Read Tibetan — པོད་སྐད་Tibetan Old Testament 2011 སྡེབ་ཐོན 26 Bible Online

སྡེབ་ཐོན 26 - Tibetan — པོད་སྐད་Tibetan Old Testament 2011 bible

སྡེབ་ཐོན 26

¹ཁྱོད་ཀྱིས་ང་གནས་པའི་དབུ་གུར་དམ་པའི་དབུགུར་གྱི་ནང་ལོགས་སུ་ཀ་ཤི་ཀའི་རས་དུམ་བུ་བཅུ་ལས་བལ་གྱི་སྐུད་པ་སྔོན་པོ་དང་། མུ་མན་དང་དམར་པོ་བཅས་ཀྱི་འཐག་པའི་ཡོལ་བ་བཅུ་ བཟོས་དགོས། ཡོལ་བ་དེར་ཀེ་རུབ་ཀྱི་དབྱིབས་ཀྱི་འཚེམ་འདྲུག་རྒྱབ་དགོས།

²ཡོལ་བ་ཆེ་ཆུང་གི་ཚད་ནི་ཚང་མ་གཅིག་པ་བྱེད་དགོས། ཡོལ་བ་དེར་རིང་ཚད་མི་ཊར་བཅུ་གཉིས་དང་། ཞེང་ཚད་མི་ཊར་གཉིས་རེ་བྱེད་དགོས།

³ཡོལ་བ་ལྔ་ཕྱོགས་གཅིག་ཏུ་མཐུད་ནས་འཚེམ་དགོས་ཤིང་། འཕྲོས་ལྔ་པོ་དེ་ཡང་དེ་བཞིན་ཕྱོགས་གཅིག་ཏུ་འཚེམ་དགོས།

⁴ཡོལ་བ་ལྔ་རེ་ཕྱོགས་གཅིག་ཏུ་འཚེམ་པའི་རས་ཡོལ་ཆེན་པོ་རེ་རེའི་ཕྱི་ལོག་གི་སྣེ་མོར་རས་སྔོན་པོའི་སྒྲོག་བུ་དག་བཟོ་དགོས།

⁵དུམ་བུ་དང་པོ་དེ་ལ་ཁྱོད་ཀྱི་སྒྲོག་བུ་ལྔ་བཅུ་འཚེམ་དགོས་པ་དང་། དེ་བཞིན་དུམ་བུ་གཉིས་པའི་མཐའ་མ་དེ་ལ་འང་སྒྲོག་བུ་ལྔ་བཅུ་འཚེམ་དགོས་ཏེ། དུམ་བུ་རྣམས་ཕན་ཚུན་ཁ་ཐུག་འཁེལ་དགོས་པ་བྱེད་དགོས།

⁶དུམ་བུ་ཆེན་པོ་གཉིས་ཕྱོགས་གཅིག་ཏུ་འབྲེལ་བའི་ཕྱིར་གསེར་གྱི་ལྕགས་ཀྱུ་ལྔ་བཅུ་བཟོ་དགོས།

⁷ར་སྤུས་བཟོས་པའི་གོས་དུམ་བུ་བཅུ་གཅིག་གིས་དབུ་གུར་དམ་པ་ཁེབས་གཅིག་བཟོ་དགོས།

⁸དེ་རྣམས་ཀྱི་རིང་ཐུང་མི་ཊར་བཅུ་གསུམ་དང་ཞེང་ཁ་མི་ཊར་གཉིས་བཅས་ཆེ་ཆུང་གཅིག་པ་བཟོ་དགོས།

⁹དེ་རྣམས་དུམ་བུ་ལྔ་ཕྱོགས་གཅིག་ཏུ་འཚེམ་དགོས་པ་དང་། དུམ་བུ་དྲུག་ཕྱོགས་གཞན་དུ་འཚེམ་དགོས། དུམ་བུ་དྲུག་པ་དེ་ཉིས་ལྡབ་བྱས་ནས་གུར་གྱི་མདུན་དུ་ལྟབ་རྩིག་རྒྱབ་དགོས།

¹⁰སྒྲོག་བུ་ལྔ་བཅུ་དེ་དུམ་བུ་མཐའ་མའི་མཐའ་རུ་སྒྲོག་དགོས། དུམ་བུ་གཞན་དེ་མཐའ་རུ་སྒྲོག་བུ་ལྔ་བཅུ་བསྒྲོག་དགོས།

¹¹ལིའི་ལྕགས་ཀྱུ་ལྔ་བཅུ་བཟོ་དགོས་པ་དང་། དེ་རྣམས་སྒྲོག་བུའི་ནང་བླུགས་ནས། དུམ་བུ་ཆེན་པོ་གཉིས་གཅིག་ཏུ་འབྲེལ་བ་དང་གུར་ཁེབས་གཅིག་ཡོང་བ་བཟོ་དགོས།

¹²གུར་གྱི་རྒྱབ་ཕྱོགས་སུ་ལྷག་འཕྲོ་དུམ་བུ་ཕྱེད་ཀ་བརྐྱངས་དགོས།

¹³གུར་དེ་ཕྱོགས་གཉིས་ནས་འགེབས་པའི་ཕྱིར་དུ་དུམ་བུ་འཕར་མ་རིང་ཚད་སན་ཊི་མི་ཊར་ལྔ་བཅུ་བྱེད་པ་དེ་ཕྱོགས་གཉིས་ནས་མར་སྣར་དགོས།

¹⁴ལུག་ཐུག་གི་པགས་པ་ཚོས་དམར་པོ་རྒྱབ་པ་དང་། གཞན་ཀོ་བ་སྤུས་ལེགས་ཀྱི་ཁེབས་གཉིས་བཟོ་དགོས་པ་དང་། དེ་གཉིས་ཕྱིའི་ཁེབས་ཀྱི་ཆེད་དུ་བེད་སྤྱོད་བྱེད་དགོས།

¹⁵ཤིང་ཏིམ་ཤིང་གི་ཕྱི་སྒྲོམ་དེ་འདྲོང་པོ་བཟོ་དགོས།

¹⁶སྒྲོམ་རེ་རེའི་རིང་ཐུང་མི་ཊར་བཞི་དང་ཞེང་ཁ་སན་ཊི་མི་ཊར་དྲུག་ཅུ་རེ་དྲུག་དང་།

¹⁷དེ་གཉིས་གཅིག་ཏུ་འབྲེལ་བའི་ཕྱིར་ཁོག་གཟེར་འདྲ་མཚུངས་གཉིས་བཟོས་ཤིང་། སྒྲོམ་ཚང་མར་ཁོག་གཟེར་དེ་ལྟར་དགོས།

¹⁸ལྷོ་ཕྱོགས་ལ་སྒྲོམ་ཉི་ཤུ་བཟོ་དགོས་དང་།

¹⁹འོག་ཏུ་དངུལ་གྱི་ཞབས་གདན་བཞི་བཅུ་འགྲོ་བ་དགོས་པ་དང་། ཁོག་གཟེར་གཉིས་བཟུང་བའི་ཕྱིར་སྒྲོམ་རེར་ཞབས་གདན་གཉིས་རེ་དགོས།

²⁰གུར་གྱི་བྱང་ཕྱོགས་སུ་ཕྱི་སྒྲོམ་ཉི་ཤུ་བཟོ་དགོས་པ་དང་།

²¹དངུལ་གྱི་ཞབས་གདན་བཞི་བཅུ་བཟོ་དགོས་པ་དང་། ཕྱི་སྒྲོམ་རེ་རའི་འོག་ཏུ་གཉིས་རེ་དགོས་སོ།

²²ནུབ་ཕྱོགས་སུ་གུར་གྱི་རྒྱབ་ངོས་སུ་ཕྱི་སྒྲོམ་དྲུག་བཟོ་དགོས་པ་དང་།

²³ཟུར་གྱི་ཆེད་དུ་སྒྲོམ་གཉིས་དགོས་པ་དང་།

²⁴ཟུར་གྱི་སྒྲོམ་རྣམས་མཐིལ་དུ་སྦྱོར་དགོས་པ་དང་རྩེ་མོ་བར་དུ་འབྲེལ་བ་དགོས། སྒྲོམ་གཉིས་ཀྱི་ཟུར་དེ་ཡང་དེ་བཞིན་བཟོ་དགོས།

²⁵དེར་བརྟེན་སྒྲོམ་བརྒྱད་དང་དངུལ་གྱི་ཞབས་གདན་བཅུ་དྲུག་བཅས་སྒྲོམ་རེར་ཞབས་གདན་གཉིས་རེ་དགོས་སོ།

²⁶ཤིང་ཏིམ་ཤིང་གི་རྒྱབ་ལག་བཅོ་ལྔ་བཟོ་དགོས། གུར་གྱི་ཕྱོགས་གཅིག་གི་ཕྱི་སྒྲོམ་ལ་རྒྱབ་ལག་ལྔ་དགོས་པ་དང་།

²⁷ཕྱོགས་གཞན་གྱི་སྒྲོམ་ལ་ལྔ་དང་ནུབ་ཀྱི་མཐའི་རྒྱབ་ཕྱོགས་ལ་ལྔ་དགོས།

²⁸སྒྲོམ་གྱི་དབུས་ཀྱི་རྒྱབ་ལག་དེ་གུར་གྱི་མཐའ་གཅིག་ནས་གཞན་བར་ཁྱབ་དགོས།

²⁹སྒྲོམ་ལ་གསེར་གཡོག་པ་དང་རྒྱབ་ལག་ཟིན་པའི་ཕྱིར་དུ་དེ་རྣམས་གསེར་གྱི་ཨ་ལོང་གི་སྒྲིག་དགོས། རྒྱབ་ལག་རྣམས་ལའང་གསེར་གཡོག་དགོས།

³⁰ངས་རི་བོའི་སྟེང་དུ་དཔེ་སྟོན་པ་ལྟར་གུར་ཕུབ་དགོས།

³¹བལ་སྐུད་ཚོན་མདོག་སྔོན་པོ་དང་མུ་མན་དང་དམར་པོ་ལས་འཐག་པའི་ཀ་ཤི་ཀའི་རས་སྤུས་དག་ནས་ཡོལ་བ་བཟོ་དགོས། དེར་ཀེ་རུབ་དབྱིབས་ཀྱི་འཚེམ་འདྲུག་རྒྱབ་དགོས།

³²གསེར་གཡོག་པས་ཤིང་ཏིམ་ཤིང་ལས་བཟོས་པའི་ཀབ་བཞིའི་སྟེང་དུ་གསེར་གྱི་ལྕགས་ཀྱུར་ཡོལ་བ་དེ་བརྐོན་དགོས། ཡོལ་བའི་གཤམ་དེ་དངུལ་གྱི་ཞབས་གདན་བཞིའི་སྟེང་འཁེལ་དགོས།

³³གུར་སྟེང་གི་ལྕགས་ཀྱུ་གྲ་སྒྲིག་ཡོད་པའི་འོག་ཏུ་ཡོལ་བ་དེ་བཏང་དགོས་པ་དང་། བཀའ་ཁྲིམས་བྲིས་ཡོད་པའི་རྡོ་ལེབ་གཉིས་བཅུག་སའི་དམ་བཅའི་སྒྲོམ་དེ་ཡོལ་བའི་རྒྱབ་ཏུ་བཞག་དགོས། ཡོལ་བ་དེ་གནས་དམ་པ་དང་ཤིན་ཏུ་དམ་པའི་གནས་གཉིས་ཀྱི་བར་མཚམས་བཅད་རྒྱུ་ཡིན།

³⁴དམ་བཅའི་སྒྲོམ་ལ་ཁེབས་དགོས།

³⁵ཤིན་ཏུ་དམ་པའི་གནས་ཀྱི་ཕྱི་ལོགས་སུ་གུར་གྱི་བྱང་ངོས་ལ་གསོལ་ལྕོག་རྒྱབ་དགོས་པ་དང་། སྒྲོན་མེའི་སྟེགས་བུ་དེ་ལྷོ་ངོས་སུ་བཞག་དགོས།

³⁶བལ་སྐུད་ཚོན་མདོག་སྔོན་པོ་དང་མུ་མན་དང་དམར་པོས་འཐག་པའི་ཀ་ཤི་ཀའི་རས་སྤུས་ལེགས་ཁར་འཚེམ་འདྲུབ་རྒྱབ་པའི་སྒོ་ཡོལ་ཞིག་བཟོས་ཏེ་གུར་གྱི་སྒོར་རྒྱབ་དགོས།

³⁷སྒོ་ཡོལ་གྱི་ཆེད་དུ་ཤིང་ཏིམ་ཤིང་གི་ཀ་བ་ལྔ་ལ་གསེར་གཡོག་ནས། དེར་གསེར་གྱི་ལྕགས་ཀྱུ་དགར་དགོས། ཀ་བའི་ཕྱིར་ལིའི་ཞབས་གདན་ལྔ་བཟོ་དགོས༎