Read Tibetan — པོད་སྐད་Tibetan Old Testament 2011 སྡེབ་ཐོན 12 Bible Online

སྡེབ་ཐོན 12 - Tibetan — པོད་སྐད་Tibetan Old Testament 2011 bible

སྡེབ་ཐོན 12

¹གཙོ་བོ་དཀོན་མཆོག་གིས་ཨི་ཇིབ་དུ་མོ་ཤེ་དང་ཨ་རོན་ལ་གསུངས་པ།

²ཟླ་བ་འདི་ནི་ཁྱོད་ཚོས་རྩིས་སྲོལ་ལྟར་ལོའི་ཟླ་བ་དང་པོ་ཡིན་ནོ།

³ཨིསི་རཱཨེལ་པ་ཐམས་ཅད་ལ་འདི་ལྟར་སྨྲོས་ཤིག ཟླ་བ་འདིའི་ཚེས་བཅུ་ལ་རང་རང་སོ་སོའི་ཁྱིམ་ཚང་བཞིན་ཚང་མས་ལུག་གུ་འམ་ར་ཕྲུག་ཞིག་འདམ་ནས་འཁྱེར་ཡོང་དགོས།

⁴གལ་ཏེ་ནང་མི་ཉུང་ཉུང་ཡོད་པའི་སེམས་ཅན་ཆ་ཚང་ཟ་མ་ཐུབ་པ་ཡིན་ན། རང་གི་ཁྱིམ་མཚེས་ཤིག་དང་མཐུན་ནས་ནང་མིའི་ཁ་གྲངས་རྩིས་ཏེ་མི་རེ་རེས་ཟ་ཐུབ་ཚོད་ཀྱི་སེམས་ཅན་གྱི་ཤ་དེ་བགོ་བཤའ་རྒྱབ་དགོས་།

⁵ལུག་ཡང་ན་ར་དེ་ནི་ལོ་གཅིག་ལོན་པ་ཕོ་སྐྱོན་གང་ཡང་མེད་པ་ཡིན་དགོས་སོ། །

⁶དེ་ནས་ཟླ་བ་དེའི་ཚེས་བཅུ་བཞི་ཉིན་ཨིསི་རཱཨེལ་གྱི་སྡེ་ཐམས་ཅད་ཀྱིས་སེམས་ཅན་རྣམས་དགོང་དྲོའི་དུས་སུ་བསད་དགོས།

⁷དེ་ཚོས་དེའི་ཁྲག་དེ་འཁྱེར་ནས་སེམས་ཅན་གྱི་ཤ་ཟས་པའི་ཁྱིམ་ཚང་རེ་རེའི་སྒོའི་རེ་བཞི་ཕན་ཚུན་དང་ཐོད་ལ་ཁྲག་བྱུགས་དགོས།

⁸མཚན་དེ་རང་ལ་ཤ་དེ་མེ་ལ་སྲེག་ནས་ཆི་མན་མེད་པའི་བག་ལེབ་དང་། སྔོ་ཚོད་ཁག་ཏིག་གཅིག་དང་མཉམ་དུ་ཟ་དགོས་སོ།

⁹ཤ་རྗེན་པའམ་ཆུ་ལ་བཙོས་ནས་ཟ་མི་ཆོག། འོན་ཀྱང་དེའི་མགོ་དང་རྐང་པ་དང་ནང་ཁྲོལ་དང་བཅས་པ་ཡོངས་རྫོགས་མེ་ལ་སྲེག་ནས་ཟ་ཞིག

¹⁰སང་ཞོགས་བར་དུ་དེའི་ལྷག་མ་གང་ཡང་ལུས་མི་ཆོག གལ་ཏེ་ལྷག་མ་ལུས་པ་ཡིན་ན་དེ་དག་མེར་སྲེག་བཏང་དགོས།

¹¹ཁྱོད་ཚོས་སྐེ་རགས་བཅིངས་ཏེ་ལྷམ་གོན་ཞིང་། ལག་ཏུ་དབྱུག་པ་བཟུང་ནས་བྲེལ་ཚབས་ཆེན་པོས་ངང་དུ་ཤ་དེ་ཟ་དགོས། དེ་ནི་གཙོ་བོ་དཀོན་མཆོག་གི་ཐར་གྲོལ་གྱི་དུས་སྟོན་དེ་ཡིན་ནོ།

¹²མཚན་དེར་ང་ཨི་ཇིབ་བརྒྱུད་ནས་བསྐྱོད་དེ། ཡུལ་དེའི་བུ་སྔོན་སྐྱེས་ཐམས་ཅད་དང་། དུད་འགྲོའི་ཕྲུ་གུ་སྔོན་སྐྱེས་ཚང་མ་གསོད་ཅིང་། ཨི་ཇིབ་ཀྱི་ལྷ་ཐམས་ཅད་ལ་ངས་ཁྲིམས་གཅོད་གཏོང་གི་ཡིན། ང་ནི་གཙོ་བོ་དཀོན་མཆོག་ཡིན་ནོ།

¹³ཁྱོད་ཚོ་གནས་སྡོད་བྱེད་པའི་ཁང་པའི་སྒོའི་ཁར་བསྐུས་པའི་ཁྲག་དེ་ནི་ཁྱོད་ཚོའི་དོན་དུ་རྟགས་མཚན་ཞིག་ཏུ་འགྱུར་ཞིང་། ངས་ཁྲག་གི་རྟགས་དེ་མཐོང་ནས་ཁྱོད་ཚོ་ལ་ཐར་དུ་འཇུག་གོ ཨི་ཇིབ་པ་རྣམས་ཀྱི་འཇིག་པའི་ནད་རིམས་ཁྱོད་ཚོར་འཆང་བར་མི་འགྱུར།

¹⁴ཉིན་དེ་ནི་ཁྱོད་ཚོའི་དོན་དུ་དྲན་རྟེན་ཞིག་ཏུ་འགྱུར་བ་དང་། དེ་ནི་ངའི་དོན་དུ་མཆོད་ཀྱི་དུས་སྟོན་ཞིག་སྲུང་དགོས། མ་འོངས་པའི་ཉིན་འདི་ཚོར་ཁྱོད་ཚོས་དུས་གཏན་གྱི་ཆེད་དུ་དུས་སྟོན་འདི་བྱེད་དགོས་སོ༎

¹⁵གཙོ་བོ་དཀོན་མཆོག་གིས་ཉིན་ཞག་བདུན་བར་དུ་ཆི་མན་མེད་པའི་བག་ལེབ་ཟ་ཞིག ཉིན་དང་པོ་རང་ལ་ཁྱོད་ཚོའི་ཁང་པ་སོ་སོ་ནས་ཆི་མན་གང་ཡོད་པ་ཚང་མ་ཕྱི་ལ་དབྱུགས་དགོས། ཉིན་དང་པོ་ནས་ཉིན་བདུན་བར་མི་སུ་ཞིག་གིས་ཆི་མན་ཡོད་་པའི་བག་ལེབ་ཟ་མཁན་དེ་ནི་ཨིསི་རཱཨེལ་གྱི་མི་སྡེའི་ཁོངས་སུ་གཏོགས་མི་ཡོང་།

¹⁶ཉིན་དང་པོ་དང་ཉིན་བདུན་པའི་ཐོག་ཏུ་བསྙེན་བཀུར་བྱེད་པའི་ཕྱིར་ཁྱོད་ཚོ་ཕྱོགས་གཅིག་ཏུ་འཛོམས་དགོས། ཉིན་དེ་གཉིས་ལ་ཁྱོད་ཚོས་ཁ་ལག་བཟོས་པ་ཙམ་མ་གཏོགས་པས། གཞན་ལས་ཀ་གང་ཡང་བྱེད་མི་ཆོག

¹⁷ཆི་མན་མེད་པའི་བག་ལེབ་ཀྱི་དུས་སྟོན་དེ་ནི་ཁྱོད་ཚོས་ངེས་པར་སྲུང་དགོས། གང་ལ་ཟེར་ན། ཉིན་དེ་རང་ལ་ངས་ཁྱོད་རྣམས་ཨི་ཇིབ་ནས་ཕྱིར་འཁྲིད་ཡོང་བ་ཡིན། ཁྱོད་ཚོ་དང་མ་འོངས་པའི་ཁྱོད་ཚོའི་མི་རབས་ཚང་མས་ཉིན་ཞག་དེ་ནི་དུས་སྟོན་ཁྱད་པར་ཅན་ཞིག་ཏུ་སྲུང་དགོས།

¹⁸ཟླ་བ་དང་པོའི་ཚེས་བཅུ་བཞི་དགོང་མོ་ནས་ཚེས་ཉི་ཤུ་རྩ་གཅིག་དགོང་མོའི་བར་ཆི་མན་མེད་པའི་བག་ལེབ་ཟ་དགོས།

¹⁹ཉིན་བདུན་བར་དུ་ཁྱོད་ཚོའི་ཁང་པའི་ནང་དུ་ཆི་མན་ཡོད་མི་རུང་། ཡུལ་དུ་སྐྱེས་པའམ་བྱེས་པ་སུ་ཞིག་གིས་ཀྱང་ཆི་མན་ཡོད་པའི་ཁ་ཟས་ཟ་ན་དེ་ནི་ཨིསི་རཱཨེལ་གྱི་མི་སྡེའི་ཁོངས་སུ་གཏོགས་མི་ཡོང་།

²⁰ཁྱོད་ཚོས་ཆི་མན་ཡོད་པའི་ཁ་ཟས་གང་ཡང་མ་ཟ་ཞིག ཁྱོད་ཚོ་ས་གནས་གང་དུ་བསྡད་ན་ཡང་ཆི་མན་མེད་པའི་བག་ལེབ་ཟ་དགོས་ཤེས་སྨྲོས་ཤིག་ཅེས་བཀའ་གནང་ངོ་༎

²¹མོ་ཤེས་ཨིསི་རཱཨེལ་གྱི་འགོ་འཁྲིད་རྣམས་བཀོང་ནས་དེ་དག་ལ་སྨྲས་པ། ད་ཁྱོད་ཚོ་སོང་ནས་རང་རང་སོ་སོའི་ཁྱིམ་ཚང་བཞིན་དུ་ལུག་གུ་རེ་གོ་སྒྲིག་བྱེད་ནས་ཐར་གྲོལ་གྱི་དུས་སྟོན་སྲུང་བའི་ཆེད་དེ་གསོད་ཅིག

²²ཧི་སོབ་ཞེས་པའི་རྩའི་ཆག་པ་ཞིག་སེམས་ཅན་གི་ཁྲག་ཡོད་པའི་སྣོད་ཀྱི་ནང་དུ་སྦང་ནས། ཁྲག་དེ་སྒོའི་རེ་བཞི་ཕན་ཚུན་གཉིས་དང་ཐོད་ལ་བསྐུས་ཤིང་ཁྱོད་ཚོའི་ནང་ནས་མི་སུའང་སང་ཞོགས་སྔ་པོ་བར་རང་གི་ཁང་པ་ནས་ཕྱི་རུ་མ་ཐོན་ཞིག

²³གང་ལ་ཟེར་ན། གཙོ་བོ་དཀོན་མཆོག་གིས་ཨི་ཇིབ་པ་རྣམས་ལ་འཆི་བའི་ཆད་པ་གཅོད་ཕྱིར་ཕེབས་སྐབས། སྒོའི་རེ་བཞི་ཕན་ཚུན་དང་ཐོད་ལ་བསྐུས་པའི་ཁྲག་དེ་གཟིགས་ནས་ཕར་གཤེགས་ཤིང་། འཆི་བའི་ཕོ་ཉ་དེ་ཁྱོད་ཚོའི་ཁང་པའི་ནང་དུ་འཛུལ་ནས་ཁྱོད་ཚོ་གསོད་བཅུག་མི་ཡོང་།

²⁴བཀའ་ཁྲིམས་དེ་ནི་ཁྱོད་དང་ཁྱོད་ཀྱི་བུ་བརྒྱུད་རྣམས་ཀྱི་དུས་གཏན་དུ་ངེས་པར་སྲུང་དགོས།

²⁵གཙོ་བོ་དཀོན་མཆོག་གིས་ཞལ་བཞེས་གནང་བའི་ཡུལ་དུ་སླེབས་པའི་རྗེས་སུ་ཁྱོད་ཚོས་དུས་སྟོན་དེ་སྲུང་དགོས།

²⁶རྗེས་སུ་ཁྱོད་ཚོའི་བུ་ཕྲུག་རྣམས་ཀྱི་དུས་སྟོན་འདིའི་དོན་གང་ཡིན་ནམ་ཞེས་འདྲི་ན།

²⁷ཁྱོད་ཚོས་ལན་དུ་འདི་ནི་གཙོ་བོ་དཀོན་མཆོག་ལ་མོས་གུས་ཞུས་ཕྱིར་བཤམས་པའི་ཐར་གྲོལ་གྱི་དུས་སྟོན་གྱི་དམར་མཆོད་ཞེས་པ་དེ་ཡིན། སྔར་ཁོང་གིས་ཨི་ཇིབ་དུ་ཨི་ཇིབ་པ་རྣམས་ལ་འཆི་བའི་ཆད་པ་གཅོད་གནང་སྐབས། ང་ཚོ་ཨིསི་རཱཨེལ་པ་རྣམས་ཀྱི་ཁང་པ་ནས་ཕར་གཤེགས་ཏེ། ང་ཚོ་ཚེ་ཐར་གནང་བའི་དུས་དྲན་ཞིག་ཡིན་ནོ་ཞེས་སྨྲོས་ཤིག་ཅེས་བཀའ་གནང་བ་དང་། ཨིསི་རཨེལ་པ་ཚོས་པུས་མོ་བཅུག་ནས་ཁོང་ལ་བསྙན་བཀུར་ཞུས་སོ།

²⁸གཙོ་བོ་དཀོན་མཆོག་གིས་མོ་ཤེ་དང་ཨ་རོན་ལ་བཀའ་གནང་བ་བཞིན་ཨིསི་རཱཨེལ་པ་རྣམས་ཀྱིས་བྱས་སོ༎

²⁹མཚན་ཕྱེད་ཙམ་ལ་གཙོ་བོ་དཀོན་མཆོག་གིས་ཨི་ཇིབ་ཀྱི་རྒྱལ་སྲས་ནས་བཟུང་སྟེ་བཙོན་པ་རྣམས་ཀྱིི་བུ་སྔོན་སྐྱེས་ཐམས་ཅད་དང་། དུད་འགྲོའི་ཕྲུ་གུ་སྔོན་སྐྱེས་ཐམས་ཅད་བསད་པ་གནང་བས།

³⁰མཚན་དེར་རྒྱལ་པོ་དང་དེའི་ལས་བྱེད་པ་རྣམས་དང། ཨི་ཇིབ་པ་ཐམས་ཅད་ལངས་ཤིང་། ཨི་ཇིབ་ཀུན་ཏུ་ངུ་འབོད་ཆེན་པོ་ཞིག་བྱུང་ངོ་། གང་ལ་ཟེར་ན། སྔོན་སྐྱེས་བུ་མ་ཤི་བའི་ཁང་པ་གཅིག་ཀྱང་མ་ལུས་པའི་ཕྱིར་ཡིན་ནོ།

³¹མཚན་དེ་རང་ལ་རྒྱལ་པོས་མོ་ཤེ་དང་ཨ་རོན་ལ་བོས་ནས་སྨྲས་པ། ཁྱོད་རང་དང་ཨིསི་རཱཨེལ་གྱི་མི་དམངས་ཚང་མ་ངའི་ཡུལ་ནས་ཐོན་ཏེ། ཁྱོད་ཚོས་ཟེར་བ་བཞིན་གཙོ་བོ་དཀོན་མཆོག་ལ་བསྙེན་བཀུར་བྱེད་ཕྱིར་སོང་ཞིག

³²ཁྱོས་ཚོས་འདོད་པ་བཞིན་རང་གི་ལུག་ཕྱུགས་སོགས་འཁྲིད་ནས་སོང་ལ། ངའི་དོན་དུའང་སྨོན་ལམ་ཐོབ་ཅིག

³³སྐབས་དེར་ཨི་ཇིབ་པ་ཚོས་ཨིསི་རཱཨེལ་པ་རྣམས་ལ། ཁྱོད་ཚོ་འདི་ནས་གང་མགྱོགས་མགྱོགས་འགྲོ་རོགས་བྱོས་ཤིག དེ་མིན་ང་ཚོ་ཚང་མ་ཤི་བའི་ཉེན་ཁ་འདུག་ཅེས་ནན་ཏན་བརྗོད་དོ།

³⁴དེ་ནས་ཨིསི་རཱཨེལ་པ་ཚོས་ཆི་མན་མེད་པའི་འབྲོ་ཞིབ་འཛིད་ནས་བག་གཞོང་ནང་བླུགས་ནས་གོས་ཀྱིས་བཏུམས་ཏེ་ཕྲག་པའི་སྒང་དུ་འཁྱེར་ནས་ཕྱིན་ནོ།

³⁵མོ་ཤེས་སྨྲས་པ་བཞིན་དུ་ཨིསི་རཱཨེལ་པ་རྣམས་ཀྱིས་བྱས་ཏེ། ཁོ་ཚོས་ཨི་ཇིབ་པ་རྣམས་ནས་དངུལ་དང་གསེར་གྱི་མཛེས་རྒྱན་དང་གོས་སོགས་བླངས་སོ།

³⁶གཙོ་བོ་དཀོན་མཆོག་གིས་ནུས་མཐུས་ཨི་ཇིབ་པ་ཚོས་ཨིསི་རཱཨེལ་པ་རྣམས་ལ་གུས་བཀུར་བྱས་ནས། ཁོ་ཚོས་དགོས་ཟེར་ཚད་ཚང་མ་སྟེར་ནས། ཁོ་ཚོས་ཨི་ཇིབ་པ་རྣམས་ཕལ་ཆེར་བཅོམ་པ་ལྟ་བུར་རྒྱུ་ནོར་ཕོན་ཆེན་པོ་འཁྱེར་ནས་ཕྱིན་ནོ༎

³⁷ཨིསི་རཱཨེལ་པ་རྣམས་རམ་སེསེ་ཞེས་པའི་གནས་ནས་ཐོན་ཏེ་སུག་ཀོད་ཞེས་པའི་གནས་སུ་འབྱོར་ཞིང་། དེ་ཚོའི་ཁ་གྲངས་ནི་ཕྲུ་གུ་དང་བུད་མེད་མ་རྩིས་པའི་སྐྱེས་པ་འབུམ་ཚོ་དྲུག་ཙམ་ཡོད་པ་ཡིན་ནོ།

³⁸དེ་ཚོ་དང་མཉམ་དུ་མི་ཚོགས་གཞན་ཞིག་དང་ར་ལུག་དང་བ་ཕྱུགས་བཅས་པ་ཚོགས་ཆེན་པོ་ཞིག་ཀྱང་ཕྱིན་ནོ།

³⁹ཁོ་ཚོས་ཨི་ཇིབ་ནས་འཁྱེར་ཡོང་བའི་བག་ཟན་དེ་ནས་ཆི་མན་མེད་པའི་བག་ལེབ་བཟོས་སོ། ཁོ་ཚོ་ཨི་ཇིབ་ནས་བློ་བུར་དུ་ཐོན་པ་ཡིན་པས། སྐབས་དེར་ཁོ་ཚོར་བག་ལེབ་བཟོ་ལོང་ཙམ་ཡང་མ་བྱུང་ངོ་།

⁴⁰ཨིསི་རཱཨེལ་པ་རྣམས་ཨི་ཇིབ་དུ་ལོ་ངོ་ ༤༣༠ བར་དུ་གནས་སོ།

⁴¹ལོ་ ༤༣༠ དེ་ཚང་བའི་ཉིན་དེ་རང་ལ་གཙོ་བོ་དཀོན་མཆོག་གི་མི་དམངས་ཀྱི་སྡེ་རིགས་ཡོངས་རྫོགས་ཨི་ཇིབ་ནས་ཐོན་ནོ།

⁴²དེ་ཚོ་ལ་ཨི་ཇིབ་ནས་འདོན་ཏེ་འཁྲིད་ཡོང་སྐབས། མཚན་དེར་གཙོ་བོ་དཀོན་མཆོག་གིས་སྲུང་བྱ་གནང་བ་དང་། ཨིསི་ར་ཨེལ་པ་ཚོ་ཡང་མཚན་དེར་མ་ཉལ་བར་བསྡད་ནས། མི་རབས་བར་དུ་གཙོ་བོ་དཀོན་མཆོག་ལ་གུས་བཀུར་ཞུས་དགོས་སོ༎

⁴³གཙོ་བོ་དཀོན་མཆོག་གིས་མོ་ཤེ་དང་ཨ་རོན་ལ་གསུངས་། ཐར་གྲོལ་གྱི་དུས་སྟོན་སྲུང་ཆོག་སྐོར་གྱི་ཁྲིམས་ནི་འདི་ལྟར་ཡིན། ཕྱི་རྒྱལ་བ་སུ་ཞིག་གིས་ཀྱང་ཐར་གྲོལ་གྱི་ཁ་ཟས་དེ་ལས་ཟ་མི་རུང་།

⁴⁴འོན་ཀྱང་ཁྱོད་ཚོས་ཉོས་པའི་བྲན་ཁོལ་ནང་ནས་མདུན་ལྤགས་ཅད་ཟིན་པ་ཚོས་དེ་ལས་ཟ་ནའང་ཆོག

⁴⁵འགྲུལ་པ་དང་གླ་པ་ཚོས་དེ་ལས་ཟ་མི་དགོས་སོ།

⁴⁶དེ་ནི་ཁང་པའི་ཕྱི་རུ་འཁྱེར་མི་ཆོག་ཅིང་ཁང་པ་དེ་གའི་ནང་དུ་ཟ་དགོས། དེའི་རུས་པ་གཅིག་ཀྱང་བཅག་མི་ཆོག

⁴⁷དུས་སྟོན་དེ་ནི་ཨིསི་རཱཨེལ་མི་སྡེ་ཡོངས་ཀྱི་ངེས་པར་སྲུང་དགོས།

⁴⁸མདུན་ལྤགས་མ་བཅད་པ་ཚོས་དེ་ལས་ཟ་མི་ཆོག གལ་ཏེ་ཁྱོད་དང་མཉམ་དུ་གནས་པའི་ཕྱི་རྒྱལ་བ་སུ་ཞིག་གིས་གཙོ་བོ་དཀོན་མཆོག་ལ་གུས་བཀུར་ཞུ་ཕྱིར་ཐར་གྲོལ་གྱི་དུས་སྟོན་དེ་སྲུང་འདོད་བྱེད་ན། ཁོའི་ནང་མི་སྐྱེས་པ་ཐམས་ཅད་ཀྱི་མདུན་ལྤགས་བཅད་པའི་རྗེས་སུ་དུས་སྟོན་དེ་སྲུང་ནའང་ཆོག དེ་རྗེས་མི་དེ་ནི་ཡུལ་དུ་སྐྱེས་པའི་ཨིསི་རཱཨེལ་པ་དང་མཚུངས་ཞིང་དུས་སྟོན་དེའི་ནང་བཞུག་ན་ཆོག་གོ

⁴⁹ཡུལ་དུ་སྐྱེས་པ་རྣམས་དང་ཁྱོད་ཚོའི་ཁྲོད་དུ་གནས་སྡོད་བྱ་མཁན་ཕྱི་རྒྱལ་བ་ཚོས་ཁྲིམས་དེ་རང་སྲུང་དགོས་ཞེས་བཀའ་གནང་ངོ།

⁵⁰གཙོ་བོ་དཀོན་མཆོག་གིས་མོ་ཤེ་དང་ཨ་རོན་ལ་བཀའ་གནང་བ་བཞིན་དུ་ཨིསི་རཱཨེལ་པ་ཡོངས་ཀྱིས་དེ་བཞིན་དུ་བྱས་སོ།

⁵¹ཉིན་དེ་རང་ལ་གཙོ་བོ་དཀོན་མཆོག་གིས་ཨིསི་རཱཨེལ་པའི་སྡེ་རིགས་རྣམས་ཨི་ཇིབ་ནས་ཕྱིར་འདོན་ཏེ་འཁྲིད་གནང་ངོ་༎