Read Tibetan — པོད་སྐད་Tibetan Old Testament 2011 ཤ་མུ་ཨེལ་གཉིས་པ། 8 Bible Online

ཤ་མུ་ཨེལ་གཉིས་པ། 8 - Tibetan — པོད་སྐད་Tibetan Old Testament 2011 bible

ཤ་མུ་ཨེལ་གཉིས་པ། 8

¹ནམ་ཞིག་རྗེས་སུ་རྒྱལ་པོ་དཱ་བིད་ཀྱིས་ཕེ་ལེ་ཤེད་པ་རྣམས་ཀྱི་ཐོག་ཏུ་སླར་ཡང་འཐབ་རྒོལ་བྱས་ཏེ། དེ་ཚོ་འཕམ་པར་བྱས་ནས་ཡུལ་གྱི་ཐོག་ཏུ་དེ་ཚོའི་དབང་ཆ་འཚམས་འཛོག་བྱས་སོ།

²དེ་བཞིན་མོ་ཨབ་པ་རྣམས་ཀྱི་ཐོག་ཏུའང་རྒྱལ་ཁ་ཐོབ་སྟེ། བཙོན་པ་རྣམས་ས་ཁར་ཉལ་དུ་བཅུག་ནས། མི་གྲངས་གསུམ་རེའི་ནང་ནས་མི་གཉིས་རེ་བསད་དུ་བཅུག་གོ དེ་བཞིན་མོ་ཨབ་པ་རྣམས་ཁོང་གི་མི་འབངས་སུ་ཚུད་དེ་ཁོང་ལ་ཁྲལ་འཇལ་ལོ།

³དེ་རྗེས་ཁོང་གིས་ཛོ་བཱའི་ས་ཁོངས་ཀྱི་སི་རི་ཡ་པའི་མངའ་སྡེའི་རྒྱལ་པོ་ཧ་དྷད་ཨེ་ཟེར་ལ་དབང་འགྱུར་བྱས་ཤིང་། ཧ་དྷད་ཨེ་ཟེར་ནི་རེ་ཧོབ་ཀྱི་བུ་ཡིན་པ་དང་། སྐབས་དེར་ཧ་དྷད་ཨེ་ཟེར་ནི་གཙང་པོ་ཡུབ་རད་ཀྱི་ས་ཁུལ་ཐོད་མ་ཁག་རང་གི་དབང་འོག་ཏུ་བླངས་ཐབས་བྱེད་ཅིང་ཡོད་དོ།

⁴དཱ་བིད་ཀྱིས་ཁོའི་རྟ་དམག་ ༡,༧༠༠ དང་རྐང་དམག་ ༢༠,༠༠༠ འཛིན་བཟུང་བྱས་ཏེ། དེའི་ཁོངས་ནས་ཤིང་རྟ་འཁོར་ལོ་ ༡༠༠ ཙམ་ལ་མཁོ་བའི་རྟ་རྣམས་ཉར་ནས་དེ་འཕྲོས་རྟ་ཚང་མར་རྐང་སྐྱོག་བཟོས་པ་རེད།

⁵དྷ་མསེ་ཀསེ་ཀྱི་ཨ་རམ་པ་རྣམས་ནས་རྒྱལ་པོ་ཧ་དྷད་ཨེ་ཟེར་ལ་རོགས་རམ་བྱེད་ཕྱིར་དམག་དཔུང་ཞིག་བཏང་མོད། འོན་ཀྱང་དཱ་བིད་ཀྱིས་དེ་ཚོ་འཐབ་རྒོལ་བྱས་ཏེ། མི་གྲངས་ ༢༢,༠༠༠ བསད་དོ།

⁶དེ་རྗེས་ཁོང་གིས་དེ་ཚོའི་ས་ཁུལ་དུ་དམག་སྒར་ཁག་རྒྱབ་ནས། དེ་ཚོ་ཁོང་གིས་མི་འབངས་སུ་འགྱུར་བས། ཁོང་ལ་བཅའ་ཁྲལ་སོགས་འཇལོ། གཙོ་བོ་དཀོན་མཆོག་གིས་དཱ་བིད་ལ་ས་ཕྱོགས་ཀུན་ཏུ་རྒྱལ་ཁ་གནང་བ་ཡིནོ།

⁷ཧ་དྷད་ཨེ་ཟེར་གྱི་ལས་བྱེད་པ་ཚོས་འཁྱེར་བའི་གསེར་གྱི་ཕུབ་དེ་དག་དཱ་བིད་ཀྱིས་བླངས་ནས་ཡེ་རུ་ཤ་ལེམ་དུ་འཁྱེར་ཡོང་བ་མ་ཟད།

⁸ཧ་དྷད་ཨེ་ཟེར་གྱིས་སྲིད་སྐྱོང་བྱས་པའི་གྲོང་ཁྱེར་བྷེ་ཏཱ་དང་བྷེ་རོ་ཐའི་ནས་ཁོང་གིས་ལིའི་རྒྱུ་ཆ་ཕོན་ཆེན་པོ་ཞིག་འཁྱེར་ཕྱིནོ།

⁹དཱ་བིད་ཀྱིས་ཧ་དྷད་ཨེ་ཟེར་གྱི་དམག་ཚོགས་ཡོངས་རྫོགས་འཕམ་པར་བྱས་པའི་གནས་ཚུལ་དེ་ཧ་མད་ཀྱི་རྒྱལ་པོ་ཏོ་ཨིས་ཐོས་ནས།

¹⁰རང་གི་བུ་ཡོ་རམ་ལ་དཱ་བིད་དང་ཐུག་འཕྲད་ཀྱིས་འཚམས་འདྲི་ཞུ་རྒྱུ་དང་། ཁོང་གིས་ཧ་དྷད་ཨེ་ཟེར་ཐོག་ཏུ་རྒྱལ་ཁ་ཐོབ་པར་སྔགས་བརྗོད་ཞུ་ཕྱིར་བཏངོ་། ཏོ་ཨིས་ཀྱང་ཧ་དྷད་ཨེ་ཟེར་དང་མཉམ་དུ་ལན་ཐེངས་མང་པོ་འཐབ་རྒོལ་བྱས་པ་རེད། ཡོ་རམ་གྱིས་དཱ་བིད་ལ་འབུལ་ཕྱིར་གསེར་དངུལ་དང་ལི་ལས་འགྲུབ་པའི་ཕྱག་རྟགས་སོགས་འཁྱེར་ཕྱིན་པ་རེད།

¹¹རྒྱལ་པོ་དཱ་བིད་ཀྱིས་ཕྱག་རྟགས་དེ་དག་དང་། ཨེ་དྷོམ། མོ་ཨབ། ཨམ་མོན། ཕེ་ལེ་ཤེད་དང་། ཨ་མ་ལེག་པ་བཅས་ནས་ཐོབ་པའི་གསེར་དངུལ་སོགས་དང་། ཧ་དྷད་ཨེ་ཟེར་ནས་འཕྲོག་བཅོམ་བྱས་པའི་ནོར་གྱི་ཆ་ཤས་ཤིག་མཆོད་འབུལ་སྐབས་སུ་བེད་སྤྱོད་བྱེད་ཕྱིར་བསྔོ་འབུལ་བྱསོ།

¹³ཚའི་ལུང་གཤོང་དུ་ཨེ་དྷོམ་པ་མི་གྲངས་ ༡༨,༠༠༠ བསད་ནས་ཕྱིར་ལོག་བྱས་པའི་རྗེས་སུ། དཱ་བིད་སྔར་ལས་ཀྱང་ལྷག་པར་སྙན་གྲགས་ཆེ་བ་བྱུངོ་།

¹⁴ཁོང་གིས་ཨེ་དྷོམ་གྱི་ས་ཕྱོགས་ཀུན་ཏུ་དམག་སྒར་རྣམས་རྒྱབ་སྟེ། དེ་གའི་ཡུལ་མི་རྣམས་ཁོང་གི་འབངས་སུ་ཚུདོ། གཙོ་བོ་དཀོན་མཆོག་གིས་དཱ་བིད་ལ་ས་ཕྱོགས་ཀུན་ཏུ་རྒྱལ་ཁ་ཆེན་པོ་གནང་བ་རེད།

¹⁵དཱ་བིད་ཀྱིས་ཨིསི་རཱཨེལ་ཡོངས་སུ་སྲིད་སྐྱོང་མཛད་དེ། རང་གི་མི་འབངས་ལ་དུས་ཀུན་ཏུ་ཁྲིམས་གཅོད་དྲང་པོ་ཐོབ་པའི་འབད་བརྩོན་ངེས་གཏན་བྱས་པ་རེད།

¹⁶ཛེ་རུ་ཡཱའི་བུ་ཡོ་ཨབ་ནི་དམག་སྤྱི་ཡིན་པ་དང་། ཨ་ཧི་ལུད་ཀྱི་བུ་ཡ་ཧོ་ཤ་ཕད་ནི་རྒྱལ་པོའི་དྲུང་གཙོ་ཡིན་ནོ།

¹⁷ཨ་ཧི་ཏུབ་ཀྱི་བུ་ཛ་དཱོག་དང་ཨ་བྷི་ཡ་ཐར་གྱི་བུ་ཨ་ཧི་མེ་ལེག་ནི་བླ་མ་ཡིན་ཏེ། དེ་བཞིན་སེ་ར་ཡཱ་ནི་ཕོ་བྲང་གི་དྲུང་ཆེ་ཡིན་པ་དང་།

¹⁸ཡ་ཧོ་ཡ་དྷའི་བུ་བྷེ་ན་ཡཱ་ནི་དཱ་བིད་ཀྱི་སྐུ་སྲུང་དམག་མིའི་འགོ་དཔོན་ཡིན་པ་དང་། དཱ་བིད་ཀྱི་བུ་རྣམས་ནི་བླ་མའི་གོ་གནས་སུ་འཁོད་པ་རེད༎