Read Tibetan — པོད་སྐད་Tibetan Old Testament 2011 ནེ་ཧེམ་ཡཱ 6 Bible Online

ནེ་ཧེམ་ཡཱ 6 - Tibetan — པོད་སྐད་Tibetan Old Testament 2011 bible

ནེ་ཧེམ་ཡཱ 6

¹ང་ཚོས་རྩིག་པ་རྡོལ་བ་རྣམས་སྐྱར་དུ་བརྩིགས་ཏེ་ལྕགས་རི་ཆ་ཚང་ཉམས་གསོ་བྱས་པའི་སྐོར་ལ་སན་བྷ་ལཏ་དང་། ཏོ་བྷི་ཡཱ་དང་གྷེ་ཤེམ་གྱིས་གཙོས་པའི་ང་ཚོའི་དགྲ་བོ་གཞན་རྣམས་ཀྱིས་གོ་ཐོས་བྱུང་བ་དང་། འོན་ཀྱང་སྐབས་དེར་ང་ཚོས་ལྕགས་རིའི་རྒྱལ་སྒོ་རྣམས་བཟོས་ཚར་མེད་པ་ཡིན་ནོ།

²དེར་བརྟན་སན་བྷ་ལཏ་དང་གྷེ་ཤེམ་གཉིས་ཀྱིས་ང་ཨོ་ནོའི་ཐང་དུ་ཡོད་པའི་གྲོང་གསེབ་ཞིག་ཏུ་ཁོ་གཉིས་དང་ཐུགས་འཕྲད་བྱེད་པར་ཡོང་དགོས་ཅེས་ལན་བཏང་མོད། འོན་ཀྱང་དེ་ནི་ང་ལ་གནོད་འཚེ་གཏོང་རྒྱུའི་ངན་བྱུས་ཤིག་བཤམས་པ་ཡིན་ནོ།

³ངས་བང་ཆེན་རྣམས་བཏང་ནས་དེར་ལན་འདེབས་བྱས་པ་ཡིན། ང་ལ་ལས་ཀ་གལ་ཆེན་པོ་ཞིག་ཡོད་པས། ལས་ཀ་དེ་བཞག་ནས་ང་ཡོང་ཐུབ་པ་མིན་འདུག ང་ཁྱོད་ཚོ་དང་ཐུག་འཕྲད་བྱེད་པའི་ཕྱིར་ངའི་ལས་དོན་གལ་ཆེན་པོ་དེ་འཚམས་འཛོག་བྱེད་ཐུབ་པ་མི་འདུག

⁴ཁོ་ཚོས་ང་ལ་ཐེངས་བཞི་པར་ལན་དེ་རང་བཏང་ཡང་ངས་ཀྱང་ཐེངས་བཞི་ཀར་ཡང་གོང་བཞིན་ལན་འདེབས་བྱས་པ་ཡིན།

⁵དེ་རྗེས་སན་བྷ་ལཏ་ཀྱིས་བང་ཆེན་ཞིག་གི་ལག་ཏུ་ལན་ཐེངས་ལྔ་པར་ཡི་གེ་ཞིག་བསྐུར་ཞིང་། ཡང་ཡི་གེ་དེ་ནི་ཡིག་ཀོག་ཁ་མ་རྒྱབ་པར་[4]བཏང་ཡོད་པ་དང་།

⁶ཡེ་གེ་དེའི་ནང་གསལ། ཁྱོད་ཀྱིས་ངོ་རྒོལ་བྱེད་རྩིས་བྱས་པའི་གནས་ཚུལ་དེ་ལ་བརྟེན་ནས་ཁྱོད་དང་ཡ་ཧུ་དཱ་པ་ཚོས་ལྕགས་རི་ཉམས་གསོ་བྱས་ཤིང་། ཁྱོད་རང་རྒྱལ་པོ་བྱེད་འདོད་ཡོད་པ་དང་།

⁷ཁྱོད་རང་ཡ་ཧུ་དཱའི་རྒྱལ་པོ་རེད་ཅེས་ཡེ་རུ་ཤ་ལེམ་དུ་ཁྱབ་སྒྲགས་བྱེད་བཅུག་པའི་ཕྱིར་ལུང་སྟོན་པ་རྣམས་གྲ་སྒྲིགས་བྱས་ཡོད་པའི་སྐོར་གྷེ་ཤེམ་གྱིས་ང་ལ་སྨྲས་བྱུང་། གནས་ཚུལ་དེ་རྒྱལ་པོས་གསན་ངེས་པ་ཡིན་པས། ང་གཉིས་ངོ་འཛོམས་ཀྱིས་དེའི་སྐོར་ལ་གྲོས་མོལ་བྱེད་དགོས་ཅེས་བྲིས་ཡོད་པ་ཡིན་ནོ།

⁸དེའི་ལན་དུ་ངས། ཁྱོད་ཀྱིས་གང་བཤད་པ་དེ་ནི་གཅིག་ཀྱང་མི་བདེན་ཞིང་། དེ་ནི་ཁྱོད་ཀྱི་བསམ་བློའི་གནས་ཚུལ་བཅོས་མ་ཞིག་རེད་ཅེས་སྨྲས་པ་ཡིན།

⁹ཁོ་ཚོས་ང་ཚོའི་ལས་ཀ་ལ་བཀག་འགོག་བྱེད་པའི་ཕྱིར་སྡིག་ར་བསྐུལ་གྱི་ཡོད་པས། ངས་དཀོན་མཆོག་ལ། ང་ལ་སེམས་ཤུགས་གནང་རོགས་གནང་ཞེས་སྨོན་ལམ་འདེབས་པ་ཡིན།

¹⁰སྐབས་དེར་ང་དྷེ་ལའི་ཡཱའི་བུའམ་མེ་ཧེ་ཏ་བྷེལ་གྱི་ཚ་བོ་ཤེ་མ་ཡཱ་དང་ཐུག་འཕྲད་བྱེད་པར་ཕྱིན་ཞིང་། ཡང་ཁོ་ནི་རང་གི་ཁང་པའི་ཕྱིར་ལོགས་སུ་ཐོན་ཐུབ་ཀྱི་མེད་པ་ཡིན་ནོ། ཁོས་ང་ལ། ང་གཉིས་མཆོད་ཁང་གི་གནས་མཆོག་དམ་པའི་ནང་དུ་ཕྱིན་ཏེ་ནང་ལོགས་ནས་སྒོ་རྒྱབ་ཅིང་གབ་ནས་བསྡད་དགོས། གང་ལགས་ཟེར་ན། ཁོ་ཚོས་ཁྱོད་བསད་པར་ཡོང་ཉེན་ཡོད། ཁོ་ཚོས་ཁྱོད་བསད་པར་མཚན་མོའི་དུས་སྐབས་ངེས་མེད་ཞིག་ལ་ངེས་པར་ཡོང་ཉེན་ཡོད་ཅེས་བརྗོད་པ་དང་།

¹¹དེའི་ལན་དུ་ངས། ང་ནི་དེ་བཞིན་བྲོས་མཁན་དང་གབ་མཁན་གྱི་མི་ཞིག་མ་ཡིན་གྱིས། ཡང་ངས་རང་སྲོག་སྐྱབས་ཕྱིར་མཆོད་ཁང་ནང་དུ་གབ་པར་འགྲོ་གི་རེད་ཅེས་བསམ་བྱུང་ངམ། ངས་དེ་འདྲ་ནམ་ཡང་བྱེད་མི་ཡོང་ཞེས་སྨྲས་པ་ཡིན།

¹²དེ་རྗེས་ངས་བསམ་བློ་ཞིབ་པར་བཏང་བས། ཏོ་བྷི་ཡཱ་དང་། སན་བྷ་ལཏ་གཉིས་ཀྱིས་ཤེ་མ་ཡཱ་ལ་ལྐོག་རྔན་སྟེར་ནས་དེ་ལྟར་བཤད་བཅུག་པ་ཡིན་པ་ལས། ཁོའི་བརྒྱུད་ནས་དཀོན་མཆོག་གིས་ལུང་བསྟན་གནང་བ་ཞིག་མ་ཡིན་པར་ངས་ཤེས་བྱུང་།

¹³ང་ལ་སྡིག་ར་བསྐུལ་ཞིང་ང་སྡིག་པར་ལྷུང་བཅུག་པའི་ཕྱིར་ཤེམ་ཡཱ་ལ་གླས་པ་དང་། ཁོ་ཚོས་ང་ལ་མིང་རྗེས་ངན་པ་དམའ་འབེབ་ཡོང་བའི་ཕྱིར་རོ།

¹⁴དེ་ནས་ངས་སྨོན་ལམ་འདེབས་ཤིང་། ཀྱེ་གཙོ་བོ་དཀོན་མཆོག་ཏོ་བྷི་ཡཱ་དང་སན་བྷ་ལཏ་གཉིས་ཀྱིས་གང་བྱས་པ་ཚང་མ་ཐུགས་ལ་བཞེས་ནས་དེ་གཉིས་ལ་ཉེས་ཆད་གནང་བར་མཛོད། དེ་ཙམ་མ་ཟད་ང་ལ་སྡིག་ར་བསྐུལ་མཁན་བུད་མེད་ནོ་དྷི་ཡཱ་ཞེས་པ་དེས་གཙོས་པས་ལུང་སྟོན་པ་གཞན་དག་ཚང་མ་ཁྱེད་ཀྱི་ཐུགས་ལ་དྲན་གསོ་གནང་རོགས་གནང་ཞེས་ཞུས་པ་ཡིན༎

¹⁵ཉིན་ཞག་ལྔ་བཅུ་ང་གཉིས་བར་དུ་ཨར་ལས་བྱས་ཏེ། ཨེ་ལུལ་ཞེས་པའི་ཟླ་བའི་ཚེས་ 25 ཉིན་ལྕགས་རི་ཡོངས་རྫོགས་ཉམས་གསོ་བྱས་ཟིན་པ་དང་།

¹⁶ཁྱིམ་མཚེས་ཡུལ་གྲུ་ཁག་ཏུ་ཡོད་པའི་ང་ཚོའི་དགྲ་བོ་རྣམས་ཀྱིས་གནས་ཚུལ་དེ་ཐོས་ནས། དཀོན་མཆོག་གི་སྐྱབས་གྲོགས་ཀྱིས་ལས་དོན་དེ་ལམ་ལྷོང་བྱུང་བ་ཡིན་པ་དེ་ཁོ་ཚོས་ཤེས་ནས་ཧ་ཅང་ངོ་ཚ་པོ་བྱུང་བ་ཡིན་ནོ།

¹⁷དེ་ཡུན་རིང་ལ་ཡ་ཧུ་དཱ་པའི་འགོ་བྱེད་ཚོས་ཏོ་བྷི་ཡཱ་དང་མཉམ་དུ་ཡིག་འགྲུལ་བྱེད་བཞིན་ཡོད་པ་དང་།

¹⁸ཨ་རཱའི་བུ་ཤེ་ཀན་ཡཱ་ནི་ཡ་ཧུ་དཱ་ནས་ཡིན་ཅིང་། ཡང་ཁོ་ནི་ཏོ་བི་ཡའི་གྱོས་པོ་[5]ཡིན་པས། ཡ་ཧུ་དཱའི་ཡུལ་མི་མང་པོས་ཏོ་བི་ཡའི་ཕྱོགས་གཏོགས་བྱས་པ། ཁོའི་བུ་ཡེ་ཧོ་ཧ་ནན་ནི་བྷེ་རེ་ཀི་ཡཱའི་བུ་མེ་ཤུལ་ལམ་གྱི་བུ་མོ་དང་ཆང་ས་བརྒྱབ་ཡོད་དེ། ཡང་མེ་ཤུ་ལམ་ནི་བྷེ་རེ་ཀྱའི་བུ་ཡིན་ནོ།

¹⁹མི་ཚོས་ངའི་མདུན་དུ་ཡོང་ནས་ཏོ་བྷི་ཡཱས་ལས་ཀ་ཡག་པོ་བྱས་པའི་སྐོར་ང་ལ་བཤད་ཅིང་། དེ་བཞིན་ངས་གང་སྨྲས་པ་ཚང་མ་ཁོའི་རྩར་སྐྱེལ་གྱི་ཡོད་པས། ཁོས་ང་ལ་སྡིག་ར་བསྐུལ་ནས་རྒྱུན་དུ་ཡི་གེ་བཏང་གི་ཡོད་པ་ཡིན་ནོ༎