་ང་ཚོའི་ཡུལ་དུ་གཞི་ཆགས་ནས་གཞུགས་རོགས་གནང་། ག་རུ་ཐུགས་འདོད་ཡོད་སར་དེར་ཞུགས་ཐུབ། རང་དབང་གི་ཐོག་ནས་ཚོང་རྒྱབ་ཏེ་རྒྱུ་ནོར་གསོག་རོགས་གནང་ཞེས་སྨྲས་སོ།

¹¹དེ་ནས་ཤེ་ཀེམ་གྱིས་དྷི་ནཱའི་ཕ་དང་སྤུན་རྣམས་ལ། ང་ལ་ཐུགས་རྗེ་གཟིགས་རོགས་གནང་། ཁྱེད་རྣམས་ལ་གང་དགོས་པ་ཚང་མ་འབུལ་རྒྱུ་ཡིན།

¹²ཁྱེད་ཀྱི་བུ་མོ་ཆང་ས་རྒྱབ་པར་རིན་པ་གང་དགོས་པ་དང་ཁྱེད་རྣམས་ལ་ཕྱག་རྟགས་གང་དགོས་པ་དེ་ངས་འབུལ་ཐུབ། གལ་སྲིད་ཁྱེད་ཀྱི་བུ་མོ་ཆང་ས་རྒྱབ་བཅུག་ན་ཁྱེད་ལ་གང་དགོས་པ་འབུལ་རྒྱུ་ཡིན་ཞེས་སྨྲས་སོ།

¹³ཤེ་ཀེམ་གྱིས། དྷི་ནཱ་ལ་བཙན་གཡེམ་བྱེད་པའི་རྐྱེན་གྱིས། ཡ་ཀོབ་ཀྱི་བུ་རྣམས་ཀྱིས་ཁོ་དང་ཁོའི་ཕ་ཧ་མོར་ལ་སླུ་འཁྲི་བྱས་ནས་ལན་རྒྱབ་བོ།

¹⁴དེ་ཚོས་ཁོ་ལ། ང་ཚོའི་སྲིང་མོ་མདུན་ལྤགས་མ་འབྲེག་པའི་མི་ལ་ཆང་ས་རྒྱབ་པར་སྤྲད་མི་ཐུབ། དེས་ང་ཚོ་སྨད་དགོས་འབྱུང་ཡོང་།

¹⁵ཁྱོད་དང་ཁྱོད་ཀྱི་སྐྱེ་པ་ཕོ་ཚང་མ་ང་ཚོ་ལྟར་མདུན་ལྤགས་འབྲེག་པ་ཡིན་ན། ང་ཚོ་ཁྱོད་ཚོ་དང་མོས་མཐུན་བྱེད་ཐུབ་ཡོང་།

¹⁶ང་ཚོ་དང་ཁྱོད་ཚོའི་བར་ལ་ཆང་ས་རྒྱབ་ཐུབ་ཡོང་། དེ་ནས་ང་ཚོ་ཁྱོད་ཚོའི་ཁྲོད་དུ་གནས་ཏེ་མི་རིགས་གཅིག་ཏུ་འགྱུར་རོ།

¹⁷འོན་ཀྱང་ཁྱོད་ཚོས་མདུན་ལྤགས་འབྲེག་པར་མི་དགའ་ན་ང་ཚོས་སྲིང་མོ་འཁྲིད་དེ་ས་གནས་འདི་ནས་འགྲོ་བར་བྱ་ཞེས་སྨྲས་སོ།

¹⁸ཧ་མོར་དང་ཤེ་ཀེམ་གཉིས་ཀར་དེ་ལྟར་བྱས་པ་ལ་དགའ་བ་དང་།

¹⁹ཤེ་ཀེམ་གྱིས་དཱི་ན་ལ་བྱམས་པའི་རྐྱེན་གྱིས་ཁོས་ལས་འདི་བྱས་པར་འགོར་པོ་མ་བྱས་སོ། ཚང་མའི་ནང་ནས་ཁོ་གཙོ་བོ་ཡིན་ནོ།

²⁰ཧ་མོར་དང་ཤེ་ཀེམ་གཉིས་གྲོང་ཁྱེར་གྱི་རྒྱལ་སྒོར་སོང་ནས་གྲོང་ཁྱེར་གྱི་མི་རྣམས་ལ།

²¹མི་འདི་ཚོ་ང་ཚོ་དང་ཤིན་ཏུ་མཐུན་པས། ཁོང་ཚོ་ངེད་རྣམས་དང་མཉམ་དུ་གནས་ཏེ་ཕར་ཚུར་ཚོང་བྱེད་དུ་འགྲོ་རུ་བཅུག་གོ ང་ཚོའི་ཡུལ་རྒྱ་ཆེན་པོ་ཡོད་པ་དང་ཁོང་ཚོ་བསྡད་ན་སྐྱོན་གང་ཡང་མི་བྱུང་བས། ངེད་རྣམས་ཀྱི་ཁོང་ཚོའི་བུ་མོ་རྣམས་དང་ཆང་ས་བརྒྱབ་ནས་ང་ཚོའི་བུ་མོ་ཁོང་ཚོར་མནའ་མར་སྤྲད་ཐུབ་བོ།

²²ང་ཚོ་ཁོང་ཚོ་ལྟར་མདུན་ལྤགས་འབྲེག་ན་ཁོང་ཚོ་ང་ཚོའི་ཁྲོད་དུ་མི་རིགས་གཅིག་ལྟར་གནས་པའི་མོས་མཐུན་བྱེད་ཐུབ་བོ།

²³གལ་ཏེ་ང་ཚོས་འདི་ལྟར་བྱས་པ་ཡིན་ན་ཁོང་ཚོའི་ཕྱུགས་དང་རྒུ་ནོར་ཚང་མ་ང་ཚོའི་ཡིན་པར་འགྱུར། དེར་བརྟེན་ཁོང་ཚོས་གང་སྨྲས་པ་ལྟར་ང་ཚོས་མོས་མཐུན་བྱས་ནས་ཁོང་ཚོ་ང་ཚོའི་ཁྲོད་དུ་གནས་ཐུབ་བོ་ཞེས་སྨྲས་སོ།

²⁴ཧ་མོར་དང་ཤེ་ཀེམ་གྱིས་གང་སྨྲས་པ་ལྟར་ཡུལ་མི་ཚང་མས་ཉན་ནས། ཕོ་རྣམས་ཀྱི་མདུན་ལྤགས་འབྲེགས་སོ།

²⁵ཉིན་གསུམ་གྱི་རྗེས་སུ་ཡུལ་མི་རྣམས་ཀྱི་མདུན་ལྤགས་འབྲེག་པའི་རྨ་དེ་དྲག་མེད་པའི་སྐབས་སུ། ཡ་ཀོབ་ཀྱི་བུ་སིམ་ཨོན་དང་ལེ་ཝི་གཉིས་ཀྱིས་རལ་གྲི་འཁུར་ནས་གསང་བར་སོང་ནས་ཡུལ་མི་རྣམས་ལ་བསད་དོ། ཁོ་གཉིས་ནི་དྷི་ནཱའི་ཨ་ཇོ་རྒན་པ་ཡིན་ནོ།

²⁶ཁོ་གཉིས་ཀྱིས་ཧ་མོར་དང་ཁོའི་བུ་ཤེ་ཀེམ་ལ་ཡང་བསད་དོ། དེ་ནས་ཤེ་ཀེམ་གྱི་ནང་ནས་དྷི་ནཱ་འཁྲིད་ནས་སོང་ངོ་།

²⁷ཡུལ་མི་རྣམས་བསད་པའི་རྗེས་སུ་ཡ་ཀོབ་ཀྱི་བུ་གཞན་ཚོས་གྲོང་ཁྱེར་བཅོམ་པ་དང་རང་གི་སྲིང་མོར་བཙན་གཡེམ་བྱས་པའི་ཚབ་ཏུ་དགྲ་ཤ་ལེན་ནོ།

²⁸དེ་ཚོས་ར་ལུག་གི་ཁྱུ་དང་བ་གླང་དང་བོང་བུ་དང་། གྲོང་ཁྱེར་དང་ཞིང་ནང་ཡོད་པ་ཚང་མ་འཁྱེར་རོ།

²⁹རིན་ཐང་ཅན་གྱི་དངོས་པོ་དང་བུད་མེད་དང་ཕྲུ་གུ་དང་ཁང་པའི་ནང་གང་ཡོད་པ་ཚང་མ་འཕྲོག་ནས་འཁྱེར་རོ།

³⁰ཡ་ཀོབ་ཀྱིས་རང་གི་བུ་སིམ་ཨོན་དང་ལེ་ཝི་ལ། ཁྱོད་ཚོས་བྱས་པའི་ལས་ཀ་འདིའི་སྒོ་ནས་ད་ཡུལ་ཀ་ནན་པའི་མི་རྣམས་དང། པེ་རི་ཛེ་པ་དང་། ཡུལ་མི་ཚང་མས་ང་ལ་སྡང་བར་འགྱུར། གལ་ཏེ་ཁོང་ཚོ་ཚང་མས་རུབ་ནས་ང་ལ་བཙན་རྒོལ་བྱེད་པ་ཡིན་ན། ང་ལ་མི་མང་པོ་མེད་པས། ང་ཚོའི་ནང་མི་རྣམས་མེད་པར་ཆགས་པར་འགྱུར་ཞེས་སྨྲས་སོ།

³¹འོན་ཀྱང་ཁོང་ཚོས་ལན་དུ། སྨད་འཚོང་མ་ལྟར་ང་ཚོའི་སྲིང་མོ་ལ་དེ་ལྟར་སྤྱོད་པ་བྱེད་མི་ཆོག་ཅེས་སྨྲས་སོ༎