Read Tibetan — པོད་སྐད་Tibetan Old Testament 2011 ཨེཛ་ར 7 Bible Online

ཨེཛ་ར 7 - Tibetan — པོད་སྐད་Tibetan Old Testament 2011 bible

ཨེཛ་ར 7

¹ལོ་མང་པོའི་རྗེས་པར་སི་ཡའི་རྒྱལ་པོ་ཆེན་པོ་ཨར་ཐག་ཤས་ཐ་ཡིན་སྐབས་སྐྱེ་བོ་ཨེཛ་ར་ཞུ་བ་ཞིག་ཡོད་པས། ཁོང་གི་རིགས་བརྒྱུད་ཡིན་པའི་བླ་མའི་གཙོ་བོ་ཨ་རོན་བརྒྱུད་ནས་ཆད་ཡོད་པ་གཤམ་གསལ་ལྟར་ཡིན་ནོ། ཨེཛ་ར་ནི་སེ་ར་ཡཱའི་བུ་དང་ཁོང་ནི་ཨ་ཛར་ཡཱའི་བུ་དང་ཁོང་ནི་ཧིལ་ཀི་ཡཱའི་བུ་དང།

²ཁོང་ནི་ཤལ་ལུམ་གྱི་བུ་དང་ཁོང་ནི་ཛ་དཱོག་གི་བུ་དང་ཁོང་ནི་ཨ་ཧི་ཏུབ་ཀྱི་བུ་དང།

³ཁོང་ནི་ཨ་མར་ཡཱའི་བུ་དང་ཁོང་ནི་ཨ་ཛར་ཡཱའི་བུ་དང་ཁོང་ནི་མེ་ར་ཡོད་ཀྱི་བུ་དང།

⁴ཁོང་ནི་ཛེ་ར་ཡཱའི་བུ་དང་ཁོང་ནི་ཨུ་ཛིའི་བུ་དང་ཁོང་ནི་བྷུག་ཀིའི་བུ་དང།

⁵ཁོང་ནི་ཨ་བྷི་ཤུ་ཨའི་བུ་དང་ཁོང་ནི་ཕིན་ཧསི་ཀྱི་བུ་དང་ཁོང་ནི་ཨེ་ལི་ཛར་གྱི་བུ་དང་ཁོང་ནི་ཨ་རོན་གྱི་བུ་ཡིན་ནོ།

⁶ཨེཛ་ར་ནི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་མོ་ཤེ་ལ་གནང་བའི་བཀའ་ཁྲིམས་ཀྱི་སྐོར་མཁྱེན་ཡོན་ཅན་དང་མཁས་དབང་ཞིག་ཡིན་ནོ། ཨེཛ་ར་ལ་གཙོ་བོ་དཀོན་མཆོག་ཁོང་གི་དཀོན་མཆོག་གི་བྱིན་རླབས་ཡོད་སྟབས། རྒྱལ་པོ་ཆེན་པོས་ཁོང་གི་ཐུགས་འདོད་ཇི་ཡོད་ཞུས་པ་ཆ་ཚང་གནང་ངོ། ཨར་ཐག་ཤས་ཐས་རྒྱལ་སྲིད་བཟུང་བའི་ལོ་བདུན་པར་ཨེཛ་ར་དང་བླ་མ་ཚོ་དང་ལེ་ཝི་པ་ཚོ་དངམཆོད་ཁང་གི་རོལ་མོ་མཁན་དང་མཆོད་ཁང་གི་སྐུ་སྲུང་བ་དང་ལས་མི་བཅས་ཡོད་པའི་ཨིསི་རཱཨེལ་པ་ཚོ་ཞིག་མཉམ་དུ་བྷེ་བྷི་ལོ་ནི་ཡ་ནས་ཡེ་རུ་ཤ་ལེམ་དུ་ཐོན་ནོ།

⁸དེ་ཚོ་བྷེ་བྷི་ལོ་ནི་ཡ་ནས་ཟླ་བ་དང་པོའི་ཚེས་གཅིག་ལ་ཐོན་པ་དང། དཀོན་མཆོག་གི་ཐུགས་རྗེས་ཡེ་རུ་ཤ་ལེམ་དུ་ཟླ་བ་ལྔ་པའི་ཚེས་གཅིག་ལ་བྱོར་རོ།

¹⁰ཨེཛ་རས་ཁོང་གི་སྐུ་ཚེ་ཧྲིལ་པོ་གཙོ་བོ་དཀོན་མཆོག་གི་བཀའ་ཁྲིམས་ལ་སློབ་གཉེར་གནང་རྒྱུ་དང་དེ་ཚོར་ཉམས་ལེན་གནང་རྒྱུ་དང་ཨིསི་རཱཨེལ་གྱི་མི་མང་ཚོར་བཀའ་ཁྲིམས་དང་ལམ་ལུགས་ཡོང་རྡོགས་ལ་སློབ་སྟོན་གནང་རྒྱུར་བེད་སྤྱོད་མཛད་དོ༎

¹¹ཨར་ཐག་ཤས་ཐས་བླ་མ་དང་མཁྱེན་ཡོན་ཅན་ལ་གཙོ་བོ་དཀོན་མཆོག་གིས་ཨིསི་རཱཨེལ་པ་ཚོར་བཀའ་ཁྲིམས་དང་བཀའ་རྒྱ་ཡོངས་ཀྱི་མཁྱེན་ཡོན་ཆ་ཚང་ཡོད་མཁན་ཨེཛ་ར་ལ་གཤམ་གསལ་གྱི་ཡིག་ཆ་གནང་ངོ།

¹²རྒྱལ་པོ་ཆེན་པོ་ཨར་ཐག་ཤས་ཐ་ནས་མཐོ་རིས་ཀྱི་དཀོན་མཆོག་གི་བཀའ་ཁྲིམས་གྱི་སྐོར་ལ་མཁྱེན་ཡོན་ལྡན་པ་བླ་མ་ཨེཛ་ར་ལ་སྤྲོད་རྒྱུར།

¹³ངས་ཨིསི་རཱཨེལ་གྱི་མི་མང་དང་བླ་མ་ཚོ་དང་ལེ་ཝི་པ་ཚོ་ཁྱོད་དང་མཉམ་དུ་ཡེ་རུ་ཤ་ལེམ་དུ་འགྲོ་བར་འདོད་མཁན་ཚོ་ལ་འགྲོ་ཆོག་པའི་བཀའ་ངའི་རྒྱལ་ཁམས་ཡོངས་སུ་གཏོང་བར་བྱའོ།

¹⁴ང་དང་ངའི་གྲོས་སྟོན་པ་བདུན་པོས། ཁྱོད་ལ་ཡེ་རུ་ཤ་ལེམ་དང་ཡ་ཧུ་དཱར་ཁྱོད་ཀྱི་དཀོན་མཆོག་གི་བཀའ་ཁྲིམས་ཁྱོད་ལ་བློས་འགེལ་གྱིས་རྩིས་གནང་བ་དེ་ཚོ་ལེགས་པོ་ཇི་ལྟར་སྲུང་བརྩི་ཞུ་བཞིན་ཡོད་པ་གཟིགས་བའི་ཆེད་རྩད་ཞིབ་བྱེད་པར་གཏོང་རྒྱུ་ཡིན།

¹⁵ཁྱོད་ཀྱིས་ང་དང་ངའི་གྲོས་སྟོན་པ་ཚོས་ཡེ་རུ་ཤ་ལེམ་དུ་ཡོད་པའི་ཨིསི་རཱཨེལ་གྱི་དཀོན་མཆོག་མཆོད་ཁང་ལ་འབུལ་བར་འདོད་པའི་གསེར་དངུལ་རྣམས་ཁྱོད་དང་མཉམ་དུ་འཁྱེར་དགོས།

¹⁶དེ་མིན་ཁྱོད་ཀྱིས་བྷེ་བྷི་ལོན་གྱི་མངའ་སྡེ་ཡོངས་ནས་སྡུད་པའི་གསེར་དངུལ་དང། ཨིསི་རཱཨེལ་གྱི་མི་མང་དང་དེ་ཚོའི་བླ་མ་ཚོས་ཡེ་རུ་ཤ་ལེམ་དུ་ཡོད་པའི་དཀོན་མཆོག་གི་མཆོད་ཁང་ལ་འབུལ་བའི་འབུལ་བ་རྣམས་འཁྱེར་དགོས་སོ།

¹⁷ཁྱོད་ཀྱི་དངུལ་འདི་ཚོ་ཟབ་ཟབ་ངང་བེད་སྤྱོད་གནང་ནས་གླང་དང་ལུག་ཐུག་དང་ལུ་གུ་དང་འབྲུ་དང་ཆང་རྣམས་དང་བཅས་ཉོས་ནས་དེ་ཚོ་ཡེ་རུ་ཤ་ལེམ་གྱི་མཆོད་ཁང་གི་མཆོད་ཁྲིར་འབུལ་དགོས་སོ།

¹⁸གསེར་དངུལ་ལྷག་མ་རྣམས་ཁྱོད་ཀྱི་དཀོན་མཆོག་གི་ཐུགས་དགོངས་ལྟར། ཁྱོད་དང་ཁྱེད་ཀྱི་ཡུལ་མི་ཚོའི་གང་ལེགས་པ་ལྟར་བེད་སྤྱོད་བྱེད་ཆོག་གོ

¹⁹ཁྱོད་ཀྱི་ཡེ་རུ་ཤ་ལེམ་དུ་དཀོན་མཆོག་གི་མཆོད་ཁང་ལ་བཀུར་སྟི་ཞུས་བའི་ཆེད་དུ་བེད་སྤྱོད་བྱེད་པའི་སྣོད་ཆས་རྣམས་དཀོན་མཆོག་ལ་འབུལ་དགོས་སོ།

²⁰དེ་མིན་ཁྱོད་ལ་མཆོད་ཁང་གི་ཆེད་དུ་དགོས་མཁོ་ཡོད་པ་རྣམས་ཁྱོད་ཀྱིས་རྒྱལ་པོའི་བང་མཛོད་ནས་ལེན་ཆོག་པ་ཡིན་ནོ།

²¹ངས་ནུབ་ཡུབ་རད་གཙང་པོའི་མངའ་སྡེའི་རྒྱལ་པོའི་བང་མཛོད་ཀྱྱི་ལས་བྱེད་པ་ཡོངས་ལ་བླ་མ་དང་མཐོ་རིས་ཀྱི་དཀོན་མཆོག་གི་བཀའ་ཁྲིམས་ཀྱི་མཁས་དབང་ཨེཛ་ར་ལ་ཇི་འདྲ་དགོས་གསུངས་པ་འཕྲལ་དུ་འབུལ་དགོས་པའི་བཀའ་གཏོང་རྒྱུ་ཡིན་ནོ།

²²དེའི་ཚད་ནི་དངུལ་ཀྱི་ལོ་ག་རམ་ ༣,༤༠༠ བར་དང་གྲོ་ཀི་ལོ་ག་རམ་ ༡༠,༠༠༠ བར་དང་རྒུན་ཆང་ལི་ཀྲར་ ༢,༠༠༠ བར་དང། ཁ་སྐྱུ་པོའི་སྣུམ་ལི་ཀྲར་ ༢,༠༠༠ བར་དང། ཚ་དགོས་ངེས་ལྟར་བཅས་ཡིན་ནོ།

²³ཁྱོད་ཀྱིས་མཐོ་རིས་ཀྱི་དཀོན་མཆོག་ཁོང་གི་མཆོད་ཁང་ལ་གང་དགོས་པ་རྣམས་འབུལ་རྒྱུར་བརྟེན་པོ་གནང་དགོས་པ་དང། ཁོང་ང་དང་ངའི་རྗེས་སུ་རྒྱལ་སྲིད་བཟུང་མཁན་ལ་ནམ་ཡང་ཐུགས་མི་ཁྲོ་བ་བྱས་དགོས་སོ།

²⁴ཁྱེད་ཀྱིས་བླ་མ་ཚོ་དང་ལེ་ཝི་པ་ཚོ་དང་རོལ་མོ་མཁན་ཚོ་དང་སྐུ་སྲུང་བ་ཚོ་དང་ལས་མི་ཚོ་དང་ཡང་ན་མཆོད་ཁང་དང་འབྲེལ་བ་ཡོད་མཁན་སུ་ཞིག་ནས་དཔྱ་ཁྲལ་ལེན་མི་ཆོག་གོ

²⁵ཨེཛ་ར་ཁྱོད་ཀྱིས་དཀོན་མཆོག་གིས་ཁྱེད་ལ་གནང་བའི་ཤེས་རབ་ལ་བེད་སྤྱོད་གནང་ནས་ཁྱེད་ཀྱི་དཀོན་མཆོག་གི་བཀའ་ཁྲིམས་ལྟར་གནས་སྡོད་བྱ་མཁན་ནུབ་ཡུབ་རད་གཙང་པོའི་མི་མང་ཚོར་དབང་བསྒྱུར་བྱད་མཁན་དང་ཁྲིམས་དཔོན་བསྐོས་ཤིག བཀའ་ཁྲིམས་དེ་ཚོ་མི་ཤེས་མཁན་ལ་ངེས་པར་དུ་སློབ་སྟོན་བྱེད་དགོས་སོ།

²⁶སུ་ཞིག་ནས་ཁྱོད་ཀྱི་དཀོན་མཆོག་གི་བཀའ་ཁྲིམས་སམ་ཡང་ན་རྒྱལ་ཁམས་ཀྱི་ཁྲིམས་ལ་སྲུང་བརྩི་མ་ཞུས་པ་ཡིན་ན། དེ་ཚོར་སྲོག་ཐོག་གམ་ཡང་ན་མཐའ་འབུད་དམ་རྒྱུ་ནོར་གཞུང་བཞེས་སམ་བཙོན་འཇུག་གིས་ཉེས་པ་འཕྲལ་དུ་གཏོང་དགོས་ཅེས་སོ༎

²⁷ཨེཛ་རས་གསུངས་པ། ང་ཚོའི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་ལ་བསྟོད་པ་ཕུལ། ཁོང་གིས་རྒྱལ་པོ་ཆེན་པོ་ལ་ཡེ་རུ་ཤ་ལེམ་གྱི་དཀོན་མཆོག་གི་མཆོད་ཁང་ལ་གུས་ཞབས་ཞུ་འདོད་ཅན་བཟོས་པར་མཛད་དོ།

²⁸དཀོན་མཆོག་གི་ཐུགས་རྗེ་ལས་ང་ལ་རྒྱལ་པོ་དང་ཁོང་གི་བཀའ་གྲོས་མཁན་ཚོ་དང་ཁོང་གི་དབང་ཡོད་ཅན་གྱི་ལས་བྱེད་པ་ཚང་མ་མགོ་འདྲེན་ཐོབ་པ་དང་གཙོ་བོ་དཀོན་མཆོག་ང་ཡིས་དཀོན་མཆོག་གིས་ང་ལ་བདག་ལ་བློ་སྟོབས་གནང་བ་དང། ང་ཡིས་ཨིསི་རཱཨེལ་གྱི་རིགས་རུས་ཚོའི་འགོ་འཛིན་མང་པོ་ང་དང་མཉམ་དུ་ཕྱིར་ལོག་རྒྱུར་འབོད་བསྐུལ་ཐུབ་པ་བྱུང་སོང་ཞེས་སྨྲས་སོ༎