Read Tibetan — པོད་སྐད་Tibetan Old Testament 2011 ནེ་ཧེམ་ཡཱ 4 Bible Online

ནེ་ཧེམ་ཡཱ 4 - Tibetan — པོད་སྐད་Tibetan Old Testament 2011 bible

ནེ་ཧེམ་ཡཱ 4

¹ང་ཚོ་ཡ་ཧུ་དཱ་པ་ཚོས་ལྕགས་རི་བརྩིགས་རྒྱུ་འགོ་འཛུགས་པའི་གནས་ཚུལ་དེ་ཐོས་ནས་སན་བྷ་ལཏ་ཧ་ཅང་ཁོང་ཁྲོ་ལངས་ནས་ང་ཚོར་དམའ་འབེབས་དང་འཕྱ་གཏམ་བཤད་དེ།

²རང་གི་མཛའ་གྲོགས་དང་ས་མར་ཡ་པའི་དམག་མི་རྣམས་ཀྱི་མདུན་དུ། ཡ་ཧུ་དཱ་པ་སྐྱོ་པོ་འདི་ཚོས་ག་རེ་བྱེད་དགོས་བས་མ་གྱི་ཡོད་དམ། ཁོ་ཚོས་གྲོང་ཁྱེར་དེ་གསར་དུ་འཛུགས་བསྐྲུན་བྱེད་དགོས་ཅེས་བསམ་པ་ཡིན་ནམ། ཁོ་ཚོས་དམར་མཆོད་སོགས་འབུལ་བའི་སྒོ་ནས་ལས་དོན་ཚང་མ་ཉི་མ་གཅིག་རང་ལ་འགྲུབ་ཡོང་ཞེས་བསམ་པ་ཡིན་ནམ། ཁོ་ཚོས་མེས་འཚིག་པའི་རྡོ་ཧྲུག་དེ་ཚོའི་ནང་ནས་ཁང་པ་རྩིག་བྱེད་རྡོ་རྣམས་བཟོ་བསྐྲུན་བྱེད་ཐུབ་ཅེས་བརྗོད་དམ་ཞེས་སྨྲས་པ་དང་།

³ཁོའི་ཉེ་འགྲམ་དུ་ལངས་ནས་བསྡད་ཡོད་པའི་ཏོ་བྷི་ཡཱས། ཁོ་ཚོས་ལྕགས་རི་གང་འདྲ་ཞིག་བཟོ་འགྲོ་ཡོད་དམ། དེ་ནི་ཝ་མོ་ཞིག་གིས་ཀྱང་སྟོར་བཤིག་བཏང་ཐུབ་ངེས་རེད་ཅེས་སྨྲས་སོ།

⁴དེ་ནས་ངས་སྨོན་ལམ་འདེབས་ཤིང་། ཀྱེ་དཀོན་མཆོག། ཁོ་ཚོས་ང་ཚོར་འཕྱ་གཏམ་བཤད་པ་དེར་གསན་རོགས་གནང་། ཁོ་ཚོས་བཤད་པའི་འཕྱ་གཏམ་དང་དམའ་འབེབས་ཀྱི་ཚིག་ངན་ཚང་མ་ཁོ་ཚོ་རང་གི་ཐོག་ཏུ་ཕོག་པར་ཤོག ཁོ་ཚོའི་རྒྱུ་དངོས་ཚང་མ་རྐུན་མས་འཕྲོག་བཅོམ་བྱས་ཏེ། མཐར་ཁོ་ཚོ་ཡུལ་གཞན་དུ་བཙོན་རར་འགྲོ་དགོས་པར་ཤོག

⁵ཁོ་ཚོས་ང་ཚོ་ལྕགས་རི་རྩིག་མཁན་རྣམས་ལ་དམའ་འབེབས་བྱས་པ་ཡིན། ཁྱེད་ཀྱིས་ཁོ་ཚོའི་ལས་ངན་དང་ཉེས་སྡིག་རྣམས་མ་བསྙེལ་བ་གནང་རོགས་གནང་ཞེས་ཞུས་པ་ཡིན།

⁶ང་ཚོས་ལས་མཚམས་མ་བཞག་པར་ལྕགས་རི་མུ་མཐུད་དེ་བརྩིགས་པས། རིང་མིན་ལྕགས་རིའི་མཐོ་ཚད་ཕྱེད་ཀར་བསླེབས་པ་ནི་མི་མང་ལ་ལས་ཀའི་སེམས་ཤུགས་ཡོད་པའི་རྐྱེན་གྱིས་ཡིན་ནོ།

⁷ང་ཚོའི་ལྕགས་རི་ཉམས་གསོ་དང་སྐྱར་དུ་རྩིག་རྒྱུའི་ལས་ཀ་དེ་ཡར་རྒྱས་འགྲོ་བཞིན་པའི་སྐོར་ཐོས་ནས། སན་བྷ་ལཏ་དང་། ཏོ་བྷི་ཡཱ་དང་། གཞན་ཡང་ཨ་ར་བི་ཡ་དང་ཨམ་མོན་དང་ཨཤ་དྷོད་ཀྱི་མི་མང་ཧ་ཅང་ཁོང་ཁྲོ་ལངས་སོ།

⁸ཡེ་རུ་ཤ་ལེམ་དུ་དམག་དྲངས་ཏེ་དེར་ཟིངས་འཁྲུགས་བསླང་ཐབས་བྱས་མོད།

⁹འོན་ཀྱང་ང་ཚོས་དཀོན་མཆོག་ལ་སྨོན་ལམ་ཞུས་པ་དང་ཆབས་ཅིག་ཉིན་མཚན་མེད་པར་དགྲ་བོའི་ཐོག་ཏུ་སྲུང་ཆ་བཞག་པ་ཡིན།

¹⁰སྐབས་དེར་ཡ་ཧུ་དཱ་པ་ཚོའི་དཀྱིལ་ལ་གླུ་གཞས་ཤིག་བཏང་སྲོལ་ཡོད་པ་ནི་གཤམ་གསལ་ལྟར་ཡིན་ཏེ། ང་ཚོས་ཁལ་ལྗིད་འཁྱེར་དགོས་བྱུང་བས་ན། ལུས་ཀྱི་སྟོབས་ཤུགས་ཚང་མ་ཉམས་ཤིང་རྒུད། རྡོ་ཧྲུག་མང་པོ་དེ་ཙམ་འཁྱེར་དགོས་པས། དེ་རིང་ལྕགས་རི་བརྩིགས་པ་ཇི་ལྟར་སྲིད།

¹¹ང་ཚོའི་དགྲ་བོ་རྣམས་ཀྱི་བསམ་ཚུལ་ལ། ང་ཚོས་ཁོ་ཚོར་མཐོང་མེད་ཅིང་། ཁོང་ཚོས་གང་བྱས་སྐོར་ལ་ང་ཚོས་གང་ཡང་ཤེས་ཀྱི་མེད་གཤག་དང་། ཁོ་ཚོས་ང་ཚོའི་ཐོག་ཏུ་དམག་དྲངས་ཤིང་ང་ཚོ་བསད་དེ་ང་ཚོའི་ལས་ཀར་གནོད་སྐྱོན་མ་བཏང་བར་དུ་ང་ཚོས་གང་ཡང་ཤེས་ཀྱི་མ་རེད་ཅེས་བསམ་མོད།

¹²འོན་ཀྱང་ཁོ་ཚོས་ང་ཚོའི་ཐོག་ཏུ་བྱུས་ངན་གང་བཤམས་པའི་སྐོར་ལ་དགྲ་བོའི་དཀྱིལ་དུ་གནས་སྡོད་བྱེད་མཁན་ཡ་ཧུ་དཱ་པ་རྣམས་ཀྱིས་ང་ཚོར་ལན་བསྐྱལ་ཏེ་དེའི་སྐོར་ལ་ཡང་ཡང་ཟོན་བརྡ་བྱས་པས།

¹³ངས་མི་མང་རྣམས་ལ་གྲི་དང་མདུང་དང་མདའ་གཞུ་སོགས་འཁྱེར་བཅུག་ནས་རང་རང་སོ་སོའི་རིགས་བརྒྱུད་བཞིན་ལྕགས་རི་རྩིག་འཕྲོས་ལུས་པའི་ས་གནས་སོ་སོར་སྲུང་ཆར་བཞག་པ་ཡིན།

¹⁴སྐབས་དེར་མི་རྣམས་སེམས་ཁྲལ་བྱས་པ་མཐོང་ནས་ཁོ་ཚོའི་འགོ་བྱེད་དང་། ལས་སྣེ་དང་བཅས་པ་ཁོ་ཚོ་ཚང་མར། ཁྱོད་ཚོ་དགྲ་བོ་རྣམས་ལ་ཞེད་མི་དགོས། གང་ལགས་ཟེར་ན། ང་ཚོའི་གཙོ་བོ་དཀོན་མཆོག་ནི་གང་འདྲའི་མངའ་ཐང་ཆེ་ཞིང་། གཟིལ་དངངས་ཆེན་པོ་ཡིན་པ་དེ་དྲན་གསོ་བྱོས་ཤིག དེ་བས་ན་ཁྱོད་ཚོས་རང་གི་ཡུལ་མི་རྣམས་དང་། སྐྱེ་དམན་བུ་ཕྲུག་རྣམས་དང་གཞན་ཡང་སོ་སོའི་ཁང་ཁྱིམ་སྐྱབས་པའི་ཕྱིར་དགྲ་བོར་རྒོལ་འཛིང་བྱེད་དགོས་ཅེས་སྨྲས་པ་ཡིན།

¹⁵དགྲ་བོའི་བྱུས་ངན་ཚང་མ་ང་ཚོས་ཧ་གོ་བ་དང་། དཀོན་མཆོག་གིས་ཁོ་ཚོའི་ཐབས་བྱུས་ངན་པ་རྣམས་ལམ་ལྷོང་དུ་འགྲོ་མ་བཅུག་པ་དེ་ཁོ་ཚོས་ཤེས་རྟོགས་བྱས་སོ། འོན་ཀྱང་ང་ཚོ་ནི་སྔར་བཞིན་ལྕགས་རི་ཉམས་གསོ་བྱེད་སར་ཕྱིར་ལོག་བྱས་པ་ཡིན།

¹⁶དེ་ནས་བཟུང་སྟེ་ངའི་མི་མང་ཕྱེད་ཀས་ཨར་ལས་བྱས་ཤིང་། ཕྱེད་ཀས་གོ་ཁྲབ་གྱོན་ཏེ་མདུང་དང་ཕུབ་དང་མདའ་གཞུ་བཅས་འཁྱེར་ནས་སྲུང་ཆར་བསྡད་ཅིང་། དེ་བཞིན་ང་ཚོའི་འགོ་བྱེད་ཚོས་ཀྱང་།

¹⁷ལྕགས་རི་ཉམས་གསོ་བྱེད་མཁན་རྣམས་ལ་གང་སྤྱིའི་རོགས་དང་རྒྱབ་སྐྱོར་ཆ་ཚང་བྱས་པ་ཡིན། ལྕགས་རི་ཉམས་གསོར་མཁོ་བའི་ལག་ཆ་འཁྱེར་མཁན་ཨར་ལས་པ་ཚོས་ལག་པ་ཡ་གཅིག་གིས་ཨར་ལས་བྱས་ཤིང་། ལག་པ་ཡ་གཅིག་ཏུ་གོ་མཚོན་འཁྱེར་ནས་བསྡད་ཀྱི་ཡོད་དོ།

¹⁸དེ་བཞིན་ཨར་ལས་བྱེད་མཁན་ཚང་མས་རང་གི་སྐེད་པར་གྲི་བཏགས་ཤིང་། དམག་དུང་འབུད་དེ་ཟོན་བརྡ་བསྐུལ་མཁན་མི་དེ་ང་དང་མཉམ་དུ་གནས་ཀྱི་ཡོད་པ་ཡིན།

¹⁹ངས་འགོ་དཔོན་དང་ལས་སྣེ་རྣམས་ཀྱིས་གཙོས་པའི་མི་མང་བྱིངས་རྣམས་ལ། ད་ང་ཚོའི་ལྕགས་རི་ཉམས་གསོ་བྱེད་རྒྱུའི་ལས་ཀ་དེ་རྒྱ་ཆེར་ཁྱབ་ཡོད་པས་ང་ཚོ་ཕན་ཚུན་རྒྱང་རིང་དུ་གནས་དགོས་བྱུང་ཡོད།

²⁰དེ་བས་ན་ཁྱོད་ཚོས་དམག་དུང་གི་སྐད་དེ་ཐོས་མ་ཐག་ཏུ་ཁྱོད་ཚོ་མཐའ་འཁོར་བཞི་ནས་ངའི་རྩར་འདུ་འཛོམས་བྱེད་དགོས། གང་ལགས་ཟེར་ན། དཀོན་མཆོག་གིས་ང་ཚོའི་ཕྱོགས་གནང་སྟེ་དགྲ་བོར་འཐབ་པ་གནང་གི་རེད་ཅེས་སྨྲས་པ་ཡིན།

²¹དེ་བཞིན་ཉིན་ལྟར་ཞོགས་པ་ནམ་ལངས་ནས་ཕྱི་དྲོ་སྐར་མ་མ་ཤར་བར་དུ་ང་ཚོའི་མི་འབོར་ཕྱེད་ཀས་ལྕགས་རི་ཉམས་གསོ་བྱས་ཤིང་། དེ་འཕྲོས་མི་འབོར་ཕྱེད་ཀས་མདུང་ལག་པར་འཁྱེར་ནས་སྲུང་ཆར་བསྡད་པ་ཡིན།

²²སྐབས་དེར་ངས་མི་མང་གི་འགོ་བྱེད་རྣམས་ལ། ཁྱོད་ཚོ་རང་གི་ལས་རོགས་རྣམས་དང་མཉམ་དུ་མཆན་མོའང་ཡེ་རུ་ཤ་ལེམ་དུ་གནས་དགོས། དེ་ལྟར་བྱས་ན་ང་ཚོས་མཚན་ལ་སྲུང་ཆར་བསྡད་དེ་ཉིན་མོར་ལས་ཀ་བྱེད་ཐུབ་པའི་ཁྱད་པར་འདུག་ཅེས་སྨྲས་པ་ཡིན།

²³དེ་དུས་ང་དང་ངའི་ལས་རོགས་དང་། དེ་བཞིན་འཁོར་གཡོག་གཞན་དང་ལྕགས་རི་སྲུང་མཁན་དམག་མི་དང་བཅས་པ་སུས་ཀྱང་མཚན་ལ་རང་གི་གོས་མ་ཕུད་པར་གོ་མཆོན་འཁྱེར་ནས་བསྡད་ཀྱི་ཡོད་པ་ཡིན་ནོ༎