Read Tibetan — པོད་སྐད་Tibetan Old Testament 2011 ཨེཛ་ར 5 Bible Online

ཨེཛ་ར 5 - Tibetan — པོད་སྐད་Tibetan Old Testament 2011 bible

ཨེཛ་ར 5

¹དུས་སྐབས་དེར་ཧག་གྷཨེ་དང་ཨིད་དྷོའི་བུ་ཛ་ཀར་ཡཱ་བཅས་ལུང་སྟོན་པ་གཉིས་ནས་ཡ་ཧུ་དཱ་དང་ཡེ་རུ་ཤ་ལེམ་དུ་གནས་སྡོད་བྱ་མཁན་ཡ་ཧུ་དཱ་པ་ཚོར་ཨིསི་རཱཨེལ་གྱི་དཀོན་མཆོག་གི་མཚན་ཐོག་བཀའ་མོལ་གནང་འགོ་ཚུགས་སོ།

²དེ་ནས་ཤལ་ཏི་ཨེལ་གྱི་སྲས་ཛེ་རུ་བྷ་བྷེལ་དང་ཡེ་ཧོ་ཛ་དག་གི་སྲས་ཡོ་ཤུ་ཨ་གཉིས་ནས་དེ་ཚོའི་གསུང་འཕྲིན་ཐོས་སྐབས་ཡེ་རུ་ཤ་ལེམ་གྱི་མཆོད་ཁང་བཞེངས་འགོ་ཚུགས་པ་དང། དེ་ཚོ་ལ་ལུང་སྟོན་པ་གཉིས་ནས་རོགས་རམ་གནང་ངོ།

³ཕལ་ཆེར་དེ་མ་ཐག་ཏུ་ནུབ་ཡུབ་རད་གཙང་པོའི་སྤྱིད་ཁྱབ་པ་ཀྲ་ཀྲེ་ནཡེ་དང་ཤེ་ཐར་བྷོ་ཛི་ནེ་དང་དེ་ཚོའི་ལས་རོགས་ལས་བྱེད་པ་ཚོ་དང་བཅས་པ་ཡེ་རུ་ཤ་ལེམ་དུ་འབྱོར་ནས། ཁྱོད་ཚོར་མཆོད་ཁང་བཞེངས་རྒྱུ་དང་དེར་གོ་སྒྲིགས་བྱ་རྒྱུ་སུས་བཀའ་གནང་བྱུང་ངམ་ཞེས་འདྲི་རྩད་བྱས་པས།

⁴དེ་ཚོས་མཆོད་ཁང་བཞེངས་རྒྱུར་རོགས་བྱ་མཁན་ཚང་མའི་མིང་ཡང་དྲིས་སོ།

⁵འོན་ཀྱང་དཀོན་མཆོག་གིས་ཡ་ཧུ་དཱ་པ་ཚོའི་སྟེང་དུ་གཟིགས་བཞིན་ཡོད་སྟབས། པར་སི་ཡའི་ལས་བྱེད་པ་དེ་ཚོས་དྷ་རི་ཡསེ་ལ་ཕྱག་བྲིས་ཤིག་ཕུལ་ནས་དེའི་ལན་མ་འབྱོར་བར་དུ་གང་ཡང་མི་བྱ་རྒྱུའི་ཐག་ཆོད་བྱས་སོ།

⁶དེ་ཚོས་རྒྱལ་པོར་ཕུལ་བའི་སྙན་ཞུ་ནི་གཤམ་གསལ་ལྟར་ཡིན།

⁷རྒྱལ་པོ་ཆེན་པོ་དྷ་རི་ཡསེ་ལ་འབུལ་རྒྱུའི་ཡི་གེ་ནང་འཁོད། ཁྱེད་ཀྱི་རྒྱལ་སྲིད་ཞི་བདེའི་ངང་སྐྱོངས་བར་ཤོག

⁸མི་དབང་ཁྱད་ཀྱི་མཁྱེན་དགོས་རྒྱུར། ང་ཚོ་ཡ་ཧུ་དཱའི་མངའ་སྡེར་འབྱོར་ནས། དེར་རླབས་ཆེན་དཀོན་མཆོག་གི་མཆོད་ཁང་དེ་བཞིན་རྡོ་ལེབ་ཆེན་པོ་དང་རྩིག་པར་ཤིང་གི་མདུང་མ་བཙུགས་ནས་སྐྱར་བཞེངས་བྱེད་པ་དང། ལས་ཀ་རྣམས་ཧ་ཅང་ཟབ་ཟབ་དང་མུ་མཐུད་བརྟན་པོའི་ངང་བྱེད་བཞིན་ཡོད་པ་ཤེས་རྟོགས་འབྱུང།

⁹དེ་ནས་ང་ཚོས་མི་མང་གི་འགོ་འཛིན་ཚོ་ལ་མཆོད་ཁང་སྐྱར་བཞེངས་ཀྱི་གོ་སྒྲིགས་བྱ་རྒྱུའི་དབང་ཆ་སུ་ཡི་སྤྲད་བྱུང་ངམ་ཞེས་དྲིས་པ་ཡིན་ནོ།

¹⁰ལས་ཀའི་འགོ་འཛིན་དེ་སུ་ཡིན་ཁྱེད་ལ་ཞུ་བའི་ཆེད་དུ་ང་ཚོས་དེ་ཚོའི་མིང་ཡང་དྲིས་པ་ཡིན་ནོ།

¹¹དེ་ཚོས་ལན་དུ། ངེད་རྣམས་མཐོ་རིས་དང་ས་གཞིའི་དཀོན་མཆོག་གི་ཞབས་ཕྱི་ཡིན་པ་དང་ང་ཚོས་ལོ་མང་པོའི་སྔོན་དུ་ཨིསི་རཱཨེལ་གྱི་མཐུ་སྟོབས་ཅན་གྱི་རྒྱལ་པོས་གོ་སྒྲིགས་གནང་ནས་བཞེངས་པའི་མཆོད་ཁང་དེ་ང་ཚོས་སྐྱར་བཞེངས་བྱེད་བཞིན་ཡོད་ཅེས་ཞུས་སོ།

¹²ང་ཚོའི་ཕ་མེས་ཚོས་མཐོ་རིས་ཀྱི་དཀོན་མཆོག་གི་ཐུགས་དཀྲུགས་ཡོད་སྟབས། ཁོང་གིས་ཀལ་དི་རྒྱལ་བརྒྱུད་ཡིན་པའི་རྒྱལ་པོ་བྷེ་བྷིལ་ལོ་ནི་ཡའིི་རྒྱལ་པོ་ནེ་བུ་ཀད་ནེ་ཛར་གྱིས་དེ་ཚོའི་ཐོག་དབང་བསྒྱུར་བྱེད་དུ་འཇུག་གནང་ནས། མཆོད་ཁང་དེ་བཞིན་བཤིག་ནས་མི་མང་རྣམས་བྷེ་བྷི་ལོ་ནི་ཡ་དུ་བཙན་བྱོལ་དུ་འཁྲིད་དོ།

¹³དེ་ནས་བྷེ་བྷི་ལོན་ནི་ཡའི་རྒྱལ་པོ་ཆེན་པོ་སའི་རསེ་ཀྱི་རྒྱལ་སྲིད་སྐྱངས་པའི་ལོ་དང་པོར་སའི་རསེ་ཀྱི་མཆོད་ཁང་སྐྱར་བཞེངས་དགོས་པའི་བཀའ་བཀྲམས་པར་མཛད་དོ།

¹⁴ཁོང་གིས་ནེ་བུ་ཀད་ནེ་ཛར་གྱིས་ཡེ་རུ་ཤ་ལེམ་གྱི་མཆོད་ཁང་ནས་འཁྱེར་ནས་བྷེ་བྷི་ལོན་གྱི་མཆོད་ཁང་དུ་བཞག་ཡོད་པའི་གསེར་དངུལ་གྱི་ཡོ་བྱད་རྣམས་སླར་གསོ་མཛད་པ་དང། སེ་རསེ་ཀྱིས་ཡོ་བྱད་དེ་ཚོ་ཁོང་གིས་སྤྱིད་ཁྱབ་སུ་བསྐོས་བའི་སྐྱེ་བོ་ཤེཤེ་བྷ་ཛར་ཟེར་བར་རྩིས་སྤྲོད་གནང་ངོ།

¹⁵རྒྱལ་པོ་ཆེན་པོས་ཁོ་ལ་དེ་ཚོ་འཁྱེར་ནས་ཡེ་རུ་ཤ་ལེམ་གྱི་མཆོད་ཁང་ལ་ཕྱིར་སློག་ནས་སྔར་མཆོད་ཁང་ཡོད་ས་དེར་མཆོད་ཁང་སྐྱར་བཞེངས་བྱོས་ཤིག་གསུངས་སོ།

¹⁶དེར་བརྟེན་ཤེཤེ་བྷ་ཛར་ཕེབས་ནས་མཆོད་ཁང་གི་རྨང་གཞི་བཏིང་བ་ནས་བཟུང་དབར་བཟོ་བསྐྲུན་མུ་མཐུད་གནང་ན་ཡང་མཆོད་ཁང་ད་བར་མ་ཚར་རོ།

¹⁷ད་ཆ་མི་དབང་ཁྱེད་ཀྱི་ཐུགས་མཉེས་པ་ཡིན་ན་། བྷེ་བྷི་ལོན་གྱི་རྒྱལ་ཁབ་ཀྱི་ལོ་རྒྱུས་ནང་སའི་རསེ་ཀྱིས་ཡེ་རུ་ཤ་ལེམ་གྱི་མཆོད་ཁང་དེ་བཞིན་བཞེེངས་དགོས་པའི་བཀའ་གནང་ཡོད་མེད་འཚོལ་ཞིབ་གནང་ནས་ཁྱེད་ཀྱི་དེའི་ཐོག་ཐུགས་དགོངས་ཇི་ཡོད་ཕྲན་ཚོར་བཀའ་གསལ་ཡོད་པ་ཞུ་ཅེས་སོ༎