Read Tibetan — པོད་སྐད་Tibetan Old Testament 2011 ཨེཛ་ར 9 Bible Online

ཨེཛ་ར 9 - Tibetan — པོད་སྐད་Tibetan Old Testament 2011 bible

ཨེཛ་ར 9

¹དེ་ལྟར་ཚང་མ་གྱིས་པའི་རྗེས་ལ་ཨིསི་རཱཨེལ་གྱི་མི་མང་གི་འགོ་འཁྲིད་འགའ་ཤས་ངའི་སར་ཡོང་ནས། ང་ལ་མི་མང་དང་བླ་མ་དང་ལེ་ཝི་པ་ཚོས་རང་ལ་ཁྱིམ་མཚེས་རྒྱལ་ཁབ་ཨམ་མོན་དང་མོ་ཨབ་དང་ཨི་ཇིབ་ཀྱི་མི་མང་དང་ཡང་ན་ཀ་ནན་པ་དང་ཧི་ཏི་པ་དང་པེ་རི་ཛི་པ་དང་ཡེ་བུ་སི་པ་དང་ཨ་མོར་པ་བཅས་ནས་ལོག་སུ་མ་བསྡད་པར་དེ་ཚོས་བྱེད་པའི་ཞེན་ལོག་ཅན་གྱི་བྱ་བ་རྣམས་བྱེད་བཞིན་ཡོད་པའི་སྐོར་ང་ལ་སྨྲས་བྱུང།

²ཡ་ཧུ་དཱ་པ་ཁྱོད་ཚོས་ཕྱི་རྒྱལ་བའི་བུད་མེད་ཚོ་དང་ཆང་ས་བརྒྱབ་བཞིན་ཡོད་སྟབས་དཀོན་མཆོག་གི་མི་མང་དམ་པ་ཚོ་གྲིབ་ཅན་དུ་གྱུར་བ་དང། འགོ་འཁྲིད་ཚོ་དང་ལས་བྱེད་པ་ཚོ་ཁྲིམས་འགལ་བྱ་མཁན་གཙོ་བོ་དེ་ཚོ་ཡིན་ནོ།

³ང་ཡིས་དེ་ལྟར་ཐོས་སྐབས་སེམས་སྡུག་གི་རང་གི་གོས་ཧྲལ་བ་དང་སྐྲ་དང་རྨ་ར་འཐེན་ནས་མྱ་ངན་གྱིས་ནོན་ནས་ས་ཁར་བསྡད་པ་ཡིན།

⁴ང་དེར་དགོངས་དྲོའི་དམར་མཆོད་འབུལ་མ་རན་བར་དུ་མྱ་ངན་བྱེད་བཞིན་བསྡད་པ་དང། ཨིསི་རཱཨེལ་གྱི་དཀོན་མཆོག་གིས་བཙན་བྱོལ་ལས་ཕྱིར་ལོག་མཁན་ཚོའི་སྡིག་པའི་སྐོར་ཇི་ལྟར་བཀའ་གནང་བར་འཇིགས་མཁན་གྱི་མི་མང་རྣམས་རིམ་བཞིན་ངའི་མཐའ་འཁོར་དུ་བསྡད་དོ།

⁵དགོངས་དྲོའི་དམར་མཆོད་འབུལ་བའི་དུས་ཚོད་ལ་སླེབས་སྐབས་རང་གི་གོས་རལ་པ་དེ་གྱོན་བཞིན་དུ་མྱ་ངན་བྱ་ཡུལ་ས་གནས་དེ་ནས་ཡར་ལངས་ཏེ་སྤུས་མོ་བཙུགས་ནས་སྨོན་ལམ་འདེབས་བཞིན་གཙོ་བོ་དཀོན་མཆོག་ང་ཡི་དཀོན་མཆོག་གི་ཕྱོགས་སུ་ལག་པ་བརྐྱངས་ནས།

⁶ངས་ཞུས་པར་ཀྱེ་དཀོན་མཆོག་ཁྱེད་ཀྱི་སྐུ་དྲུང་དུ་ངའི་མགོ་བོ་ཡར་འདེགས་རྒྱུར་ཧ་ཅང་ངོ་ཚ་བཞིན་འདུག ང་ཚོའི་སྡིག་པ་རྣམས་སྤུངས་ཡོད་པ་དང་ང་ཚོའི་མགོ་བོ་ལས་མཐོ་པོར་འགྱུར་ཡོད་པས་དེ་ཚོ་མཐོ་རིས་བར་དུ་སླེབས་ཡོད་དོ།

⁷ང་ཚོའི་ཕ་མེས་ཀྱི་དུས་ནས་དེ་རིང་བར་དུ་ང་ཚོ་ཁྱོད་ཀྱི་མི་མང་ཚོས་སྡིག་པ་ཆེན་པོ་བསགས་ཡོད། ང་ཚོའི་སྡིག་པའི་རྐྱེན་གྱིས་ང་ཚོ་དང་ང་ཚོའི་རྒྱལ་པོ་ཚོ་དང་བླ་མ་ཚོ་བཅས་པ་ཕྱི་རྒྱལ་གྱི་རྒྱལ་པོའི་ལག་ཏུ་ཤོར་ནས་ང་ཚོ་དམར་གསོད་བཏང་བ་དང་ཇག་བཅོམ་གྱིས་ནས་བཙོན་པ་ལྟར་འཁྲིད་ཡོད་དོ། དེ་རིང་བར་དུ་ང་ཚོར་དམའ་འབེབས་ཆ་ཚང་གྱིས་ནང་དུ་གནས་ཡོད་དོ།

⁸ད་ཆ་དུས་ཚོད་ཐུང་ཐུང་ཞིག་རིང་གཙོ་བོ་དཀོན་མཆོག་ང་ཚོའི་དཀོན་མཆོག་ཁྱེད་ཀྱིས་ང་ཚོར་བཀའ་དྲིན་ཆེན་པོའི་སྒོ་ནས་ང་ཚོ་འགའ་ཤས་ཚེ་གཡོག་ལས་ཐར་དུ་འཇུག་གནང་ནས་གནས་དམ་པ་འདིར་བདེ་འཇགས་ངང་གནས་སུ་འཇུག་གནང་ཡོད། ང་ཚོ་ཚེ་གཡོག་ཡིན་བཞིན་དུ་ཁྱེད་ཀྱིས་ང་ཚོར་མི་ཚེ་གསར་བ་གནང་ངོ།

⁹ཁྱེད་ཀྱིས་ང་ཚོ་ཚེ་གཡོག་ཏུ་གནས་སུ་འཇུག་གནང་མེད། ཁྱེད་ཀྱིས་པར་སི་ཡའི་རྒྱལ་པོ་ཆེན་པོ་རྣམས་ང་ཚོར་ཐུགས་རྗེ་དང་ང་ཚོ་འཚོ་བར་གནས་བཅུག་པ་དང། ཁྱེད་ཀྱི་མཆོད་ཁང་གྱང་གོག་ཏུ་སོང་བ་དེ་སྐྱར་བཞེངས་བྱེད་རྒྱུ་དང་ཡ་ཧུ་དཱ་དང་ཡེ་རུ་ཤ་ལེམ་དུ་བདེ་འཇགས་སུ་གནས་པ་བཅས་ཡོང་བ་བཟོས་གནང་ཡོད་དོ།

¹⁰འོན་ཀྱང་ཀྱེ་དཀོན་མཆོག་ད་ཆ་དེ་ལྟར་ཚང་མ་བྱུང་བའི་རྗེས་ལ་ང་ཚོས་ཁྱེད་ལ་གང་ཞུས་ཐུབ་བམ། ང་ཚོས་སླར་ཡང་ཁྱེད་ཀྱི་བཀའ་རྣམས་ལ་སྲུང་བརྩི་ཞུས་མེད་དོ།

¹¹བཀའ་དེ་ཚོ་ཁྱེད་ཀྱིས་ཞབས་ཕྱི་ལུང་སྟོན་པ་རྣམས་བརྒྱུད་ནས་གནང་ཡོད། དེ་ཚོས་ང་ཚོའི་དབང་བར་བྱེད་པའི་ཡུལ་དེ་བཞིན་མི་གཙང་བ་ཡིན། གང་ལགས་ཟེར་ན། དེར་གནས་སྡོད་བྱེད་པའི་མི་མང་ཚོས་ཡུལ་གྱི་མཐའ་གཅིག་ནས་གཞན་བར་ཞེན་ལོག་དང་སྐྱུག་བྲོའི་བྱ་བས་བཀང་ཡོད་ཅེས་གསུངས་སོ།

¹²དེ་ཚོས་ང་ཚོའི་ཡུལ་དེ་བཞིན་དབང་བར་འདོད་ཅིང་ང་ཚོའི་རིགས་བརྒྱུད་རྗེས་མ་ཚོར་གཏན་དུ་སྤྲད་པར་འདོད་ན་ང་ཚོས་མི་མང་དེ་ཚོ་མཉམ་དུ་ནམ་ཡངཆང་ས་བརྒྱབ་མི་ཆོག་པ་དང། དེ་ཚོ་འཕེལ་རྒྱས་དང་ལམ་ལྟོང་བྱུང་བར་ནམ་ཡང་རོགས་བྱེད་མི་རུང་གསུངས་སོ།

¹³འོན་ཀྱང་ང་ཚོའི་སྡིག་པ་དང་ནོར་འཁྲུལ་རྣམས་ལ་ཉེས་ཆད་ཚང་མ་བྱུང་བའི་རྗེས་ལ་ང་ཚོས་ང་ཚོའི་དཀོན་མཆོག་ཁྱེད་ཀྱིས་ང་ཚོར་དགོས་ངེས་ཀྱི་ཉེས་ཆད་ལས་ཉུང་བར་གཏོང་གནང་ནས་ང་ཚོ་འཚོ་རུ་འཇུག་གནང་བ་ཤེས་ཀྱི་ཡོད་དོ།

¹⁴དེ་བས་ན་ང་ཚོས་སླར་ཡང་ཁྱེད་ཀྱི་བཀའ་ལ་བརྩི་མེད་ཀྱིས་མི་མང་སྤྱོད་ངན་དེ་ཚོ་མཉམ་དུ་ཇི་ལྟར་ཆང་ས་བརྒྱབ་ཐུབ་བམ། གལ་སྲིད་དེ་ལྟར་ང་ཚོས་གྱིས་པ་ཡིན་ན་ཁྱེད་ཧ་ཅང་ཐུགས་ཁྲོ་བར་འགྱུར་ནས་ཁྱེད་ཀྱིས་ང་ཚོ་ཆ་ཚང་འཇིགས་པར་མཛད་ནས་སུ་ཡང་འཚོ་བར་མི་འཇུག་གོ

¹⁵གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་ཁྱེད་དྲང་བདེན་ཡིན་པས་ཀྱིས་ང་ཚོ་འཚོ་རུ་འཇུག་གནང་ཡོད། ང་ཚོའི་སྐྱོན་རྣམས་ང་ཚོས་ཁྱེད་ལ་ངོས་ལེན་ཞུ་རྒྱུ་ཡིན། ང་ཚོ་ཁྱེད་ཀྱི་དྲུང་དུ་བཅར་བ་དབང་ཆ་མེད་ཅེས་ཞུས་སོ༎