Read Tibetan — པོད་སྐད་Tibetan Old Testament 2011 རྒྱལ་རབས་དང་པོ། 2 Bible Online

རྒྱལ་རབས་དང་པོ། 2 - Tibetan — པོད་སྐད་Tibetan Old Testament 2011 bible

རྒྱལ་རབས་དང་པོ། 2

¹དཱ་བིད་གྲོངས་པའི་དུས་ཉེ་བར་སླེབས་པ་དང་། ཁོང་རང་གི་བུ་སོ་ལོ་མོན་སྐད་བཏང་ནས་མཐའ་མའི་སློབ་སྟོན་འདི་ལྟར་གནང་ངོ།

²ད་ང་འཆི་བའི་དུས་ལ་སླེབས་ཡོད། ཁྱོད་རང་བློ་སེམས་བརྟན་པོ་དང་བློ་ཐག་ཆོད་པོ་བྱོས་ལ།

³གཙོ་བོ་དཀོན་མཆོག་ཁྱོད་ཀྱི་དཀོན་མཆོག་གིས་བཀའ་གང་གནང་བ་ཚང་མ་སྒྲུབ་ཅིག ཁྱོད་གང་དུ་སོང་ཡང་ཁྱོད་ཀྱི་ལས་གང་བྱེད་པ་ཚང་མར་ཡར་རྒྱས་གོང་འཕེལ་ཡོང་བའི་ཆེད་དུ། མོ་ཤེའི་བཀའ་ཁྲིམས་ནང་བྲིས་ཡོད་པའི་ཁྲིམས་དང་བཀའ་རྒྱ་ཚང་མ་སྒྲུབ་ཅིག

⁴ཁྱོད་ཀྱིས་ཁོང་གི་བཀའ་སྲུང་བ་ཡིན་ན་གཙོ་བོ་དཀོན་མཆོག་གིས་ང་ལ་གསུངས་པ་བཞིན་ངའི་བརྒྱུད་པ་ཚོས་སྙིང་ཡོངས་དང་སྲོག་ནས་ཁོང་གི་བཀའ་ཚང་མ་སྲུང་བ་ཡིན་ན་ཨིསི་རཱཨེལ་གྱི་རྒྱལ་ཁྲིའི་ཐོག་ཏུ་བཞུགས་མཁན་མི་ཞིག་ནམ་ཡང་ཆད་མི་ཡོང་ཞེས་པའི་ཁོང་གི་གནང་བའི་དམ་བཅའ་ཆ་ཚང་སྒྲུབ་པར་གནང་ཡོང།

⁵གནས་ཚུལ་གཞན་ཞིག་ལ། ཡོ་ཨབ་ཀྱིས་ཨིསི་རཱཨེལ་གྱི་དམག་དཔོན་ནེར་གྱི་བུ་ཨེབ་ནེར་དང་ཡེ་ཐེར་གྱི་བུ་ཨ་མ་ས་གཉིས་བསད་ནས་ང་ལ་ཅི་བྱས་པ་ཁྱོད་ཀྱིས་དྲན་གྱི་འདུག་གམ། ཁོ་ཚོ་གཉིས་ཀྱི་དམག་འཁྲུགས་སྐབས་བསད་པའི་གནས་ཚུལ་གྱི་དགྲ་ཤ་ལེན་པའི་ཆེད་ཁོས་ཞི་བདེའི་དུས་སྐབས་ལ་ཁོ་གཉིས་ལ་བསད་པའི་སྐོར་ལ་ཁྱོད་ཀྱིས་དྲན་ཞིག ཁོས་མི་སྐྱོན་མེད་རྣམས་བསད་ཡོད། ཁོས་བྱས་པའི་ཉེས་པའི་འགན་དེ་ད་ཆ་ངས་འཁུར་བཞིན་དེའི་འབྲས་བུ་མྱོང་ངོ།

⁶ཁྱོད་ཀྱིས་ག་རེ་བྱེད་དགོས་ཤེས་པས། ཁོ་ལ་ཞི་བདེ་ངང་རང་བཞིན་གྱིས་འཆི་རུ་མ་འཇུག་ཅིག

⁷འོན་ཀྱང་གྷིལ་ཨད་ནས་ཡིན་པ་བྷར་ཛི་ལའིི་བུ་ཚོར་བྱམས་བརྩེའི་ཐོག་བལྟ་རྟོགས་བྱོས་ཤིག གང་ལགས་ཟེར་ན། ང་ཁྱོད་རང་གི་སྤུན་རྒན་པ་ཨབ་ས་ལོམ་གྱི་རྩ་ནས་བྲོས་ཡོང་སྐབས་དེ་ཚོས་ང་ལ་དྲིན་བྱས་ཡོད།

⁸བྷེན་ཡ་མིན་གྱི་བྷ་ཧུ་རིམ་གྲོང་གི་གྷེ་རའི་བུ་ཤིམ་ཨི་ཡང་ཡོད། ང་མ་ཧ་ནེམ་དུ་འགྲོ་བའི་ཉིན་ཁོས་ང་ལ་དམོད་པ་དྲག་པོ་བརྒྱབ་བྱུང་། འོན་ཀྱང་ཁོ་ཆུ་བོ་ཡོར་དན་དུ་ཐུག་སྐབས་ངས་གཙོ་བོ་དཀོན་མཆོག་གི་མཚན་ནས་ཁོ་མི་གསོད་པའི་ཆེད་དམ་བཅའ་ནན་པོ་བྱས་པ་ཡིན་ནོ།

⁹འོན་ཀྱང་ཁྱོད་ཀྱིས་ཁོ་ལ་ཉེད་ཆད་མ་བཏང་བར་བཞག་མི་རུང་། ཁྱོད་ཀྱིས་ཇི་འདྲ་བྱེད་དགོས་ཤེས་པ་དང་། ཁྱོད་ཀྱིས་ངེས་པར་དུ་ཁོ་གསོད་དགོས་ཅེས་གསུངས་སོ༎

¹⁰དཱ་བིད་གྲོངས་པ་དང་ཁོང་གི་སྐུ་ཕུང་དེ་དཱ་བིད་ཀྱི་གྲོང་ཁྱེར་དུ་སྦས་སོ།

¹¹ཁོང་གིས་ལོ་བཞི་ཅུ་རིང་ཨིསི་རཱཨེལ་གྱི་རྒྱལ་པོ་གནང་བ་དང་། ཧེབ་རོན་དུ་ལོ་བདུན་དང་ཡེ་རུ་ཤ་ལེམ་དུ་ལོ་ངོ་སུམ་ཅུ་སོ་སུམ་རིང་རྒྱལ་སྲིད་བསྐྱངས་སོ།

¹²སོ་ལོ་མོན་ནི་ཡབ་དཱ་བིད་ཀྱི་ཤུལ་འཛིན་དུ་རྒྱལ་པོར་འགྱུར་བ་དང་ཁོང་གི་རྒྱལ་སྲིད་ཀྱི་ནུས་སྟོབས་བརྟན་པོར་གནས་སོ༎

¹³དེ་ནས་ཧ་གྷིད་ཀྱི་བུ་ཨ་དྷོ་ནི་ཡཱ་སོ་ལོ་མོན་གྱི་ཨ་མ་བྷད་ཤེ་བྷྷའི་རྩར་སླེབས་པ་དང་། མོས་ཁོ་ལ་ཁྱོད་མཛའ་གྲོགས་ལྟ་བུར་ཡོང་བ་ཡིན་ནམ་ཞེས་དྲིས་པས། ཁོས་དེ་ལྟར་ཡིན་ཞེས་སྨྲས་སོ།

¹⁴དེ་ནས་ཁོས། ངས་ཁྱེད་ལ་ཞུ་བ་ཞིག་ཐེངས་རྒྱུ་ཡོད། མོས། དེ་ག་རེ་ཡིན་ནམ་ཞེས་དྲིས་པས།

¹⁵ཁོས་ལན་དུ། ང་རྒྱལ་པོར་འགྱུར་དགོས་པ་དེ་ཁྱེད་ཀྱིས་ཤེས་གསལ་རེད། ཨིསི་རཱཨེལ་པ་ཚོས་ཀྱང་ང་རང་རྒྱལ་པོར་འགྱུར་བའི་རེ་བ་ཡོད། འོན་ཀྱང་དེ་ལྟར་མ་བྱུང་བར་ངའི་སྤུན་རྒྱལ་པོར་འགྱུར་སོང་། གང་ལགས་ཟེར་ན། དེ་ནི་གཙོ་བོ་དཀོན་མཆོག་གི་ཐུགས་དགོངས་རེད།

¹⁶ད་ཆ་ཁྱེད་ལ་ཞུ་བ་ཞིག་འབུལ་རྒྱུ་ཡོད་པ་དེ་ལ་ཁྱེད་ཀྱིས་མིན་མ་གསུངས་རོགས་གནང་ཞུས་པས། བྷད་ཤེ་བྷྷས་དེ་ག་རེ་ཡིན་ནམ་ཞེས་དྲིས་པས།

¹⁷ལན་དུ་ཁོས། རྒྱལ་པོ་སོ་ལོ་མོན་ལ་ཤུ་ནེམ་ནས་ཡིན་པའི་བུ་མོ་ཨ་བྷི་ཤག་ངའི་ཆུང་མར་སློང་རོགས་གནང་། ཁྱེད་ཀྱིས་རྒྱལ་པོ་ལ་གང་ཞུས་པ་དེ་ལ་ནམ་ཡང་མིན་མི་གསུངས་པ་ངས་ཤེས་སོ།

¹⁸མོས་དེ་ནི་ལེགས་སོ། ངས་ཁྱོད་ཀྱི་དོན་དུ་རྒྱལ་པོར་བཀའ་མོལ་ཞུ་བར་བྱེད་དོ་ཞེས་སྨྲས་སོ།

¹⁹དེ་ནས་བྷད་ཤེ་བྷྷ་རྒྱལ་པོའི་དྲུང་དུ་ཨ་དྷོ་ནི་ཡཱའི་ཆེད་དུ་བཀའ་མོལ་ཞུ་བར་ཕེབས་སོ། རྒྱལ་པོས་རང་གི་ཡུམ་ལ་སྣེ་ལེན་ཞུ་བར་བཞེངས་ནས། ཁོང་ལ་གུས་ཞབས་བྱས་སོ། དེ་ནས་ཁོང་གིས་རང་གི་རྒྱལ་ཁྲིའི་སྟེང་དུ་བཞུགས་པ་དང་རང་གི་ཡུམ་གྱི་ཆེད་དུ་བཞུགས་ཁྲི་གཞན་ཞིག་འཇོག་བཅུག་པ་དང་། མོས་ཁོང་གི་གཡས་ཕྱོགས་སུ་བཞུགས་ནས།

²⁰ངས་ཁྱེད་ལ་ཞུ་བ་ཆུང་ངུ་ཞིག་ཞུ་རྒྱུ་ཡོད་པ་དེ་ལ་ཁྱོད་ཀྱིས་མིན་མ་གསུངས་རོགས་གནང་ཞུས་པས། རྒྱལ་པོས་ཨ་མ་ལགས། ཁྱེད་ཀྱིས་གསུངས་ཡ་ཡོད་པ་དེ་ག་རེ་ཡིན་ནམ། ངས་ཁྱེད་ལ་ནམ་ཡང་མི་ཡོང་ཞུ་མིན་གསུངས་སོ།

²¹ལན་དུ་ཁོང་གིས། ཁྱོད་རང་གི་སྤུན་ཨ་དྷོ་ནི་ཡཱ་ལ་བུ་མོ་ཨ་བྷི་ཤག་ཆུང་མར་སྤྲོད་དགོས་ཅེས་གསུངས་པ་དང་།

²²རྒྱལ་པོས། ཁྱེད་ཀྱིས་ཨ་བྷི་ཤག་ཁོ་ལ་སྤྲོད་དགོས་གསུངས་པ་དེའི་དོན་གང་ཡིན་ནམ། ཁྱེད་ཀྱིས་ཁོ་ལ་ངའི་རྒྱལ་ཁྲི་ཀྱང་སྤྲོད་དགོས་གསུངས་ན་ཡང་ཆོག གང་ལྟར་ཁོ་ངའི་གཅེན་པོ་ཡིན་པ་དང་བླ་མ་ཨ་བྷི་ཡ་ཐར་དང་ཡོ་ཨབ་ཀྱང་ཁོའི་ཕྱོགས་སུ་ཡོད་ཅེས་གསུངས་སོ།

²³དེ་ནས་སོ་ལོ་མོན་གྱིས་གཙོ་བོ་དཀོན་མཆོག་གི་མཚན་ནས་དམ་བཅའ་ནན་ཏན་བྱས་ཏེ། ཨ་དྷོ་ནི་ཡཱས་འདི་ལྟར་སློང་བའི་དོན་དུ་རང་གི་སྲོག་སྤྲད་ནས་རིམ་པ་ངའི་འཛལ་མ་བཅུག་ན་དཀོན་མཆོག་གི་ང་ལ་གསོད་པར་ཤོག

²⁴གཙོ་བོ་དཀོན་མཆོག་གིས་ང་ལ་ཡབ་དཱ་བིད་ཀྱི་ཁྲིའི་སྟེང་དུ་བརྟན་པོར་འཇོག་པར་གནང་ཡོད། ཁོང་གི་ང་དང་ངའི་རིགས་རྒྱུད་ལ་རྒྱལ་སྲིད་དེ་གནང་ནས་རང་གི་ཞལ་བཞེས་འགྲུབ་པ་གནང་ཡོད། གསོན་པོའི་གཙོ་བོ་དཀོན་མཆོག་གི་མཚན་ལ་དམ་བཅའ་འཛོག་ཡོད་དེ་རིང་ཨ་དྷོ་ནི་ཡཱ་འཆི་བར་འགྱུར་རོ་ཞེས་གསུངས་སོ།

²⁵དེ་ནས་རྒྱལ་པོ་སོ་ལོ་མོན་གྱིས་བྷེ་ན་ཡ་ལ་བཀའ་གནང་བ་ལྟར་ཁོ་ཕྱིན་ནས་ཨ་དོ་ནི་ཡ་ལ་བསད་དོ༎

²⁶རྒྱལ་པོ་སོ་ལོ་མོན་གྱིས་བླ་མ་ཨ་བྷི་ཡ་ཐར་ལ་ཁྱོད་རང་གི་ལུང་པ་ཨ་ན་ཐོད་ཀྱི་ཁྱིམ་དུ་སོང་ཞིག ཁྱོད་རང་འཆི་འོས་པ་ཞིག་ཡིན། འོན་ཀྱང་ད་ལྟ་ངས་ཁྱོད་འཆི་བར་མི་འཇུག། གང་ལགས་ཟེར་ན། ཁྱོད་ངའི་ཡབ་དཱ་བིད་དང་མཉམ་དུ་ཡོད་སྐབས་ཁྱོད་ཀྱིས་ཁོང་དང་མཉམ་དུ་སྡུག་བསྔལ་མྱོང་བ་དང་། ཁྱོད་ཀྱི་གཙོ་བོ་དཀོན་མཆོག་གི་དམ་བཅའི་སྒྲོམ་གྱི་འགན་འཁུར་བ་ཡིན་པའི་ཕྱིར་རོ་ཞེས་གསུངས་སོ།

²⁷དེ་ནས་སོ་ལོ་མོན་གྱིས་ཨ་བྷི་ཡ་ཐར་ལ་གཙོ་བོ་དཀོན་མཆོག་གི་བླ་མའི་ཞབས་ཞུའི་ལས་ཀ་ནས་གཏོན་གནང་ངོ་། འདི་ལྟར་གཙོ་བོ་དཀོན་མཆོག་གིས་ཤི་ལཱོ་རུ་བླ་མ་ཨེ་ལི་དང་ཁོང་གི་རིགས་བརྒྱུད་ཀྱི་སྐོར་གང་གསུངས་པ་རྣམས་དངོས་སུ་སྒྲུབ་པ་ཡིན་ནོ།

²⁸ཡོ་ཨབ་ཀྱིས་བྱུང་བའི་ལོ་རྒྱུ་ཐོས་སོ། (ཁོས་ཨ་དྷོ་ནི་ཡཱ་ལ་རྒྱབ་སྐྱོར་བྱས་པ་མ་གཏོགས། ཨབ་ས་ལོམ་ལ་རྒྱབ་སྐྱོར་བྱས་མེད་དོ།) དེ་འདྲ་སོང་ཙང་ཁོ་གཙོ་བོ་དཀོན་མཆོག་གནས་པའི་དབུ་གུར་དམ་པར་བྲོས་ནས་མཆོད་ཁྲིའི་ཟུར་གྱི་ར་ཅོ་གཉིས་ལ་འཐམས་ནས་བསྡད་དོ།

²⁹རྒྱལ་པོ་སོ་ལོ་མོན་ལ་ཡོ་ཨབ་དབུ་གུར་དམ་པར་བྲོས་པ་དང་མཆོད་ཁྲིའི་ཉེ་འཁྲིས་སུ་ཡོད་པའི་གནས་ཆུལ་འབྱོར་པ་དང་། སོ་ལོ་མོན་གྱི་ཡོ་ཨབ་མཆོད་ཁྲིར་ཅི་ཕྱིར་བྲོས་པ་ཡིན་ནམ་ཞེས་དྲིས་པར་བང་ཆེན་ཞིག་བཏང་ངོ་། ཡོ་ཨབ་ཀྱིས་ལན་དུ། ང་སོ་ལོ་མོན་ལ་འཇིགས་ནས། གཙོ་བོ་དཀོན་མཆོག་གི་དྲུང་དུ་བྲོས་པ་ཡིན་ཞེས་ཞུས་སོ། དེ་འདྲ་སོང་ཙང་རྒྱལ་པོ་སོ་ལོ་མོན་གྱིས་ཡོ་ཨབ་གསོད་པར་བྷེ་ན་ཡཱ་ལ་བཏང་ངོ།

³⁰ཁོས་གཙོ་བོ་དཀོན་མཆོག་གནས་པའི་དབུ་གུར་དམ་པར་ཕྱིན་ནས། ཡོ་ཨབ་ལ་རྒྱལ་པོས་ཁྱོད་ལ་མར་ཐོན་དགོས་པའི་བཀའ་གནང་བྱུང་ཅེས་སྨྲས་པ་དང་། ལན་དུ་ཡོ་ཨབ་ཀྱིས། ང་ཐོན་གྱི་མིན། ང་འདིར་འཆི་གི་ཡིན་ཞེས་སྨྲས་སོ། བྷེ་ན་ཡཱས་རྒྱལ་པོའི་སར་ཕྱིར་ལོག་ནས་ཡོ་ཨབ་ཀྱི་གང་སྨྲས་པ་རྣམས་ཞུས་སོ།

³¹ལན་དུ་སོ་ལོ་མོན་གྱིས། ཡོ་ཨབ་ཀྱིས་གང་སྨྲས་པ་བཞིན་གྱིས་ཤིག ཁོ་གསོད་ལ་དུར་དུ་བཅུག་ཅིག། དེ་ནས་ཡོ་ཨབ་ཀྱིས་སྐྱོན་མེད་མི་རྣམས་བསད་ནས་བྱེད་པའི་ཉེས་ལན་དུ་ངའམ་དཱ་བིད་ཀྱི་བརྒྱུད་པ་ཚོར་ནམ་ཡང་འགན་ཅན་བྱུང་བར་མི་འགྱུར།

³²ངའི་ཡབ་དཱ་བིད་ཀྱིས་མ་མཁྱེན་པར་ཡོ་ཨབ་ཀྱིས་མི་གསོད་ཀྱིས་ཉེས་པ་ཁག་གྱིས་པར་གཙོ་བོ་དཀོན་མཆོག་གིས་ཉེས་ཆད་དེ་ཁོ་རང་ལ་གཏོང་གནང་ཡོང་། ཡོ་ཨབ་ཀྱིས་ཁོ་ལས་དྲག་པའི་མི་སྐྱོན་མེད་གཉིས། ཨིསི་རཱཨེལ་གྱི་དམག་དཔྱིད་ཨབ་ནེར་དང་ཡ་ཧུ་དཱ་པའི་དམག་དཔྱིད་ཨ་མ་ས་གཉིས་བསད་དོ།

³³དེ་ཚོ་བསད་པའི་ཉེས་ཆད་ཡོ་ཨབ་དང་ཁོའི་བརྒྱུད་པར་རྟག་ཏུ་ཕོག་པར་འགྱུར། ཡིན་ན་ཡང་གཙོ་བོ་དཀོན་མཆོག་གིས་དཱ་བིད་ཀྱི་བརྒྱུད་པ་ཁོང་གི་ཁྲིར་སྡོད་མཁན་རྣམས་ལ་རྒྱུན་དུ་ཡར་རྒྱས་གནང་བར་འགྱུར་ཞེས་གསུངས་སོ།

³⁴དེའི་ཕྱིར་བྷེ་ན་ཡཱ་གཙོ་བོ་དཀོན་མཆོག་གནས་པའི་དབུ་གུར་དམ་པར་སོང་ནས་ཡོ་ཨབ་བསད་ནས་ཁོ་ལ་ཐང་ཁུལ་གྱི་རང་གི་ཁྱིམ་འགྲམ་དུ་དུར་དུ་བཅུག་གོ

³⁵རྒྱལ་པོས་བྷེ་ན་ཡ་ལ་ཡོ་ཨབ་ཀྱི་ཚབ་ཏུ་དམག་སྤྱིར་བསྐོས་པ་དང་ཛ་དཱོག་ལ་ཨབ་ཡ་ཐར་གྱི་ཚབ་ཏུ་བླ་མར་བསྐོས་སོ༎

³⁶དེ་ནས་རྒྱལ་པོས་ཤིམ་ཨི་ལ་འབོད་ནས་ཁོ་ལ། ཁྱེད་རང་གི་ཆེད་དུ་འདིར་ཡེ་རུ་ཤ་ལེམ་དུ་ཁང་པ་ཞིག་བཟོས་ཤིག དེའི་ནང་དུ་སྡོད་ལ་གྲོང་ཁྱེར་ནས་མ་ཐོན་ཞིག

³⁷གལ་སྲིད་ཁྱོད་གྲོང་ཁྱེར་ཐོན་ནས་ཀིད་རོན་རྒལ་ནས་ཕྱིན་པ་ཡིན་ན་ཁྱོད་ངེས་པར་དུ་འཆི་བར་འགྱུར། དེའི་ཉེས་པ་དེ་ཁྱོད་རང་ཉིད་ལ་ཕོག་ཡོད་གསུངས་སོ།

³⁸ལན་དུ་ཤིམ་ཨིས། མི་དབང་ཆེན་པོ། ཁྱེད་ཀྱིས་བཀའ་གནང་བ་བཞིན་ཞུ་རྒྱུ་ཡིན་པ་དང་། ཁོ་ཡེ་རུ་ཤ་ལེམ་དུ་ཡུན་རིང་བར་དུ་གནས་སོ།

³⁹འོན་ཀྱང་ལོ་གསུམ་གྱི་རྗེས་སུ་ཤིམ་ཨིའི་ཚེ་གཡོག་གཉིས་གྷད་ཀྱི་མ་ཀཱའི་བུ་རྒྱལ་པོ་ཨ་ཀིཤི་ཀྱི་དྲུང་དུ་བྲོས་ཕྱིན་པ་དང་། ཤིམ་ཨིས་དེ་ཚོ་གྷད་དུ་ཡོད་པ་ཐོས་པ་དང་།

⁴⁰དེ་མ་ཐག་ཏུ་ཁོས་རང་གི་བོང་བུར་སྒ་བརྒྱབ་ནས་ཚེ་གཡོག་གཉིས་འཚོལ་དུ་རྒྱལ་པོ་ཨ་ཀིཤི་ཀྱི་སར་གྷད་དུ་སླེབས་ནས་ཁོས་ཚེ་གཡོག་གཉིས་རྙེད་ནས་ཁྱིམ་དུ་འཁྲིད་ཡོང་བ་དང་།

⁴¹སོ་ལོ་མོན་གྱིས་ཤིམ་ཨིས་གང་བྱས་པ་དེ་ཐོས་ནས།

⁴²ཁོང་གིས་ཁོ་ལ་འབོད་དུ་བཏང་ནས་སྨྲས་པ། ངས་ཁྱོད་་ཡེ་རུ་ཤ་ལེམ་ནས་འགྲོ་མི་ཆོག་པ་གཙོ་བོ་དཀོན་མཆོག་གི་མཚན་ནས་མནའ་བསྐྱེལ་དུ་བཅུག་ཡོད། ཁྱོད་ཀྱིས་དེ་ལྟར་བྱས་པ་ཡིན་ན་ཁྱོད་ངེས་པར་དུ་འཆི་རྒྱུའི་ངས་ཁྱོད་ལ་ཉེན་བརྡ་སྤྲད་ཡོད་པ་ཡིན། ཁྱོད་ཀྱིས་དེ་ལྟར་སྒྲིགས་པ་འདུག་ཅེས་ཁས་ལེན་བྱས་མེད་དམ།

⁴³དེ་འདྲ་སོང་ཙང་ཁྱོད་ཀྱིས་ཅིའི་ཕྱིར་རང་གི་ཁས་ལེན་ནས་འགལ་བ་མ་ཟད་ངའི་བཀའ་ལ་ཅི་ཕྱིར་མ་གསུངས་བ་ཡིན་ནམ།

⁴⁴ཁྱོད་ཀྱིས་ངའི་ཡབ་དཱ་བིད་ལ་ངན་པ་གང་གྱིས་པ་ཚང་མ་གསལ་པོ་ཤེས་པ་དང་། གཙོ་བོ་དཀོན་མཆོག་གིས་དེའི་ཉེས་ལན་དུ་ཁྱོད་རང་ལ་ཆད་པ་གཏོང་བར་འགྱུར་རོ།

⁴⁵འོན་ཀྱང་ཁོང་གིས་ང་ལ་བྱིན་རླབས་གནང་རྒྱུ་མ་ཟད། དུས་ནམ་གནས་བར་དཱ་བིད་ཀྱིས་རྒྱལ་ཁྲི་བརྟན་པོར་གནས་ཀྱི་རེད་ཅེས་གསུངས་སོ།

⁴⁶དེ་ནས་རྒྱལ་པོས་བྷེ་ན་ཡཱ་ལ་བཀའ་གནང་བ་ལྟར་ཁོ་ཕྱིན་ནས་ཤིམ་ཨི་ལ་བསད་དོ། དེ་ནས་སོ་ལོ་མོན་གྱི་རྒྱལ་སྲིད་ཀྱི་མངའ་འོག་ཏུ་ཆ་ཚང་བསྡུས་སོ༎