Read Tibetan — པོད་སྐད་Tibetan Old Testament 2011 བཀོད་པ 42 Bible Online

བཀོད་པ 42 - Tibetan — པོད་སྐད་Tibetan Old Testament 2011 bible

བཀོད་པ 42

¹ཨི་ཇིབ་ནང་འབྲུ་ཐོབ་ཀྱི་ཡོད་པའི་སྐོར་ཡ་ཀོབ་ཀྱིས་ཐོས་པ་དང་། རང་གི་བུ་རྣམས་ལ་འབོད་དེ། ཁྱོད་ཚོ་ཚང་མས་ལས་ཤིག་བྱོས་ཤིག

²ཨི་ཇིབ་ནང་འབྲུ་ཐོབ་ཀྱི་འདུག་ཅེས་ངས་ཐོས་བྱུང་བས། ང་ཚོ་ཚང་མ་གསོན་པོར་གནས་ཕྱིར་ཁྱོད་ཚོ་སོང་ནས་འབྲུ་ཉོས་ཤིག་ཅེས་སྨྲས་སོ།

³དེར་བརྟེན་ཡོ་སེབ་ཀྱི་ཨ་ཇོོ་ བཅུ་རྣམས་འབྲུ་ཉོ་ཕྱིར་ཨི་ཇིབ་དུ་སོང་ངོ་།

⁴འོན་ཀྱང་ཡ་ཀོབ་ཀྱིས་རང་གི་བུ་ཆུང་ཤོས་བྷེན་ཡ་མིན་ལ་གནོད་སྐྱོན་ཞིག་བྱུང་ཡོང་ཞེས་འཇིགས་ཏེ། ཁོ་ལ་མ་བཏང་ངོ་།

⁵དེ་ལྟར་ཡུལ་ཀ་ནན་ནང་མུ་གེ་ཤོར་བའི་རྐྱེན་གྱིས་ཡ་ཀོབ་ཀྱི་བུ་རྣམས་གཞན་དང་མཉམ་དུ་འབྲུ་ཉོ་རུ་སོང་ངོ་།

⁶འཛམ་གླིང་ཡོངས་ཀྱི་མི་རྣམས་ལ་ཨི་ཇིབ་ཡུལ་གྱི་སྤྱི་ཁྱབ་ཡོ་སེབ་ཀྱིས་འབྲུ་བཙོང་ངོ་། ཡོ་སེབ་ཀྱི་ཨ་ཇོོ་རྣམས་ཀྱང་ཁོང་གི་རྩར་ཡོང་ནས་གདོང་ས་ལ་ཁ་སྦུབ་ནས་ཁོང་ལ་ཕྱག་འཚལ་ལོ།

⁷ཡོ་སེབ་ཀྱིས་རང་གི་སྤུན་ཚོ་ལ་བལྟས་ནས་ངོ་ཤེས་ཀྱང་མི་ཤེས་པ་ལྟར་བྱས་ཏེ། རླུང་ལངས་བ་ལྟར་བྱས་ཏེ་ཁོ་ཚོ་ལ། ཁྱོད་ཚོ་གང་ནས་ཡོང་བ་ཡིན་ནམ་ཞེས་དྲིས་པས། ཁོང་ཚོས་ལན་དུ། ང་ཚོ་ཡུལ་ཀ་ནན་ནས་ཁ་ཟས་ཉོ་བའི་ཕྱིར་ཡོང་བ་ཡིན་ཞེས་སྨྲས་པ་དང་།

⁸ཡོ་སེབ་ཀྱིས་རང་གི་ཨ་ཇོ་རྣམས་ངོ་ཤེས་ཀྱང་། དེ་ཚོས་ཁོང་ལ་ངོ་མ་ཤེས་སོ།

⁹ཡོ་སེབ་ཀྱིས་སྔར་རྨི་ལམ་གྱི་ནང་ག་རེ་མཐོང་བ་རྣམས་དྲན་ནས་ཁོང་ཚོ་ལ། ཁྱོད་ཚོ་སོ་པ་ཡིན་པས། ང་ཚོའི་ཡུལ་ནང་ཉེས་སྐྱོན་ག་རེ་ཡོད་མེད་བལྟ་ཕྱིར་ཡོང་བ་ཡིན་པ་འདྲ་ཞེས་སྨྲས་སོ།

¹⁰ཁོང་ཚོས། ཇོ་བོ་ལགས། ང་ཚོ་ཁྱེད་ཀྱི་བྲན་གཡོག་ཡིན་པས། ཁ་ཟས་ཉོ་བའི་ཕྱིར་ཡོང་བ་ཡིན།

¹¹ང་ཚོ་ཚང་མ་ནི་སྤུན་རྣམས་ཡིན། ང་ཚོ་སོ་པ་མ་ཡིན་པ་དང་། ང་ཚོ་མི་དྲང་པོ་ཡིན་ཞེས་ཞུས་སོ།

¹²འོན་ཀྱང་ཡོ་སེབ་ཀྱིས། ཁྱོད་ཚོ་ནི་སོ་པ་ཡིན་པས་ང་ཚོའི་ཡུལ་ནང་སྐྱོན་ག་རེ་ཡོད་མེད་སྐོར་ཤེས་ཕྱིར་ཡོང་བ་ཡིན་གསུངས་པས།

¹³ཁོང་ཚོས་ཡོ་སེབ་ལ། ཇོ་བོ་ལགས། ང་ཚོ་སྤུན་བཅུ་གཉིས་ཡོད་པས། ཡུལ་ཀ་ནན་དུ་ཡོད་པའི་མི་ཞིག་གི་བུ་རྣམས་ཡིན། སྤུན་གཅིག་ནི་གྲོངས་ནི་མེད་པས། ཆུང་ཤོས་དེ་ཕ་དང་མཉམ་དུ་བསྡད་ཡོད་ཅེས་སྨྲས་པ་དང་།

¹⁴ཡོ་སེབ་ཀྱིས་ཁོང་ཚོ་ལ། ངས་ཁྱོད་ཚོ་ལ་སྨྲས་པ་ལྟར་ཁྱོད་ཚོ་ནི་སོ་པ་ཡིན།

¹⁵གལ་ཏེ་ཁྱོད་ཚོ་སོ་པ་མིན་ན། ངས་རྒྱལ་པོའི་མཚན་ལ་མནའ་འཁུར་ནས་བརྗོད་རྒྱུར། ཁྱོད་ཚོའི་སྤུན་ཆུང་ཤོས་འདིར་མ་ཡོང་བར་དུ་ཁྱོད་ཚོ་ཚང་མ་ས་གནས་འདི་ནས་འགྲོ་མི་ཆོག

¹⁶ཁྱོད་ཚོའི་ནང་ནས་སྤུན་གཅིག་སོང་ནས་ཁོ་ལ་འཁྲིད་ཤོག ཁྱོད་ཚོའི་གཏམ་དེ་བདེན་པ་ཡིན་མིན་ཤེས་པའི་ཕྱིར་ཁྱོད་ཚོ་ལྷག་འཕྲོས་རྣམས་བཙོན་ནང་སྡོད་ཅིག དེ་མིན་ཁྱོད་ཚོ་སོ་པ་ཡིན་པ་དེ་ལ་དོག་པ་མེད་ཅེས་སྨྲས་སོ།

¹⁷དེ་ནས་ཁོང་གིས་ཁོང་ཚོ་ཉི་མ་གསུམ་གྱི་བར་དུ་བཙོན་ནང་བཅུག་གོ།

¹⁸དེ་ནས་ཉིན་གསུམ་པར་ཡོ་སེབ་ཀྱིས་ཁོང་ཚོ་ལ། ང་ཡང་དཀོན་མཆོག་ལ་འཇིགས་མཁན་ཞིག་ཡིན་པས། ཁྱོད་ཚོས་ངས་སྨྲས་པ་ལྟར་བྱས་ན་ངས་ཁྱོད་ཚོ་ཐར་གཅུག་ཡོང་།

¹⁹ཁྱོད་ཚོ་དྲང་པོ་ཡིན་ན་ཁྱོད་ཚོའི་ནང་ནས་སྤུན་གཅིག་བཙོན་ཁང་ནང་སྡོད་ཅིག སྤུན་གཞན་ཚོས་རང་གི་ཁང་པར་འབྲུ་རྣམས་འཁྱེར་ཞིག

²⁰དེ་ནས་ཁྱོད་ཚོས་སྤུན་ཆུང་ཤོས་དེ་ངའི་རྩར་འཁྲིད་ཡོང་དགོས། དེ་ནས་ཁྱོད་ཚོའི་གཏམ་བདེན་པ་ཡིན་པ་དེ་ངས་ཤེས་པར་འགྱུར་ཏེ། ངས་ཁྱོད་ཚོ་ལ་སྲོག་ཐོག་མི་བཏང་ངོ་ཞེས་སྨྲས་པ་དང་། ཁོང་ཚོས་དེ་བཞིན་མོས་མཐུན་བྱས་སོ།

²¹ཁོང་ཚོས་གཅིག་གིས་གཅིག་ལ། བདེན་པར་ང་ཚོའི་སྤུན་གྱི་སྐོར་ལ་ང་ཚོ་ཉེས་ཅན་ཡིན། གང་ལ་ཟེར་ན། ཁོས་ང་ཚོ་ལ་ཞུ་འབོད་བྱེད་སྐབས་ང་ཚོས་ཁོའི་གཏམ་ལ་མ་ཉན་ནོ། དེར་བརྟེན་དཀའ་ངལ་འདི་ང་ཚོའི་སྟེང་དུ་འཕོག་པ་ཡིན་ནོ་ཞེས་སྨྲས་སོ།

²²རུ་བྷེན་གྱིས་ཁོང་ཚོ་ལ། བུ་དེ་ལ་གནོད་པ་གང་ཡང་མ་བྱེད་ཅེས་ངས་ཁྱོད་ཚོ་ལ་ལབ་ནའང་ཁྱོད་ཚོས་ཉན་མ་སོང་། ད་ཁོའི་སྲོག་གཅོད་རྐྱེན་གྱིས་ང་ཚོ་འཆི་བར་འགྱུར།

²³ཁོང་ཚོས་སྐད་ཆ་བཤད་པ་ཐམས་ཅད་ཡོ་སེབ་ཀྱི་ཤེས་པ་དེ་ཁོང་ཚོས་ཧ་མ་གོའོ། གང་ལ་ཟེར་ན། དེ་ཚོ་ཁོང་དང་མཉམ་དུ་གཏམ་གླེང་བྱེད་སྐབས། སྐད་བསྒྱུར་བ་གཅིག་བརྒྱུད་ནས་ཕན་ཚུན་གཏམ་གླེང་བྱེད་པའོ།

²⁴དེ་ནས་ཡོ་སེབ་ཁོང་ཚོའི་རྩར་ནས་ཕར་ཙམ་སོང་སྟེ་ངུས་སོ། ཡང་ལོག་ཡོང་ནས་ཁོང་ཚོ་དང་མཉམ་དུ་སྐད་ཆ་ཤོད་པ་དང་། སིམ་ཨོན་ལ་བཟུང་སྟེ་ཚང་མའི་མདུན་དུ་བསྡམས་སོ༎

²⁵དེ་ནས་ཡོ་སེབ་ཀྱིས་རང་གི་ཨ་ཇོ་རྣམས་ཀྱི་ཕད་གོག་དེ་ཚོའི་ནང་འབྲུས་བཀང་སྟེ་ཁོ་ཚོས་སྤྲད་པའི་དངུལ་དེ་རང་རང་གི་ཕད་གོག་རེ་རེ་ནང་བཅུག་ཅིང་ལམ་དུ་ཟ་བའི་ཕྱིར་ཁ་ཟས་ཡང་ཚང་མ་ལ་སྤྲད་པའི་བཀའ་གནང་ནས་དེ་བཞིན་དུ་བྱས་སོ།

²⁶ཨ་ཇོ་རྣམས་ཀྱིས་ཉོས་པའི་འབྲུ་རྣམས་བོང་བུར་བཀལ་ནས་རང་གི་ལམ་དུ་སོང་ངོ་།

²⁷ཁོང་ཚོ་མཚན་མོ་ངལ་གསོ་བའི་སྐབས་སུ་སྤུན་གཅིག་གིས་བོང་བུ་ལ་ཆག་སྟེར་བའི་ཕྱིར་ཕད་གོག་བཀྲོལ་བ་དང་ཕད་གོག་གི་ཁའི་སྟེང་རང་གི་དངུལ་བཞག་ཡོད་པ་མཐོང་ངོ་།

²⁸ཁོས་རང་གི་སྤུན་རྣམས་ལ། ངའི་དངུལ་དེ་ཕད་གོག་ནང་ང་ལ་རང་ཅག་ཕྱིར་སློག་བྱེད་འདུག་ཅེས་སྨྲས་པ་དང་། ཁོང་ཚོ་ཚང་མ་འཇིགས་ནས་གཅིག་གིས་གཅིག་ལ། འདི་ལྟར་དཀོན་མཆོག་གིས་ང་ཚོ་ལ་གང་གནང་བ་ཡིན་ནམ་ཞེས་ཟེར་རོ།

²⁹དེ་ནས་ཁོང་ཚོ་ཡུལ་ཀ་ནན་དུ་ལོག་ནས་རང་གི་ཕ་ཡ་ཀོབ་ལ་ག་རེ་བྱུང་བ་ཚང་མ་བཤད་དོ།

³⁰ཨི་ཇིབ་ཀྱི་སྤྱི་ཁྱབ་ཀྱིས་ང་ཚོ་མཉམ་དུ་སྐད་ཆ་རྩུབ་པོ་བཤད་ཅིང་ཡུལ་གྱི་སོ་པ་བྱེད་ཕྱིར་ཡོང་འདུག་ཅེས་སྐྱོན་བརྗོད་བྱེད་དོ།

³¹ང་ཚོ་སོ་པ་མིན་པར་མི་བཟང་པོ་ཡིན་པ་དང་།

³²ང་ཚོ་ཚང་མ་ཕ་གཅིག་གི་བུ་སྤུན་བཅུ་གཉིས་ཡིན་ནོ། གཅིག་ནི་གྲོངས་ནས་མེད་པས་ཆུང་ཤོས་ནི་ཕ་དང་མཉམ་དུ་ཀ་ནན་དུ་ཡོད་དོ།

³³སྤྱི་ཁྱབ་ཀྱིས་གཏམ་དེའི་སྒོ་ནས་ཁྱོད་ཚོ་མི་དྲང་པོ་ཡིན་པ་དེ་ངས་ཤེས་ཕྱིར། ཁྱོད་ཚོའི་ནང་ནས་ང་དང་མཉམ་དུ་སྤུན་གཅིག་འདིར་སྡོད་ཅིག། གཞན་ཚོ་འབྲུ་འཁྱེར་ནས་རང་གི་ལྟོགས་ནས་ཡོད་པའི་ནང་མི་རྩར་སོང་ཞིག

³⁴སྤུན་ཆུང་ཤོས་དེ་ངའི་རྩར་འཁྲིད་ཤོག དེ་ལྟར་བྱས་ན་ཁྱོད་ཚོ་རྣམས་སོ་པ་མིན་པ་མི་དྲང་པོ་ཡིན་པ་ངས་ཤེས་ཐུབ་བོ། དེ་ནས་ཁྱོད་ཚོའི་སྤུན་དེ་ཁྱོད་ཚོ་ལ་ཕྱིར་སློག་སྤྲད་རྒྱུ་ཡིན་པ་དང་། ཁྱོད་ཚོ་འདིར་བསྡད་ནས་ཚོང་རྒྱབ་ཐུབ་ཅེས་སྨྲས་སོ།

³⁵ཁོང་ཚོས་ཕད་གོག་བཀྲོལ་ནས་བཏོན་སྐབས་རང་རང་གི་དངུལ་དེ་ཕད་གོག་ནང་བཞག་ཡོད་པ་ཐོབ་བོ། དངུལ་དེ་མཐོང་བ་དང་། ཕ་དང་ཁོང་ཚོ་ཚང་མ་ཤིན་ཏུ་འཇིགས་སོ།

³⁶ཕ་ཡ་ཀོབ་ཀྱིས་ཁོང་ཚོར། ངའི་བུ་རྣམས་ང་ལས་འཕྲལ་བ་དེ་ཁྱོད་ཚོས་འདོད་དམ། ཡོ་སེབ་ནི་ཤི་ནས་མེད། སིམ་ཨོན་ཡང་མེད་དོ། ད་ཁྱོད་ཚོས་བྷེན་ཡ་མིན་ཡང་འཁྲིད་པ་ཡིན་ན། དེ་ལྟར་སྡུག་བསྔལ་ཚང་མ་ང་ལ་བབས་སོ་ཞེས་སྨྲས་སོ།

³⁷རུ་བྷེན་གྱིས་ཁོང་ལ། གལ་ཏེ་ངས་བྷེན་ཡ་མིན་ཁྱེད་ཀྱི་རྩར་འཁྲིད་མ་ཡོང་ན་ངའི་བུ་གཉིས་དེ་ཁྱེད་ཀྱིས་གསོད་ཅིག། ཁོ་ངའི་ལག་ཏུ་བཅོལ་ན། ངས་ཁོ་ཁྱེད་ཀྱི་རྩར་ཕྱིར་ལོག་འཁྲིད་ཡོང་ཞེས་སྨྲས་སོ།

³⁸འོན་ཀྱང་ཡ་ཀོབ་ཀྱིས་ཁོ་ལ། ཁོ་ཁྱོད་དང་མཉམ་དུ་འགྲོ་མི་ཐུབ། ཁོའི་ཨ་ཇོ་གྲོངས་ཚར་བ་དང་། ཁོ་གཅིག་པུ་ལུས་ཡོད་དོ། གང་ལ་ཟེར་ན། ང་ནི་མི་རྒས་པོ་ཡིན་པས། ཁོའི་མྱ་ངན་གྱི་རྐྱེན་གྱིས་ང་ཤི་ཡོང་ཞེས་སྨྲས་སོ༎