Read Tibetan — པོད་སྐད་Tibetan Old Testament 2011 སྡེབ་ཐོན 22 Bible Online

སྡེབ་ཐོན 22 - Tibetan — པོད་སྐད་Tibetan Old Testament 2011 bible

སྡེབ་ཐོན 22

¹སུ་ཞིག་གིས་གཞན་གྱི་གླང་ངམ་ལུག་རྐུས་ནས་དེ་བསད་པའམ་འཚོང་བ་ཡིན་ན། གླང་གཅིག་གི་ཚབ་ལ་གླང་ལྔ་འཇལ་དགོས། ལུག་གཅིག་གི་ཚབ་ལ་ལུག་བཞི་འཇལ་དགོས།

²རྐུ་མ་རྐུ་བཞིན་པའི་སྐབས་སུ་ལག་པར་འཐེབས་ཏེ་ཉེས་བརྡུང་གི་ཁོ་ཤི་བ་ཡིན་ནའང་དེའི་སྲོག་གི་ཉེས་ལན་བརྡུང་མཁན་དེ་ལ་འཕོག་པར་མི་འགྱུར།

³འོན་ཀྱང་ཉི་མ་ཤར་ཚར་བའི་རྗེས་སུ་དེ་ལྟར་བྱུང་བ་ཡིན་ན་ཁོ་ལ་སྲོག་གཅོག་ཀྱི་ཉེས་པ་འཕོག་པར་འགྱུར། རྐུན་མ་དེས་གུན་གསབ་འཇལ་དགོས། འོན་ཀྱང་ཁོ་ལ་གང་ཡང་མེད་པ་ཡིན་ན། རྐུས་པའི་ཚབ་ཏུ་ཁོ་རང་ལ་འཚོང་དགོས།

⁴གལ་ཏེ་བརྐུས་པའི་གླང་ངམ་བོང་བུའམ་ལུག་བཅས་གསོན་པོར་ཁོའི་ལག་པར་འཐེབས་པ་ཡིན་ན། སེམས་ཅན་གཅིག་གི་འཚབ་ལ་ཉེས་ལྡབ་འཇལ་དགོས།

⁵མི་ཞིག་གིས་སེམས་ཅན་རྣམས་རྩ་ཁར་བཏང་ནས་དེ་དག་གཞན་གྱི་ཞིང་ཁར་ཤོར་ཏེ་རྒུན་ཚལ་ལ་སོགས་པའི་སྟོན་ཐོག་རྣམས་ཟས་བ་ཡིན་ན། ཁོས་རང་གི་ཞིང་དང་རྒུན་ཚལ་གྱི་སྟོན་ཐོག་ཡག་ཤོས་དེ་སྐྱིན་འཚབ་ཏུ་འཇལ་དགོས།

⁶མི་ཞིག་གིས་རང་གི་ཞིང་ཁར་མེ་བཏང་བས། མེ་དེ་རིམ་བཞིན་འཕེལ་བས། མི་གཞན་གྱི་ཞིང་ཁའི་སྟོན་ཐོག་བརྔས་ཟིན་པའམ་རྔ་རྒྱུ་ཡིན་པ་རྣམས་མེས་འཚིག་ནས་འཇིགས་པ་ཡིན་ན། མེ་གཏོང་མཁན་དེས་སྐྱིན་འཚབ་ངེས་པར་འཇལ་དགོས།

⁷མི་ཞིག་གིས་རང་གི་ཁྱིམ་མཚེས་ལ་དངུལ་ལམ་ནོར་རྫས་ཤིག་བཅོལ་ནས་དེ་རྐུ་མར་ཤོར་ཤིང་། རྐུན་མ་དེ་ལག་པར་འཐེབས་པ་ཡིན་ན། དེས་བརྐུས་པའི་ནོར་རྫས་ཀྱི་ཉིས་ལྡབ་འཇལ་དགོས།

⁸གལ་ཏེ་རྐུན་མ་ལག་པར་མ་འཐེབ་ན། ནོར་རྫས་བཅོལ་བའི་མི་དེ་མཆོད་ཁང་དུ་ཕྱིན་ནས། ཁོས་མི་གཞན་གྱི་རྒྱུ་དངོས་རྐུས་མེད་ཅེས་མནའ་སྐྱེལ་དགོས་སོ།

⁹གླང་ངམ་བོང་བུའམ་ལུག་གམ་གོས་སོགས་གང་རུང་རླག་སྟོར་ཤོར་བའི་སྐོར་ལ་རྩོད་གླེང་བྱུང་ན། རྩོད་མི་གཉིས་ཀ་མཆོད་ཁང་དུ་འཁྲིད་དགོས། དཀོན་མཆོག་གིས་མི་སུ་ལ་ནག་ཉེས་ར་འཕྲོད་བྱུང་བ་དེས་གཞན་དེ་ལ་ཉིས་ལྡབ་འཇལ་དགོས།

¹⁰མི་ཞིག་གིས་རང་གི་ཁྱིམ་མཚེས་ལ་བོང་བུའམ་གླང་ངམ་ལུག་གམ་གཞན་ཡང་དུད་འགྲོ་གང་རུང་ཞིག་བཅོལ་ནས། སུས་ཀྱང་མ་མཐོང་བར་དེ་དག་ཤི་བའམ་རྨས་སྐྱོན་ཤོར་བའམ་ཡང་ན་མི་གཞན་གྱིས་དེ་དག་དེད་ནས་འགྲོ་བ་དང་། དཔང་པོ་མེད་པ་ཡིན་ན།

¹¹དུད་འགྲོ་བཅོལ་སའི་མི་དེ་མཆོད་ཁང་དུ་ཕྱིན་ནས་ཁོས་རང་གི་ཁྱིམ་མཚེས་ཀྱི་དུད་འགྲོ་རྣམས་རྐུས་མེད་ཅེས་དཀོན་མཆོག་གི་སྤྱན་སྔར་རང་ཉིད་ནག་མེད་ཡིན་པའི་མནའ་སྐྱེལ་དགོས། བདག་པོས་དེ་ལ་ཡིད་ཆེས་དགོས་པ་དང་། ཁོས་སྐྱིན་འཚབ་འཇལ་མི་དགོས་སོ།

¹²འོན་ཀྱང་དུད་འགྲོ་བཅོལ་སའི་ལག་ནས་དེ་དག་རྐུན་མར་ཤོར་བ་ཡིན་ན། ཁོས་བདག་པོ་ལ་སྐྱིན་འཚབ་འཇལ་དགོས།

¹³དུད་འགྲོ་དེ་དག་གཅན་གཟན་གྱི་བསད་པ་ཡིན་ན། དེ་བདེན་པ་ཡིན་མིན་ཁུངས་སྐྱེལ་བྱེད་པའི་ཕྱིར་དུ་དུས་འགྲོའི་རོ་དེ་འཁྱེར་ཡོང་དགོས། གཅན་གཟན་གྱིས་བསད་པའི་དུད་འགྲོའི་སྐྱིན་འཚབ་འཇལ་མི་དགོས།

¹⁴མི་ཞིག་གིས་རང་གི་ཁྱིམ་མཚེས་ནས་དུད་འགྲོ་ཞིག་གཡར་ཏེ། བདག་པོ་དེ་མེད་པའི་སྐབས་སུ་དུད་འགྲོ་དེ་རྨས་པའམ་ཤི་སྐྱོན་སོགས་བྱུང་བ་ཡིན་ན། ཁོས་སྐྱིན་འཚབ་ངེས་པར་འཇལ་དགོས།

¹⁵བདག་པོ་མཉམ་དུ་ཡོད་སྐབས་དེ་བཞིན་བྱུང་བ་ཡིན་ན། དེར་སྐྱིན་འཚབ་འཇལ་མི་དགོས། འོན་ཀྱང་དུད་འགྲོ་དེ་གླ་ཆར་ལེན་པ་ཞིག་ཡིན་ན། གླ་ཆ་དེ་ཀས་གུན་འཚབ་མཐུད་པ་ཡིན་ནོ༎

¹⁶མི་ཞིག་གིས་ཆང་སའི་ཆེད་དུ་ལོང་ཆང་མ་བྱེད་པའི་བུ་མོ་ན་ཆུང་མ་ཞིག་ཁ་བསླུས་རྒྱབ་ནས་དེ་དང་མཉམ་དུ་ལུས་འབྲེལ་བྱས་པ་ཡིན་ན། ཁོས་མནའ་མའི་རིན་གོང་འཇལ་ནས་བུ་མོ་དེ་དང་ངེས་པར་ཆང་ས་བརྒྱབ་དགོས།

¹⁷གལ་ཏེ་བུ་མོའི་ཕས་རང་གི་བུ་མོ་མི་དེ་ལ་ཆང་ས་བརྒྱབ་པར་སྤྲད་འདོད་མ་བྱེད་ན། བུ་མོ་ན་ཆུང་མའི་ཆེད་དུ་འཇལ་དགོས་པའི་མནའ་མའི་རིན་གོང་འཇལ་དགོས་སོ།

¹⁸ངན་སྔགས་སྒྲུབ་མཁན་བུད་མེད་སུ་ཡིན་རུང་དེ་ངེས་པར་གསོད་དགོས།

¹⁹མི་སུ་ཞིག་གིས་དུད་འགྲོ་དང་ཆགས་པ་སྤྱོད་ན་མི་དེ་ངེས་པར་གསོད་དགོས།

²⁰གཙོ་བོ་དཀོན་མཆོག་ང་གཅིག་པུ་མ་གཏོགས་པར་ལྷ་གཞན་ལ་དམར་མཆོད་འབུལ་མཁན་དེ་རྩ་མེད་གཏོང་དགོས།

²¹དུས་སྐབས་ཤིག་ལ་ཁྱོད་ཚོ་ནི་ཨི་ཇིབ་དུ་བྱེས་པ་ཞིག་ཡིན་པ་དྲན་ནས། ད་ལྟ་བྱེས་པ་སུ་ཞིག་ལའང་ཁྱོད་ཚོས་སྡུག་པོ་བཏང་བ་དང་མནར་གཅོད་མ་བྱེད་ཅིག

²²བུད་མེད་ཡུག་མོ་དང་དྭ་ཕྲུག་རྣམས་ལ་མནར་གཅོད་མ་བྱེད་ཅིག

²³གལ་ཏེ་ཁྱོད་ཚོས་མནར་གཅོད་བྱེད་ན། གཙོ་བོ་དཀོན་མཆོག་ངའི་དེ་ཚོས་ངུ་འབོད་བྱས་པར་ཉན་ནས་སྐྱབས་གྲོགས་བྱས་རྒྱུ་ཡིན།

²⁴ངའི་ཁྲོ་བ་ཆེན་པོས་ཁྱོད་ཚོ་ལ་དམག་སར་འཚར་བཅོད་རྒྱུ་ཡིན་པ་དང་། ཁྱོད་ཚོའི་ཆུང་མ་རྣམས་ཡུག་མོར་འགྱུར་བ་དང་། ཕྲུ་གུ་རྣམས་ཕ་མེད་པར་འགྱུར་ཡོང་།

²⁵ངའི་མི་མང་ནང་ནས་མི་དབུལ་པོ་ཞིག་གིས་ཁྱོད་ནས་དངུལ་སྐྱིན་པ་གཡར་བ་ཡིན་ན། ཁྱོད་རང་བུན་བདག་བཞིན་སྐྱེད་ཁ་མ་ལེན་ཞིག

²⁶ཁྱོད་ཀྱིས་ཁྱིམ་མཚེས་པའི་གོས་ཤིག་གཏའ་མར་བཞག་ཡོད་པ་ཡིན་ན། ཉི་མ་མ་ཞུར་གོང་དུ་དེ་ཁོ་ལ་ཕྱིར་ལོག་བྱེད་དགོས།

²⁷གང་ལ་ཟེར་ན། ཁོ་ལ་གྱོན་གོས་དེ་མ་གཏོགས་གཞན་མེད་པས། མཚན་མོ་ག་རེ་གྱོན་ནས་གཉིད་ལོག་ཡོང་ངམ། མི་དེས་ང་ལ་ཞུ་བ་འཐེན་པ་ཡིན་ན། ང་ནི་སྙིང་རྗེ་ཆེ་བས། དེའི་ཞུ་བར་ངེས་པར་ཉན་རྒྱུ་ཡིན་ནོ།

²⁸དཀོན་མཆོག་ལ་བསྐུར་བ་མ་འདེབས་ཤིག དེ་བཞིན་ཁྱོད་ཀྱི་མི་སྡེའི་འགོ་དཔོན་ཞིག་ལ་སྨོན་ལོག་མ་འདེབས་ཤིག

²⁹ཁྱོད་ཚོས་རང་གི་སྟོན་ཐོག་དང་རྒུན་ཆང་དང་། སྐྱུ་རུའི་སྣུམ་སོགས་ཀྱི་མཆོད་པ་འབུལ་བར་མ་འགྱངས་བར་བྱོས་ཤིག ཁྱོད་ཚོའི་བུ་སྔོན་སྐྱེས་དག་ང་ལ་འབུལ་བར་སྤྲོད་ཅིག

³⁰དེ་བཞིན་ཁྱོད་ཚོའི་གླང་ཕྲུག་པེ་པེ་དང་ར་ལུག་དང་སེམས་ཅན་རྣམས་ཀྱི་ཕོ་སྔོན་སྐྱེས་ཚང་མ་སྐྱེས་ནས་ཉིན་བདུན་བར་དུ་རང་གི་ཨ་མ་དང་མཉམ་དུ་བཞག་ནས་ཉིན་བརྒྱད་པའི་ཐོག་ངའི་རྩར་མཆོད་འབུལ་དུ་འཁྱེར་ཡོང་དགོས།

³¹ཁྱོད་ཚོ་ངའི་མི་དམངས་དམ་པ་ཡིན་པས། གཅན་གཟན་གྱིས་བསད་པའི་སེམས་ཅན་གྱི་ཤ་དེ་ཁྱོད་ཚོས་ཟ་མི་ཆོག དེ་ནི་ཁྱོད་ཚོས་ཁྱི་ལ་སྟེར་དགོས་སོ༎