Read Tibetan — པོད་སྐད་Tibetan Old Testament 2011 བཀོད་པ 40 Bible Online

བཀོད་པ 40 - Tibetan — པོད་སྐད་Tibetan Old Testament 2011 bible

བཀོད་པ 40

¹དུས་འགའ་ཤས་ཀྱི་རྗེས་སུ་ཨི་ཇིབ་ཀྱི་རྒྱལ་པོ་ལ་རྒུན་ཆང་དང་བཞེས་བག་ཕུལ་མཁན་གཉིས་ཀྱིས་ཉེས་པ་བྱས་པའི་རྐྱེན་གྱིས།

²རྒྱལ་པོ་ཁོང་གཉིས་ལ་ཁྲོས་ཏེ།

³དེ་གཉིས་ལ་སྲུང་བྱ་བ་རྣམས་ཀྱི་འགོ་འཁྲིད་ཀྱི་ནང་དུ་ཡོད་པའི་བཙོན་ཁང་དུ་བཅུག་གོ ཡོ་སེབ་ལའང་བཙོན་ཁང་དེའི་ནང་དུ་བཅུག་ཡོད་པ་ཡིན་ནོ།

⁴ཁོང་ཚོ་བཙོན་ནང་ཡུན་རིང་པོ་ནས་གནས་ཡོད་པ་དང་། འགོ་འཁྲིད་ཀྱིས་དེ་གཉིས་ལ་གཡོག་བྱས་པར་ཡོ་སེབ་ལ་བཞག་གོ།

⁵མཚན་གཅིག་བཙོན་ཁང་ནང་རྒུན་ཆང་དང་བཞེས་བག་ཕུལ་མཁན་གཉིས་ཀྱིས་རྨི་ལམ་རེ་རེ་མཐོང་བས། དེའི་དོན་མི་འདྲ་ཡོད་པའོ།

⁶སྔ་དྲོ་ཡོ་སེབ་ཁོང་གཉིས་ཀྱི་རྩར་ཡོང་སྐབས་ཁོང་གཉིས་སེམས་མི་བདེ་བར་ཡོད་པ་མཐོང་ནས།

⁷ཁྱེད་གཉིས་ཀྱི་སེམས་མི་བདེ་བ་མཐོང་བའི་དོན་དེ་གང་ཡིན་ནམ་ཞེས་དྲིས་པས།

⁸ཁོང་ཚོས། ང་གཉིས་ཀྱི་རྨི་ལམ་རེ་རེར་མཐོང་བས། དེའི་དོན་གང་ཡིན་པ་འགྲེལ་བཤད་བྱ་མཁན་མེད་པའི་རྐྱེན་གྱིས་ཡིན་ནོ་ཞེས་སྨྲས་པས། ཡོ་སེབ་ཀྱིས། རྨི་ལམ་གྱི་འགྲེལ་བཤད་བརྒྱབ་པའི་ཤེས་རབ་ནི་དཀོན་མཆོག་གཅིག་པུས་གནང་ཐུབ། ད་ཁྱེད་གཉིས་ཀྱི་རྨི་ལམ་གང་མཐོང་བ་དེ་ང་ལ་ཤོད་ཅིག་སྨྲས་པ་དང་།

⁹དེ་ནས་རྒུན་ཆང་ཕུལ་མཁན་གྱིས་ཡོ་སེབ་ལ། ངའི་རྨི་ལམ་ནང་ངའི་མདུན་དུ་རྒུན་ཤིང་ཞིག་མཐོང་བས།

¹⁰རྒུན་ཤིང་ལ་ཡལ་ག་གསུམ་ཡོད་པ་དང་། དེར་ལོ་མ་སྐྱེས་ནས་མེ་ཏོག་ཡང་བྱུང་ཞིང་རྒུན་འབྲུམ་གྱི་འབྲས་བུ་ཡང་ཆགས་ནས་སྨིན་ནོ།

¹¹ངའི་ལག་ཏུ་རྒྱལ་པོའི་བཞེས་ཕོར་ཡོད་པ་དེའི་ནང་རྒུན་འབྲུམ་བཙིར་ནས་རྒྱལ་པོ་ལ་ཕུལ་བ་མཐོང་བྱུང་ཞེས་སྨྲས་སོ།

¹²དེ་ནས་ཡོ་སེབ་ཀྱིས་ཁོའི་རྨི་ལམ་གྱི་འགྲེལ་བཤད་བྱེད་ཅིང་། ཡལ་ག་གསུམ་གྱི་དོན་ནི་ཉི་མ་གསུམ་ཡིན།

¹³ཉིན་གསུམ་གྱི་རྗེས་སུ་རྒྱལ་པོས་ཁྱེད་ལ་བཙོན་ནས་བཏོན་ཏེ། སྔར་ལྟར་ཁྱེད་རྒྱལ་པོའི་རྒུན་ཆང་ཕུལ་མཁན་གྱི་ལས་བྱེད་པ་ལྟར་ཁོང་ལ་བཞེས་ཕོར་ནང་རྒུན་ཆང་ཕུལ་ཡོང་།

¹⁴ཁྱེད་རང་ལས་བྱེད་པའི་གོ་གནས་དེ་སྐྱར་གསོ་གནང་ནས་གནས་སྟངས་ཡག་པོ་ཡོད་པའི་དུས་སུ་ང་ལ་དྲན་གསོ་བྱེད་ནས་རྒྱལ་པོ་ལ་ངའི་སྐོར་བཤད་ནས་ང་བཙོན་ནས་ཐར་ཕྱིར་རོགས་གནང་ཞིག་དང་།

¹⁵གང་ལ་ཟེར་ན། ཨིབ་རི་པའི་ཡུལ་ནས་ང་ལ་བརྐུས་ནས་ས་གནས་འདིར་འཁྲིད་ཡོང་བས། དེར་ང་ཨི་ཇིབ་དུའང་བཙོན་ཁང་དུ་བསྡད་དགོས་པའི་ངས་ཉེས་པ་གང་ཡང་བྱེད་མེད་ཅེས་སྨྲས་སོ།

¹⁶རྒུན་ཆང་ཕུལ་མཁན་གྱིས་རྨི་ལམ་གྱི་དོན་བཟང་པོ་ཐོས་ནས། བཞེས་བག་བཟོ་མཁན་གྱིས་ཡོ་སེབ་ལ། ང་ལ་ཡང་རྨི་ལམ་ཞིག་མཐོང་བས། ངས་བཞེས་བག་གི་གང་བའི་ཙེལ་པོ་གསུམ་རང་གི་མགོའི་སྟེང་འཁྱེར་ཡོད་པ་དང་།

¹⁷ཚང་མ་ལས་ཙེལ་པོ་མཐོ་ཤོས་ནང་རྒྱལ་པོའི་ཕྱིར་བཞེས་བག་ཞིམ་པོ་སྣ་ཚོགས་ཡོད་པས། འོན་ཀྱང་ནམ་མཁའི་བྱ་རྣམས་ཡོང་ནས་དེ་ལས་ཟ་བ་ཞིག་རྨི་ལམ་མཐོང་བྱུང་ཞེས་སྨྲས་པ་དང་།

¹⁸ཡོ་སེབ་ཀྱིས་ཁོ་ལ། ཙེལ་པོ་གསུམ་གྱི་དོན་ནི་ཉི་མ་གསུམ་ཡིན།

¹⁹ཉིན་གསུམ་གྱི་རྗེས་སུ་རྒྱལ་པོས་ཁྱེད་ལ་བཙོན་ནས་བཏོན་ཏེ་ཁྱེད་ཀྱི་མགོ་བཅད་ནས། དེ་ནས་ཁོང་གིས་ཁྱེད་ཀྱི་ལུས་དེ་ཀ་བར་བཀལ་ཏེ་བྱ་རྣམས་ཀྱིས་ཁྱེད་ཀྱི་ཤ་ཟ་བར་འགྱུར་ཞེས་སྨྲས་སོ།

²⁰ཉིན་གསུམ་གྱི་རྗེས་སུ་རྒྱལ་པོའི་འཁྲུངས་ཞག་ཡིན་པས། ལས་བྱེད་པ་ཚང་མར་མགྲོན་ཞིག་བཤམས་ནས། རྒྱལ་པོས་རྒུན་ཆང་དང་བཞེས་བག་ཕུལ་མཁན་གཉིས་ཀར་བཙོན་ནས་བཏོན་ཏེ་ལས་བྱེད་པ་ཚང་མའི་མདུན་དུ་འཁྲིད་ཡོང་ངོ་།

²¹རྒུན་ཆང་ཕུལ་མཁན་ལ་སྔར་གྱི་གོ་གནས་སྐྱར་གསོ་གནང་བ་དང་ལས་བྱེད་པའི་བཀའ་གནང་ངོ་།

²²འོན་ཀྱང་བཞེས་བག་ཕུལ་མཁན་ལ་སྲོག་ཐོག་བཏང་ངོ་། འདི་ཚོ་ཚང་མ་ཡོ་སེབ་ཀྱིས་སྨྲས་པ་ལྟར་བྱུང་ངོ་།

²³འོན་ཀྱང་རྒུན་ཆང་ཕུལ་མཁན་གྱིས་ཡོ་སེབ་ཀྱི་དྲིན་མ་དྲན་པར་བརྗེད་དོ༎