Read Tibetan — པོད་སྐད་Tibetan Old Testament 2011 རྒྱལ་རབས་དང་པོ། 16 Bible Online

རྒྱལ་རབས་དང་པོ། 16 - Tibetan — པོད་སྐད་Tibetan Old Testament 2011 bible

རྒྱལ་རབས་དང་པོ། 16

¹གཙོ་བོ་དཀོན་མཆོག་གིས་ཧ་ན་ནིའི་བུ་ལུང་སྟོན་པ་ཡེ་ཧུ་བརྒྱུད་ནས་བྷ་ཤ་ལ་བཀའ་འདི་ལྟར་གནང་ངོ་།

²ཁྱོད་སུ་ཞིག་ཀྱང་མ་ཡིན། འོན་ཀྱང་ངས་ཁྱོད་ལ་ཨིསི་རཱཨེལ་གྱི་མི་མང་གི་འགོ་པར་བསྐོས་པ་ཡིན། ད་ཆ་ཁྱོད་ཀྱིས་ཡེ་རོ་བྷམ་ལྟར་སྡིག་ཅན་ཡིན་པ་མ་ཟད། ངའི་མི་མང་ལ་ཡང་སྡིག་པ་བྱེད་དུ་བཅུག་གོ། དེ་ཚོའི་སྡིག་པའི་རྐྱེན་གྱིས་ང་ལ་ཁོང་ཁྲོ་སླངས་ཡོད་དོ།

³ངས་ཡེ་རོ་བྷམ་ལ་བྱས་པ་ལྟར་ཁྱོད་དང་ཁྱོད་ཀྱི་ནང་མི་རྣམས་ལའང་མེད་པ་བཟོ་རྒྱུ་ཡིན་ནོ།

⁴ཁྱོད་ཀྱི་ནང་མི་གྲོང་ཁྱེར་ནང་ཤི་བ་ཚོ་ཁྱིས་ཟ་བ་དང་། ཐང་དུ་ཤི་བ་ཚོ་བྱ་རྒོད་ཀྱིས་ཟ་བར་བྱའོ།

⁵བྷ་ཤས་མཛད་པ་རྣམས་དང་ཁོང་གི་བློ་སྟོབས་ཆེན་པོའི་བྱ་བ་རྣམས་ཨིསི་རཱཨེལ་གྱི་རྒྱལ་པོ་རྣམས་ཀྱི་རྒྱལ་རབས་ནང་བཀོད་ཡོད་དོ།

⁶བྷ་ཤ་གྲོངས་པ་དང་ཁོང་ཏིར་ཛཱ་རུ་དུར་དུ་སྦས་པའི་རྗེས་སུ་ཁོང་གི་བུ་ཨེ་ལཱ་ཁོང་གི་ཤུལ་འཛིན་དུ་རྒྱལ་པོར་འགྱུར་རོ།

⁷བྷ་ཤས་གཙོ་བོ་དཀོན་མཆོག་གི་དྲུང་དུ་སྡིག་པ་གྱིས་པའི་རྐྱེན་གྱིས་གཙོ་བོ་དཀོན་མཆོག་གིས་ལུང་སྟོན་པ་ཡེ་ཧུ་བརྒྱུད་ནས་བྷ་ཤ་དང་ཁོའི་ནང་མི་རྣམས་ལ་བཀའ་གནང་བ་དེ་ཡེ་ཧུས་ཁོ་ལ་གསུངས་ཡོད་དོ། བྷ་ཤས་རྒྱལ་པོ་ཡེ་རོ་བྷོམ་གྱིས་སྡིག་པ་གྱིས་ནས་གཙོ་བོ་དཀོན་མཆོག་གི་ཐུགས་དཀྲུགས་པ་གཅིག་པུ་མ་ཡིན་པར། ཡེ་རོ་བྷོམ་གྱི་ནང་མི་ཚང་མ་བསད་པའི་རྐྱེན་གྱིས་ཁོང་གི་ཐུགས་དཀྲུགས་ཡོད་དོ༎

⁸ཡ་ཧུ་དཱའི་རྒྱལ་པོ་ཨ་སས་རྒྱལ་སྲིད་སྐྱངས་ནས་ལོ་ངོ་ཉི་ཤུ་རྩ་དྲུག་ སོང་བའི་སྐབས་སུ་བྷ་ཤའི་བུ་ཨེ་ལཱ་ཨིསི་རཱཨེལ་གྱི་རྒྱལ་པོར་འགྱུར་བ་དང་། ཁོང་གི་ཏིར་ཛཱ་རུ་ལོ་གཉིས་རིང་རྒྱལ་སྲིད་སྐྱངས་སོ།

⁹ཁོང་གི་འགན་འཁུར་བ་ཛིམ་རི་བྱ་བ་རྒྱལ་པོའི་ཤིང་རྟ་འཁོར་ལོ་ཕྱེད་ཀའི་དོ་དམ་པ་ཡིན་པ་དེས་ཁོང་ལ་བྱུས་ངན་བརྩམ་མོ། ཉིན་ཞིག་ཏིར་ཛཱ་རུ་ཨེ་ལཱའི་ཕོ་བྲང་གི་དོ་དམ་པ་ཨར་ཛ་ཞེས་པ་དེའི་ཁྱིམ་དུ་རྒྱལ་པོ་ཨེ་ལས་ཆང་ར་བཟི་བཟི་འཐུང་བཞིན་ཡོད་སྐབས་སུ།

¹⁰ཛིམ་རི་ཁང་པའི་ནང་དུ་འཛུལ་ནས་ཨེ་ལཱ་བསད་ནས་ཁོས་རྒྱལ་སྲིད་བཟུང་ངོ། དེ་ནིི་ཡ་ཧུ་དཱ་པའི་རྒྱལ་པོ་ཨ་སས་རྒྱལ་སྲིད་སྐྱངས་ནས་ལོ་ཉི་ཤུ་རྩ་བདུན་འགྲོ་སྐབས་བྱུང་བ་ཡིན་ནོ།

¹¹ཛིམ་རི་རྒྱལ་པོར་འགྱུར་མ་ཐག་ཏུ་བྷ་ཤའི་ནང་མི་ཚང་མ་བསད་པ་མ་ཟད། ཁོའི་གཉེན་མཚན་སྐྱེས་པ་དང་གྲོགས་པོ་ཚང་མ་ཡང་བསད་དོ།

¹²དེ་ལྟར་གཙོ་བོ་དཀོན་མཆོག་གིས་བྷ་ཤའི་སྐོར་ལུང་སྟོན་པ་ཡེ་ཧུ་བརྒྱུད་ཇི་ལྟར་བཀའ་གནང་བ་ལྟར་ཛིམ་རིས་བྷ་ཤའི་ནང་མི་ཚང་མ་བསད་དོ།

¹³གང་ལགས་ཟེར་ན། དེ་ཚོས་སྐུ་འདྲར་མཆོད་པ་མ་ཟད། ཨིསི་རཱཨེལ་པ་ཚོ་ལ་ཡང་དེ་ལྟར་བྱེད་བཅུག་པའི་རྐྱེན་གྱིས་བྷ་ཤ་དང་ཁོང་གི་བུ་ཨེ་ལཱས་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་གི་ཐུགས་ཁྲོ་སླངས་ཡོད་པ་ཡིན་ནོ།

¹⁴ཨེ་ལའི་མཛད་པ་རྣམས་ཨིསི་རཱཨེལ་གྱི་རྒྱལ་པོ་རྣམས་ཀྱི་རྒྱལ་རབས་ནང་བྲིས་ཡོད་དོ༎

¹⁵ཡ་ཧུ་དཱའི་རྒྱལ་པོ་ཨ་སས་རྒྱལ་སྲིད་སྐྱངས་ནས་ལོ་ངོ་ཉི་ཤུ་རྩ་བདུན་སྐབས་སུ། ཏིར་ཛཱ་རུ་ཛིམ་རིས་ཨིསི་རཱཨེལ་པའི་སྟེང་དུ་ཉིན་བདུན་རིང་རྒྱལ་སྲིད་སྐྱངས་སོ། ཨིསི་རཱཨེལ་གྱི་དམག་དཔུང་གིས་ཕེ་ལེ་ཤེད་ཀྱི་གྲོང་ཁྱེར་གྷི་བེ་ཐོན་མཐའ་བསྐོར་ནས་བསྡད་བཞིན་པའི་སྐབས་སུ།

¹⁶ཛིམ་རིས་རྒྱལ་པོར་བྱུས་ངན་བརྩམས་ནས་ཁོང་དཀྲོངས་པའི་སྐོར་དེ་ཚོས་ཐོས་པ་དང་། དེ་ཚོས་རང་གི་དམག་སྤྱི་ཨོམ་རི་ཟེར་བར་ཨིསི་རཱཨེལ་གྱི་རྒྱལ་པོར་བསྐོས་ནས་གསལ་སྒྲགས་བྱས་སོ།

¹⁷ཨོམ་རི་དང་ཁོང་གི་དམག་དཔུང་ཚོས་གྷི་བེ་ཐོན་ནས་ཏིར་ཛཱ་ལ་མཐའ་བསྐོར་རོ།

¹⁸ཛིམ་རིས་གྲོང་ཁྱེར་ཤོར་བ་མཐོང་བ་དང་ཕོ་བྲང་ནང་གི་འཛིངས་རའི་ནང་ཕྱིན་ནས་ཕོ་བྲང་ལ་མེ་སྤར་ནས་རང་ཉིད་ཡང་མེ་ལྕེའི་ནང་འཆིའོ།

¹⁹ཁོས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་པའི་རྐྱེན་གྱི་རྐྱེན་ངན་འདི་བྱུང་བ་ཡིན་ནོ། སྔོན་གྱི་ཡེ་རོ་བྷམ་ལྟར་ཁོ་རང་གི་སྡིག་པ་བྱས་པ་མ་ཟད། ཨིསི་རཱཨེལ་པ་ཚོ་ལ་ཡང་དེ་ལྟར་བྱེད་བཅུག་ནས་གཙོ་བོ་དཀོན་མཆོག་ཐུགས་དཀྲུགས་པ་ཡིན་ནོ།

²⁰ཛིམ་རིས་མཛད་པའི་ལོ་རྒྱུས་རྣམས་དང་བྱུས་ངན་བརྩམས་པ་བཅས་ཨིསི་རཱཨེལ་གྱི་གྱལ་པོ་རྣམས་ཀྱི་རྒྱལ་རབས་ནང་བྲིས་ཡོད༎

²¹ཨིསི་རཱཨེལ་གྱིས་མི་མང་རྣམས་ཚོགས་ཁག་གཉིས་སུ་གྱེས་ནས་ཁོ་ཚོ་འགའ་ཞིག་གིས་གྷི་ནད་ཀྱི་བུ་ཏིབ་ནི་ལ་རྒྱལ་པོར་བསྐོས་འདོད་ཡོད་པ་དང་། ཚོགས་ཁག་གཞན་དེ་ནི་ཨོམ་རིའི་ཕྱོགས་སུ་ཡོད་དོ།

²²མཐའ་མར་ཨོམ་རིའི་ཕྱོགས་སུ་ཡོད་མཁན་ཚོ་རྒྱལ་བ་དང་ཏིབ་ནི་འཆི་ནས་ཨོམ་རི་རྒྱལ་པོར་འགྱུར་རོ།

²³དེ་ལྟར་ཡ་ཧུ་དཱ་པའི་རྒྱལ་པོ་ཨ་སས་རྒྱལ་སྲིད་བཟུང་ནས་ལོ་གསུམ་ཅུ་སོ་གཅིག་སོང་སྐབས་སུ། ཨོམ་རི་ཨིསི་རཱཨེལ་གྱི་རྒྱལ་པོར་འགྱུར་བ་དང་ལོ་བཅུ་གཉིས་རིང་རྒྱལ་སྲིད་བསྐྱངས་སོ། སྔོན་གྱི་ལོ་དྲུག་རིང་ཏིར་ཛཱ་རུ་རྒྱལ་སྲིད་བསྐྱངས་སོ།

²⁴དེ་ནས་ཁོས་ཤེ་མེར་ཟེར་བའི་མི་ནས་ས་མར་ཡའི་རི་དེ་དངུལ་དུམ་བུ་ ༦,༠༠༠ སྤྲད་ནས་ཉོས་སོ། དེ་ནས་དེའི་ཁར་ཨོམ་རིས་རི་དེའི་སྟེང་མཁར་རྫོང་དང་གྲོང་ཁྱེར་བཟོས་པ་དང་། ཐོག་མའི་རི་དེའི་བདག་པོ་ཤེ་མེར་གྱི་མིང་གི་རྗེས་སུ་ས་མར་ཡ་ཞེས་མིང་བཏགས་སོ།

²⁵ཨོམ་རིས་གཙོ་བོ་དཀོན་མཆོག་གི་སྤྱན་སྔར་སྔོན་གྱི་རྒྱལ་པོ་ཚང་མ་ལས་ལྷག་པའི་སྡིག་པ་གྱིས་ཡོད་དོ།

²⁶སྔོན་གྱི་ཡེ་རོ་བྷམ་ལྟར་རང་གི་སྡིག་པ་གྱིས་པ་མ་ཟད། མི་མང་ཚོ་ལ་ཡང་འདྲ་སྐུར་ཕྱག་མཆོད་བྱེད་བཅུག་ནས་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་ཐུགས་ཁྲོ་བསླངས་སོ།

²⁷ཨོམ་རིའི་མཛད་པ་རྣམས་དང་ཁོང་གི་བྱས་རྗེས་རྣམས་ཨིསི་རཱཨེལ་གྱི་རྒྱལ་པོ་རྣམས་ཀྱི་རྒྱལ་རབས་ནང་བྲིས་ཡོད་དོ།

²⁸ཨོམ་རི་གྲོངས་ནས་ས་མར་ཡ་རུ་དུར་དུ་སྦས་པའི་རྗེས་སུ་ཁོང་གི་བུ་ཨ་ཧབ་ཤུལ་འཛིན་དུ་རྒྱལ་པོར་འགྱུར་རོ༎

²⁹ཡ་ཧུ་དཱའི་རྒྱལ་པོ་ཨ་སས་རྒྱལ་སྲིད་བཟུང་ནས་ལོ་གསུམ་བཅུ་སོ་བརྒྱད་སོང་བའི་སྐབས་སུ། ཨོམ་རིའི་བུ་ཨ་ཧབ་ཨིསི་རཱཨེལ་གྱི་རྒྱལ་པོར་འགྱུར་བ་དང་ཁོང་གིས་ས་མར་ཡ་རུ་ལོ་ཉི་ཤུ་རྩ་གཉིས་རིང་རྒྱལ་སྲིད་བསྐྱངས་སོ།

³⁰ཁོང་གིས་གཙོ་བོ་དཀོན་མཆོག་གི་སྤྱན་སྔར་སྔོན་གྱི་རྒྱལ་པོ་ཚང་མ་ལས་ལྷག་པའི་སྡིག་པ་གྱིས་ཡོད་དོ།

³¹ཁོང་གིས་རྒྱལ་པོ་ཡེ་རོབ་ཨམ་གྱི་གྱིས་པའི་སྡིག་པ་ལས་འགལ་ཏེ་ད་རུང་ཁོང་གིས་སི་དོན་གྱི་རྒྱལ་པོ་ཨེད་བྷལ་གྱི་བུ་མོ་ཡེ་ཛི་བྷེལ་དང་ཆང་ས་བརྒྱབ་པ་མ་ཟད། བྷལ་ལ་མཆོད་པའི་ཕྱིར་རོ།

³²ཁོང་གིས་ས་མར་ཡ་རུ་བྷལ་ལ་ལྷ་ཁང་ཞིག་བཞེངས་པ་དང་། དེ་ལ་མཆོད་ཁྲི་ཞིག་བཟོས་ནས་ལྷ་ཁང་དེའི་ནང་བཞག་གོ

³³ཁོང་གིས་ལྷ་མོ་ཨ་ཤེ་རཱའི་འདྲ་སྐུ་ཞིག་ཀྱང་དེར་བཞག་གོ ཁོང་གིས་ཨིསི་རཱཨེལ་གྱི་སྔོན་གྱི་རྒྱལ་པོ་ཚང་མ་ལས་ལྷག་པའི་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་ཐུགས་ཁྲོ་བསླངས་སོ།

³⁴ཁོང་གི་སྐུ་དུས་སུ་བྷེ་ཐེལ་པ་ཧི་ཨེལ་གྱིས་ཡེ་རི་ཀོའི་གྲོང་ཁྱེར་སྐྱར་གསོ་གནང་བ་དང་། ཁོང་གིས་ཡེ་རི་ཀོའི་རྨང་གཞི་གཏིང་སྐབས་ཁོང་གི་བུ་རྒན་པ་ཨ་བྷི་རམ་ཤི་བ་དང་། རྒྱལ་སྒོ་བཟོ་སྐབས་བུ་ཆུང་བ་སེ་གུབ་ཟེར་བ་དེ་ནི་ཤིའོ། གཙོ་བོ་དཀོན་མཆོག་གིས་ནུན་གྱི་བུ་ཡོ་ཤུ་ཨ་བརྒྱུད་ལུང་བསྟན་གནང་བ་ལྟར་སྒྲུབས་པ་ཡིན་ནོ༎