Read Tibetan — པོད་སྐད་Tibetan Old Testament 2011 ཤ་མུ་ཨེལ་གཉིས་པ། 14 Bible Online

ཤ་མུ་ཨེལ་གཉིས་པ། 14 - Tibetan — པོད་སྐད་Tibetan Old Testament 2011 bible

ཤ་མུ་ཨེལ་གཉིས་པ། 14

¹དེ་ནས་རྒྱལ་པོ་དཱ་བིད་ཀྱིས་ཨབ་ས་ལོམ་ལ་ཧ་ཅང་དྲན་ཏེ་ཁོའི་སྐོར་ལ་མྱ་ངན་བྱེད་ཀྱི་ཡོད་པ་དེ་ཡོ་ཨབ་ཀྱི་ཤེས་ཀྱི་ཡོད་དོ།

²ཁོས་ས་གནས་ཊེ་ཀོ་ཨ་རུ་གནས་སྡོད་བྱེད་པའི་བུད་མེད་བློ་གྲོས་ལྡན་པ་ཞིག་ཡོད་པ་དེ་ལ་བོས་ཏེ། བུད་མེད་དེ་དེར་སླེབས་པ་དང་ཁོས་མོ་ལ་སྨྲས་པ། ཁྱོད་ནི་མྱ་ངན་བྱེད་ཚུལ་གྱིས་སྐྱོ་གོས་གྱོན་ཏེ་མགོ་ལ་སྐྲ་ཤད་མ་རྒྱབ་ཅིང་། ཉིན་མ་མང་པོ་མྱ་ངན་ནང་དུ་ཡོད་པའི་བུད་མེད་དང་འདྲ་བའི་རྣམ་འགྱུར་སྟོན་ཞིག

³དེ་རྗེས་རྒྱལ་པོའི་དྲུང་དུ་ཕྱིན་ནས། དེར་ཁྱོད་ཀྱིས་གང་བཤད་དགོས་པ་དེ་ངས་ཁྱོད་ལ་བསླབ་རྒྱུ་ཡིན་པས། དེ་བཞིན་ཁྱོད་ཀྱིས་སྨྲོས་ཤིག་ཅེས་སྨྲས་ནས། མོས་གང་བཤད་དགོས་པ་དེ་ཡོ་ཨབ་ཀྱིས་མོ་ལ་སྨྲས་སོ།

⁴དེ་ནས་བུད་མེད་དེ་རྒྱལ་པོའི་དྲུང་དུ་བཅར་ནས་གུས་ཞབས་ཆེན་པོས་མགོ་བོ་ས་ལ་བཏུད་དེ་ཕྱག་འཚལ་ཞིང་། ཀྱེ་རྒྱལ་པོ་ཆེན་པོ་ང་ལ་སྐྱབས་གྲོགས་གནང་དུ་གསོལ་ཞེས་ཞུས་པ་དང་།

⁵རྒྱལ་པོས། ཁྱོད་ལ་ག་རེ་དགོས་པ་འདུག་ཅེས་གསུངས་པས། མོས་ལན་དུ། ང་ནི་ཡུག་མོ་ཉམས་ཐག་ཅིག་ཡིན་པ་དང་། ངའི་ཁྱོ་ག་འདས་ཟིན་ཅིང་།

⁶ང་ལ་བུ་གཉིས་ཡོད་དེ། ཉིན་ཅིག་ཁོ་གཉིས་ཞིང་ཁར་འཐབ་འཛིང་བྱས་པས། སྐབས་དེར་ཁོ་གཉིས་ལ་བར་མི་བྱེད་མཁན་སུའང་མེད་སྟབས། བུ་གཅིག་གིས་གཞན་དེ་ལ་བསད་པ་ཡིན་པས།

⁷ད་ངའི་སྤུན་དང་གཉེན་མཚན་ཚང་མས་ང་ལ་རྒྱབ་འགལ་བྱས་ཏེ། ངའི་བུ་གཅིག་པོ་དེའང་དེ་ཚོའི་ལག་ཏུ་རྩིས་སྤྲོད་བྱེད་དགོས་ཤེས་ཟེར་བ་མ་ཟད། ཁོས་རང་གི་སྤུན་བསད་པ་ཡིན་པས། དེའི་ཉེས་ལན་དུ་ཁོ་ཡང་བསད་དགོས་ཤེས་སྨྲས་སོ། གལ་སྲིད་ངའི་བུ་གཅིག་པོ་དེའང་ཁོ་ཚོའི་ལག་ཏུ་རྩིས་སྤྲོད་པ་ཡིན་ན། ང་ལ་བུ་གཅིག་ཀྱང་མ་ལུས་ཤིང་། ང་ནི་རེ་ཐབས་ཀུན་ལས་བྲལ་ཏེ། ངའི་ཁྱོ་གའི་མིང་དང་རིགས་བརྒྱུད་འཛིག་རྟེན་འདི་ནས་ཡལ་བར་འགྱུར།

⁸རྒྱལ་པོས་ལན་དུ། ད་ལྟ་ཁྱོད་ནང་དུ་ཕྱིར་ལོག་བྱོས་ཤིག། ངས་དོན་གནས་འདིའི་སྐོར་ལ་ཞིབ་དཔྱོད་བྱེད་རྒྱུ་ཡིན་ཞེས་གསུངས་སོ།

⁹མོས། ཀྱེ་རྒྱལ་པོ་ཆེན་པོ། ཁྱེད་ཀྱིས་ཞིབ་དཔྱོད་དགོངས་ཞེས་ག་རེ་གནང་ནའང་། དོན་གནད་དེའི་ཉེས་ལན་ནི་ང་དང་ངའི་ནང་མིས་འཁྱེར་རྒྱུ་ཡིན་པས། རྒྱལ་པོ་རང་ཉིད་དང་ཁྱེད་ཀྱི་སྐུ་འཁོར་ཚང་མར་གནོང་ཉེས་སོགས་གང་ཡང་མེད་ཅེས་ཞུས་པ་དང་།

¹⁰ལན་དུ་རྒྱལ་པོས། གལ་སྲིད་སུ་ཞིག་གིས་ཁྱོད་ལ་སྡིག་ར་བསྐུལ་བ་ཡིན་ན། མི་དེ་ངའི་རྩར་འཁྲིད་ཤོག་ཅིག། དེས་ཁྱོད་ལ་སྐྱར་དུ་གནོད་འཚེ་བཏང་མི་ཡོང་ཞེས་གསུངས་སོ།

¹¹ཡང་མོས། ཀྱེ་རྒྱལ་པོ་ཆེན་པོ། ངའི་བུའི་དགྲ་ཤ་ལེན་འདོད་བྱེད་མཁན་ངའི་གཉེན་མཚན་ཚོས་ངའི་བུ་གཞན་དེའང་བསད་ནས། སྔར་ལས་ལྷག་པའི་སྡིག་པ་ཉེན་ཆབས་ཆེ་བ་ཞིག་བྱེད་མི་དགོས་པའི་ཕྱིར། གཙོ་བོ་དཀོན་མཆོག་ཉིད་ཀྱི་དཀོན་མཆོག་ལ་ཐུགས་སྨོན་གནང་བར་མཛོད་ཅེས་ཞུས་པ་དང་། དཱ་བིད་ཀྱིས་ལན་དུ། ང་ནི་སྐུ་གསོན་པོར་བཞུགས་པའི་གཙོ་བོ་དཀོན་མཆོག་གི་མཚན་བརྗོད་དེ་མནའ་སྐྱེལ་རྒྱུར། ཁྱོད་ཀྱི་བུ་ལ་སུས་ཀྱང་གནོད་འཚེ་སྐྱེལ་མི་ཐུབ་ཅེས་གསུངས་པ་དང་།

¹²ཡང་བུད་མེད་དེས། ཀྱེ་མི་དབང་ཆེན་པོ། ད་དུང་ངས་ཁྱེད་ལ་སྐྱབས་འཇུག་གཞན་ཞིག་ཞུས་ཆོག་པ་གནང་དུ་གསོལ་ཞེས་སྨྲས་པས། རྒྱལ་པོས་ད་སྨྲོས་ཤིག་གསུངས་སོ།

¹³མོས་རྒྱལ་པོ་ལ། ཁྱེད་ཀྱིས་དཀོན་མཆོག་གི་མི་རྣམས་ལ་དེ་ལྟ་བུའི་ལས་ངན་གནང་བ་དེ་གང་ཡིན་ནམ། ཡུལ་ནས་ཕྱིར་འབུད་བྱས་པའི་ཉིད་ཀྱི་སྲས་དེའང་རང་ཡུལ་དུ་ཕྱིར་ལོག་བྱེད་ཆོག་པའི་བཀའ་མ་གནང་ངོ་། དེ་བས་ན་ད་ལྟ་གསུངས་བའི་གཏམ་གྱི་སྒོ་ནས་ཁྱེད་ཀྱི་རང་ཉིད་ལ་ཉེས་ཅན་བཟོས་གནང་ཡོད།

¹⁴ང་ཚོ་ཚང་མ་ཤི་དགོས་སོ། ང་ཚོ་ནི་ས་ཁར་ཤོས་པའི་ཆུ་དང་མཚུངས་ཏེ། ཆུ་དེ་ནི་སྐྱར་དུ་ཡར་བླངས་མི་ཐུབ་པ་ཡིན་ནོ། འཆི་བའི་མི་དེ་གཙོ་བོ་དཀོན་མཆོག་གིས་ཀྱང་སླར་ཡང་གསོན་པོར་བཟོས་མི་གནང་མོད། འོན་ཀྱང་རྒྱལ་པོས་མི་ཞིག་ཕྱིར་འབུད་བཏང་བའི་ཡུལ་ནས་ངེས་པར་འཁྱེར་ཡོང་ཐུབ་པ་ཞིག་ཡིན་ནོ།

¹⁵མི་རྣམས་ཀྱིས་ང་ལ་སྡིག་ར་བསྐུལ་བ་ཡིན་པས། ངས་རྒྱལ་པོ་ཁྱེད་ལ་ཞུ་བ་འདི་འབུལ་གྱི་ཡོད། གང་ལགས་ཟེར་ན། ངས་གང་ཞུས་པ་དེ་ཁྱེད་ཀྱིས་གནང་ཡོང་བསམ་པའི་རེ་འདོད་ཆེན་པོ་ཞིག་འབྱུང་།

¹⁶ད་ང་དང་ངའི་བུ་ལ་གསོད་ཐབས་བྱས་ཏེ། དཀོན་མཆོག་གིས་ཉིད་ཀྱི་མི་འབངས་རྣམས་ལ་གནང་བའི་ཡུལ་དེ་ནས་ང་ཚོ་བཏོན་ཐབས་བྱེད་མཁན་དེ་ལས་ཁྱེད་ཀྱིས་ང་ཚོར་སྐྱབས་པ་གནང་ཡོང་ཞེས་བསམ་བྱུང་།

¹⁷རྒྱལ་པོ་ཁྱེད་ཀྱི་དམ་བཅས་ང་ལ་སྲུང་སྐྱོབས་གནང་ཡོང་ཞེས་བསམ་བྱུང་། གང་ལགས་ཟེར་ན། རྒྱལ་པོ་ནི་དཀོན་མཆོག་གི་ཕོ་ཉ་དང་མཚུངས་ཤིང་བཟང་ངན་དབྱེ་འབྱེད་གནང་ཐུབ་པ་ཞིག་ཡིན་ནོ། གཙོ་བོ་དཀོན་མཆོག་ཉིད་ཀྱི་དཀོན་མཆོག་ཁྱེད་དང་མཉམ་དུ་འགྲོགས་པར་ཤོག་ཅེས་ཞུས་སོ།

¹⁸དེའི་ལན་དུ་རྒྱལ་པོས། ད་ངས་ཁྱོད་ལ་འདྲི་བ་ཞིག་འདྲི་རྒྱུ་ཡིན་པས། དེར་ཁྱོད་ཀྱིས་ལན་འདེབས་དྲང་པོ་ཞིག་རྒྱབ་དགོས་ཤེས་གསུངས་པ་དང་། མོས་ལན་དུ། ཀྱེ་མི་དབང་ཆེན་པོ། ཁྱེད་ཀྱི་ཐུགས་འདོད་བཞིན་དུ་བཀའ་འདྲི་གནང་བར་མཛོད་ཅེས་ཞུས་སོ།

¹⁹དེ་ནས་ཁོང་གིས། གཏམ་འདི་ཚོ་བྱེད་པར་ཁྱོད་ལ་ཡོ་ཨབ་ཀྱིས་རྒྱུ་བསྐུལ་བྱས་བྱུང་ངམ་ཞེས་གསུངས་པ་དང་། མོས་ལན་དུ། ཀྱེ་རྒྱལ་པོ་ཆེན་པོ། ངས་ཁྱེད་ཀྱི་མཛད་བཟང་དམ་པའི་མནའ་སྐྱེལ་ནས་ཞུ་རྒྱུར། ཁྱེད་ཀྱིས་བཀའ་འདྲི་གང་གནང་བ་དེ་ལ་ལན་འདེབས་མ་བྱེད་པར་གཡོལ་ཐབས་རྩ་བ་ནས་མེད། དེ་བས་ན། ཁྱེད་ཀྱི་ཞབས་ཕྱི་ཡོ་ཨབ་ཀྱིས་ང་ལ་ངས་གང་བྱེད་དགོས་པ་དང་བཤད་དགོས་པ་ཚང་མ་བསླབ་ནས་བཏང་བྱུང་།

²⁰གནས་ཚུལ་འདི་དག་ཤོད་ཐུབ་པའི་ཕྱིར་ཁོས་འདི་ལྟར་བྱས་པ་ཡིན། རྒྱལ་པོ་ཁྱེད་ནི་དཀོན་མཆོག་གི་ཕོ་ཉ་དང་མཚུངས་པའི་མཁྱེན་གྱི་ཡོད། ཡུལ་དུ་བྱུང་བའི་གནས་ཚུལ་ཚང་མ་མཁྱེན་ཐུབ་པ་ཡིན་ནོ།

²¹རྗེས་སུ་རྒྱལ་པོས་ཡོ་ཨབ་ལ། ཁྱོད་ཀྱིས་གང་འདོད་པ་བཞིན་ངས་བྱེད་རྒྱུའི་ཐག་གཅོད་བྱས་པ་ཡིན་པས། ད་ཁྱོད་ཕྱིན་ནས་གཞོན་ནུ་ཨབ་ས་ལོམ་ལ་འདིར་ཕྱིར་ལོག་འཁྲིད་ཤོག་ཅེས་གསུངས་སོ།

²²དེ་ནས་ཡོ་ཨབ་ཀྱིས་གུས་པ་ཆེན་པོས་དཱ་བིད་ཀྱི་དྲུང་དུ་ཕྱག་འཚལ་ཞུས་ཏེ། ཀྱེ་རྒྱལ་པོ་ཆེན་པོ། དཀོན་མཆོག་གིས་ཁྱེད་ལ་བྱིན་རླབས་གནང་བར་ཤོག ཁྱེད་ང་དང་ཐུགས་མཉེས་པོ་ཡོད་པ་དེ་ད་ངས་ཤེས་བྱུང་། གང་ལགས་ཟེར་ན། ངས་ཞུ་བར་ཁྱེད་ཀྱིས་གསན་ཆོག་གནང་སོང་ཞེས་ཞུས་པ་དང་།

²³དེ་རྗེས་ཁོ་ཡར་ལངས་ཏེ་གྷེ་ཤུར་དུ་ཕྱིན་ནས་ཨབ་ས་ལོམ་ཡེ་རུ་ཤ་ལེམ་དུ་འཁྲིད་ཡོང་ངོ་།

²⁴འོན་ཀྱང་རྒྱལ་པོས་ཨབ་ཤ་ལོམ་ཕོ་བྲང་ནང་དུ་སྡོད་མི་ཆོག་ཅེས་བཀའ་གནང་ཡོད་པ་ཡིན་ནོ། ང་ནི་ཁོ་ལ་བལྟ་ཡང་མི་འདོད་ཅེས་རྒྱལ་པོས་གསུངས་སོ། དེར་བརྟེན་ཨབ་ཤ་ལོམ་སོ་སོའི་ཁང་ཁྱིམ་ནང་དུ་བསྡད་པ་དང་། རྒྱལ་པོའི་གཟིགས་ངོར་མ་མཐོང་ངོ་༎

²⁵ཨིསི་རཱཨེལ་ཡོངས་སུ་ཨབ་ས་ལོམ་དང་འདྲ་བའི་བྱད་གཟུགས་ལེགས་པའི་མི་ཞིག་སུའང་མེད་ཅིང་། ཁོའི་མགོ་ནས་རྐང་མཐིལ་བར་སྐྱོན་གང་ཡང་མེད་པ་ཡིན་ནོ།

²⁶ཁོའི་སྐྲ་ནི་ཧ་ཅང་གི་མཐུག་པོ་དང་ལྗིད་པོ་ཆགས་དུས་ལོག་རེར་ཐེངས་རེར་འབྲེག་དགོས་ཀྱི་ཡོད་པ་དང་། འབྲེག་ཟིན་པའི་སྐྲའི་ལྗིད་ཚད་ནི་གཞུང་སྲོལ་ལྗིད་ཚད་ལྟར་ཀི་ལོ་གཉིས་ལས་ལྷག་ཙམ་ཡོད་པ་ཡིན་ནོ།

²⁷ཨབ་ས་ལོམ་ལ་བུ་གསུམ་དང་བུ་མོ་གཅིག་ཡོད་དེ། ཡང་མོའི་མིང་ལ་ཏ་མཱར་ཟེར་བ་དང་། མོ་ནི་ཧ་ཅང་བྱད་གཟུགས་མཛེས་མོ་ཞིག་ཡོད་པ་ཡིན་ནོ།

²⁸ཨབ་ས་ལོམ་ལོ་གཉིས་བར་དུ་རྒྱལ་པོ་དང་མ་མཇལ་བར་ཡེ་རུ་ཤ་ལེམ་དུ་བསྡད་དོ།

²⁹དེ་རྗེས་ཁོས་རང་གི་ཚབ་ཏུ་ཡོ་ཨབ་ལ་རྒྱལ་པོའི་དྲུང་དུ་གཏོང་ཕྱིར་སྐད་བཏང་ཡང་། འོན་ཀྱང་ཡོ་ཨབ་མ་ཡོང་ངོ་། ཡང་ཨབ་ས་ལོམ་གྱིས་ཁོ་ལ་སྐྱར་དུ་བོས་ཀྱང་ཁོ་མ་ཡོང་བས།

³⁰དེར་བརྟེན་ཨབ་ས་ལོམ་གྱིས་རང་གི་གཡོག་པོ་རྣམས་ལ། ལྟོས་ཤིག། ཡོ་ཨབ་ཀྱི་ཞིང་ནི་ངའི་ཞིང་གི་འགྲམ་དུ་ཡོད་པས། དེར་འབྲུ་སྐྱེས་ནས་ཡོད་ཅིང་། ཁྱོད་ཕྱིན་ནས་ཞིང་ཁར་མེ་རྒྱོབ་ཅིག་ཅེས་སྨྲས་པ་བཞིན། དེ་ཚོ་ཕྱིན་ནས་ཞིང་ཁར་མེ་རྒྱབ་པ་རེད།

³¹དེ་ནས་ཡོ་ཨབ་ཨབ་ས་ལོམ་གྱི་ནང་དུ་ཕྱིན་ནས། ཁྱོད་ཀྱི་གཡོག་པོ་ཚོས་ངའི་ཞིང་ཁར་མེ་རྒྱབ་དགོས་དོན་དེ་གང་ཡིན་ནམ་ཞེས་འདྲི་རྩད་བྱས་པར།

³²ལན་དུ་ཨབ་ས་ལོམ་གྱིས། ངས་ཁྱོད་རྩར་མི་བཏང་ནས་བོས་ཀྱང་ཁྱོད་སླེབས་མ་བྱུང་། ཁྱོད་རང་ངའི་ཚབ་ཏུ་རྒྱལ་པོའི་དྲུང་དུ་བཅར་ནས། ང་ནི་གྷེ་ཤུར་ནས་འདིར་ཡོང་དགོས་དོན་གང་ཡིན་ནམ། ང་ཕར་བསྡད་པ་ཡིན་ནའང་ཡག་པོ་ཡོང་ང་ཡོད། ད་ཁྱོད་ཀྱིས་ང་རྒྱལ་པོ་དང་མཇལ་འཕྲད་བྱུང་ཐུབ་པའི་ཐབས་བྱོས་ཤིག གལ་སྲིད་ང་ལ་ནག་ཉེས་ཡོད་པ་ཡིན་ན་རྒྱལ་པོས་ང་ལ་ཉེས་པ་སྲོག་ཐོག་ཏུ་གཏོང་བར་ཤོག་ཅེས་སྨྲས་སོ།

³³དེར་བརྟེན་ཡོ་ཨབ་རྒྱལ་པོ་དཱ་བིད་ཀྱི་དྲུང་དུ་བཅར་ནས་ཨབ་ས་ལོམ་གྱིས་གང་སྨྲས་པ་བཞིན་ཞུས་པས། རྒྱལ་པོས་ཨབ་ས་ལོམ་ལ་བོས་པའི་ཕྱིར་བཏང་བ་དང་། ཨབ་ས་ལོམ་རྒྱལ་པོའི་དྲུང་དུ་བཅར་ནས་ས་ལ་ཁ་འབུབ་སྟེ་ཕྱག་འཚལ་བ་དང་། རྒྱལ་པོས་ཁོ་ལ་འོ་བྱས་ཏེ་ཕེབས་བསུ་གནང་ངོ་༎