Read Tibetan — པོད་སྐད་Tibetan Old Testament 2011 སྔོན་རབས་གཉིས་པ། 29 Bible Online

སྔོན་རབས་གཉིས་པ། 29 - Tibetan — པོད་སྐད་Tibetan Old Testament 2011 bible

སྔོན་རབས་གཉིས་པ། 29

¹ཧེ་ཛི་ཀི་ཡཱ་དགུང་ལོ་ཉི་ཤུ་རྩ་ལྔར་ཕེབས་སྐབས་ཡ་ཧུ་དཱ་པའི་རྒྱལ་པོར་འགྱུར་བ་དང་། ཁོང་གིས་ཡེ་རུ་ཤ་ལེམ་དུ་ལོ་ཉི་ཤུ་རྩ་དགུའི་རིང་རྒྱལ་སྲིད་བསྐྱངས་སོ། ཁོང་གི་ཡུམ་ནི་ཛེ་ཀར་ཡཱའི་བུ་མོ་ཨ་བྷི་ཡཱ་ཟེར་བ་དེ་ཡིན་ནོ།

²ཁོང་གི་མེས་པོ་རྒྱལ་པོ་དཱ་བིད་ཀྱི་རྗེས་སུ་འཇུག་གནང་ནས། ཁོང་གིས་གཙོ་བོ་དཀོན་མཆོག་གིས་ཐུགས་མཉེས་པ་འབའ་ཞིག་གནང་ཡོད་དོ༎

³ཧེ་ཛི་ཀི་ཡཱ་རྒྱལ་པོར་འགྱུར་བའི་ལོ་དང་པོའི་ཟླ་བ་དང་པོའི་རྗེས་སུ། ཁོང་གིས་མཆོད་ཁང་གི་རྒྱལ་སྒོ་ཁག་ཡང་སྐྱར་སྒོ་ཕྱེས་ནས་དེ་ཚོ་ཉམས་གསོ་བྱས་སོ།

⁴ཁོང་གིས་བླ་མ་དང་ལེ་ཝི་པ་ཁག་གཅིག་མཆོད་ཁང་གི་ཤར་ཕྱོགས་ཀྱི་ཁྱམས་རར་འཛོམས་བཅུག་ནས།

⁵ཁོང་གིས་དེ་ཚོ་ལ་བཀའ་གནང་བར། ལེ་ཝི་པ་ཁྱོད་ཚོས་ཁྱེད་རང་ཚོ་དམ་པའི་ཁྲུས་བྱས་ནས། ཁྱོད་རང་ཚོའི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་གི་མཆོད་ཁང་གཙང་མ་བཟོས་དགོས་སོ། མཆོད་ཁང་ནང་གྲིབ་ཅན་མི་གཙང་བ་ཡོད་པ་རྣམས་ཕྱིར་འབུད་བྱོས་ཤིག

⁶ང་ཚོའི་ཕ་མེས་ཚོས་ང་ཚོའི་དཀོན་མཆོག་གཙོ་བོ་དཀོན་མཆོག་ལ་དམ་ཚིག་གཙང་མ་བྱས་མེད་པ་དང་། ཁོང་གིས་ཐུགས་མ་མཉེས་པ་འབའ་ཞིག་བྱས་ནས། དེ་ཚོས་ཁོང་ལ་སྤངས་པ་དང་ཁོང་བཞུགས་ཡུལ་དུ་རྒྱབ་བསྟན་ཡོད་དོ།

⁷དེ་ཚོས་མཆོད་ཁང་གི་སྒོ་རྒྱབ་པ་དང་མཆོད་མེ་དཀྲོང་བཅུག་པ་དང་། ཨིསི་རཱཨེལ་གྱི་དཀོན་མཆོག་གི་མཆོད་ཁང་ནང་སྤོས་མ་བདུག་པ་དང་མཆོད་པ་ཕུལ་མེད་པ་དང་།

⁸དེེའི་རྐྱེན་གྱིས་གཙོ་བོ་དཀོན་མཆོག་ཡ་ཧུ་དཱ་པ་དང་ཡེ་རུ་ཤ་ལེམ་པ་ཚོར་ཐུགས་ཁྲོས་ཡོད་པ་དང་། ཁོང་གིས་དེ་ཚོ་ལ་ཇི་གནང་བ་ལ་ཚང་མས་ཧང་སང་བ་དང་འཇིགས་སྐྲག་སྐྱེས་ཡོད་དོ། དེ་ནི་ཁྱོད་ཚོས་གསལ་པོ་ཤེས་ཀྱི་ཡོད་དོ།

⁹ང་ཚོའི་ཕ་ཚོར་དམག་སར་བསད་པ་དང་ང་ཚོའི་ཆུང་མ་དང་བུ་ཕྲུག་ཚོ་བཙོན་དུ་འཁྲིད་ཡོད་དོ།

¹⁰ངས་ཁོང་གི་ཐུགས་ཁྲོ་བ་དེ་ཞི་བར་བྱེད་པའི་ཆེད། གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་དང་མཉམ་དུ་དམ་བཅའ་ཞིག་འཇོག་རྒྱུ་ཡིན་ནོ།

¹¹ངའི་བུ་ཚོ་དུས་ཚོད་ཆུད་ཟོས་སུ་མ་གཏོང་ཞིག ཁྱོད་ཚོ་གཙོ་བོ་དཀོན་མཆོག་ལ་སྤོས་བདུག་པ་དང་མི་མང་ཚོས་ཁོང་ལ་མཆོད་པར་སྣེ་འཁྲིད་བྱ་མཁན་དུ་འདམས་པ་ཡིན་ཞེས་གསུངས་སོ།

¹²དེར་གཤམ་གསལ་གྱི་ལེ་ཝི་པ་ཚོ་ཡང་ཡོད་དོ། ཀོ་ཧདའི་རིགས་རུས་ནས་ཨ་མ་སེའི་བུ་མ་ཧད་དང་ཨ་ཛར་ཡཱའི་བུ་ཡོ་ཨེལ་དང་། མེ་ར་རིའི་རིགས་རུས་ནས་ཛབ་དཱིའི་བུ་ཀིཤེ་དང་ཡེ་ཧ་ལེ་ལེལ་གྱི་བུ་ཨ་ཛར་ཡ་དང་། གྷེར་ཤོན་གྱི་རིགས་རུས་ནས་ཛིམ་ནའི་བུ་ཡོ་ཨ་དང་ཡོ་ཨའི་བུ་ཨེ་དྷེན་དང་། ཨེ་ལི་ཛ་ཕན་གྱི་རིགས་རུས་ནས་ཤིམ་རི་དང་ཡུ་ཨེལ། ཨ་སཕེ་ཀྱི་རིགས་རུས་ནས་ཛ་ཀར་ཡཱ་དང་མ་ཏན་ཡཱ་དང་། ཧེ་མན་གྱི་རིགས་རུས་ནས་ཡེ་ཧུ་ཨེལ་དང་ཤིམ་ཨི་དང་། ཡེ་དུ་ཐུན་གྱི་རིགས་རུས་ནས་ཤེ་མ་ཡཱ་དང་ཨུ་ཛི་ཨེལ་བཅས་ཡིན་ནོ།

¹⁵མི་དེ་ཚོས་རང་གི་སྤུན་ལེ་ཝི་པ་རྣམས་བསྡུས་ནས་དེ་ཚོ་ཚང་མ་ཆོ་གའི་སྒོ་ནས་གཙང་མ་བཟོས་སོ། དེ་ནས་དེ་ཚོ་ལ་རྒྱལ་པོས་ཇི་ལྟར་བྱེད་དགོས་པའི་བཀའ་གནང་བ་ལྟར། གཙོ་བོ་དཀོན་མཆོག་གི་བཀའ་ཁྲིམས་བཞིན་མཆོད་ཁང་དེ་ཚོ་ཆོ་གའི་སྒོ་ནས་གཙང་མ་བཟོས་སོ།

¹⁶བླ་མ་ཚོ་མཆོད་ཁང་ནང་གཙང་མ་བཟོ་བར་ཕེབས་པ་དང་། མཆོད་ཁང་གི་ཁྱམས་རའི་ནང་ཆོ་ག་ལྟར་གྲིབ་ཅན་ཡིན་པ་རྣམས་ཕྱིར་འདོན་གནང་ནས། ལེ་ཝི་པ་ཚོས་དེ་ཚོ་གྲོང་གྱི་ཕྱིར་ལོག་ཀིད་རོན་གྱི་ལུང་གཤོང་དུ་འཁྱེར་རོ།

¹⁷ཟླ་བ་དང་པོའི་ཚེས་གཅིག་ཉིན་ལས་འགོ་འཛུགས་པ་དང་། ཚེས་བརྒྱད་པར་དེ་ཚོས་མཆོད་ཁང་གི་འཛུལ་སྒོའི་ཁང་མིག་དང་བཅས་ཚང་མ་སྒྲུབ་བོ། དེ་ནས་དེ་ཚོས་ཟླ་བ་དེའི་ཚེས་བཅུ་དྲུག་བར་ཉིན་བརྒྱད་མཆོད་ཁང་ནང་མཆོད་འབུལ་འཕར་མ་གྲ་སྒྲིགས་ཀྱི་ཕྱག་ལེན་གནང་ངོ་༎

¹⁸ལེ་ཝི་པ་ཚོས་རྒྱལ་པོ་ཧེ་ཛི་ཀི་ཡཱ་ལ་གཤམ་གསལ་ལྟར་སྙན་གསེང་ཞུས་པ། ང་ཚོས་མཆོད་ཁང་ཡོངས་རྫོགས་དང་སྦྱིན་སྲེག་ཕུལ་བའི་མཆོད་ཁྲི་དང་། དམ་པའི་བཞེས་བག་གི་གསོལ་ལྕོག་དང་། གཞན་ཡོ་བྱད་ཡོངས་རྫོགས་ཆོ་ག་ལྟར་གཙང་མ་ལེགས་པར་ཟིན་པ་ཡིན་ཞེས་ཞུས་སོ།

¹⁹ང་ཚོས་རྒྱལ་པོ་ཨ་ཧཛ་དཀོན་མཆོག་གི་ཕྱོགས་སུ་དམ་ཚིག་མི་གཙང་བའི་དུས་སུ་འཁྱེར་བའིི་ཡོ་བྱད་ཚང་མ་སྐྱར་དུ་ཕྱིར་ལོག་འཁྱེར་ཡོང་ནས་དེ་ཚོ་ཚང་མ་སྐྱར་དུ་བསྔོ་འབུལ་བྱས་པ་ཡིན། དེ་རྣམས་གཙོ་བོ་དཀོན་མཆོག་གི་མཆོད་ཁྲིའི་མདུན་དུ་ཡོད་ཅེས་སོ།

²⁰རྒྱལ་པོ་ཧེ་ཛི་ཀི་ཡཱས་དུས་ཚོད་འགོར་པོ་མ་གནང་བར་གྲོང་ཁྱེར་གྱི་གནས་ཡོད་མི་སྣ་རྣམས་འཛོམས་བཅུག་ནས། དེ་ཚོ་དང་མཉམ་དུ་མཆོད་ཁང་དུ་ཕེབས་སོ།

²¹རྒྱལ་པོའི་ཁྱིམ་ཚང་དང་ཡ་ཧུ་དཱ་པའི་མི་མང་རྣམས་ཀྱི་སྡིག་པ་སེལ་བ་དང་། མཆོད་ཁང་གཙང་མ་བཟོ་བའི་མཆོད་པའི་ཆེད་ཁོང་ཚོས་བ་གླང་བདུན་དང་། ལུག་བདུན་དང་། ལུག་གུ་བདུན་དང་། ར་བདུན་བཅས་འཁྲིད་ནས། རྒྱལ་པོས། ཨ་རོན་གྱི་རིགས་བརྒྱུད་ཀྱི་བླ་མ་ཚོར་མཆོད་ཁྲིར་སེམས་ཅན་དེ་ཚོ་དམར་མཆོད་ཕུལ་དགོས་པའི་བཀའ་གནང་ངོ་།

²²བླ་མ་ཚོས་དང་པོ་བ་གླང་བསད་པ་དང་། དེ་ནས་ལུག་དང་ལུག་གུ་བཅས་རིམ་བཞིན་བསད་ནས་དམར་མཆོད་རེ་རེའི་ཁྲག་མཆོད་ཁྲིའི་སྟེང་སྟོར་རོ།

²³མཐའ་མར་ཁོང་ཚོས་ར་དེ་ཚོ་རྒྱལ་པོ་དང་གཞན་མཆོད་ཁན་ཚོའི་སར་འཁྲིད་ནས་ཁོ་ཚོས་དེ་ཚོའི་སྟེང་ལག་པ་བཞག་གོ

²⁴དེ་ནས་བླ་མ་ཚོས་ར་རྣམས་བསད་ནས་མི་མང་རྣམས་ཀྱི་སྡིག་པ་སེལ་བའི་མཆོད་པར་དེ་ཚོའི་ཁྲག་མཆོད་ཁྲིའི་སྟེང་གཤོས་སོོ། གང་ཡིན་ཟེར་ན། རྒྱལ་པོས་ཨིསི་རཱཨེལ་པ་ཡོངས་ཀྱི་ཆེད་དུ་སྦྱིན་སྲེག་གི་མཆོད་པ་དང་སྡིག་པའི་ཆེད་མཆོད་པ་ཕུལ་དགོས་པའི་བཀའ་གནང་ཡོད་དོ།

²⁵གཙོ་བོ་དཀོན་མཆོག་གིས། རྒྱལ་པོ་དཱ་བིད་ལ་རྒྱལ་པོའི་ལུང་སྟོན་པ་གྷཌ་དང་ལུང་སྟོན་པ་ན་ཐན་བརྒྱུད་སློབ་སྟོན་གནང་བ་ལྟར་རྒྱལ་པོས་མཛད་ནས། ཁོང་གིས་ལེ་ཝི་པ་ཚོ་ལ་པི་ཝང་དང་སྦུག་ཆལ་བཅས་མཉམ་དུ་མཆོད་ཁང་ནང་ལངས་བཅུག་གོ

²⁶རོལ་མོའི་ཡོ་བྱད་ནི་རྒྱལ་པོ་དཱ་བིད་ཀྱིས་བེད་སྤྱོད་གནང་བ་ལྟར་ཡོད། དེར་བླ་མ་ཚོས་ཡང་དུང་ཆེན་འཁྱེར་ནས་ལངས་བ་ཡང་ཡོད་དོ།

²⁷ཧེ་ཛི་ཀི་ཡཱས་སྦྱིན་སྲེག་གི་མཆོད་པ་འཁྱེར་ཡོང་དགོས་པའི་བཀའ་གནང་བ་དང་། མཆོད་པ་ཕུལ་སྐབས་མི་མང་ཚོས་གཙོ་བོ་དཀོན་མཆོག་ལ་བསྟོད་པའི་མགུར་མ་ཕུལ་ནས། རོལ་མོ་མཁན་ཚོས་དུང་ཆེན་དང་གཞན་རོལ་མོའི་ཡོ་བྱད་ཚང་མ་བཏང་འགོ་ཚུགས་སོ།

²⁸དེར་ཡོད་པའི་མི་མང་རྣམས་ནས་མཆོད་འབུལ་བྱས་པ་དང་མགུར་མ་ལེན་པར་མཉམ་བཞུགས་བྱས་པ་དང་། རོལ་མོ་ཁག་དམར་མཆོད་རྣམས་མ་འཚིག་བར་དུ་མུ་མཐུད་ནས་བཏང་ངོ་།

²⁹དེ་ནས་རྒྱལ་པོ་ཧེ་ཛི་ཀི་ཡཱ་དང་མི་མང་རྣམས་ནས་པུས་མོ་བཙུགས་ནས་དཀོན་མཆོག་ལ་མཆོད་དོ།

³⁰རྒྱལ་པོ་དང་མི་མང་གི་འགོ་འཛིན་ཚོས། ལེ་ཝི་པ་ཚོར་གཙོ་བོ་དཀོན་མཆོག་ལ་བསྟོད་པའི་མགུར་མ་རྣམས་རྒྱལ་པོ་དཱ་བིད་དང་ལུང་སྟོན་པ་ཨ་སཕེ་ཀྱིས་བྲིས་གནང་བ་རྣམས་གཏོང་ཞིག་གསུངས་སོ། དེ་ནས་ཚང་མས་པུས་མོ་བཙུགས་ནས་དཀོན་མཆོག་ལ་མཅོད་པ་དང་དགའ་སྤྲོའི་ངང་མགུར་མ་བཏང་ངོ་།

³¹ཧེ་ཛི་ཀི་ཡཱས་མི་མང་ཚོ་ལ། ད་ཁྱོད་ཚོ་ཆོ་ག་ལྟར་གཙང་མ་ཡིན་པས་གཙོ་བོ་དཀོན་མཆོག་ལ་བཀའ་འདྲིན་གཏང་རག་གི་ཆེད་འབུལ་བའི་མཆོད་པ་རྣམས་འཁྱེར་ཤོག་ཅེས་གསུངས་སོ། དེ་ལྟར་དེ་ཚོས་ཉན་ནས་འགའ་ཤས་ཀྱི་དང་བླང་ཐོག་གཙོ་བོ་དཀོན་མཆོག་ལ་སྦྱིན་སྲེག་གི་མཆོད་པ་ཕུལ་བའི་སེམས་ཅན་འཁྱེར་ཡོང་ངོ་།

³²དེ་ཚོས་སྦྱིན་སྲེག་གི་མཆོད་པའི་ཆེད་དུ་གླང་བདུན་ཅུ་དང་ལུག་ ༡༠༠ དང་ལུག་གུ་ ༢༠༠ བཅས་འཁྱེར་ཡོང་ངོ་།

³³དེ་ཚོས་མི་མང་གི་ཟ་བའི་ཆེད་མཆོད་པར་གླང་ ༦༠༠ དང་ལུག་ ༣,༠༠༠ ཡང་འཁྱེར་ཡོང་ངོ་།

³⁴སེམས་ཅན་དེ་ཚོ་ཚང་མ་གསོད་པའི་བླ་མ་ལྡང་བ་མེད་སྟབས་ལས་ཀ་མ་ཚར་བར་དུ་ལེ་ཝི་པ་ཚོས་རོགས་བྱས་སོ། སྐབས་དེར་བླ་མ་མང་པོས་གཙང་མའི་ཁྲུས་བྱས་ཡོད་དོ། (ལེ་ཝི་པ་ཚོ་ཆོ་ག་བཞིན་གཙང་མ་བྱ་རྒྱུར་བླ་མ་གཞན་ལས་ཀྱང་དམ་ཚིག་ཅན་ཡོད་དོ།)

³⁵བླ་མ་ཚོར་མཆོད་པ་ཆ་ཚང་བསྲེག་ནས་ཕུལ་རྒྱུའི་ཐོག་མི་མང་གི་ཟ་བའི་མཆོད་པའི་ཚིལ་ལུ་ཕུལ་རྒྱུ་དང་། སྦྱིན་སྲེག་གི་མཆོད་པ་མཉམ་དུ་ཕུལ་བའི་རྒུན་ཆང་བླུག་རྒྱུའི་ལས་འགན་ཡང་ཡོད་དོ། དེ་ལྟར་མཆོད་ཁང་དུ་མཆོད་རྒྱུ་དེ་ཡང་སྐྱར་འགོ་ཚུགས་སོ།

³⁶རྒྱལ་པོ་ཧེ་ཛི་ཀི་ཡཱ་དང་མི་མང་རྣམས་དགའ་སྤྲོའི་ངང་གནས་ཡོད། གང་ལ་ཟེར་ན། དཀོན་མཆོག་གི་དེ་ཚོ་ཚང་མ་མགྱོགས་པོ་བྱ་རྒྱུར་ཁོང་ཚོར་རོགས་གནང་ངོ་༎