Tibetan — པོད་སྐད་Tibetan Old Testament 2011 bible online

རྒྱལ་རབས་དང་པོ། 8

¹དེ་ནས་རྒྱལ་པོ་སོ་ལོ་མོན་གྱིས་ཨིསི་རཱཨེལ་གྱི་སྡེ་རིགས་དང་རིགས་རུས་ཀྱི་འགོ་འཛིན་ཡོངས་རྫོགས་ཡེ་རུ་ཤ་ལེམ་དུ་གཙོ་བོ་དཀོན་མཆོག་གི་དམ་བཅའི་སྒྲོམ་དེ་དཱ་བིད་ཀྱི་གྲོང་ཁྱེར་ཛི་ཡོན་ནས་མཆོད་ཁང་དུ་གདན་འདྲེན་ཞུ་བའི་ཆེད་སྐད་བཏང་གནང་ངོ།

²དེ་ཚོ་ཚང་མ་ཨེ་ཐ་ནིམ་གྱི་ཟླ་བ་བདུན་པར་རྩ་ཡབ་གི་དུས་ཆེན་སྐབས་འཛོམས་སོ།

³རྒན་པོ་རྣམས་འཛོམས་པ་དང་བླ་མ་ཚོས་དམ་བཅའི་སྒྲོམ་དེ་བཏེགས་ནས།

⁴དེ་མཆོད་ཁང་དུ་འཁྱེར་བ་རེད། ལེ་ཝི་པ་དང་བླ་མ་ཚོ་ཡང་གཙོ་བོ་དཀོན་མཆོག་གནས་པའི་དབུ་གུར་དམ་པ་དང་གཞན་ཅ་དངོས་རྣམས་མཆོད་ཁང་དུ་འཁྱེར་རོ།

⁵རྒྱལ་པོ་སོ་ལོ་མོན་དང་ཨིསི་རཱཨེལ་གྱི་མི་མང་ཚང་མ་དམ་བཅའི་སྒྲོམ་གྱི་མདུན་དུ་འཛོམས་པ་དང་ལུག་དང་བ་གླང་ཧ་ཅང་ཁྱོན་ཆེ་གྲངས་རྩིས་མ་ཐུབ་པར་དམར་མཆོད་དུ་ཕུལ་ལོ།

⁶དེ་ནས་བླ་མ་ཚོས་དམ་བཅའི་སྒྲོམ་དེ་མཆོད་ཁང་ནང་དུ་འཁྱེར་ནས་ཤིན་ཏུ་དམ་པའི་གནས་ཀེ་རུབ་རྣམས་ཀྱི་འོག་ཏུ་བཞག་གོ

⁷དེ་ཚོའི་ཤོག་པ་བརྐྱངས་པའི་དམ་བཅའི་སྒྲོམ་དང་དེ་འཁྱེར་བྱེད་རྒྱུག་པ་རྣམས་བཀབ་བཞིན་ཡོད་དོ།

⁸ཤིན་ཏུ་དམ་པའི་གནས་ཀྱི་མདུན་དུ་སླངས་མཁན་སུ་ཞིག་གི་རྒྱུག་པ་རྣམས་ཀྱི་མཐའ་དེ་མཐོང་བ་ལས་ས་ཕྱོགས་གཞན་ནས་མི་མཐོང་ངོ། (རྒྱུག་པ་རྣམས་ད་ལྟ་ཡང་དེར་ཡོད་དོ།)

⁹ཨིསི་རཱཨེལ་གྱི་མི་མང་རྣམས་ཨི་ཇིབ་ནས་ཡོང་དུས་ཁོ་ཚོ་མཉམ་དུ་གཙོ་བོ་དཀོན་མཆོག་གིས་ཞལ་ཆད་མཛད་གནང་སྐབས་མོ་ཤེས་རི་བོ་སི་ནཨའི་རུ་དམ་བཅའི་སྒྲོམ་དེའི་ནང་བཞག་པའི་རྡོ་ལེབ་གཉིས་མ་གཏོགས་གཞན་ཅི་ཡང་མེད་དོ།

¹⁰བླ་མ་རྣམས་མཆོད་ཁང་ནས་ཐོན་སྐབས་དེ་བློ་བུར་དུ་སྤྲིན་གྱི་ཁྱབ་ནས།

¹¹གཙོ་བོ་དཀོན་མཆོག་གི་གཟི་བརྗིད་ཀྱི་འོད་ཀྲག་མདངས་དེའི་འཕྲོད་ནས། བླ་མ་རྣམས་ཞབས་ཏོག་ཞུ་བར་ནང་དུ་འགྲོ་མ་ཐུབ་བོ།

¹²དེ་ནས་སོ་ལོ་མོན་གྱིས་སྨོན་ལམ་འདེབས་པ། གཙོ་བོ་དཀོན་མཆོག་ཁྱེད་ཀྱིས་ནམ་མཁར་ཉི་མ་བཞག་གནང་ངོ་། འོན་ཀྱང་ཁྱེད་ནི་སྤྲིན་དང་མུན་པའི་ནང་དུ་བཞུགས་རྒྱུ་འདམས་གནང་ངོ་།

¹³ད་ངས་ཁྱེད་གཏན་དུ་བཞུགས་པའི་ཕྱིར། མཆོད་ཁང་ལེགས་པ་ཞིག་བཞེངས་ཡོད༎

¹⁴དེར་མི་མང་རྣམས་ལངས་ཡོད་པས། རྒྱལ་པོ་སོ་ལོ་མོན་གྱིས་ཁོ་ཚོར་ཞལ་བསྒྱུར་ནས་ཁོ་ཚོའི་དོན་དུ་དཀོན་མཆོག་ལ་བྱིན་རླབས་ཞུས་ནས།

¹⁵ཁོང་གིས་གསུངས་པ། གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་ལ་བསྟོད་པ་ཕུལ་ཞིག ཁོང་གིས་ངའི་ཡབ་དཱ་བིད་ལ་ཞལ་བཞེས་གནང་བ་རྣམས་སྲུང་གནང་ཡོད་དོ།

¹⁶ཁོང་གི་བཀའ་ངའི་མི་མང་ཨི་ཇིབ་ནས་བཏོན་པའི་དུས་ནས་ད་བར་ཨིསི་རཱཨེལ་གྱི་ས་ཁུལ་གང་ལའང་ང་ལ་མཆོད་པའི་ཆེད་དུ་མཆོད་ཁང་བཞེངས་སའི་གྲོང་ཁྱེར་ཞིག་ངས་འདམས་མེད་དོ། འོན་ཀྱང་དཱ་བིད་ཁྱོད་ངའི་མི་མང་ལ་དབང་བསྒྱུར་བྱེད་པའི་ཆེད་འདམས་ཡོད་ཅེས་སོ།

¹⁷སོ་ལོ་མོན་གྱིས་མུ་མཐུད་ནས། ངའི་ཡབ་དཱ་བིད་ཀྱིས་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་མཆོད་པ་ཕུལ་བའི་མཆོད་ཁང་བཞེངས་རྒྱུའི་འཆར་གཞི་གཏིང་གནང་ཡོད།

¹⁸འོན་ཀྱང་གཙོ་བོ་དཀོན་མཆོག་གིས་ཁོང་ལ་ཁྱོད་ཀྱིས་ངའི་ཆེད་དུ་མཆོད་ཁང་བཞེངས་འོདད་ཡོད་པ་དེ་སྒྲིག་བཞག།

¹⁹འོན་ཀྱང་ཀྱོད་ཀྱིས་དེ་བཞེངས་མི་ཐུབ། ཁྱོད་ཀྱི་རང་གི་བུས་ངའི་མཆོད་ཁང་བཞེངས་ཡོང་ཞེས་གསུངས་སོ།

²⁰ད་ལྟ་གཙོ་བོ་དཀོན་མཆོག་གིས་རང་གི་དམ་བཅའ་རྣམས་སྲུང་གནང་ཡོད། ང་ནི་ངའི་ཡབ་དཱ་བིད་ཀྱི་རྒྱལ་པོའི་ཤུལ་འཛིན་པ་དང་། ཨིསི་རཱཨེལ་གྱི་གཙོ་བོ་དཀོན་མཆོག་ལ་མཆོད་པའི་ཆེད་དུ་མཆོད་ཁང་ཞིག་བཞེངས་པ་ཡིན་ནོ།

²¹གཙོ་བོ་དཀོན་མཆོག་གིས་ང་ཚོའི་ཕ་མེས་རྣམས་ཨི་ཇིབ་ཡུལ་ནས་འདོན་གནང་སྐབས་ཞལ་ཆད་མཛད་པའི་དམ་བཅའི་སྒྲོམ་དེ་འཇོག་ཡུལ་ཞིག་ངས་མཆོད་ཁང་ནང་བཞག་ཡོད་ཅེས་སྨྲས་སོ༎

²²དེ་ནས་མི་མང་རྣམས་འཛོམས་ཡོད་པའི་ཐོག་སོ་ལོ་མོན་ཕེབས་ནས་མཆོད་ཁྲིའི་མདུན་དུ་བཞེངས་པ་དང་ཕྱག་གཉིས་ཡར་ཀྱག་ནས།

²³སྨོན་ལམ་བཏབ་པ། གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག། ཁྱེད་ལྟ་བུའི་དཀོན་མཆོག་མཐོ་རིས་ཀྱི་སྟེང་དང་། འོག་འཛམ་གླིང་དུ་ཡང་མེད་དོ། ཁོང་ཚོས་སེམས་ཀྱི་གཏིང་ནས་ཁྱེད་ཀྱི་བཀའ་ལ་བརྩི་འཇོག་བྱས་པ་ཡིན་ཙང། ཁྱེད་ཀྱིས་མི་མང་མཉམ་དུ་གནང་བའི་ཞལ་ཆད་སྲུང་གནང་བ་དང་། ཁོ་ཚོར་བརྩེ་བ་གནང་ངོ།

²⁴ཁྱེད་ཀྱིས་ངའི་ཡབ་དཱ་བིད་ལ་གནང་བའི་ཞལ་བཞེས་སྲུང་གནང་ཡོད་པ་དང་། ད་རིང་ཞལ་ཆད་གནང་བ་དེ་ཚོ་ཆ་ཚང་སྒྲུབ་པ་གནང་ངོ།

²⁵གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་ད་ངས་ཁྱེད་ལ་གསོལ་བ་འདེབས་རྒྱུར། ཁྱེད་ཀྱིས་ཞལ་བཞེས་གཞན་ཁག་ངའི་ཡབ་ལ་གནང་བ་དེ་ཚོ། གལ་སྲིད་ཁོང་གི་བརྒྱུད་པས་ཁོང་བཞིན་ཟབ་ནན་ཐོག་ཁྱེད་ཀྱི་བཀའ་ལ་ཉན་པ་ཡིན་ནོ། ཁྱེད་ཀྱིས་ཇི་སྲིད་ནམ་གནས་བར་ཁོང་གི་བརྒྱུད་པ་ཞིག་ཨིསི་རཱཨེལ་གྱི་རྒྱལ་པོར་འགྱུར་རྒྱུ་ཞལ་བཞེས་གནང་བ་དེ་སྲུང་རོགས་གནང་།

²⁶ཀྱེ་དཀོན་མཆོག་ཨིསི་རཱཨེལ་གྱི་དཀོན་མཆོག་ཁྱེད་ཀྱི་བྲན་པོ་ངའི་ཡབ་དཱ་བིད་ལ་ཞལ་བཞེས་གནང་བ་རྣམས་སྒྲུབ་པར་མཛོད་ཅིག

²⁷འོན་ཀྱང་ཀྱེ་དཀོན་མཆོག་ཁྱེད་འཇིག་རྟེན་འདིར་འཞུགས་ཐུབ་བམ། ཡང་ན་མཐོ་རིས་ཡོངས་རྫོགས་ལའང་ཁྱེད་ཤོང་པའི་རྒྱ་ཁྱོན་མེད་དོ། ངས་ཁྱེད་ཀྱི་ཆེད་དུ་གཞེངས་པའི་མཆོད་ཁང་འདིའི་ནང་ཇི་ལྟར་ཤོང་ངམ།

²⁸གཙོ་བོ་དཀོན་མཆོག་ངའི་དཀོན་མཆོག་ང་ཁྱེད་ཀྱི་ཞབས་ཕྱི་ཡིན། ངས་གསོལ་བ་འདེབས་པར་གསན་རོགས་གནང་། ད་རིང་ངས་འབོད་བསྐུལ་ཞུས་པ་རྣམས་སྒྲུབ་པར་མཛོད་ཅིག

²⁹ས་གནས་འདིར་ཁྱེད་ལ་བརྙེན་བཀུར་ཞུ་ཕྱིར་འདམས་པ་གནང་བའི་མཆོད་ཁང་འདི་ལ་ཉིན་མཚན་མེད་པར་གཟིགས་རོགས་གནང་། ངས་མཆོད་ཁང་འདིར་ཁ་བལྟས་ནས་སྨོན་ལམ་བཏབ་པ་ཡིན་ན་ངའི་སྨོན་ལམ་གསན་རོགས་གནང་།

³⁰མཆོད་ཁང་འདིར་ང་དང་ཁྱེད་ཀྱི་མི་མང་ཚོའི་ཁ་བལྟས་ནས་སྨོན་ལམ་བཏབ་པ་ཡིན་ན་གསན་པར་མཛོད། ཁྱེད་ཀྱི་བཞུགས་གནས་མཐོ་རིས་སུ་ང་ཚོའི་སྨོན་ལམ་གསན་ནས་བཟོད་གསོལ་གནང་བར་མཛོད།

³¹མི་ཞིག་གིས་གཞན་ཞིག་ལ་སྐྱོན་བཏགས་ནས་ཁོ་ལ་སྐྱོན་མེད་ལུགས་ཀྱི་མནའ་བསྐྱེལ་བར་མཆོད་ཁང་འདིའི་མཆོད་ཁྲིའི་སར་འཁྲིད་ཡོང་བ་ཡིན་ན།

³²ཀྱེ་གཙོ་བོ་དཀོན་མཆོག་ཁྱེད་ཀྱིས་མཐོ་རིས་ནས་གསན་ནས་ཁྱེད་ཀྱི་བྲན་པོར་ཁྲིམས་ཀྱི་དཔྱད་མཚམས་གཏོང་བར་མཛོད། ཉེས་ཅན་ལ་ཆད་པ་དང་སྐྱོན་མེད་ལ་བདེན་པ་གནང་བར་མཛོད།

³³ཨིསི་རཱཨེལ་གྱི་མི་མང་ཚོས་ཁྱེད་ཀྱི་སྤྱན་སྔར་སྡིག་པ་གྱིས་པའི་རྐྱེན་གྱིས་དགྲ་བོ་རྣམས་ཀྱིས་དེ་ཚོར་ཕམ་པར་བྱས་པ་དང་། དེ་ནས་དེ་ཚོས་མཆོད་ཁང་འདིར་ཁ་བལྟས་ནས་ཉམ་ཆུང་ཐོག་ཁྱེད་ལ་བཟོད་གསོལ་ཞུ་བར་ཡོང་བ་ཡིན་ན།

³⁴ཁྱེད་ཀྱིས་མཐོ་རིས་ནས་དེ་ཚོར་གསན་པར་མཛོད། ཁྱེད་ཀྱིས་མི་མང་ཚོའི་སྡིག་པར་བཟོད་གསོལ་གནང་ནས་དེ་ཚོའི་ཕ་མེས་ཚོར་གནང་བའི་ཡུལ་དུ་འཁྲིད་པར་མཛོད་ཅིག

³⁵ཁྱེད་ཀྱི་མི་མང་ཚོས་ཁྱེད་ཀྱི་སྤྱན་སྔར་སྡིག་པ་གྱིས་པའི་རྐྱེན་ཁྱེད་ཀྱིས་ཆར་པ་བཀག་གནང་པ་དང་། དེ་ནས་དེ་ཚོས་འགྱོད་སེམས་སྐྱེད་ནས་མཆོད་ཁང་འདིར་ཁ་བལྟས་ནས་ཉམ་ཆུང་ཐོག་ཁྱེད་ལ་བཤགས་པ་ཕུལ་བ་ཡིན་ན།

³⁶མཐོ་རིས་ནས་དེ་ཚོ་ལ་གསན་པར་མཛོད། རྒྱལ་པོ་དང་ཨིསི་རཱཨེལ་གྱི་མི་མང་ཚོའི་སྡིག་པར་བཟོད་གསོལ་གནང་རོགས་གནང་། དྲང་བདེན་བྱེད་རྒྱུར་དེ་ཚོ་ལ་སློབ་སྟོན་གནང་རོགས་གནང་། ཀྱེ་གཙོ་བོ་དཀོན་མཆོག། དེ་ནས་ཁྱེད་ཀྱི་མི་མང་ལ་བཏན་ཏུ་གནས་པར་གནང་བའི་ཡུལ་འདིར་ཆར་པ་བཏོང་བར་མཛོད་ཅིག

³⁷ཡུལ་འདིར་མུ་གེའམ་ནད་རིམས་སམ་རླུང་ཤུགས་དྲག་པོས་སྟོན་ཐོག་མེད་པར་བཟོས་སམ། འབུ་ཚོགས་ཀྱིས་སྟོན་ཐོག་མེད་པར་བྱས་སམ། ཁྱེད་ཀྱི་མི་མང་ལ་དགྲ་བོས་བཙན་འཛུལ་བྱས་སམ། ཡང་ན་ནད་ཡམས་དང་རྐྱེན་ངན་སོགས་བྱུང་བ་ཡིན་ན།

³⁸དེ་ཚོའི་སྨོན་ལམ་ལ་གསན་རོགས་གནང་། ཁྱེད་ཀྱི་ཨིསི་རཱཨེལ་གྱི་མི་མང་སུ་འདྲ་ཞིག་ལ་སྡུག་བསྔལ་དྲག་པོ་བྱུང་ནས། མཆོད་ཁང་འདིའི་ཕྱོགས་སུ་སྨོན་ལམ་འདེབས་ཕྱིར་ལག་པ་འདེགས་པ་ཡིན་ན་དེ་ཚོའི་སྨོན་ལམ་ལ་གསན་རོགས་གནང་།

³⁹ཁྱེད་ཀྱི་ནམ་མཁའི་མཐོ་རིས་ཀྱི་བཞུགས་གནས་ནས་དེ་ཚོར་གསན་པ་དང་བཟོད་གསོལ་གནང་ནས་སྐྱབས་རོགས་གནང་བར་མཛོད། ཁྱེད་གཅིག་པོས་འགྲོ་བ་མིའི་སེམས་ཀྱི་བསམ་བློ་རྟོགས་ཐུབ་པ་དང་། མི་སོ་སོའི་ལས་ལྟར་འོས་པའི་འབྲེལ་བ་གནང་བར་མཛོད།

⁴⁰དེ་ཡིན་ཙང་ཁྱེད་ཀྱི་མི་མང་རྣམས་དུས་རྟག་ཏུ་ཁྱེད་ཀྱི་བཀའ་ལ་ཉན་ནས་ཁྱེད་ཀྱིས་ང་ཚོའི་ཕ་མེས་ཚོར་གནང་བའི་ཡུལ་དུ་གནས་པའི་ཕྱིར་རོ།

⁴¹ཐག་རིང་དུ་བསྡད་པའི་ཕྱི་རྒྱལ་བ་ཞིག་གིས་ཁྱེད་ཀྱི་སྙན་གྲགས་དང་ཁྱེད་ཀྱི་མི་མང་ལ་བྱ་བ་རྒྱ་ཆེ་གནང་བ་ཁག་ཐོས་ནས་ཁྱེད་ལ་བསྙེན་བཀུར་ཞུ་བ་དང་སྨོན་ལམ་འདེབས་པའི་ཕྱིར་མཆོད་ཁང་འདིར་ཡོང་བ་ཡིན་ན།

⁴²

⁴³དེའི་ཞུ་བར་གསན་པར་མཛོད། འཛམ་གླིང་གི་མི་མང་ཡོངས་ནས་ཁྱེད་ཀྱི་མི་མང་ཨིསི་རཱཨེལ་པ་ལྟར་ཁྱེད་ངོ་ཤེས་ནས་ཁྱེད་ཀྱི་བཀའ་ལ་བརྩི་ནས་ནམ་མཁར་ཁྱེད་ཀྱི་བཞུགས་གནས་མཐོ་རིས་སུ་ཁོའི་སྨོན་ལམ་གསན་ནས་ཁོས་ཞུ་བ་ཇི་ཕུལ་བ་རྣམས་སྒྲུབ་པར་མཛོད། དེ་ནས་དེ་ཚོས་ངས་བཞེངས་པའི་མཆོད་ཁང་འདི་བཞིན་ཁྱེད་ལ་བསྙེན་བཀུར་འབུལ་ཡུལ་ཡིན་པ་དེ་ཤེས་པར་འགྱུར་རོ།

⁴⁴ཁྱེད་ཀྱིས་འབངས་རྣམས་ལ་དེ་ཚོའི་དགྲ་བོ་དང་འཐབ་ཕྱིར་གཡུལ་དུ་འགྲོ་དགོས་པའི་བཀའ་གནང་བ་དང་། དེ་ཚོ་གང་དུ་ཡོད་ན་ཡང་ཁྱེད་ཀྱི་འདམས་གནང་བའི་གྲོང་ཁྱེར་འདི་དང་ངས་ཁྱེད་ཀྱི་ཆེད་དུ་བཞེངས་པའི་མཆོད་ཁང་འདིར་ཁ་བལྟས་ནས་སྨོན་ལམ་འདེབས་སྐབས་སུ།

⁴⁵དེ་ཚོའི་སྨོན་ལམ་ལ་གསན་པར་མཛོད། མཐོ་རིས་ནས་དེ་ཚོར་གསན་ནས་དེ་ཚོ་ལ་རྒྱལ་ཁ་གནང་བར་མཛོད།

⁴⁶སྡིག་པ་མི་བྱེད་མཁན་སུ་ཡང་མེད་པ་དང་། ཁྱེད་ཀྱི་འབངས་ཀྱིས་ཁྱེད་ཀྱི་སྤྱན་སྔར་སྡིག་པ་གྱིས་ཤིང་། ཁྱེད་ཐུགས་ཁྲོ་བའི་སྐབས་སུ་ཁོ་ཚོའི་དགྲ་བོའི་ཁོ་ཚོར་ཕམ་པར་བྱས་པ་དང་ཡུལ་གཞན་དུ་བཙོན་པར་འཁྲིད་པ་དང་ཡུལ་དེ་ཐག་རིང་དུ་ཡོད་ན་ཡང་།

⁴⁷ཁྱེད་ཀྱི་འབངས་ཀྱི་སྨོན་ལམ་ཞུ་བར་གསན་རོགས་གནང་། ཀྱེ་དཀོན་མཆོག་དེ་ཚོ་སྡིག་ཅན་ཇི་ཡིན་པ་དང་སྤྱོད་ངན་ཇི་ལྟར་གྱིས་ཡོད་པ་ཤེས་ཤིང་འགྱོད་པ་སྐྱེས་ནས་ཡུལ་དེ་ནས་སྨོན་ལམ་འདེབས་པ་ཡིན་ན་གསན་པར་མཛོད།

⁴⁸ཡུལ་དེར་དེ་ཚོས་དྲང་བདེན་ཐོག་ནས་ཁྱེད་ཀྱིས་ང་ཚོའི་ཕ་མེས་ཚོར་གནང་བའི་ཡུལ་དང་ཁྱེད་ཀྱིས་འདམས་གནང་བའི་གྲོང་ཁྱེར་དང་ངས་ཁྱེད་ཀྱི་ཆེད་དུ་བཞེངས་པའི་མཆོད་ཁང་འདིར་ཁ་བལྟས་ནས་བཤགས་པ་དང་སྨོན་ལམ་འདེབས་པ་ཡིན་ན།

⁴⁹དེ་ཚོའི་ཞུ་བར་གསན་པར་མཛོད་ཅིག། ཁྱེད་ཀྱི་མཐོ་རིས་ཀྱི་བཞུགས་གནས་སུ་དེ་ཚོ་ལ་གསན་ནས་སྙིང་རྗེ་གནང་བར་མཛོད།

⁵⁰དེ་ཚོའི་ཉེས་སྡིག་དང་ཁྱེད་ལ་ངོ་ལོག་ཞུ་བའི་སྤྱོད་ཚུལ་ལ་བཟོད་གསོལ་གནང་ནས། དེ་ཚོའི་དགྲ་བོས་དེ་ཚོར་བྱམས་བརྩིའི་ངང་བལྟ་སྐྱོངས་ཡོང་བ་གནང་བར་མཛོད།

⁵¹གང་ལགས་ཟེར་ན། དེ་ཚོ་ཁྱེད་ཀྱིས་ཨི་ཇིབ་ཀྱི་འབར་བའི་མེ་སྤུངས་ནས་འདོན་གནང་བའི་འབངས་རྣམས་ཡིན་ནོ།

⁵²ཀུན་དབང་ལྡན་པའི་གཙོ་བོ་དཀོན་མཆོག་ཁྱེད་ཀྱི་ཨིསི་རཱཨེལ་གྱི་འབངས་དང་རྒྱལ་པོར་དུས་རྟག་ཏུ་བྱམས་བརྩེའི་གཟིགས་སྐྱོངས་ཐོག་་དེ་ཚོའི་ས་གནས་གང་ནས་ཁྱེད་ལ་སྐྱབས་འཇུག་ཞུས་པ་ཡིན་ན། དེ་ཚོས་ཞུ་བར་གསན་པར་མཛོད།

⁵³དེ་ཚོ་ལ་ང་ཚོའི་ཕ་མེས་ཚོ་ཨི་ཇིབ་ནས་འདོན་གནང་སྐབས་བྲན་པོ་མོ་ཤེའི་བརྒྱུད་བཀའ་གནང་བ་བཞིན་དེ་ཚོ་འབངས་ཡོངས་ཀྱི་ཁྲོད་ནས་ཁྱེད་ཀྱི་འབངས་སུ་འདམས་གནང་ངོ་༎

⁵⁴སོ་ལོ་མོན་གྱིས་གཙོ་བོ་དཀོན་མཆོག་ལ་སྨོན་ལམ་བཏབ་ཟིན་པའི་རྗེས་སུ་ཁོང་མཆོད་ཁྲིའི་མདུན་དུ་སྤུས་མོ་བཅུགས་ནས་ཕྱག་གཉིས་འདེགས་ཚར་བ་དང་ཡར་བཞེངས་ནས།

⁵⁵གསུང་སྐད་ཆེན་པོས། དེར་འཛོམས་ཡོད་པའི་མི་ཚང་མའི་ཕྱིར་བྱིན་རླབས་ཞུས་ཤིང་། ཁོང་གིས་གསུངས་པ།

⁵⁶གཙོ་བོ་དཀོན་མཆོག་གིས་ཇི་ལྟར་ཞལ་བཞེས་གནང་བ་ལྟར་རང་གི་མི་མང་ལ་ཞི་བདེ་གནང་མཁན་ཁོང་ལ་བལྟོད་པ་ཕུལ་ཞིག ཁོང་གི་བྲན་པོ་མོ་ཤེའི་བརྒྱུད་བཀའ་དྲིན་ཅན་གྱི་ཞལ་བཞེས་གནང་བ་ཚང་མ་སྒྲུབ་གནང་ངོ།

⁵⁷ང་ཚོའི་གཙོ་བོ་དཀོན་མཆོག་ང་ཚོའི་ཕ་མེས་ཚོ་མཉམ་དུ་འགྲོགས་པ་ལྟར་ང་ཚོ་དང་མཉམ་དུ་འགྲོགས་པར་ཤོག ཁོང་གིས་ང་ཚོ་ནམ་ཡང་མི་དོར་བ་དང་མི་སྤོང་བར་ཤོག

⁵⁸ང་ཚོ་ཁོང་གི་བཀའ་ལ་ཉན་མཁན་བཟོས་གནང་བར་ཤོག དེའི་རྐྱེན་གྱིས་ང་ཚོས་དུས་རྟག་ཏུ་ཁོང་གི་ཐུགས་དགོངས་ལྟར་གནས་པ་དང་ང་ཚོའི་མེས་པོ་རྣམས་ལ་གནང་བའི་བཀའ་ཁྲིམས་དང་བཀའ་རྒྱ་རྣམས་སྲུང་ཐུབ་པར་ཤོག

⁵⁹ང་ཚོའི་གཙོ་བོ་དཀོན་མཆོག་གིས་ངས་ཁོང་ལ་ཞུས་པའི་ཞུ་བ་ཁག་རྒྱུན་དུ་ཐུགས་དྲན་གསོས་པར་ཤོག ཁོང་རྒྱུན་དུ་ཨིསི་རཱཨེལ་གྱི་འབངས་དང་རྒྱལ་པོ་དང་ཁོ་ཚོའི་ཉིན་རེའི་དགོས་མཁོ་བཞིན་སྙིང་རྗེ་གནང་བར་ཤོག

⁶⁰དེའི་རྐྱེན་གྱིས་འཛམ་གླིང་གི་རྒྱལ་ཁབ་ཡོངས་ཀྱི་གཙོ་བོ་དཀོན་མཆོག་ཁྱེད་གཅིག་པོ་དཀོན་མཆོག་ཡིན་པ་དང་། གཞན་སུ་ཡང་མིན་པ་ཤེས་པར་ཤོག

⁶¹ཁྱོད་ཚོ་ཁོང་གི་འབངས་རྣམས་ནས་གཙོ་བོ་དཀོན་མཆོག་ང་ཚོའི་དཀོན་མཆོག་ལ་རྒྱུན་དུ་དམ་ཚིག་གཙང་མའི་ཐོག་དེ་རིང་བྱེད་པ་བཞིན་ཁོང་གི་བཀའ་ཁྲིམས་དང་བཀའ་རྒྱ་རྣམས་ལ་བརྩི་བཀུར་ཞུས་པར་ཤོག།

⁶²དེ་ནས་རྒྱལ་པོ་སོ་ལོ་མོན་དང་ཨིསི་རཱཨེལ་གྱི་མི་མང་རྣམས་ནས་གཙོ་བོ་དཀོན་མཆོག་ལ་དམར་མཆོད་ཕུལ་ལོ།

⁶³ཁོང་གིས་བ་གླང་གྲངས་ ༢༢,༠༠༠ དང་ལུག་གྲངས་ ༡༢༠,༠༠༠ མཐུན་བྲེལ་གྱི་དམར་མཆོད་ཕུལ་ལོ། དེ་ལྟར་རྒྱལ་པོ་དང་མི་མང་ནས་མཆོད་ཁང་གི་བསྔོ་འབུལ་བྱས་སོ།

⁶⁴ཉིན་དེ་རང་ལ་ཁོང་གིས་མཆོད་ཁང་མདུན་གྱི་ཚོམས་ཆེན་གྱི་དབུས་སུ་བསྔོ་འབུལ་གནང་བ་དང་དེར་སྦྱིན་སྲེག་གི་མཆོད་པ་ཆ་ཚང་དང་འབྲུའི་མཆོད་པ་དང་སེམས་ཅན་གྱི་ཚིལ་ལུའི་མཆོད་པ་དང་མཐུན་བྲེལ་གྱི་མཆོད་པ་ཕུལ་ནས། ཁོང་གིས་དེ་ལྟར་གནང་བ་ཡིན་ནོ། གང་ལགས་ཟེར་ན། མཆོད་པ་དེ་ཚོའི་ཆེད་དུ་ལིའི་མཆོད་ཁྲི་དེ་ཧ་ཅང་ཆུང་དྲགས་པ་ཡིན་ནོ།

⁶⁵མཆོད་ཁང་དེ་རང་དུ་སོ་ལོ་མོན་དང་ཨིསི་རཱཨེལ་གྱི་མི་མང་ཚོས་ཉིན་བདུན་གྱི་རིང་རྩ་ཡབ་ཀྱི་དུས་སྟོན་བྱས་སོ། དེར་བྱང་ནས་ཐག་རིང་ཧ་མད་ལ་ནས་ལྷོ་ཕྱོགས་ཨི་ཇིབ་ཀྱི་ས་མཚམས་བར་གྱི་མི་མང་འདུ་འཛོམས་ཧ་ཅང་ཆེན་པོ་བྱུང་ཡོད་ཅིང་།

⁶⁶ཉིན་བརྒྱད་པར་སོ་ལོ་མོན་གྱིས་མི་མང་རྣམས་སོ་སོའི་ཁྱེམ་དུ་བཏང་བ་དང་། གཙོ་བོ་དཀོན་མཆོག་གིས་ཁོང་གི་བྲན་པོ་དཱ་བིད་དང་ཨིསི་རཱཨེལ་གྱི་མི་མང་རྣམས་ལ་བྱིན་རླབས་དེ་ལྟ་བུ་གནང་བར་བརྟེན་ནས། དེ་ཚོས་ཁོང་ལ་བསྟོད་ཅིང་དགའ་པོའི་ངང་ནས་སོ་སོའི་ཁྱིམ་དུ་ལོག་གོ།

Read Tibetan — པོད་སྐད་Tibetan Old Testament 2011 རྒྱལ་རབས་དང་པོ། 8 Bible Online

རྒྱལ་རབས་དང་པོ། 8 - Tibetan — པོད་སྐད་Tibetan Old Testament 2011 bible

རྒྱལ་རབས་དང་པོ། 8