Read Tibetan — པོད་སྐད་Tibetan Old Testament 2011 སྡེབ་ཐོན 16 Bible Online

སྡེབ་ཐོན 16 - Tibetan — པོད་སྐད་Tibetan Old Testament 2011 bible

སྡེབ་ཐོན 16

¹ཨིསི་རཱཨེལ་གྱི་སྡེ་ཚོགས་ཚང་མ་ཨེ་ལིམ་ནས་ཐོན་པ་དང་། ཁོ་ཚོ་ཨི་ཇིབ་ནས་ཐོན་ཏེ་ཟླ་བ་གཉིས་པའི་ཉིན་ཞག་བཅོ་ལྔའི་ཐོག་དེ་ཚོ་ཨེ་ལིམ་དང་རི་བོ་སི་ནཨེ་བར་ལ་ཡོད་པའི་སིན་ཞེས་པའི་འབྲོག་སྟོང་དུ་སླེབས་སོ།

²དེར་འབྲོག་སྟོང་དུ་ཁོ་ཚོ་ཚང་མས་མོ་ཤེ་དང་ཨ་རོན་ལ་རྙོག་སྒྲ་བཤད་དེ།

³ང་ཚོ་ཨི་ཇིབ་དུ་ཡོད་སྐབས་ཤ་དང་ཁ་ཟས་སོགས་འདོད་པ་གང་ཡོད་ཟ་རྒྱུ་ཡོད་པས། དེ་དུས་ང་ཚོ་གཙོ་བོ་དཀོན་མཆོག་གི་ཕྱག་འོག་ཏུ་ཤི་ན་ཡང་སྒྲིག་པ་ཡོད། འོན་ཀྱང་ཁྱེད་གཉིས་ཀྱིས་ང་ཚོ་ལྟོགས་པར་བསད་པའི་ཕྱིར་འབྲོག་སྟོང་འདིར་འཁྲིད་ཡོང་བ་ཡིན་ཟེར་བརྗོད་པ་དང་།

⁴གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ལྟོས་ཤིག། ངས་ཁྱོད་ཚོའི་དོན་དུ་གནམ་ནས་ཁ་ཟས་ཤིག་འབེབས་པར་བྱེད་རྒྱུ་ཡིན། མི་དམངས་རྣམས་ཉིན་ལྟར་རེ་བཞིན་ཕྱི་རུ་ཕྱིན་ནས་ཁ་ཟས་དེ་ནས་ཉིན་དེ་རང་ལ་ལྡང་བ་མ་གཏོགས་སྒྲུག་མི་ཆོག དེ་འི་སྒོ་ནས་དེ་ཚོས་ངའི་བཀའ་བཀོད་པ་བཞིན་སྤྱོད་མིན་ངས་ཚོད་ལྟ་བྱེད་པའི་ཕྱིར་རོ།

⁵དེ་ཚོས་ཉིན་ཞག་དྲུག་པའི་ཐོག་དུས་རྒྱུན་གྱི་ཚད་ལས་ལྡབ་གཅིག་མང་བ་སྒྲུག་ནས་བཞག་དགོས་ཤེས་བཀའ་གནང་ངོ་།

⁶དེར་བརྟེན་མོ་ཤེ་དང་ཨ་རོན་གྱིས་ཨིསི་རཱཨེལ་པ་རྣམས་ལ་སྨྲས་པ། ཁྱོད་ཚོ་ཨི་ཇིབ་ནས་འཁྲིད་གནང་མཁན་དེ་ནི་གཙོ་བོ་དཀོན་མཆོག་རང་ཉིདཡིན་པ་དེ་ཁྱོད་ཚོས་དོ་དགོང་ཤེས་ཡོང་།

⁷སང་ཞོག་སྔ་དྲོ་ཁྱོད་ཚོས་གཙོ་བོ་དཀོན་མཆོག་གི་གཟི་བརྗིད་དེ་མཇལ་ཐུབ་ཡོང་། ཁྱོད་ཚོས་གཙོ་བོ་དཀོན་མཆོག་ལ་རྙོག་གཏམ་ཞུས་པ་དེ་ཁོང་གིས་གསན་ཡོད། ཁྱོད་ཚོས་ཁོང་གི་ཐོག་ཏུ་རྙོག་གྲ་བཤད་ཡོད། གང་ལ་ཟེར་ན། ང་ཚོ་ནི་ཁོང་གི་བཀའ་བཞིན་བྱ་མཁན་གཅིག་པོ་ཡིན།

⁸མོ་ཤེས་ཡང་སྐྱར་སྨྲས་པ། ཁྱོད་ཚོས་གཙོ་བོ་དཀོན་མཆོག་ལ་ངོ་ལོག་ཅིང་ཁོང་ལ་རྙོག་གྲ་ཞུས་པ་དེ་ནི་ཁོང་གིས་གསན་པའི་རྐྱེན་གྱི། ཁོང་གིས་ཁྱོད་ཚོ་ལ་དགོང་དྲོ་ཤ་དང་། ཞོགས་པར་བག་ལེབ་འདོད་པ་གང་ཡོད་གནང་བར་འགྱུར། ཁྱོད་ཚོས་རྙོག་གྲ་བཤད་པ་དེ་ནི་ང་ཚོར་མ་ཡིན་གྱི། གཙོ་བོ་དཀོན་མཆོག་ལ་བཤད་པ་ཡིན་ནོ།

⁹མོ་ཤེས་ཨ་རོན་ལ་སྨྲས་པ། ཨིས་རཱཨེལ་གྱི་སྡེ་ཚོགས་ཚང་མར་གཙོ་བོ་དཀོན་མཆོག་གི་དྲུང་དུ་ལངས་ཞིག གང་ལ་ཟེར་ན། ཁྱོད་ཚོས་རྙོག་གྲ་་ཞུས་པ་དེ་ཁོང་གིས་གསན་ཡོད་ཅེས་སྨྲོས་ཤིག

¹⁰ཨ་རོན་གྱིས་ཨིས་རཱཨེལ་གྱི་སྡེ་ཚོགས་རྣམས་དང་སྐད་ཆ་ཤོད་བཞིན་པའི་སྐབས་སུ། དེ་ཚོས་འབྲོག་སྟོང་གི་ཕྱོགས་སུ་བལྟས་པས། བློ་བུར་དུ་སྤྲིན་པའི་དཀྱིལ་དུ་གཙོ་བོ་དཀོན་མཆོག་གི་གཟི་བརྗིད་དེ་མངོན་ནོ།

¹¹གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

¹²ཨིསི་རཱཨེལ་པ་ཚོས་བཤད་པས་རྙོག་གྲ་དེ་ངས་ཐོས་བྱུང་བས། དེ་ཚོར་སྨྲོས་ཤིག། དེ་ཚོ་བཟའ་བའི་ཕྱིར་དགོང་དྲོ་ཤ་དང་། ཞོག་པར་བག་ལེབ་ཀྱི་འགྲངས་བར་འགྱུར་ཡོང་། དེ་ལྟར་བྱུང་བའི་སྒོ་ནས་ང་གཙོ་བོ་དཀོན་མཆོག་དེ་ཚོའི་དཀོན་མཆོག་ཡིན་པ་དེ་ཚོས་ཤེས་ཐུབ་ཡོང་།

¹³དེ་ནས་དགོང་དྲོའི་དུས་སུ་བྱ་སྲེག་པ་རྣམས་བབས་ནས་སྒར་བཀབ་ཅིང་། ཞོགས་པར་སྒར་གྱི་ཕྱོགས་བཞི་རུ་ཟིལ་པས་ཡོངས་སུ་ཁྱབ་ནས་ཡོད་དོ།

¹⁴ཟིལ་པ་དེ་སྐམ་པའི་རྗེས་སུ་རིལ་བུ་ཆུང་ཆུང་བ་མོ་ཆགས་པ་བཞིན་དུ་འབྲོག་སྟོང་གི་ངོས་ཚང་མ་བཀབ་བོ།

¹⁵ཨིསི་རཱཨེལ་པ་ཚོས་དེ་མཐོང་ནས་དེ་གང་ཡིན་ནམ་ཞེས་ཕན་ཚུན་འདྲི་བ་བྱས་སོ། གང་ལ་ཟེར་ན། ཁོ་ཚོས་དེ་གང་ཡིན་པ་མ་ཤེས་པའི་ཕྱིར་རོ། མོ་ཤེས་ལན་དུ། འདི་ནི་གཙོ་བོ་དཀོན་མཆོག་གིས་ཁ་ཟས་སུ་གནང་བ་ཡིན་ནོ།

¹⁶གཙོ་བོ་དཀོན་མཆོག་གིས་བཀའ་གནང་བ་བཞིན། མི་རེ་རེས་རང་གི་ཟ་ཐུབ་ཚོད་ཙམ་བསྡུས་དགོས། ཁྱིམ་ཚང་གི་ནང་མི་རེ་རེ་ལི་ཊར་གཉིས་རེ་རེེ་བསྡུ་དགོས་ཤེས་སྨྲས་པ་དང་།

¹⁷ཨིསི་རཱཨེལ་པ་རྣམས་ཀྱི་ནང་ནས་ཁ་ཤས་ཀྱི་མང་ཙམ་བསྡུས་པ་དང་། ཡང་ཁ་ཤས་ཀྱི་ཉུང་ཙམ་བསྡུས་སོ།

¹⁸རྗེས་སུ་དེ་ཚོས་མང་ཉུང་འདེགས་པའི་སྐབས་སུ། མང་བ་བསྡུ་མཁན་རྣམས་ལ་ཐོལ་པ་དང་། ཉུང་བ་བསྡུ་མཁན་རྣམས་ལ་ཆད་པ་སོགས་གང་ཡང་མ་བྱུང་ངོ་། ཚང་མས་རང་གི་ཟ་ཐུབ་ཚོད་ཙམ་བསྡུས་སོ།

¹⁹དེ་ནས་མོ་ཤེས་དེ་ཚོ་ལ། ཁྱོད་ཚོ་སུས་ཀྱང་ཁ་ཟས་ཀྱི་ལྷག་མ་སང་ཉིན་གྱི་ཆེད་དུ་བཞག་མི་ཆོག་ཅེས་སྨྲས་ཀྱང།

²⁰ཁ་ཤས་ཀྱི་མོ་ཤེའི་ཁ་ལ་མ་ཉན་པར་ཁ་ཟས་དེ་ལས་སང་ཞོག་བར་དུ་ལྷག་མ་བཞག་པས། དེར་འབུ་འཁོར་ནས་དྲི་མ་ངན་པ་རྒྱབ་པ་དང་། མོ་ཤེ་དེ་ཚོ་དང་མཉམ་དུ་ཁྲོས་སོ།

²¹དེ་ཚོས་ཞོགས་ལྟར་རེ་བཞིན་ཁ་ཟས་དེ་ལས་རང་གི་ཟ་ཐུབ་ཚོད་བསྡུས་པའི་ལྷག་ལུས་རྣམས་ཉི་མ་ཚ་པོ་བྱུང་བ་དང་ཚང་མ་བཞུར་ཕྱིན་ནོ།

²²བདུན་ཕྲག་གི་ཉིན་དྲུག་པར་དེ་ཚོས་མི་རེར་ལི་ཊར་བཞི་རེའམ་དུས་རྒྱུན་སྒྲུག་པའི་ཁ་ཟས་ཀྱི་ཚད་ལས་ལྡབ་གཅིག་ལྷག་བསྡུས་སོ། སྡེ་ཚོགས་ཀྱི་འགོ་པ་རྣམས་ཡོང་ནས་དེའི་སྐོར་མོ་ཤེ་ལ་སྨྲས་པ་དང་།

²³མོ་ཤེས་ལན་དུ། གཙོ་བོ་དཀོན་མཆོག་གི་བཀའ་བཞིན་དུ་སང་ཉིན་ནི་ངལ་གསོ་བའི་ཉིན་ཞག་དམ་པ་ཡིན་པས། ཁྱོད་ཚོས་སྲེག་བཙོས་དང་ཐབ་ལས་སོགས་གང་བྱེད་དགོས་པ་ཚང་མ་དེ་རིང་རང་བྱས་ཏེ། ལྷག་མ་གང་ལུས་པ་རྣམས་སང་ཉིན་གྱི་ཆེད་དུ་བཞག་ཆོག་ཅེས་སྨྲས་སོ།

²⁴མོ་ཤེས་སྨྲས་པ་བཞིན་དུ་དེ་ཚོས་ལྷག་ལུས་རྣམས་སང་ཉིན་གྱི་ཆེད་དུ་བཞག་པས། དེར་འབུ་འཁོར་དང་དྲི་མ་ཡང་མ་རྒྱབ་བོ།

²⁵དེ་ནས་མོ་ཤེས་སྨྲས་པ། དེ་ནི་དེ་རིང་རང་ཟ་དགོས། གང་ལ་ཟེར་ན། དེ་རིང་གཙོ་བོ་དཀོན་མཆོག་སྐུ་ངལ་གསོ་བའི་ཞག་དེ་ཡིན་པས། ཁྱོད་ཚོས་ཁ་ཟས་གཅིག་ཀྱང་ཐང་ཁར་ཐོབ་མི་ཡོང་།

²⁶ཁྱོད་ཚོས་ཉིན་ཞག་དྲུག་བར་དུ་ཁ་ཟས་དེ་སྒྲུག་དགོས། ཉིན་ཞག་བདུན་པ་དེ་ནི་ངལ་གསོ་བའི་ཉི་མ་ཡིན་པས། དེ་ཉིན་གང་ཡང་ཐོབ་མི་ཡོང་ཞེས་སྨྲས་ཀྱང་།

²⁷ཉིན་ཞག་བདུན་པར་མི་ཚོགས་ནང་ནས་འགའ་ཤས་ཀྱིས་ཁ་ཟས་སྒྲུག་པར་ཕྱི་རུ་སོང་ཡང་གང་ཡང་མ་ཐོབ་བོ།

²⁸དེ་ནས་གཙོ་བོ་དཀོན་མཆོག་གིས་མོ་ཤེས་ལ། ཁྱོད་ཚོས་ག་དུས་བར་དུ་ངའི་བཀའ་ཁྲིམས་མ་སྲུང་བར་སྡོད་ཀྱི་ཡིན་ནམ།

²⁹དྲན་ཞིག། གཙོ་བོ་དཀོན་མཆོག་ངས་ཁྱོད་ཚོ་ལ་ངལ་གསོ་བའི་ཉིན་མོ་ཞིག་སྟེར་ཡོད། ཉིན་ཞག་དྲུག་པ་ལ་ངས་ཁྱོད་ཚོར་ཉིན་གཉིས་བར་དུ་ལྡང་བའི་ཁ་ཟས་སྟེར་གྱི་ཡོད་པས། ཉིན་ཞག་བདུན་པ་ལ་ཁྱོད་ཚོ་རང་རང་སོ་སོའི་གནས་སུ་བསྡད་པ་ལས་དེ་ཉིན་སུའང་རང་གི་ཁང་པ་ནས་ཕྱི་ལ་འགྲོ་ཆོག་མི་ཡོང་ཞེས་བཀའ་གནང་བ་དང་།

³⁰དེར་བརྟེན་ཉིན་ཞག་བདུན་པར་མི་ཚོགས་ཚང་མས་ལས་མཚམས་བཞག་ནས་ངལ་གསོ་རྒྱབ་བོ།

³¹ཨིསི་རཱཨེལ་མི་དམངས་ཚོས་ཁ་ཟས་དེ་ལ་མན་ན་[1]ཞེས་བཏགས་སོ། དེ་ནི་འབྲུ་དང་འདྲབ་ཆུང་ཞིང་། ཁ་མདོག་དཀར་ལ་བྲོ་བ་ཡང་སྦྲང་རྩི་དང་མཉམ་དུ་བཟོས་པའི་བག་ལེབ་སྲབ་པོ་ཞིག་ཡོད་པ་ཡིན་ནོ།

³²དེ་ནས་མོ་ཤེས་སྨྲས་པ། གཙོ་བོ་དཀོན་མཆོག་གིས་ང་ཚོའི་རྗེས་སུ་ཡོང་བའི་རིགས་བརྒྱུད་རྣམས་ཀྱི་ཆེད་དུ་མན་ན་དེ་ལས་ལི་ཊར་གང་ཙམ་ཞིག་བདག་ཉར་བྱེད་དེ་བཞག་དགོས་ཅེས་བཀའ་གནང་ཡོད་པ་ཡིན། དེ་གང་ཡིན་ཟེར་ན། གཙོ་བོ་དཀོན་མཆོག་གིས་ངེད་རྣམས་ཨི་ཇིབ་ནས་འཁྲིད་གནང་སྐབས་འབྲོག་སྟོང་དུ་ངེད་རྣམས་ལ་གནང་བའི་ཁ་ཟས་དེ་ཁོ་ཚོས་མཐོང་ཐུབ་པའི་ཕྱིར་ཡིན་ནོ།

³³མོ་ཤེས་ཨ་རོན་ལ། སྣོད་གཅིག་གི་ནང་དུ་མན་ན་ལི་ཊར་གཉིས་བླུགས་ནས་ང་ཚོའི་རྗེས་མའི་རིགས་བརྒྱུད་ཀྱི་ཆེད་དུ་གཙོ་བོ་དཀོན་མཆོག་གི་མདུན་དུ་ཞོག་ཅིག་ཅེས་སྨྲས་པ་དང་།

³⁴གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་བ་བཞིན་ཨ་རོན་གྱིས་སྣོད་དེ་དམ་བཅའི་སྒྲོམ་གྱི་མདུན་དུ་སྲུང་ཆ་དང་བཅས་བཞག་གོ

³⁵ཨིསི་རཱཨེལ་པ་རྣམས་ཀ་ནན་ཡུལ་དུ་འབྱོར་ནས་གཞིས་མ་ཆགས་བར་དུ་ལོ་བཞི་བཅུ་རིང་དེ་ཚོས་མན་ན་ལས་ཟས་སོ།

³⁶དེང་དུས་བེད་སྤྱོད་བྱེད་པའིི་འཇལ་ཚད་ནི་ལི་ཊར་ཉི་ཤུ་ཙམ་ཡིན་ནོ༎