Read Tibetan — པོད་སྐད་Tibetan Old Testament 2011 ནེ་ཧེམ་ཡཱ 5 Bible Online

ནེ་ཧེམ་ཡཱ 5 - Tibetan — པོད་སྐད་Tibetan Old Testament 2011 bible

ནེ་ཧེམ་ཡཱ 5

¹དེ་ནས་ནམ་ཞིག་རྗེས་སུ་སྐྱེ་ཕོ་མོ་མང་པོས་རང་རིགས་ཡ་ཧུ་དཱ་པ་རྣམས་ལ་སྐྱོན་བརྗོད་འདོན་ཞིང་སྨྲས་པ།

²ང་ཚོ་ནང་མི་མང་པོ་ཡིན་པས་ང་ཚོ་འཚོ་ཐབས་སུ་འབྲུ་རིགས་སོགས་དགོས་ཡོད།

³མུ་གེ་དུས་སུ་འབྲུ་རིགས་ལྡང་ངེས་བཞིན་པ་ཐོབ་པའི་ཕྱིར་རང་གི་ས་ཞིང་དང་། ཁང་པ་རྒུན་ཚལ་དང་བཅས་པ་གཏའ་མར་བཞག་ནས་འབྲུ་རིགས་སོགས་ཉོ་དགོས་བྱུང་ཞེས་སྨྲས་པ་དང་།

⁴ལ་ལས་ང་ཚོའི་ས་ཞིང་སོགས་ཀྱི་གཞུང་ཁྲལ་འཇལ་བའི་ཕྱིར་དངུལ་གཡར་སྐྱེན་ལེན་དགོས་བྱུང་བ་དང་།

⁵ཡ་ཧུ་དཱ་པ་གཞན་དང་མཚུངས་པར་ང་ཚོའང་ཡ་ཧུ་དཱ་པའི་རིགས་བརྒྱུད་གཅིག་པ་ཡིན་པ་དང་། ང་ཚོའི་བུ་ཕྲུག་རྣམས་ཁོ་ཚོའི་བུ་ཕྲུག་ནང་བཞིན་ལེགས་པ་མི་འདུག་གམ། འོན་ཀྱང་ང་ཚོས་རང་གི་བུ་ཕྲུག་རྣམས་གཞན་གྱི་བྲན་གཡོག་ཏུ་བཏང་དགོས་བྱུང་བ་དང་། ང་ཚོའི་བུ་མོ་རྣམས་ཀྱང་གཞན་གྱི་བྲན་འཁོལ་དུ་བཙོང་དགོས་བྱུང་བ་དང་། དེ་བཞིན་ང་ཚོའི་ས་ཞིང་དང་རྒུན་ཚལ་ཚང་མ་མི་གཞན་གྱི་བདག་དབང་དུ་ཤོར་བས། ང་ཚོ་བྱ་ཐབས་བྲལ་ནས་བསྡད་ཡོད་ཅེས་སྨྲས་པ་དང་།

⁶གནས་ཚུལ་དེ་ཐོས་ནས་ང་ཧ་ཅང་ཁོང་ཁྲོ་ལངས་ཤིང་།

⁷དེའི་སྐོར་ལ་ཐབས་ཤེས་ཤིག་བྱེད་དགོས་འདུག་བསམ་ནས་ངས་མི་མང་གི་འགོ་བྱེད་དང་ལས་སྣེ་རྣམས་ལ་གཤེ་གཤེ་བཏང་ཞིང་། ཁྱོད་ཚོས་རང་གི་སྤུན་ཟླ་རྣམས་ལ་མནར་གཅོད་བཏང་གི་འདུག་ཅེས་སྨྲས་པ་ཡིན། དེ་ནས་དཀའ་ངལ་དེ་སེལ་ཐབས་སུ་ངས་མི་མང་གི་ཚོགས་འདུ་རྒྱས་འཛོམས་ཤིག་བཀུག་ནས་དེ་དག་ལ།

⁸ཕྱི་མིའི་ལག་ཏུ་བྲན་འཁོལ་དུ་འཚོང་ཟིན་པའི་ང་ཚོའི་ཡ་ཧུ་དཱ་པའི་སྤུན་ཟླ་རྣམས་ང་ཚོས་ཅི་ནུས་ཀྱིས་སྐྱར་དུ་ཚུར་བླུ་ཐབས་བྱེད་བཞིན་པའི་ཁར། ཁྱོད་ཚོ་ཡ་ཧུ་དཱ་པའི་སྤུན་ཟླ་ནང་ཁོངས་སུ་གཅིག་གིས་གཅིག་ལ་བཙོང་གི་ཡོད་པ་དེ་གང་ཡིན་ནམ་ཞེས་འདྲི་རྩད་བྱས་སྐབས། འགོ་བྱེད་རྣམས་ལན་འདེབས་བྱེད་མ་ནུས་པར་ཁུ་སིམ་མེར་གནས་པ་ཡིན་ནོ།

⁹ངས་སྐྱར་དུ་ཁོ་ཚོ་ལ། ཁྱོད་ཚོའི་ལས་ཀ་དེ་ནོར་འཁྲུལ་བྱས་བཞག། ད་ཁྱོད་ཚོས་དཀོན་མཆོག་ལ་རྩིས་གུས་ཞུས་ཏེ། གང་རིགས་ཤིང་འོས་པ་དེ་བྱོས་ཤིག། དེ་ལྟར་བྱས་ན་དགྲ་བོས་ང་ཚོར་འཕྱ་གཏམ་བཤད་ཐུབ་པའི་རྐྱེན་ཐོབ་མི་ཡོང་།

¹⁰ངས་མི་མང་ལ་འབྲུ་དང་དངུལ་སོགས་སྐྱིན་པར་བཏང་ཡོད། ངའི་ལས་རོགས་དང་ལས་བྱེད་པ་རྣམས་ཀྱིས་ཀྱང་དེ་བཞིན་སྐྱིན་པར་བཏང་ཡོད་མོད། འོན་ཀྱང་ང་ཚོས་བུ་ལོན་དེ་དག་ཚུར་ལེན་རྩིས་མ་བྱས་པར་ཆག་ཡང་གཏོང་དགོས།

¹¹དེ་སྔ་གཡར་སྐྱིན་དུ་བཏང་བའི་དངུལ་དང་། འབྲུ། རྒུན་ཆང་དང་སྣུམ་ལ་སོགས་པ་ཚང་མ་ཆག་ཡང་གཏོང་དགོས་པ་དང་། དེ་ཚོའི་ས་ཞིང་དང་། རྒུན་ཚལ་དང་། སྐྱུ་རུ་རའི་ཚལ་ཞིང་དང་། ཁང་པ་བཅས་པ་ཚང་མ་ཁོ་ཚོར་ཕྱིར་སྤྲོད་བྱེད་དགོས་ཅེས་སྨྲས་སོ།

¹²མི་མང་གི་འགོ་བྱེད་ཚོས། ང་ཚོས་ཁྱེད་རང་གིས་ཅི་གསུངས་བཀའ་སྒྲུབ་ཞུས་ཏེ། ཁོ་ཚོའི་རྒྱུ་དངོས་ཚང་མ་ཕྱིར་སྤྲོད་བྱས་ཤིང་། དེ་ཚོའི་བུ་ལོན་ཡོངས་སུ་ཆག་ཡང་བྱེད་ཀྱི་ཡིན་ཞེས་སྨྲས་པ་དང་། དེ་ནས་ངས་བླ་མ་རྣམས་ལ་སྐད་བཏང་ནས་ཁོ་ཚོའི་མདུན་དུ་མི་མང་གི་འགོ་བྱེད་རྣམས་ལ་སོ་སོས་བྱས་པའི་ཁ་ཆད་རྣམས་སྲུང་གི་ཡིན་ཞེས་དམ་བཅའ་བྱེད་བཅུག་སྟེ།

¹³ངས་རང་གི་སྐེ་རགས་བཀྲོལ་ནས་རྡབ་རྡབ་བཏང་ཞིང་། གལ་ཏེ་ཁྱོད་ཚོས་རང་གི་དམ་བཅའ་ནས་འགལ་ན་དཀོན་མཆོག་གིས་ཀྱང་ཁྱོད་ཚོའི་ཁང་ཁྱིམ་དང་། རྒྱུ་དངོས་ཚང་མ་ཁྱོད་ཚོའི་ལག་ནས་རྡབ་རྡབ་བཏང་བ་གནང་ཞིང་། ཁྱོད་ཚོ་ཚང་མ་ལག་པ་སྟོང་པར་བཟོས་པ་གནང་རྒྱུ་ཡིན་ཞེས་སྨྲས་པ་ལ། དེར་འདུ་འཛོམས་བྱས་པའི་མི་ཚང་མས་ཨ་མེན་ཞེས་བརྗོད་ནས་གཙོ་བོ་དཀོན་མཆོག་ལ་བསྟོད་བསྔགས་ཞུས་ཤིང། མི་མང་གི་འགོ་བྱེད་ཚོས་ཀྱང་རང་རང་སོ་སོས་བྱས་པའི་དམ་བཅའ་རྣམས་འགལ་མེད་རྩིས་སྲུང་བྱས་པ་ཡིན་ནོ།

¹⁴རྒྱལ་པོ་ཨར་ཐག་ཤས་ཐ་ཀྱི་ཆབ་སྲིད་སྐྱོང་ལོ་ཉི་ཤུ་པ་ནས་སུམ་ཅུ་སོ་གཉིས་བར་དུ་ལོ་ངོ་བཅུ་གཉིས་ཀྱི་རིང་ལ་ང་ཡ་ཧུ་དཱའི་ཡུལ་གྱི་སྲིད་ཚབ་བྱས་ཏེ་བསྡད་མོད། འོན་ཀྱང་ལོ་ངོ་བཅུ་གཉིས་དེའི་རིང་དུ་ང་དང་ངའི་ནང་མི་བཅས་པས་སྲིད་ཚབ་ཀྱི་ཐོབ་ཐང་བཞིན་གྱི་ཁ་ཟས་བཟང་པོ་དགོས་ཅེས་ལབ་རྒྱུ་མ་བྱུང་།

¹⁵འོན་ཀྱང་ངའི་སྔོན་དུ་བྱུང་བའི་སྲིད་ཚབ་རྣམས་ཀྱིས་མི་མང་ནས་ཆང་དང་ལྟོ་དོད་ཚོན་བྱེད་ཉིན་རེར་དངུལ་ཊམ་བཞི་བཅུ་རེ་ལེན་ཏེ་མི་མང་ལ་དཀའ་ངལ་ཆེན་པོ་བཟོས་པ་དང་། ཁོ་ཚོའི་གཡོག་པོ་ཚོས་ཀྱང་མི་མང་སུན་པོ་བྱས་ཀྱི་ཡོད་པ་དང་། འོན་ཀྱང་ང་ནི་དཀོན་མཆོག་ལ་གུས་བཀུར་ཞུ་མཁན་ཞིག་ཡིན་པས་དེ་ལྟར་མ་བྱས་པ་ཡིན།

¹⁶ངས་རང་གི་ནུས་ཤུགས་ཚང་མ་ལྕགས་རི་ཉམས་གསོའི་ཆེད་དུ་བེད་སྤྱོད་བཏང་བས། རང་གི་ཆེད་དུ་རྒྱུ་ནོར་སོགས་གང་ཡང་གསོག་འཇོག་བྱེད་རྒྱུ་མ་བྱུང་། དེ་ཙམ་མ་ཟད་ངའི་མངའ་འོག་ཏུ་ལས་ཀ་བྱེད་མཁན་ཚོས་ཀྱང་ལྕགས་རི་ཉམས་གསོ་བྱས་སོ།

¹⁷ཡུལ་གྱི་ཕྱོགས་བཞི་ནས་ང་ལ་ཐུགས་འཕྲད་དུ་ཡོང་མཁན་རྣམས་མ་རྩིས་པར་ཡ་ཧུ་དཱ་པ་བརྒྱ་དང་ལྔ་བཅུ་ཐམ་པ་དང་དེ་ཚོའི་འགོ་བྱེད་ཚོས་ཉིན་ལྟར་རེ་བཞིན་ང་དང་མཉམ་དུ་ཁ་ཟས་ཟ་གི་ཡོད་པ་དང་།

¹⁸ཉིན་རེའི་ཁ་ཟས་སུ་ངས་གླང་གཅིག་དང་ལུག་རྒྱག་པ་དྲུག་དང་གཞན་ཡང་བྱ་དེ་མང་པོ་གྲ་སྒྲིག་བྱས་པ་དང་། ཉིན་ཞག་བཅུ་རེའི་ཐོག་ཏུ་རྒུན་ཆང་གསར་པ་རེ་དྲངས་ཀྱི་ཡོད། མི་མང་དཀའ་ངལ་ཆེན་པོ་ཡོད་པ་དེ་ངས་ཤེས་པས། སྲིད་ཚབ་ཀྱི་ཐོབ་ཐང་དེ་ངས་མ་ལེན་པར་བཞག་པ་ཡིན།

¹⁹ཀྱེ་གཙོ་བོ་དཀོན་མཆོག། ངས་མི་རིགས་འདིའི་དོན་ལ་སྲི་ཞུ་གང་ཞུས་པ་ཚང་མ་ཁྱེད་ཀྱི་ཐུགས་ལ་ངེས་པ་གནང་རོགས་གནང་ཞེས་ཞུ་གི་ཡོད༎