Read Tibetan — པོད་སྐད་Tibetan Old Testament 2011 ནེ་ཧེམ་ཡཱ 2 Bible Online

ནེ་ཧེམ་ཡཱ 2 - Tibetan — པོད་སྐད་Tibetan Old Testament 2011 bible

ནེ་ཧེམ་ཡཱ 2

¹དེ་ནས་ཟླ་བ་བཞིའི་རྗེས་སུ་ཉིན་གཅིག་རྒྱལ་པོ་ཆེན་པོ་ཨར་ཐག་ཤས་ཐ་གསོལ་ཚིག་བཞེས་སྐབས་ངས་ཁོང་ལ་རྒུན་ཆང་ཕུལ་བ་དང་། རྒྱལ་པོ་ཆེན་པོས་ང་སེམས་སྐྱོ་བ་དེ་སྔ་ནམ་ཡང་གཟིགས་མེད་དོ།

²དེར་བརྟེན་ཁོང་གིས་ང་ལ། ཁྱོད་རང་དེ་འདྲ་སེམས་སྐྱོ་པོ་མཐོང་བ་དེ་གང་ཡིན་ནམ། ཁྱོད་རང་ན་མི་འདུག། ཁྱོད་རང་ངེས་པར་དུ་སེམས་མ་སྐྱིད་པ་ཡིན་ནོ་ཞེས་གསུངས་པ་དང་། ང་འཇིགས་སོ།

³ཞུ་ལན་དུ། ཀྱེ་མི་དབང་ཆེན་པོ་སྐུ་ཚེ་རྒྱུན་དུ་བརྟན་པར་ཤོག ངའི་མེས་པོ་རྣམས་ཀྱི་སྐུ་ཕུང་སྦས་པའི་གྲོང་ཁྱེར་དེ་སྟོངས་ཤིང་འཇིག་པ་དང་། དེའི་གཞུང་སྒོ་རྣམས་མེས་ཡོངས་སུ་འཚིག་ཡོད་པས། ངའི་སེམས་མི་སྐྱོ་བ་ཇི་ལྟར་སྲིད་ཅེས་ཞུས་པ་དང་།

⁴རྒྱལ་པོས། ཁྱོད་ལ་ག་རེ་དགོས་པ་འདུག་ཅེས་བཀའ་འདྲི་གནང་བས། ངས་གཙོ་བོ་དཀོན་མཆོག་ལ་སྨོན་ལམ་ཞུས་པ་ཡིན།

⁵རྒྱལ་པོ་ལ། ཀྱེ་མི་དབང་ཆེན་པོ། སྐུ་ཉིད་ཐུགས་མཉེས་ཤིང་བྲན་པོའི་ཞུ་བར་ཁས་ལེན་གནང་ན་ང་ལ་ཡ་ཧུ་དཱའི་ཡུལ་དུ་འགྲོ་བཅུག་རོགས་གནང་། ཡུལ་དེར་ངའི་མེས་པོ་རྣམས་ཀྱི་སྐུ་ཕུང་སྦས་ཡོད་པས། ངས་གྲོང་ཁྱེར་དེ་ཉམས་གསོ་བྱེད་ཆོག་པ་གནང་རོགས་གནང་ཞེས་ཞུ་བ་འབུལ་ལོ།

⁶རྒྱལ་པོ་དང་བཙུན་མོ་ལྷན་དུ་བཞུགས་ཡོད་སྐབས་རྒྱལ་པོས་ངའི་ཞུ་བར་ངོས་ལེན་གནང་ཏེ། ང་ལ། ཁྱོད་ལམ་དུ་ག་ཚོད་འགོར་ཡོང་ངམ། ག་དུས་ཕྱིར་ལོག་བྱེད་དམ་ཞེས་བཀའ་འདྲི་གནང་བའི་ལན་ཚང་མ་ངས་རྒྱལ་པོ་ལ་ཞུས་པ་ཡིན།

⁷དེ་རྗེས་ངས་རྒྱལ་པོ་ལ། གཙང་པོ་ཡུབ་རད་ཕ་རོལ་དུ་ཡོད་པའི་ནུབ་ཕྱོགས་ས་ཁུལ་གྱི་མངའ་སྡེའི་སྲིད་ཚབ་རྣམས་ལ་བསྟན་པའི་ཕྱིར་དུ་ང་རང་ཡ་ཧུ་དཱའི་ཡུལ་བར་དུ་འགྲོ་ཆོག་པའི་ལག་འཁྱེར་ཞིག་ང་ལ་གནང་རོགས་གནང་ཞེས་ཞུས་པ་ཡིན།

⁸ཡང་དེ་བཞིན་མཆོད་ཁང་སྲུང་སྐྱོབ་བྱེད་ཕྱིར་བརྩིགས་པའི་རྫོང་གི་གཞུང་སྒོ་ཆེ་ཆུང་ཁག་དང་གྲོང་ཁྱེར་གྱི་ལྕགས་རིར་མཁོ་བྱེད་དང་། གཞན་ཡང་ངའི་ཁང་པ་རྒྱབ་སྐབས་མཁོ་བའི་ཤིང་ཆས་ཁག་སྒྲུབ་དགོས་ཤེས་རྒྱལ་པོའི་ཤིང་ནགས་དོ་དམ་པ་ཨ་སཕེ་ཀྱི་མིང་ཐོག་ཏུའང་བཀའ་ཤོག་གཅིག་ཞུས་པ་ཡིན། དཀོན་མཆོག་ང་དང་མཉམ་དུ་འགྲོགས་པའི་རྐྱེན་གྱིས་ངའི་དགོས་མཁོ་ཚང་མ་རྒྱལ་པོས་སྒྲུབ་པ་གནང་བྱུང་།

⁹དེ་ནས་རྒྱལ་པོ་ཆེན་པོས་རྟ་པ་དང་དམག་དཔོན་འགའ་ཤས་ང་དང་མཉམ་དུ་གཏོང་བ་གནང་ནས་གཙང་པོ་ཡུབ་རད་ཕ་རོལ་གྱི་ནུབ་ཕྱོགས་མངའ་སྡེ་ཁུལ་དུ་བསླེབས་ཤིང་། ངས་དེ་གའི་སྲིད་ཚབ་རྣམས་ལ་རྒྱལ་པོས་གནང་བའི་བཀའ་ཤོག་རྣམས་བསྟན་མོད།

¹⁰འོན་ཀྱང་གྲོང་ཁྱེར་བྷེད་ཧོ་རོན་དུ་གནས་སྡོད་བྱེད་མཁན་སན་བྷ་ལཏ་དང་། ཨམ་མོན་མངའ་སྡེའི་ཁུལ་དུ་གནས་སྡོད་བྱེད་མཁན་མིང་ལ་ཏོ་བྷི་ཡཱ་ཞེས་པ་ལས་བྱེད་པ་ཚོས་ཨིསི་རཱཨེལ་པ་རྣམས་ལ་རོགས་བྱེད་མཁན་མི་ཞིག་བསླེབས་བཞག་ཅེས་ཐོས་ནས་ཧ་ཅང་ཁྲོས་སོ།

¹¹དེ་རྗེས་ང་ཡེ་རུ་ཤ་ལེམ་དུ་འབྱོར་ནས་ཉིན་ཞག་གསུམ་གྱི་རྗེས་ལ་མ་གཏོགས།

¹²གཙོ་བོ་དཀོན་མཆོག་གིས་ང་ལ་ཡེ་རུ་ཤ་ལེམ་དུ་ག་རེའི་དོན་ལ་གཏོང་བ་གནང་བ་ཡིན་པ་དེའི་སྐོར་ངས་སུ་ལའང་མ་བཤད་པ་ཡིན། དེ་ནས་ནམ་ཕྱེད་ཙམ་ལ་ངས་མི་འགའ་ཤས་མཉམ་དུ་འཁྲིད་ནས་ཕྱི་ལོགས་སུ་ཐོན་སྐབས། མཚན་དེ་ལ་ང་རང་བཞོན་པའི་བོང་བུ་དེ་མ་གཏོགས་ང་ཚོ་དང་མཉམ་དུ་སེམས་ཅན་གཞན་མེད་ཅིང་།

¹³གྲོང་ཁྱེར་གྱི་ནུབ་ཕྱོགས་སུ་ཡོད་པའི་ལུང་གཤོང་གི་གཞུང་སྒོ་བརྒྱུད་དེ་གྲོང་ཁྱེར་ནས་ཕྱིར་ཐོན་ཏེ། ལྷོ་ཕྱོགས་སུ་འབྲུག་གི་ཆུ་མིག་བརྒལ་ནས་བཙོག་སྙིགས་དབྱུགས་སའི་རྒྱལ་སྒོའི་བར་དུ་ཕྱིན་ཞིང་། གྲོང་ཁྱེར་གྱི་ལྕགས་རི་གཞིགས་པ་རྣམས་དང་མེས་འཚིག་པའི་གཞུང་སྒོ་རྣམས་ངས་བརྟག་དཔྱད་བྱས་པ་ཡིན།

¹⁴དེ་ནས་གྲོང་ཁྱེར་གྱི་ཤར་ཕྱོགས་ནས་བྱང་ངོས་སུ་ཕྱིན་ཏེ་ཆུ་མིག་གི་རྒྱལ་སྒོ་དང་རྒྱལ་པོའི་རྫིང་བུའི་བར་དུ་བསླེབས་པ་དང་། ང་བཞོན་པའི་བོང་བུ་དེས་རྡོ་ཧྲུག་དཀྱིལ་དུ་འགྲོ་ས་མ་རྙེད་པས།

¹⁵ཀིད་རོན་ལུང་གཤོང་དུ་མར་བབས་ནས་ལྕགས་རི་རྣམས་བརྟག་ཞིབ་བྱེད་བཞིན་ལམ་དེ་རང་བརྒྱུད་དེ་ལུང་གཤོང་གི་རྒྱལ་སྒོར་འཛུལ་ནས་གྲོང་ཁྱེར་དུ་ཕྱིན་པ་ཡིན།

¹⁶ང་གང་དུ་ཕྱིན་པ་དང་ག་རེ་བྱས་པའི་སྐོར་ལ་ས་གནས་ཀྱི་ལས་བྱེད་པ་སུས་ཀྱང་མ་ཤེས་པ་དང་། དེའི་སྐོར་ལ་ངས་ཡ་ཧུ་དཱ་པའི་སྤུན་ཟླ་རྣམས་ལའང་ད་བར་གང་ཡང་བཤད་མེད་ཅིང་། ངའི་ལས་དོན་དེའི་སྐོར་ལ་བླ་མ་འགོ་བྱེད་དང་མི་མང་གི་ལས་བྱེད་པ་དང་། གཞན་ཡང་ལས་སྣེ་རྣམས་ལ་ངས་རོགས་ཞུ་དགོས་པ་ཡིན། འོན་ཀྱང་དེ་བར་ཁོ་ཚོར་ངས་གང་ཡང་བཤད་མེད་པ་ཡིན་ནོ།

¹⁷ངས་ཁོ་ཚོ་ལ། ལྟོས་དང་། ང་ཆོའི་གནས་སྟངས་ཐབས་སྡུག་པོ་འདི་འདྲ་ཞིག་ལ་ཐུག་ཡོད། ཡེ་རུ་ཤ་ལེམ་ནི་འཇིག་ནས་རྩ་མེད་ཆགས་ཤིང་། དེའི་རྒྱལ་སྒོ་རྣམས་ཀྱང་མེས་ཡོངས་སུ་འཚིག་འདུག་པས། ད་ང་ཚོས་གྲོང་ཁྱེར་གྱི་ལྕགས་རི་རྣམས་སྐྱར་དུ་གསར་རྩིག་བྱས་ཏེ་ང་ཚོར་འཕོག་པའི་མིང་རྗེས་ངན་པ་དེ་མེད་པར་བྱེད་དགོས་ཅེས་སྨྲས་པ་ཡིན།

¹⁸ངས་ཁོ་ཚོ་ལ་དཀོན་མཆོག་ང་དང་མཉམ་དུ་འགྲོགས་ཤིང་། ཁོང་གིས་ང་ལ་སྐྱབས་གྲོགས་ཇི་ལྟར་མཛད་པའི་སྐོར་དང་། རྒྱལ་པོས་གང་དང་གང་གསུངས་པའི་སྐོར་ཚང་མ་བཤད་པ་ཡིན། དེའི་ལན་དུ་ཁོ་ཚོས། ད་ང་ཚོ་གྲོང་ཁྱེར་དང་གྲོང་ཁྱེར་གྱི་ལྕགས་རི་རྣམས་གསར་རྩིག་བྱ་རྒྱུའི་ལས་འགོ་འཛུགས་དགོས་ཅེས་སྨྲས་ནས་ཨར་ལས་བྱེད་རྒྱུའི་གྲ་སྒྲིག་བྱས་པ་ཡིན།

¹⁹སྐབས་དེར་སན་བྷ་ལཏ་དང་། ཏོ་བྷི་ཡཱ་དང་། ཨ་རབ་པའི་མི་གྷེ་ཤེམ་ཞེས་པའི་མི་གསུམ་གྱིས། ང་ཚོས་གང་བྱེད་རྩི་ཡིན་པ་དེའི་སྐོར་གོ་ཐོས་ཀྱིས། ང་ཚོར་འཕྱ་གཏམ་བཤད་དེ་སྨྲས་པ། ཁྱོད་ཚོས་གང་བྱེད་རྩི་ཡོད། ཁྱོད་ཚོས་རྒྱལ་པོར་ངོ་རྒོལ་ཞུ་རྩིས་བྱེད་ཀྱི་ཡོད་དམ།

²⁰དེའི་ལན་དུ་ངས། མཐོ་རིས་ཀྱི་དཀོན་མཆོག་གི་སྐུ་དྲིན་གྱིས་ང་ཚོའི་ལས་དོན་འགྲུབ་རྒྱུ་ཡིན་པ་དང་། ང་ཚོ་ནི་ཁོང་གི་ཞབས་ཏོག་པ་ཡིན་པས། གྲོང་ཁྱེར་དང་ལྕགས་རི་རྣམས་གསར་དུ་བརྩིགས་ཐབས་བྱེད་ཀྱི་ཡོད། འོན་ཀྱང་ཡེ་རུ་ཤ་ལེམ་གྱི་རྒྱུ་དངོས་གང་གི་ཐོག་ཏུའང་ཁྱོད་ཚོར་ཐོབ་སྐལ་དང་དབང་ཆ་སོགས་མེད་པ་དང་། ཡུལ་གྱི་ལུགས་སྲོལ་སོགས་ལའང་ཁྱོད་ཚོར་ཐེ་བྱུས་གང་ཡང་མེད་ཅེས་སྨྲས་པ་ཡིན༎