Read Tibetan — པོད་སྐད་Tibetan Old Testament 2011 བཀོད་པ 43 Bible Online

བཀོད་པ 43 - Tibetan — པོད་སྐད་Tibetan Old Testament 2011 bible

བཀོད་པ 43

¹ཡུལ་ཀ་ནན་ནང་མུ་གེ་ཤིན་ཏུ་ཆེ་རུ་ཕྱིན་པས།

²ཨི་ཇིབ་ནས་ཉོས་པའི་འབྲུ་རྣམས་ཟས་ཚར་བའི་རྗེས་སུ་ཡ་ཀོབ་ཀྱིས་རང་གི་བུ་ཚོ་ལ། ང་ཚོའི་ཕྱིར་འབྲུ་ཉོ་བའི་ཕྱིར་སོང་ཞིག་ཅེས་སྨྲས་པ་དང་།

³ཡ་ཧུ་དཱས་ཕ་ལ། གལ་ཏེ་ང་ཚོས་རང་གི་སྤུན་ཆུང་ཤོས་དེ་འཁྲིད་མ་འགྲོ་ན་ཨི་ཇིབ་གྱི་སྤྱི་ཁྱབ་མཇལ་མི་ཐུབ་ཅེས་ཁོང་གིས་ཉེན་བརྡ་གནང་ཡོད།

⁴གལ་ཏེ་ཁྱེད་ཀྱིས་ང་ཚོ་དང་མཉམ་དུ་སྤུན་དེ་བཏང་བར་མོས་མཐུན་བྱས་ན་ང་ཚོས་ཁ་ཟས་ཉོ་བར་འགྲོ་རྒྱུ་ཡིན།

⁵གལ་ཏེ་ཁྱེད་ཀྱིས་ང་ཚོའི་སྤུན་དེ་མ་བཏང་ན་ང་ཚོ་འབྲུ་ཉོ་བར་མི་འགྲོ། གང་ལ་ཟེར་ན། ང་ཚོ་མཉམ་དུ་སྤུན་མེད་ན་ང་ཚོ་སྤྱི་ཁྱབ་རྩར་བཅར་མི་ཐུབ་ཅེས་ཁོང་གིས་ང་ཚོར་གསུངས་ཡོད་ཅེས་སྨྲས་སོ།

⁶ཡ་ཀོབ་ཀྱིས་ཁོང་ཚོ་ལ། ཁྱོད་ཚོའི་མི་དེ་ལསྤུན་ཆུང་བ་གཅིག་ཡོད་ཅེས་བཤད་ནས། ག་རེ་དོན་དུ་ངའི་ཐོག་དཀའ་ངལ་དེ་འདྲ་འཁྱེར་ཡོང་ངམ།

⁷ཁོང་ཚོས་ལན་དུ། སྤྱི་ཁྱབ་དེས་ང་ཚོའི་ནང་མིའི་སྐོར་ལ་དྲི་བ་མང་པོ་དྲིས་པས། ཁོང་གིས་ང་ཚོའི་ཕ་གསོན་པོ་ཡོད་མེད་དང་། ང་ཚོ་ལ་སྤུན་གཞན་ཞིག་ཡོད་མེད་ཅེས་དྲིས་པས། ང་ཚོས་ཁོང་གི་དྲི་བ་ལ་ལན་དེ་ལྟར་རྒྱབ་དགོས་བྱུང་། ཁོང་གིས་ང་ཚོའི་སྤུན་ང་ཚོ་དང་མཉམ་དུ་འདིར་འཁྲིད་ཡོང་དགོས་ཤེས་ལབ་ཀྱི་རེད་ཟེར་ཇི་ལྟར་ཤེས་སམ་ཞེས་སྨྲས་སོ།

⁸ཡ་ཧུ་དཱས་རང་གི་ཕ་ལ། བུ་དེ་ལ་ང་མཉམ་དུ་བཏང་རོགས་གནང་། ང་ཚོ་ལམ་སང་འབྲུ་ཉོ་བར་ཐོན་ནས་ང་ཚོ་ཚང་མ་ལྟོགས་པར་མ་ལུས་པར་གསོན་པོར་གནས་ཡོང་།

⁹ཁོའི་སྲོག་གི་འགན་དེ་ངས་འཁུརཡོང་། ང་ཚོའི་སྤུན་དེ་འཁྲིད་ནས་གལ་སྲིད་ཁོ་ཕྱིར་སློག་འཁྲིད་མ་ཡོང་ན། ང་ནི་ཁྱེད་ཀྱི་དྲུང་དུ་ཚེ་གང་ཉེས་ཅན་དུ་བརྩི་བར་བྱའོ།

¹⁰ང་ཚོ་ད་བར་འགོར་མེད་ན་ཨི་ཇིབ་དུ་ཕྱིན་ནས་ཐེང་མ་གཉིས་ཙམ་འཁོར་ཡོད་འགྲོ་ཞེས་སྨྲས་སོ།

¹¹དེ་ནས་ཕ་ཡིས་ཁོང་ཚོར། ད་ང་ཚོས་དེ་འདྲ་བྱེད་དགོས་ན་ཨི་ཇིབ་གྱི་སྤྱི་ཁྱབ་ལ་ཡུལ་ནང་སྐྱེས་པའི་ལོ་ཐོག་ལེགས་ཤོས་དང་། དྲི་ཞིམ་ལྡན་པའི་བྱུགས་སྨན་དང་། སྦྲང་རྩི་དང་། སྨན་སྣ་དང་། སྟར་ག་ལ་སོགས་པ་སྤྱི་ཁྱབ་ལ་འབུལ་བའི་ཕྱིར་འཁྱེར་ཞིག

¹²ཁྱོད་ཚོའི་ཕད་གོག་ནང་ཡོད་པའི་དངུལ་དང་ད་ལྟའི་དངུལ་བཅས་ཉིས་ལྡབ་འཁྱེར་ནས་ཁོང་ལ་འབུལ་དགོས། གང་ལ་ཟེར་ན། ཁྱོད་ཚོའི་ཕད་གོག་གི་སྟེང་བཞག་ཡོད་པའི་དངུལ་དེ་ཕྱིར་སློག་བྱེད་དགོས་སོ། གཅིག་བྱས་ན་དེ་ནོར་འཁྲུལ་གྱི་བྱུང་བ་ཡིན་འགྲོ།

¹³ཁྱོད་ཚོའི་སྤུན་ཆུང་བ་དེ་འཁྲིད་ནས་མི་དེའི་རྩར་སོང་ཞིག

¹⁴སྤྱི་ཁྱབ་ཀྱིས་ཁྱོད་ཚོའི་སྤུན་ཤིམ་ཨོན་དང་བྷེན་ཡ་མིན་གཉིས་ཁྱོད་ཚོ་དང་མཉམ་དུ་ལོག་འཇུག་པར་ཀུན་དབང་ལྡན་པའི་དཀོན་མཆོག་གིས་ཐུགས་རྗེ་གཟིགས་པར་ཤོག། ངའི་བུ་ཚོའི་ཆེད་དུ་མྱ་ངན་བྱེད་དགོས་ན་ཡང་བྱེད་རྒྱུ་ཡིན།

¹⁵དེ་ནས་སྤུན་རྣམས་ཀྱིས་ཕྱག་རྟགས་དང་། དངུལ་ཉིས་ལྡབ་དང་། བྷེན་ཡ་མིན་འཁྲིད་དེ་ཨི་ཇིབ་ཕྱོགས་སུ་ཐོན་ནོ། དེར་ཁོ་ཚོ་ཡོ་སེབ་ཀྱི་མདུན་དུ་བཅར་རོ།

¹⁶ཡོ་སེབ་ཀྱིས་ཁོང་ཚོ་མཉམ་དུ་བྷེན་ཡ་མིན་ཡོད་པ་མཐོང་ནས་རང་གི་ཁྱིམ་གི་གཡོག་པོ་གཙོ་བོ་ལ། མི་འདི་ཚོ་ངའི་ཁང་པར་འཁྲིད་ཅིག། དེ་རིང་ཉིན་གུང་མི་འདི་ཚོ་ང་མཉམ་དུ་ཁ་ཟས་ཟ་བར་འགྱུར། སེམས་ཅན་ཞིག་བསད་ནས་མགྲོན་ཞིག་བཤོམས་ཤིག་ཅེས་སྨྲས་སོ།

¹⁷གཡོག་པོས་ཡོ་སེབ་ཀྱི་བཀའ་བཞིན་དུ་བྱས་ནས། སྤུན་རྣམས་ཡོ་སེབ་ཀྱི་ཁང་པའི་ནང་དུ་འཁྲིད་དོ།

¹⁸དེ་ཚོས་ཡོ་སེབ་ཀྱི་ཁང་པར་འཁྲིད་སྐབས་ཁོང་ཚོ་འཇིག་ནས་སེམས་ལ། ང་ཚོ་འདིར་འཁྲིད་ཡོང་དགོས་དོན་ནི་སྔོན་དུ་ང་ཚོའི་ཕད་གོག་ནང་དངུལ་ཕྱིར་ལོག་བྱས་པའི་རྐྱེན་གྱིས་ཡིན་ནོ། དེ་ཚོས་གློ་བུར་དུ་ང་ཚོར་རྒོལ་ནས་བོང་བུ་རྣམས་འཕྲོག་པ་དང་ང་ཚོར་བྲན་གཡོག་བཟོ་བར་འགྱུར་ཞེས་བསམ་མོ།

¹⁹ཁོང་ཚོ་ཡོ་སེབ་ཀྱི་ཁང་པའི་སྒོའི་འགྲམ་དུ་སླེབས་པ་དང་། གཡོག་པོ་གཙོ་བོ་དེ་ལ།

²⁰ཇོ་ལགས། ཁ་སྔོན་ང་ཚོ་འབྲུ་ཉོ་བར་ཡོང་བ་ཡིན།

²¹མཚན་མོ་ངལ་གསོ་བྱས་སྐབས་ང་ཚོས་ཕད་གོག་ཕྱེ་བས། ང་ཚོ་རེ་རེའི་ཕད་གོག་ནང་རང་རང་གི་དངུལ་དེ་བཞག་འདུག་པས། དངུལ་དེ་རྣམས་ཕྱིར་ལོག་བྱས་པའི་ཕྱིར་ང་ཚོས་འཁུར་ཡོད།

²²ད་དུང་ང་ཚོས་འབྲུ་ཉོ་ཕྱིར་དངུལ་གཞན་ཡང་འཁུར་ཡོད། ང་ཚོའི་ཕད་གོག་ནང་དངུལ་དེ་སུས་བླུགས་པ་དེ་ང་ཚོས་མི་ཤེས་སོ་ཞེས་སྨྲས་སོ།

²³གཡོག་པོས་ཁོང་ཚོ་ལ། ཁྱོད་ཚོ་སེམས་འཕྲལ་དང་འཇིགས་སྣང་མ་བྱེད་ཅིག ཁྱོད་ཚོ་དང་ཁྱོད་ཚོའི་ཕ་ཡི་དཀོན་མཆོག་གིས་དངུལ་དེ་ཁྱོད་ཚོའི་ཕད་གོག་ནང་བཞག་པ་ཡིན་འགྲོ། གང་ཡིན་ཞེ་ན། ཁྱོད་ཚོས་ཉོས་པའི་འབྲུའི་རིན་དངུལ་དེ་ང་ལ་ཐོབ་བྱུང་ཞེས་ཟེར་རོ། དེ་ནས་ཁོས་ཁོང་ཚོའི་སྤུན་སིམ་ཨོན་བཏོན་ནས་དེ་ཚོའི་རྩར་འཁྲིད་དོ།

²⁴དེ་ནས་གཡོག་པོ་དེས་སྤུན་རྣམས་ལ་ཁང་པའི་ནང་དུ་འཁྲིད་ནས་རྐང་པ་འཁྲུ་ཕྱིར་ཆུ་སྟེར་བ་དང་། བོང་བུ་རྣམས་ལ་རྩ་ཆག་སྤྲད་དོ།

²⁵ཁོང་ཚོ་ཡོ་སེབ་དང་མཉམ་དུ་ཉིན་གུང་ཁ་ལག་ཟ་དགོས་པ་ཤེས་པས། འབུལ་བ་རྣམས་བཏོན་ནས་བཤམས་སོ།

²⁶དེ་ནས་ཡོ་སེབ་ཁང་པར་བསླེབས་པ་དང་། ཁོང་ཚོས་འབུལ་བ་དེ་ཕུལ་ནས་མགོ་ས་ལ་སྒུར་རོ།

²⁷ཡོ་སེབ་ཀྱིས་ཁོང་ཚོ་ལ། ཁྱོད་ཚོ་ཁམས་བདེའམ། ཁྱོད་ཚོས་ཕ་རྒས་པོ་ཞིག་ཡོད་སྨྲས་པས། ཁོང་ཡང་ཁམས་བདེ་ཞིང་གསོན་པོར་ཡོད་དམ་ཞེས་དྲིས་པས།

²⁸ཁོང་ཚོས། ཁྱེད་ཀྱི་བྲན་གཡོག་ང་ཚོའི་ཕ་དེ་ཁམས་བདེ་ཞིང་གསོན་ པོར་ཡོད་ཅེས་ཞུས་ནས་ཁོང་གི་མདུན་དུ་པུས་མོ་བཙུགས་ཏེ་མགོ་སྒུར་རོ།

²⁹ཡོ་སེབ་ཀྱིས་རང་གི་སྤུན་བྷེན་ཡ་མིན་ལ་མཐོང་སྟེ། ཁྱོད་ཚོས་སྤུན་ཆུང་བ་ཞིག་གི་སྐོར་བཤད་པ་དེ་འདི་ཡིན་ནམ་ཞེས་སྨྲས་ནས་ཁོ་ལ། དཀོན་མཆོག་གིས་ཁྱོད་ལ་བྱིན་རླབས་གནང་བར་ཤོག་ཅེས་སྨྲས་སོ།

³⁰དེ་ནས་ཡོ་སེབ་ནམ་སང་ལངས་ནས་སོང་ངོ་། གང་ལ་ཟེར་ན། ཡོ་སེབ་ཀྱི་སེམས་ལ་རང་གི་སྤུན་གྱི་ཆེད་དུ་བྱམས་པའི་ཁེངས་ནས་ངུ་བར་འདོད་དོ། ཁོང་རང་གི་ཁང་མིག་ནང་དུ་སོང་ནས་ངུས་སོ།

³¹ཁོང་རང་གི་ངུ་རྒྱུ་བཀག་ནས་གདོང་ཁྲུས་ཏེ་ཕྱིར་ཐོན་ནས་ཁ་ཟས་འཁྱེར་ཤོག་ཅེས་བཀའ་གནང་ངོ་།

³²ཡོ་སེབ་ལ་རྩོག་རྩེ་གཅིག་ལ་ཞལ་ལག་ལོགས་སུ་ཕུལ་བ་དང་། ཁོང་གི་སྤུན་ཚོ་ལ་རྩོག་རྩེ་གཞན་དུ་ཕུལ་ལོ། ཁོང་མཉམ་དུ་ཟ་བའི་ཨི་ཇིབ་པ་རྣམས་ལའང་ཁ་ཟས་སོ་སོར་ཕུལ་ལོ། གང་ལ་ཞེ་ན། ཨི་ཇིབ་པ་རྣམས་ཨིབ་རི་པ་ཚོ་མཉམ་དུ་ཁ་ཟས་ཟ་བ་ནི་རང་ལ་དམའ་བར་བརྩི་བ་དང་འདྲའོ།

³³སྤུན་རྣམས་ཀྱང་ཡོ་སེབ་ཀྱི་མདུན་དུ་རྒན་གཞོན་རིམ་པ་བཞིན་སྔོན་སྐྱེས་ནས་མཐའ་མ་ཆུང་བའི་བར་དུ་བཞག་པས། ཁོང་ཚོ་གཅིག་གིས་གཅིག་ལ་བལྟས་ཏེ་ངོ་མཚར་དུ་གྱུར་ཏོ།

³⁴ཁོང་ཚོ་ལ་ཡོ་སེབ་ཀྱི་རྩོག་རྩེ་ནས་ཁ་ཟས་བགོས་པ་དང་། བྷེན་ཡ་མིན་ལ་སྐལ་བ་ལྔ་ལྡབ་སྤྲད་དོ། དེ་ལྟར་ཁོང་ཚོ་ཡོ་སེབ་དང་མཉམ་དུ་ཟ་བ་དང་རྒུན་ཆང་འཐུང་ཞིང་སྐྱིད་པོ་བྱས་སོ༎