Read Tibetan — པོད་སྐད་Tibetan Old Testament 2011 ཨེསེ་ཐར 5 Bible Online

ཨེསེ་ཐར 5 - Tibetan — པོད་སྐད་Tibetan Old Testament 2011 bible

ཨེསེ་ཐར 5

¹དེ་ནས་སྨྱུང་གནས་ཀྱི་ཉིན་ཞག་གསུམ་པའི་ཐོག་ཏུ། ཨེསི་ཐར་གྱིས་བཙུན་མོའི་ན་བཟའ་བཞེས་ཏེ། ཕོ་བྲང་གི་ཚོམས་སྐོར་ནང་མར་རྒྱལ་ཁྲི་ཡོད་པའི་གཟིམས་ཆུང་གི་མདུན་དུ་ཞལ་བསྒྱུར་ནས་བཞངས་སོ། རྒྱལ་པོ་ནི་གཟིམས་ཆུང་ནང་དུ་རྒྱལ་ཁྲིའི་སྟེང་ནས་གཟིམས་སྒོའི་ཕྱོགས་སུ་ཞལ་བསྒྱུར་ནས་བཞུགས་ཡོད་ཅིང།

²རྒྱལ་པོས་བཙུན་མོ་ཨེསི་ཐར་ཚོམས་སྐོར་ནང་བཞེངས་ནས་བཞུགས་ཡོད་པ་གཟིགས་མ་ཐག་ཏུ། བཙུན་མོ་རྒྱལ་པོའི་དྲུང་དུ་མཇལ་བའི་ཐུགས་རྗེ་རྙེད་ནས། རྒྱལ་པོས་རང་གི་ཕྱག་ཏུ་བསྣམས་པའི་གསེར་གྱི་ཕྱག་འབེར་དེ་བཙུན་མོ་ཨེསི་ཐར་གྱི་ཕྱོགས་སུ་བཏེགས་པར་མཛད་པས། བཙུན་མོ་ཨེསི་ཐར་ཡང་རྒྱལ་པོའི་པྱོགས་སུ་ཉེ་བར་བཅར་ཏེ། ཕྱག་འབེར་གྱི་རྩེ་དེ་བཙུན་མོས་འཕྱང་བར་མཛད་དོ།

³དེ་ནས་རྒྱལ་པོས། བཙུན་མོ་ཨེསི་ཐར་ཁྱེད་ལ་གང་འདོད་དམ། ཁྱེད་ལ་གང་དགོས་པ་དེ་ང་ལ་སྨྲོས་ཤིག་དང། ངས་རང་གི་རྒྱལ་སྲིད་ཕྱེད་ཀ་བར་དུའང་ཁྱེད་ལ་སྦྱིན་པར་བྱའོ་ཞེས་གསུངས་པས།

⁴ལན་དུ་བཙུན་མོ་ཨེསི་ཐར་གྱིས་ཞུས་པ། ཀྱེ། མི་དབང་ཆེན་པོ། ཁྱེད་ཀྱི་ཁོ་མོར་ཐུགས་དགྱེས་ན། རྒྱལ་པོ་ཉིད་དང་ཧ་མན་བཅས་དོ་དགོང་ཁོ་མོས་བཤམས་པའི་གསོལ་སྟོན་དུ་ཕེབས་སུ་གསོལ་ཞེས་ཞུས་པས།

⁵བཙུན་མོས་ཞུས་པ་ལྟར། རྒྱལ་པོས་ཧ་མན་ལ། འགྲོ་གྲབ་གྱིས་ཤིག་ཅེས་བཀའ་གནང་སྟེ། བཙུན་མོ་ཨེསི་ཐར་གྱིས་བཤམས་པའི་གསོལ་སྟོན་དུ་རྒྱལ་པོ་དང་ཧ་མན་གཉིས་ཕེབས་སོ།

⁶རྒུན་ཆང་ཞུ་བའི་སྐབས་སུ་རྒྱལ་པོས་བཙུན་མོར། ཁྱེད་ལ་ཞུ་བ་ཅི་འདྲ་ཞིག་ཡོད། ཁྱེད་ལ་གང་འདོད་པ་ཚང་མ་སྒྲུབ་པར་བྱ་རྒྱུའི་ཁས་ལེན་བྱེད་རྒྱུ་ཡིན། ངས་རང་གི་རྒྱལ་སྲིད་ཕྱེད་ཀ་བར་དུའང་ཁྱེད་ལ་སྦྱིན་པར་བྱའོ་ཞེས་གསུངས་པའི་ལན་དུ།

⁷བཙུན་མོ་ཨེསི་ཐར་གྱིས་ཞུས་པ།

⁸གལ་ཏེ་ཁོ་མོར་རྒྱལ་པོའི་སྤྱན་སྔར་གཟིགས་པ་རྙེད་ན། རྒྱལ་པོ་ཁྱེད་དང་ཧ་མན་གཉིས་ཁོ་མོས་བཤམས་པའི་གསོལ་སྟོན་དུ་སང་ཉིན་སླར་ཡང་ཕེབས་པར་མཛོད། སྐབས་དེར་ཁོ་མོས་གང་དགོས་པ་དེ་ཞུ་བར་བྱའོ་ཞེས་ཞུས་སོ༎

⁹ཐུགས་སྤྲོ་གྲོལ་སྐབས་ཧ་མན་ཡིད་དགའ་ཞིང་བློ་བདེ་ཆེན་པོསི་ངང་དུ་འཐོན་ནོ། འོན་ཀྱང་ཁོས་ཕོ་བྲང་གི་གཞུང་སྒོའི་འགྲམ་དུ་མོར་དོ་ཀཡེ་ལ་མཐོང་བ་དང། མོར་དོ་ཀཡེས་ཡར་ལངས་ཏེ་ཁོ་ལ་གུས་ཞབས་སོགས་གང་ཡང་མ་བྱས་པས། ཁོ་ཧ་ཅང་ཁྲོས་སོ།

¹⁰འོན་ཀྱང་སྐབས་དེར་ཁོས་བཟོད་སྒོམ་བྱས་ཤིང་རང་གི་ཁྱིམ་དུ་ཕྱིན་ནས། མཛའ་གྲོགས་རྣམས་དང་རང་གི་ཆུང་མ་ཛེ་རེཤེ་ལ་བོས་ནས།

¹¹ང་ལ་རྒྱལ་པོ་ཆེན་པོས། རང་གི་དཔལ་འབྱོར་ལོངས་སྤྱོད་དང། ཁོ་ལ་བུ་མང་ཉུང་ཇི་ཡོད་དང། རྒྱལ་པོས་ཁོ་ལ་ཇི་ལྟར་གོ་ས་སྤར་བའི་སྐོར་དང། རྒྱལ་པོའི་ལས་བྱེད་པ་གཞན་ལས་ཁོ་རང་ཇི་ཙམ་གལ་ཆེན་པོ་ཡིན་པའི་སྐོར་རང་བསྟོད་བྱེད་དོ།

¹²གཏམ་གྱི་གླེང་འཕྲོ་མ་བཅད་པར་ཧ་མན་གྱིས། བཙུན་མོ་ཨེསི་ཐར་གྱིས་བཤམས་པའི་གསོལ་སྟོན་ལ། རྒྱལ་པོ་དང་ལྷན་དུ་ང་མ་གཏོགས་པར་གཞན་སུའང་བོས་མི་འདུག རྒྱལ་པོ་དང་ལྷན་དུ་ང་ལ་སང་ཉིན་ཡང་མགྲོན་དུ་བོས་ཡོད།

¹³འོན་ཀྱང་ཡ་ཧུ་ད་པ་མོར་དོ་ཀཡེ་ཞེས་པ་དེ་ཕོ་བྲང་གི་གཞུང་སྒོར་ལངས་ནས་བསྡད་པའི་མཐོང་ཚད་རིང་ལ་གོང་གསལ་ཆེས་བསྟོད་ཚང་མས་ང་ཚིམས་པར་མི་འགྱུར་ཞེས་སྨྲས་སོ།

¹⁴དེར་བརྟེན་ཁོའི་ཆུང་མ་དང་མཛའ་གྲོགས་ཚང་མས་ཁོ་ལ་། མི་ཏར་ཉི་ཤུ་རྩ་གཉིས་བྱས་པའི་སྲོག་ཉེས་འཕྱར་ཤིང་ཞིག་བཟོས་ཏེ། མོར་དོ་ཀཡེ་དེའི་ཁར་འཕྱར་དགོས་ཞེས་སང་ཞོག་རྒྱལ་པོར་ཞུས་ཤིག དེ་ནས་ཁྱེད་ཐུགས་དགའ་སྣང་ཆེན་པོའི་ངང་གསོལ་སྟོན་དུ་ཕེབས་ཚོག་གི་རེད་ཅེས་ཞུས་པས། ཧ་མན་གྱི་སེམས་ལ་གྲོས་འཆར་དེ་ཡག་པོ་ཞིག་འདུག་བསམ་ནས་སྲོག་ཉེས་འཕྱར་ཤིང་དེ་བཟོ་རུ་བཅུག་གོ།