Read Tibetan — པོད་སྐད་Tibetan Old Testament 2011 སྡེབ་ཐོན 28 Bible Online

སྡེབ་ཐོན 28 - Tibetan — པོད་སྐད་Tibetan Old Testament 2011 bible

སྡེབ་ཐོན 28

¹ཁྱོད་ཀྱི་ཨ་ཇོ་ཨ་རོན་དང་ཁོའི་བུ་ན་དྷབ་དང་ཨ་བྷི་ཧུ་དང་ཨེ་ལི་ཛར་དང་ཨི་ཐ་མར་བཅས་སྐད་གཏོང་ཞིག ཁོ་ཚོ་ཨིསི་རཱཨེལ་གྱི་མི་མང་དང་ལོགས་སུ་དབྱེ་བ་བྱེད་དགོས། གང་ལ་ཟེར་ན། ཁོ་ཚོས་བླ་མའི་ཚུལ་དུ་ང་ལ་ཞབས་ཕྱི་ཞུ་དགོས་སོ།

²ཁྱོད་ཀྱི་ཨ་ཅོ་ཨ་རོན་གྱི་དོན་དུ་བླ་མའི་ཆོས་གོས་གཟི་བརྗིད་ཅན་དང་ཡིད་དུ་འོང་བ་ཞིག་བཟོ་དགོས།

³ངས་སྤྲད་པའི་ཤེས་རབ་ཀྱི་ཁྱབ་པར་བྱས་པའི་འཚེམ་བཟོ་བ་མཁས་པ་རྣམས་སྐད་བཏང་ནས་ཨ་རོན་གྱི་ཆོས་གོས་འཚེམ་དགོས་པའི་བཀའ་གཏོང་དགོས། དེ་རྗེས་ཁོས་བླ་མའི་ཚུལ་དུ་ངའི་ཞབས་ཕྱི་ཞུ་ཕྱིར་བསྔོ་འབུལ་བྱེད་དགོས།

⁴ཁོ་ཚོར་བྲང་རྒྱན་ཞིག་དང་། བླ་གོས་ཨེ་ཕོད་དང་། ན་བཟའ་དང་། འཚེམ་འདྲུབ་རྒྱབ་པའི་སྟོད་གོས་དང་། གཞན་ཡང་མགོ་དཀྲི་ཞིག་དང་སྐེ་རག་བཅས་བཟོ་དགོས་པའི་བཀའ་གཏོང་དགོས། དེ་ཚོས་བླ་མའི་ཆོས་གོས་དེ་དག་ཁྱོད་ཀྱི་ཨ་ཇོ་ཨ་རོན་དང་ཁོའི་བུ་བརྒྱུད་རྣམས་ཀྱི་ཆེད་དུ་བཟོ་དགོས་ཤིང་། ཁོ་ཚོས་བླ་མའི་ཚུལ་དུ་ངའི་ཞབས་ཕྱི་ཞུ་དགོས་པ་ཡིན་ནོ།

⁵འཚེམ་བཟོ་བ་ཚོས་བལ་སྐུད་ཚོན་མདོག་སྔོན་པོ་དང་མུ་མན་དང་དམར་པོ་དང་། དེ་བཞིན་གསེར་སྐུད་དང་ཀ་ཤི་ཀའི་རས་སྤུས་ལེགས་བཅས་བེད་སྤྱོད་བྱེད་དགོས།

⁶དེ་ཚོས་བླ་གོས་ཨེ་ཕོད་དེ་བལ་སྐུད་སྔོན་པོ་དང་མུ་མན་དང་དམར་པོ་དང་གཞན་ཡང་གསེར་སྐུད་དང་ཀ་ཤི་ཀའི་རས་སྤུས་ལེགས་བཅས་ཀྱི་བཟོ་དགོས་པ་དང་། དེར་འཚེམ་འདྲུག་གིས་མཛེས་རྒྱན་རྒྱས་པར་རྒྱབ་དགོས།

⁷བླ་གོས་ཨེ་ཕོད་དེ་དཔུང་པར་ལུང་ཐག་གཉིས་ཀྱི་འགྲམ་དུ་སྒྲོག་དགོས།

⁸ཨེ་ཕོད་དང་རྒྱུ་གཅིག་པ་བྱས་པའི་སྐེ་རག་སྤུས་ལེགས་ཤིག་འཐག་ནས་ཨེ་ཕོད་དང་མཉམ་དུ་སྒྲོག་དགོས།

⁹མཆོང་གི་རྡོ་གཉིས་བླངས་ནས་དེར་ཡ་ཀོབ་ཀྱི་བུ་བཅུ་གཉིས་ཀྱི་མིང་བརྐོས་དགོས།

¹⁰དེ་ཚོ་སྔོན་སྐྱེས་ནས་ཆུང་ཤོས་བར་རིམ་བཞིན་རྡོ་གཅིག་ལ་མིང་དྲུག་དང་རྡོ་གཞན་ལ་མིང་དྲུག་བཅས་བརྐོས་དགོས།

¹¹རྡོ་བརྐོ་མཁས་པས་རྡོ་གཉིས་ཡ་ཀོབ་ཀྱི་བུ་ཚོའི་མིང་བརྐོ་དགོས་པ་དང་། རྡོ་དེ་གཉིས་གསེར་གྱི་སྒྲོམ་ཚོའི་ནང་སྦྱོར་དགོས་པ་ཡིན།

¹²རྡོ་དེ་གཉིས་ཨིསི་རཱཨེལ་གྱི་མི་བརྒྱུད་བཅུ་གཉིས་བསྟན་ཕྱིར་བླ་གོས་ཨེ་ཕོད་ཀྱི་དཔུང་པའི་ལུང་ཐག་གཉིས་ཀྱི་སྟེང་དུ་བཞག་དགོས། དེ་ལྟར་ང་གཙོ་བོ་དཀོན་མཆོག་གིས་ངའི་མི་དམངས་དྲན་པའི་ཕྱིར་ཨ་རོན་གྱི་དེ་ཚོའི་མིང་རང་གི་དཔུང་པའི་སྟེང་འཁྱེར་དགོས།

¹³གསེར་གྱི་ཁྲ་ཁུང་གཉིས་བཟོས་ཤིག།

¹⁴དེར་ལྷས་པའི་ཐག་པ་ལྟར་གསེར་བཙོ་མའི་གསེར་ཐག་གཉིས་བཟོས་ནས་གསེར་གྱི་ཁྲ་ཁུང་ཚོའི་ནང་སྦྱོར་དགོས༎

¹⁵དཀོན་མཆོག་གི་ཐུགས་དགོངས་ཧ་གོ་བའི་ཕྱིར་བླ་ཆེན་གྱི་ཆེད་དུ་བྲང་རྒྱན་ཞིག་བཟོ་དགོས། དེ་ནི་ཨེ་ཕོད་དང་རྒྱུ་གཅིག་པ་ཡིན་དགོས། དེར་འཚེམ་འདྲུབ་ཀྱང་གཅིག་པ་བྱས་པ་བཟོ་དགོས།

¹⁶དེའི་དབྱིབས་ནི་གྲུ་བཞི་དང་ལྟེབ་རྩིག་ཉིས་ལྡབ་བྱས་པ་རིང་ཐུང་སན་ཊི་མི་ཊར་ ༢༢ དང་། ཞེང་ཁ་ཡང་སན་ཊི་མི་ཊར་ ༢༢ བྱས་པ་དགོས།

¹⁷དེར་རྡོ་རྩ་ཆེན་ཁག་གྲལ་བཞི་ལ་སྒྲིགས་ནས་རྒྱན་དགོས། གྲལ་དང་པོར་པད་མ་ར་ག་དང་། ཊོ་པཛ་ཞེས་པ་ནོར་བུའི་རིགས་ཀྱི་རྡོ་སེར་པོ་དང་། ཡང་གྷར་ནེཊ་ཞེས་པའི་ནོར་བུའི་རིགས་ཀྱི་རྡོ་དམར་པོ་དང་།

¹⁸གྲལ་གཉིས་པར་ནོར་བུ་མ་རྒད་དང་། ཨིན་དྲ་ནི་ལ་དང་རྡོ་རྗེ་ཕ་ལམ་དང་།

¹⁹གྲལ་གསུམ་པར་གཡུ་དང་མ་ནེ་ཧོར་དང་། མུན་ཤེལ་ཞེས་པ་ནོར་བུའི་རིགས་ཀྱི་རྡོ་སྔོ་དམར་བྱས་པ་ཞིག་དང་།

²⁰གྲལ་བཞི་པར་སྤུ་ཤ་ཀ་ར་ཞེས་པའི་ནོར་བུའི་རིགས་ཤིག་དང་། མཆོང་དང་གཡང་ཊི་བཅས་དགོས། དེ་དག་གསེར་གྱི་སྒྲོམ་ནང་སྦྱོར་དགོས།

²¹ཨིསི་རཱཨེལ་གྱི་སྡེ་རྣམས་བསྟན་ཕྱིར་རྡོ་བཅུ་གཉིས་དེ་ཚོ་ལ་ཡ་ཀོབ་ཀྱི་བུ་བཅུ་གཉིས་ཀྱི་མིང་བརྐོད་དགོས།

²²བྲང་རྒྱན་ལ་དགར་ཆེད་ལྷས་པའི་ཐག་པ་ལྟར་གསེར་བཙོ་མའི་གསེར་ཐག་རྣམས་བཟོ་དགོས།

²³གསེར་གྱི་ཨ་ལོང་གཉིས་བཟོས་ནས་དེ་གཉིས་བྲང་རྒྱན་གྱི་ཐོད་ཀྱི་ཟུར་གཉིས་ལ་སྦྱོར་ཞིག

²⁴གསེར་གྱི་ཐག་པ་གཉིས་ཨ་ལོང་གཉིས་ལ་བཅིངས་ཤིག

²⁵གསེར་གྱི་ཐག་པ་དེ་རང་གི་སྣེ་མོ་གཞན་གཉིས་དེ་སྒྲོམ་གཉིས་ལ་སྦྱོར་ནས་དེ་ལྟར་བླ་གོས་ཨེ་ཕོད་ཀྱི་དཔུང་ཐག་གི་མདུན་ཕྱོགས་སུ་སྦྱོར་དགོས།

²⁶དེ་ནས་གསེར་གྱི་ཨ་ལོང་གཉིས་བཟོས་ནས་བླ་གོས་ཨེ་ཕོད་དང་ཉེ་བར་བྲང་རྒྱན་གྱི་ཟུར་འོག་མའི་ནང་གི་མཐའ་གཉིས་ལ་སྦྱོར་དགོས།

²⁷ད་དུང་གསེར་གྱི་ཨ་ལོང་གཉིས་བཟོས་ནས་ཨེ་ཕོད་ཀྱི་དཔུང་ཐག་གཉིས་གི་གཤམ་དང་དེའི་མདུན་དུ་ངོས་ཀྱི་ཚེམ་ཁའི་མཐུད་མཚམས་སུ་འཁེལ་བར་བྱས་ཏེ། ལེགས་པར་འཐག་པའི་སྐེ་རག་དེའི་ཐོད་དུ་སྦྱར་དགོས།

²⁸ཐག་པ་སྔོན་པོས་ཨེ་ཕོད་ཀྱི་ཨ་ལོང་རྣམས་བྲང་རྒྱན་གྱི་ཨ་ལོང་དང་མཉམ་དུ་བསྡམས་དགོས། དེ་ལྟར་བྱེད་དགོས་དོན་ནི་བྲང་རྒྱན་སྐེ་རག་གི་ཐོད་དུ་བརྟན་པོར་གནས་ཤིང་ལྷུག་པོ་མི་ཆགས་པའི་ཕྱིར་ཡིན་ནོ།

²⁹ཨ་རོན་གནས་དམ་པར་འཛུལ་སྐབས་ཨིསི་རཱཨེལ་གྱི་སྡེ་ཚོའི་མིང་བརྐོས་པའི་བྲང་རྒྱན་དེ་གྱོན་དགོས། དེའི་སྒོ་ནས་ང་གཙོ་བོ་དཀོན་མཆོག་གིས་ངའི་མི་མང་རྟག་ཏུ་དྲན་པར་འགྱུར་རོ།

³⁰བྲང་རྒྱན་གྱི་ནང་དུ་ཨུ་རིམ་དང་ཐུམ་མིམ་གཉིས་བཅུག་དགོས། ཨ་རོན་ངའི་གནས་དམ་པའི་ནང་དུ་ཡོང་སྐབས་ཁོས་དེ་གཉིས་རང་དང་མཉམ་དུ་འཁྱེར་དགོས། དེ་ལྟར་ཁོས་བྲང་རྒྱན་དེ་རྒྱུན་དུ་བཏགས་པའི་སྒོ་ནས་ཨིསི་རཱཨེལ་མི་མང་གི་སྐོར་ལ་གཙོ་བོ་དཀོན་མཆོག་ངའི་བསམ་ཚུལ་གང་ཡོད་པ་དེ་ཁོས་རྟོགས་ཐུབ་པ་ཡིན་ནོ༎

³¹ཨེ་ཕོད་ཀྱི་འོག་ཏུ་གྱོན་དགོས་པའི་ན་བཟའ་དེ་ནི་བལ་སྔོ་ཀྱང་ལས་བཟོ་དགོས།

³²མགོ་བཅུག་ཕྱིར་ཐོད་དུ་ཨི་ཁུང་ཞིག་དགོས་ཏེ་ཨི་ཁུང་དེ་མི་རལ་བའི་ཆེད་དུ་དེ་ལ་མཐའ་སྒྲིལ་ཞིག་གིས་བསྐོར་དགོས།

³³དེའི་མཐའ་འཇག་འོག་མར་བལ་སྐུད་སྔོན་པོ་དང་། མུ་མན་དང་དམར་པོས་སེ་འབྲུའི་དབྱིབས་བཟོས་ཏེ་དགར་དགོས་པ་དང་། དེའི་བར་མཚམས་རེ་རེར་གསེར་གྱི་དྲིལ་ཆུང་རེའང་དགར་དགོས།

³⁴

³⁵ཨ་རོན་གྱི་བླ་མའི་ཞབས་ཞུ་བྱེད་སྐབས་བླ་མའི་གྱོན་གོས་དེ་དག་གྱོན་དགོས། ཁོ་ངའི་གནས་དམ་པའི་ནང་ངའི་མདུན་དུ་ཡོང་སྐབས་དང་དེ་ནས་ཐོན་སྐབས་ཁོའི་གྱོན་གོས་ཀྱི་དྲིལ་བུའི་སྒྲོག་བས་ཁོ་ཤི་བར་མི་འགྱུར།

³⁶གསེར་བཙོ་མས་རྒྱན་ཆ་ཞིག་བཟོས་ནས་གཙོ་བོ་དཀོན་མཆོག་གི་དོན་དུ་བསྔོ་བ་ཡིན་ཞེས་བརྐོས་ཤིག

³⁷དེ་ཐོད་དཀྲི་ཀྱི་མདུན་ཕྱོགས་སུ་འཐག་པ་སྔོན་པོ་ཞིག་གིས་བསྡམས་ནས།

³⁸ཨ་རོན་གྱི་ཐོད་པར་བཏགས་དགོས། དེ་ལ་བརྟེན་ནས་ཨིསི་རཱཨེལ་པ་ཚོས་འབུལ་བ་འབུལ་སྟངས་ནོར་བ་ཡིན་ནའང་། གཙོ་བོ་དཀོན་མཆོག་གིས་འབུལ་བ་དེ་དག་ངོས་ལེན་གནང་རྒྱུ་ཡིན།

³⁹ཨ་རོན་གྱི་སྟོད་ཐུང་ཀ་ཤི་ཀའི་རས་སྤུས་དག་གི་འཐག་དགོས་པ་དང་། དེ་བཞིན་ཐོད་དཀྲི་ཀྱང་ཀ་ཤི་ཀའི་རས་སྤུས་དག་ལས་བཟོ་དགོས་པ་དང། དཔུང་ཐག་ཀྱང་འཚེམ་འདྲུབ་གིས་བརྒྱན་དགོས།

⁴⁰ཨ་རོན་གྱི་བུ་རྣམས་གཟི་བརྗིད་ཅན་དང་ཡིད་འོང་ལྡན་པའི་ཕྱིར་སྟོད་ཐུང་དང་དཔུང་ཐག་དང་དབུ་ཞ་བཅས་བཟོ་དགོས།

⁴¹ན་བཟའ་དེ་རྣམས་ཁྱོད་ཀྱི་ཨ་ཇོ་ཨ་རོན་དང་ཁོའི་བུ་རྣམས་ལ་གཡོག་ནས། ཁོང་ཚོས་ང་ལ་བླ་མའི་ཞབས་ཞུ་བྱེད་པའི་ཕྱིར་ཁོ་ཚོར་བསྔྔོ་འབུལ་གྱི་སྣུམ་བྱུགས་ནས་བསྔོ་ཞིང་བསྐོ་གཞག་བྱེད་དགོས།

⁴²ང་ཚོའི་ངོ་ཚ་མི་མངོན་པའི་ཕྱིར་ཀ་ཤི་ཀའི་རས་ཀྱི་སྨད་གོས་སྐེ་པ་ནས་བརླ་ཤེའི་བར་དུ་སླེབས་པ་བཟོ་དགོས།

⁴³ཨ་རོན་དང་ཁོའི་བུ་རྣམས་བླ་མའི་ཚུལ་དུ་ང་གནས་པའི་དབུ་གུར་དམ་པ་ཡང་ན་མཆོད་ཁྲིར་ཞབས་ཞུ་བྱེད་སྐབས་འཛུལ་དུས། དེར་རྟག་ཏུ་གོས་དེ་གྱོན་དགོས། གང་ལགས་ཟེར་ན། ངོ་ཚ་མངོན་པའི་རྐྱེན་གྱིས་མི་བསད་པའི་ཕྱིར་རོ། ཨ་རོན་དང་ཁོའི་རིགས་བརྒྱུད་ཚོས་ཆོས་ཁྲིམས་འདི་དག་རྟག་ཏུ་སྲུང་དགོས་པ་ཡིན་ནོ༎