Read Tibetan — པོད་སྐད་Tibetan Old Testament 2011 ནེ་ཧེམ་ཡཱ 9 Bible Online

ནེ་ཧེམ་ཡཱ 9 - Tibetan — པོད་སྐད་Tibetan Old Testament 2011 bible

ནེ་ཧེམ་ཡཱ 9

¹ཟླ་བ་དེ་གའི་ཚེས་ཉི་ཤུ་བཞིའི་ཉིན་ཨིསི་རཱཨེལ་མི་མང་རྣམས་ནས་རང་གི་སྡིག་པར་འགྱོད་བཤགས་འབུལ་ཞིང་། སྨྱུང་གནས་སྲུང་བར་ཕྱོགས་གཅིག་ཏུ་འདུ་འཛོམས་བྱས་པ་དང་། ཁོ་ཚོས་ཕྱི་རྒྱལ་བ་ཚང་མའི་ཁྲོད་ནས་ཐོན་ཏེ་ཟུར་དུ་གནས་ཡོད་པ་དང་། མྱ་ངན་མཚོན་ཕྱིར་རང་གི་མགོ་བོར་ཐལ་ལ་བྱུགས་ཏེ་ལུས་ལ་རྩ་རས་གྱོན་ཞིང་། ཡར་ལངས་ཏེ་སོ་སོས་བྱས་པའི་སྡིག་པ་དང་རང་གི་ཕ་མེས་བརྒྱུད་ནས་བསགས་པའི་སྡིག་པར་འགྱོད་བཤགས་ཕུལ་ལོ།

³ཆུ་ཚོད་གསུམ་ཙམ་གྱི་རིང་ཁོ་ཚོར་གཙོ་བོ་དཀོན་མཆོག་དེ་ཚོའི་དཀོན་མཆོག་གི་བཀའ་ཁྲིམས་ནས་སྒྲོག་སྦྱངས་བྱས་ཤིང་། དེ་རྗེས་ཆུ་ཚོད་གསུམ་ཙམ་གྱི་རིང་དུ་ཁོ་ཚོས་རང་གི་སྡིག་པར་འགྱོད་བཤགས་ཕུལ་ཏེ། གཙོ་བོ་དཀོན་མཆོག་དེ་ཚོའི་དཀོན་མཆོག་ལ་བསྙེན་བཀུར་ཞུས་པ་ཡིན་ནོ།

⁴ལེ་ཝི་པ་ཚོའི་ཆེད་དུ་སྡིངས་བྱ་ཞིག་བཟོས་ཡོད་ཅིང་། དེའི་སྟེང་དུ་ཡེ་ཤུ་ཨ་དང་། བྷ་ནི། ཀད་མི་ཨེལ། ཤེ་བྷན་ཡཱ། བྷུན་ནི། ཤེ་རེབ་ཡཱ། བྷ་ནི་དང་། ཀེ་ན་ནི་བཅས་ལངས་ཏེ། སྐད་ཤུགས་ཆེན་པོས་གཙོ་བོ་དཀོན་མཆོག་དེ་ཚོའི་དཀོན་མཆོག་ལ་སྨོན་ལམ་འདེབས་སོ།

⁵དེ་ནས་ཡེ་ཤུ་ཨ་དང་། ཀད་མི་ཨེལ། བྷ་ནི། ཧ་ཤབ་ནི་ཨ། ཤེ་རེབ་ཡཱ། ཧོ་དི་ཡཱ། ཤེ་བྷན་ཡཱ་དང་པེ་ཐ་ཡཱ་ཞེས་པའི་གོང་གསལ་ལེ་ཝི་པ་རྣམས་ནས་མཆོད་འབུལ་བྱེད་ཕྱིར་མི་མང་ལ་འབོད་བསྐུལ་བྱས་ཏེ་སྨྲས་སོ། ཡར་ལངས་ཤིང་རང་གི་གཙོ་བོ་དཀོན་མཆོག་ཁྱེད་ཀྱི་དཀོན་མཆོག་ལ་བསྟོད་བསྔགས་འབུལ་ཞིག། དུས་གཏན་དུ་ཁོང་ལ་བསྟོད་བསྔོགས་ཤིག། འགྲོ་བ་མིས་གཙོ་བོ་དཀོན་མཆོག་གི་མངའ་ཐང་དང་འཚམ་ཞིང་འོས་པའི་བསྟོད་བསྔགས་འབུལ་མི་ཐུབ་ན་ཡང། གཟི་བརྗིད་ལྡན་པའི་ཁོང་གི་མཚན་ལ་བསྟོད་བསྔགས་འབུལ་དགོས་སོ།

⁶དེ་ནས་ཨིསི་རཱཨེལ་མི་མང་རྣམས་ཀྱིས་འདི་ལྟར་སྨོན་ལམ་འདེབས་སོ། ཀྱེ་གཙོ་བོ་དཀོན་མཆོག། ཁྱེད་གཅིག་པུ་གཙོ་བོ་དཀོན་མཆོག་ལགས་ཤིང་། ཁྱེད་ཀྱིས་མཐོ་རིས་དང་། གནམ་གྱི་སྐར་མའི་ཚོགས་དང་། དེ་བཞིན་ས་གཞི་དང་རྒྱ་མཚོ་དང་དེའི་ནང་གི་སྲོག་ཆགས་ཚང་མ་བཀོད་ཅིང་། དེ་དག་ལ་ཁྱེད་ཀྱི་སྲོག་གནང་བར་མཛད་དོ། མཐོ་རིས་སྟོབས་ཀྱིས་ཁྱེད་ལ་གུས་པ་ཆེན་པོས་བསྙན་བཀུར་ཞུ་གི་ཡོད།

⁷ཀྱེ་གཙོ་བོ་དཀོན་མཆོག། ཁྱེད་ཀྱིས་ཨབ་རམ་ལ་འདེམས་སྒྲུག་གནང་སྟེ་བྷེ་བྷི་ལོ་ནིཡའི་ཨུར་ཞེས་པའི་ས་གནས་ནས་བཏོན་ཏེ་འཁྲིད་ཕེབས་པ་གནང་ཞིང་། ཁོའི་མིང་ལ་ཨབ་ར་ཧམ་ཞེས་བརྒྱུར་བར་མཛད་དོ།

⁸ཁོའི་དད་པ་བརྟན་པོ་ཡིན་པ་དེ་ཁྱེད་ཀྱིས་གཟིགས་ནས། ཁྱེད་ཀྱིས་ཁོ་ལ་དམ་བཅའ་ཞིག་མཛད་ཅིང་། ཀ་ན་ཨན་པ་དང། ཧེད་པ། ཨ་མོར་པ། ཕེ་རི་ཟི་པ། ཡེ་བུ་ཟི་པ་དང་། གྷིར་ག་སི་པའི་ཡུལ་རྣམས་ཁོའི་རིགས་བརྒྱུད་ཚོ་ལ་གནང་རྒྱུའི་ཞལ་བཞེས་གནང་བ་ཡིན། ཁྱེད་ནི་དམ་ཚིག་ཅན་ཡིན་པས་ཉིད་ཀྱི་ཞལ་བཞེས་གང་གནང་བ་དེ་སྒྲུབ་པར་མཛད་དོ།

⁹ཨི་ཇིབ་དུ་ང་ཚོའི་མེས་པོ་རྣམས་ཀྱི་དཀའ་ངལ་རྣམས་ཁྱེད་ཀྱིས་གཟིགས་ཏེ། རྒྱ་མཚོ་དམར་པོར་ཁོ་ཚོས་སྨྲེ་ངག་འདོན་པ་ལ་ཁྱེད་ཀྱིས་གསན་པ་གནང་བ་ཡིན།

¹⁰ཨི་ཇིབ་ཡུལ་གྱི་རྒྱལ་པོ་དང་། ཁོའི་ལས་བྱེད་པ་རྣམས་དང་། དེ་བཞིན་ཁོའི་མི་འབངས་རྣམས་ཀྱི་མདུན་དུ་ཁྱེད་ཀྱིས་ངོ་མཚར་ཆེ་བའི་མཛད་འཕྲིན་མཛད་དོ། གང་ལ་ཟེར་ན། ཨི་ཇིབ་པ་ཚོས་ཉིད་ཀྱི་མི་འབངས་རྣམས་ལ་མནར་གཅོད་ཇི་ལྟར་བཏང་བ་དེ་ཁྱེད་ཀྱིས་མཁྱེན་ཡོད། དེ་ལྟར་ཁྱེད་ལ་མཚན་སྙན་གྲགས་ཆེན་པོ་བྱུང་བ་དེ་ནི་ད་ལྟའང་ཉམས་མེད་དུ་གནས་ཡོད་དོ།

¹¹རྒྱ་མཚོའི་དབུས་སུ་ཁྱེད་ཀྱིས་མི་མང་གི་ཆེད་དུ་འགྲུལ་ལམ་ཞིག་བཟོས་པ་གནང་ཞིང་། དེའི་ཁར་ཉིད་ཀྱི་མི་འབངས་ས་སྐམ་སར་འགྱུད་ནས་འགྲུལ་ལོ། ཁོ་ཚོའི་རྗེས་སུ་དེད་མཁན་རྣམས་ནི་རྦ་རླབས་དྲག་པོའི་དཀྱིལ་དུ་རྡོ་ནུབ་པ་བཞིན། རྒྱ་མཚོ་གཏིང་རིང་པོར་ནུབ་སྟེ་ཡོངས་སུ་ཤི་བ་ཡིན་ནོ།

¹²ཁྱེད་ཀྱིས་ཉིན་མོར་སྤྲིན་གྱིས་ཀ་བ་དང་མཚན་མོར་མེའི་ཀ་བས་ལམ་སྟོན་མཛད་ནས་དེ་དག་ལ་དབུ་འཁྲིད་མཛད་དོ།

¹³ཁྱེད་མཐོ་རིས་ཀྱི་གནས་ནས་རི་བོ་སི་ནཨའི་སྟེང་དུ་ཕེབས་ཏེ་ཉིད་ཀྱི་མི་འབངས་རྣམས་དང་གསུང་གླེང་མཛད་ཅིང་། དེ་དག་ལ་ཡང་དག་པའི་བཀའ་ཁྲིམས་དང་སློབ་སྟོན་བཟང་པོ་དག་གནང་ངོ་།

¹⁴ཁྱེད་ཀྱིས་དེ་ཚོར་ངལ་གསོ་བའི་ཞག་དེ་ཉིན་ཞག་དམ་པ་ཞིག་ཏུ་བརྩི་སྲུང་བྱེད་དགོས་པའི་སྐོར་ལ་སློབ་སྟོན་གནང་ངོ་། ཁྱེད་ཀྱིས་ཉིད་ཀྱི་ཞབས་ཏོག་པ་མོ་ཤེའི་བརྒྱུད་ནས་བཀའ་ཁྲིམས་ཀྱང་གནང་ངོ།

¹⁵དེ་ཚོ་ལྟོགས་པའི་དུས་སུ་ཁྱེད་ཀྱིས་མཐོ་རིས་ནས་བག་ལེབ་དང་། སྐོམ་པའི་དུས་སུ་བྲག་རི་ནས་ཆུ་བཏོན་ཏེ་གནང་ངོ་། ཁྱེད་ཀྱིས་དེ་ཚོར་གནང་གི་ཡིན་ཞེས་དམ་བཅའ་གནང་བའི་ཡུལ་དེར་དབང་འཛིན་བྱེད་ཚོག་པའི་ཞལ་བཞེས་གནང་ངོ་།

¹⁶འོན་ཀྱང་ང་ཚོའི་མེས་པོ་རྣམས་ནི་ང་རྒྱལ་ཆེ་ཞིང་སེམས་གཤིས་གྱོང་བས། ཁྱེད་ཀྱི་བཀའ་ལ་རྩིས་གུས་མ་ཞུས་པ་དང་།

¹⁷ཁོ་ཚོས་ཁྱེད་ཀྱི་བཀའ་ལ་བརྩི་མེད་ཞུས་ཤིང་། ཁྱེད་ཀྱིས་མཛད་པའི་ངོ་མཚར་ཅན་གྱི་མཛད་འཕྲིན་རྣམས་ཁོ་ཚོས་བརྗེད་དོ། ང་རྒྱལ་སྐྱེད་ནས་སྐྱར་དུ་ཨི་ཇིབ་ཀྱི་བྲན་འཁོལ་དུ་ཕྱིར་ལོག་བྱེད་ཕྱིར་འགོ་འཁྲིད་ཞིག་ཀྱང་བསྐོས་མོད། འོན་ཀྱང་ཁྱེད་ནི་སྡིག་སེལ་གནང་བར་ཐུགས་མཉེས་ཤིང་ཐུགས་བརྩེ་ཅན་དང་ཐུགས་བཟོད་ཆེ་བ་ལགས་སོ། ཁྱེད་ཀྱིས་དེ་ཚོར་བདག་མེད་དུ་སྤངས་མ་གནང་བ་དང་།

¹⁸དེ་ཚོས་བེའུའི་དབྱིབས་སུ་འདྲ་སྐུ་ཞིག་བཟོས་ཏེ། ང་ཚོ་ཨི་ཇིབ་ནས་འཁྲིད་ཡོང་མཁན་དཀོན་མཆོག་ནི་འདི་རང་ཡིན་ནོ་ཞེས་བརྗོད་དེ། སྐུ་འདྲ་དེ་ལ་བསྙེན་བཀུར་ཞུས་པ་དང་། ཀྱེ་གཙོ་བོ་དཀོན་མཆོག། ཁོ་ཚོས་ཁྱེད་ལ་དེ་ལྟ་བུའི་དམའ་བེབས་ཞུས་མོད།

¹⁹འོན་ཀྱང་ཁྱེད་ནི་ཐུགས་བརྩེ་ཆེན་པོ་ཡིན་པས། ཁྱེད་ཀྱིས་དེ་ཚོར་འབྲོག་སྟོང་ནང་བདག་མེད་དུ་བོར་བ་མ་གནང་བ་དང་། དེ་བཞིན་ཁོ་ཚོར་ལམ་སྟོན་བྱེད་མཁན་ཉིན་མོའི་སྤྲིན་པ་དང་མཚན་གྱི་མེ་དེའང་ཕར་བསྡུས་པ་མ་གནང་བ་ཡིན་ནོ།

²⁰ཁྱེད་ནི་ཐུགས་གཤིས་བཟང་པོ་ཡིན་པས། དེ་ཆོར་རྒྱུན་ཆད་མེད་པར་སློབ་སྟོན་མཛད་དེ། དེ་ཚོར་ཟས་སུ་མན་ནཱ་དང་འཐུང་བའི་ཕྱིར་ཆུ་གནང་ངོ་།

²¹ཁོ་ཚོ་འབྲོག་སྟོང་ནང་ལོ་ངོ་བཞི་བཅུའི་བར་དུ་གནས་ཡུན་རིང་ལ་ཁྱེད་ཀྱིས་ཁོ་ཚོའི་དགོས་མཁོ་ཚང་མ་སྒྲུབ་པ་གནང་བ་དང་། དེ་ཡུན་རིང་ལ་ཁོ་ཚོའི་ལུས་ཀྱི་གྱོན་གོས་སོགས་ནམ་ཡང་མ་རལ་ལོ། ཁོ་ཚོའི་རྐང་པར་ནད་ཟུག་དང་སྦོས་པ་སོགས་གང་ཡང་མ་བྱུང་ངོ་།

²²དེ་ཙམ་མ་ཟད་ཁྱེད་ཀྱིས་ཡུལ་མི་དང་བཅས་པའི་ཡུལ་གྲུ་དག་ཁོ་ཚོར་གནང་ཞིང་། ཁོ་ཚོའི་ས་མཚམས་གཡས་གཡོན་གྱི་ཡུལ་ཁག་རྣམས་ཀྱང་ཁོ་ཚོའི་བདག་དབང་དུ་གནང་ངོ་། ཁོ་ཚོས་རྒྱལ་པོ་སི་ཧོན་གྱི་ཡུལ་ཧེཤ་བྷོན་དང་། རྒྱལ་པོ་ཨོག་གི་ཡུལ་བྷ་ཤཱན་བཅས་དབང་དུ་བསྡུས་པ་ཡིན་ནོ།

²³ཁྱེད་ཀྱིས་དེ་ཚོར་སྐར་མའི་ཚོགས་དང་འདྲ་བའི་བུ་བརྒྱུད་གྲངས་མང་གནང་ཞིང་། སྔར་ཁྱེད་ཀྱིས་དེ་ཚོའི་མེས་པོ་རྣམས་ལ་ཞལ་བཞེས་གནང་བའི་ཡུལ་དེ་ཁོ་ཚོས་དབང་འཛིན་བྱས་ཏེ་དེར་གནས་སྡོད་བྱས་སོ།

²⁴ཁོ་ཚོས་ཀ་ནན་ཡུལ་དབང་དུ་བསྡུས་ཤིང་། ཁྱེད་ཀྱིས་དེ་གའི་ཡུལ་མི་རྣམས་བཏུལ་བར་མཛད་དོ། ཉིད་ཀྱི་མི་འབངས་ཨིསི་རཱཨེལ་པ་ཚོས་ཀ་ནཱན་ཡུལ་གྱི་མི་མང་དང་རྒྱལ་པོ་རྣམས་ལ་རང་གི་འདོད་པ་གང་ཡོད་བྱེད་བཅུག་པའི་ཕྱིར་དེ་དག་ཁོ་ཚོའི་ལག་ཏུ་རྩིས་སྤྲོད་གནང་ངོ་།

²⁵ཁྱེད་ཀྱི་མི་འབངས་རྣམས་ནས་ལྕགས་རིས་བསྐོར་བའི་གྲོང་ཁྱེར་ཁག་དང་། ས་ལུད་འཛོམས་པའི་ཡུལ་དང་། རྒྱུ་ནོར་ལྡན་པའི་ཁང་ཁྱིམ་སོགས་དང་། སྔོན་ནས་བྲུས་ཏེ་གྲ་སྒྲིག་བྱས་ཡོད་པའི་ཁྲོན་པ་རྣམས་དང་། དེ་བཞིན་རྒུན་ཚལ་དང་། ཁ་སྐྱུར་པོའི་ཚལ་ཞིང་སོགས་དབང་འཛིན་བྱས་ཏེ། དེ་དག་ཟས་ནས་ལུས་སྟོབས་རྒྱས་ཤིང་། ཁྱེད་ཀྱིས་གནང་བའི་གནང་སྦྱིན་བཟང་པོ་ཀུན་ལ་ལོངས་སྤྱོད་པ་དང་།

²⁶འོན་ཀྱང་དེ་ཚོས་ཁྱེད་ཀྱི་བཀའ་ལ་རྩིས་མེད་ཞུས་ཏེ་ཁྱེད་ལ་ངོ་རྒོལ་ཞུས་ཤིང་། ཁྱེད་ཀྱི་བཀའ་ཁྲིམས་ལ་རྒྱབ་འགལ་ཞུས་སོ། འགྱོད་བཤགས་ཕུལ་ནས་ཁྱེད་ཀྱི་ཕྱོགས་སུ་སེམས་བསྒྱུར་དགོས་ཅེས་འབོད་བསྐུལ་བྱེད་མཁན་ལུང་སྟོན་པ་རྣམས་ཁོ་ཚོས་བསད་དོ། ཁྱེད་ལ་ཡང་ཡང་དམའ་འབེབས་ཞུས་པས།

²⁷དེར་བརྟེན་ཁྱེད་ཀྱིས་ཁོ་ཚོའི་དགྲ་བོ་རྣམས་ལ་ཁོ་ཚོའི་ཐོག་ཏུ་དབང་བྱེད་དུ་བཅུག་གོ། འོན་ཀྱང་ཁོ་ཆོས་དཀའ་ངལ་གྱི་དུས་སུ་ཁྱེད་ལ་སྐྱབས་ཞུས་པས། ཁྱེད་ཀྱིས་མཐོ་རིས་ནས་ཁོ་ཚོའི་ཞུ་བར་གསན་ཏེ་ཁོ་ཚོར་བཀའ་ལན་གནངོ་ངོ་། ཁོ་ཚོ་དགྲ་བོའི་ལག་ནས་སྲུང་སྐྱོབས་གནང་ཕྱིར་ཁྱེད་ཀྱི་ཐུགས་བརྩེ་ཆེན་པོས་ཁོ་ཚོར་འགོ་འཁྲིད་བྱེད་མཁན་རྣམས་ཀྱང་བཏང་བ་གནང་ངོ་།

²⁸འོན་ཀྱང་ཞི་བདེ་ལྷིང་འཇག་བྱུང་བའི་རྗེས་ལ་ཁོ་ཚོས་ཡང་སྐྱར་སྡིག་པ་བྱས་པས། ཁྱེད་ཀྱིས་དེ་ཚོའི་དགྲ་བོ་རྣམས་ལ་ཁོ་ཆོའི་ཐོག་ཏུ་རྒྱལ་ཁ་གནང་བ་དང་། རྗེས་སུ་ཁོ་ཆོས་ཡང་སྐྱར་འགྱོད་བཤགས་ཕུལ་ནས་སྐྱབས་གྲོགས་མཛད་རོགས་གནང་ཞེས་ཞུ་བ་ཕུལ་སྐབས། མཐོ་རིས་ནས་ཁྱེད་ཀྱིས་དེ་ཚོའི་ཞུ་བར་གསན་ཏེ། ཁྱེད་ཀྱི་སྙིང་རྗེ་ཆེན་པོས་ཁོ་ཚོར་ཡང་ནས་ཡང་དུ་སྐྱབས་གྲོགས་མཛད་དོ།

²⁹དེ་ཚོས་བཀའ་ཁྲིམས་སྲུང་ཕྱིར་ཁྱེད་ཀྱིས་དེ་ཚོར་ཟོན་བསྐུལ་གནང་། འོན་ཀྱང་ཁོ་ཚོས་ང་རྒྱལ་བྱས་ནས་ཁྱེད་ཀྱི་བཀའ་ཁྲིམས་རྣམས་ལ་སྤངས་པ་དང་། ཁྱེད་ཀྱི་བཀའ་ཁྲིམས་སྲུང་རྒྱུ་དེ་ནི་གསོན་པོར་གནས་པའི་ཐབས་ལམ་དེ་ཡིན་ནོ། འོན་ཀྱང་དེ་ཚོས་སེམས་གཤིས་གྱོང་པོ་བྱས་ནས་དེ་དག་ལ་རྩིས་མེད་ཞུས་སོ།

³⁰ཁྱེད་ཀྱི་ལོ་མང་བར་དུ་དེ་ཚོར་ཐུགས་བཟོད་་མཛད་དེ་ཟོན་བསྐུལ་གནང་ཞིང་། ཉིད་ཀྱི་ཐུགས་ཉིད་ཀྱི་བསྐུལ་མས་ལུང་སྟོན་པ་རྣམས་བརྒྱུད་དེ་ཁྱེད་ཀྱིས་དེ་ཚོར་ལུང་བསྟན་གནང་རུང་། ཁྱེད་ཀྱི་མི་འབངས་རྣམས་ཀྱིས་རྣ་བ་འོན་པ་ལྟར་བྱས་ནས་དེར་ཉན་ཚོག་མ་བྱས་པ་དང་། དེ་བས་ན་ཁྱེད་ཀྱིས་མི་རིགས་གཞན་རྣམས་ལ་ཁོ་ཚོའི་ཐོག་ཏུ་དབང་བསྒྱུར་བྱེད་བཅུག་གོ།

³¹འོན་ཀྱང་ཁྱེད་ཀྱི་སྙིང་རྗེ་ཆེན་པོའི་སྒོ་ནས་དེ་དག་ལ་མ་སྤངས་བ་དང་འཇིགས་པར་ཡང་མ་གནང་ངོ་། གང་ལགས་ཟེར་ན། ཁྱེད་ནི་སྙིང་རྗེ་དང་ཐུགས་རྗེ་ལྡན་པའི་དཀོན་མཆོག་ལགས་པའི་ཕྱིར་རོ།

³²ཀྱེ་དཀོན་མཆོག། ང་ཚོའི་དཀོན་མཆོག་ཁྱེད་ནི་མངའ་ཐང་ཆེ་ཞིང་། བཀའ་བཙན་པོ་དང་། མཐུ་སྟོབས་དང་ལྡན་ནོ། ཁྱེད་ཀྱིས་དམ་ཚིག་ཅན་གྱི་སྒོ་ནས་ཞལ་བཞེས་ཚང་མ་སྒྲུབ་པར་མཛད་པ་དང་། སྔར་ཨ་སུར་པའི་རྒྱལ་པོ་རྣམས་ཀྱིས་ང་ཚོར་མནར་གཅོད་བཏང་བ་ནས་བཟུང་ད་བར་ང་ཚོས་དཀའ་སྡུག་མྱངས་དང་མྱོང་བཞིན་ཡོད། ང་ཚོའི་རྒྱལ་པོ་རྣམས་དང་འགོ་བྱེད་རྣམས་དང་། དེ་བཞིན་བླ་མ་རྣམས་དང་ལུང་སྟོན་པ་རྣམས་དང་གཞན་ཡང་ང་ཚོའི་མེས་པོ་རྣམས་ཀྱིས་གཙོས་པའི་ང་ཚོ་ཚང་མས་མྱངས་དགོས་བྱུང་བའི་དཀའ་སྡུག་རྣམས་ཁྱེད་ཀྱིས་ཐུགས་དྲན་གསོས་པ་གནང་རོགས་གནང་།

³³ཁྱེད་ཀྱིས་ང་ཚོའི་ཐོག་ཏུ་ཉེས་ཆད་གཏོང་གནང་བ་དེ་ནི་དྲང་ཞིང་འོས་པ་ཡིན་པ་དང་། ང་ཚོས་ཉེས་སྡིག་བྱས་རུང་ཁྱེད་ནི་དམ་ཚིག་ངང་དུ་ཞུགས་སོ།

³⁴ང་ཚོའི་མེས་པོ་རྣམས་དང་རྒྱལ་པོ་རྣམས་དང་དེ་བཞིན་འགོ་བྱེད་དང་བླ་མ་རྣམས་ཀྱིས་ཁྱེད་ཀྱི་བཀའ་ཁྲིམས་ལ་བརྩིས་མེད་བྱས་པ་དང་། ཁྱེད་ཀྱི་བཀའ་རྒྱ་དང་ཟོན་བསྐུལ་རྣམས་ལ་མ་ཉན་པ་ཡིན་ནོ།

³⁵ཁྱེད་ཀྱི་ཐུགས་རྗེ་བྱིན་རླབས་ཀྱི་སྒོ་ནས་རྒྱལ་པོ་རྣམས་ཀྱིས་ཁྱེད་ཀྱི་མི་འབངས་ཀྱི་ཐོག་ཏུ་སྲིད་སྐྱོང་བྱས་སོ། དེ་དག་ས་ལུད་འཛོམས་ཤིང་ཡུལ་ལྗོངས་རྒྱ་ཚེའི་ནང་དུ་གནས་སྡོད་བྱས་སྐབས། དེ་ཚོས་རང་གི་སྡིག་པ་སྤངས་ནས་ཁྱེད་ལ་ཞབས་ཏོག་མ་ཞུས་སོ།

³⁶ད་ཁྱེད་ཀྱིས་ང་ཚོར་གནང་བའི་ས་ལུད་འཛོམས་ཤིང་ང་ཚོར་ཁ་ཟས་སྦྱིན་མཁན་ཡུལ་འདི་གའི་ནང་དུ་ང་ཚོ་བྲན་འཁོལ་དུ་ཚུད་ཡོད་དོ།

³⁷ང་ཚོས་ཉེས་དམིགས་བྱས་པའི་རྐྱེན་གྱིས་ང་ཚོའི་ཐོག་ཏུ་བཀོད་གནང་བ་རྒྱལ་པོ་ཚོའི་རྩར་ང་ཚོའི་སྟོན་ཐོག་ཚང་མ་སྐྱེལ་དགོས་བྱུང་བ་དང་། ཁོ་ཚོས་ང་་ཚོ་དང་ང་ཚོའི་ལུག་ཕྱུགས་སེམས་ཅན་རྣམས་ཀྱི་ཐོག་ཏུ་འདོད་པ་གང་ཡོད་བྱས་པས་ངེད་རྣམས་དཀའ་ངལ་ཆེན་པོའི་ནང་དུ་ཚུད་ཡོད་དོ༎

³⁸དེ་སྔ་གནས་ཚུལ་གང་བྱུང་བ་དེ་ལ་བརྟེན་པས། ང་ཚོ་ཨིསི་རཱཨེལ་མི་མང་་ཡོངས་ནས་བཅའ་ཡིག་བརྟན་པོ་འདི་བཞིན་འབུལ་གྱི་ཡོད། བཅའ་ཡིག་དེར་ང་ཚོའི་འགོ་བྱེད་རྣམས་དང་ལེ་ཝི་པ་རྣམས་དང་། དེ་བཞིན་བླ་མ་བཅས་ཀྱིས་མཚན་རྟགས་བཀོད་ཡོད་དོ༎