Read Tibetan — པོད་སྐད་Tibetan Old Testament 2011 སྡེབ་ཐོན 3 Bible Online

སྡེབ་ཐོན 3 - Tibetan — པོད་སྐད་Tibetan Old Testament 2011 bible

སྡེབ་ཐོན 3

¹ཉིན་ཞིག་མོ་ཤེས་རང་གི་གྱོས་པོ་མིད་ཡན་ཡུལ་གྱི་བླ་མ་ཡི་ཐོརོའི་ར་ལུག་འཚོ་ཞིང་ཡོད་པ་དང་། ར་ལུག་རྣམས་འབྲོག་སྟོང་གི་ཕར་ཕྱོགས་སུ་འཁྲིད་ནས་དམ་པའི་རི་བོ་སི་ནཨེ་རུ་བསླེབས་པ་དང་།

²དེར་དཀོན་མཆོག་གི་ཕོ་ཉ་ཞིག་ཚེར་ཤིང་མེ་ལྕེ་འབར་བཞིན་པ་ཞིག་གི་དཀྱིལ་ནས་ཁོང་གི་མདུན་དུ་མངོན་ནོ། ཁོང་དེར་བལྟས་པས། དེར་མོ་ཤེས་ཚེར་ཤིང་དུ་མེ་འབར་ཡང་འཚིག་གི་མེད་པ་མཐོང་ངོ་།

³དེ་ནས་ཚེར་ཤིང་དེ་མེས་མ་འཚིག་པ་དེ་ཅི་ཡིན་ནམ་དེ་ཡ་མཚན་ཞིག་འདུག ཁོས་ང་དེའི་འགྲམ་དུ་ཕྱིན་ནས་བལྟ་དགོས་བསམ་མོ།

⁴གཙོ་བོ་དཀོན་མཆོག་གིས་ཁོ་ཉེ་བར་ཡོང་བ་གཟིགས་ནས་དཀོན་མཆོག་གིས་ཚེར་ཤིང་གི་དཀྱིལ་ནས་ཁོ་ལ། མོ་ཤེ། མོ་ཤེ་ཞེས་བཀའ་གནང་བ་དང་། ཁོང་གི་ཞུ་ལན་དུ་ང་འདི་རུ་ཡོད་ཅེས་ཞུས་སོ།

⁵ཁོང་གིས། ཁྱོད་ཐག་ཉེ་བར་མ་ཡོང་ཞིག། ཁྱོད་ལངས་ནས་བསྡད་ཡོད་པའི་ས་གནས་དེ་ནི་གནས་དམ་པ་ཞིག་ཡིན་པས། ཁྱོད་ཀྱི་ལྷམ་དེ་ཕུད་ཅིག།

⁶ང་ནི་ཁྱོད་ཀྱི་ཕ་མེས་ཀྱི་དཀོན་མཆོག། ཨབ་ར་ཧམ་གྱི་དཀོན་མཆོག། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་ཡིན་ཞེས་གསུངས་སོ། མོ་ཤེས་དཀོན་མཆོག་ལ་བལྟ་བར་འཇིགས་ནས་རང་གི་གདོང་སྦས་སོ།

⁷གཙོ་བོ་དཀོན་མཆོག་གིས་ཨི་ཇིབ་ནང་ཡོད་པའི་ངའི་མི་དམངས་ཚོའི་དཀའ་ངལ་ངས་མཐོང་ཞིང་། བྲན་གཡོག་གི་དཔོན་པོ་རྣམས་ཀྱིས་དེ་ཚོར་མནར་གཅོད་བཏང་བའི་རྐྱེན་གྱིས་དེ་ཚོས་ངུ་འབོད་བཏོན་པ་དེ་ངས་གོ་བས། དེ་ཚོའི་སྡུག་བསྔལ་ཚང་མ་ངས་ཤེས་ཀྱི་ཡོད།

⁸དེར་བརྟེན་ངས་དེ་ཚོར་ཨི་ཇིབ་པ་རྣམས་ཀྱི་ལག་ནས་སྐྱབས་ཏེ་ཡུལ་དེ་ནས་བཏོན་ནས་ཡུལ་རྒྱ་ཆེ་བས་ནང་སྐྱལ་བའི་ཕྱིར་ང་སླེབས་ཡོད། ཡུལ་དེ་བཟང་པོ་དང་ས་ལུད་འཛོམས་པོ་ཡོད་པ་དང་། དེར་ད་ལྟ་ཀ་ནན་པ། ཧི་ཏི་པ། ཨ་མོར་པ། པེ་རི་ཛི་པ། ཧི་ཝི་པ་དང། ཡ་བུ་ཟི་པ་རྣམས་གནས་སྡོད་བྱེད་བཞིན་ཡོད་དོ།

⁹ད་ལྟོས་ཤིག། ཨིསི་རཱཨེལ་པའི་ངུ་འབོད་ངས་ཐོས་པ་དང་། ཨི་ཇིབ་པ་ཚོས་ཁོང་ཚོའི་ཐོག་ཏུ་བྱས་པའི་བཙན་གནོན་དྲག་པོ་དེ་དག་ཀྱང་ངས་མཐོང་ཡོད་དོ།

¹⁰ད་ཁྱོད་ཀྱི་ངའི་མི་འབངས་ཨིསི་རཱཨེལ་པ་ཚོ་ཨི་ཇིབ་ནས་འདོན་པའི་ཕྱིར་ངས་ཁྱོད་ལ་རྒྱལ་པོའི་མདུན་དུ་གཏོང་གི་ཡིན་ཞེས་གསུངས་སོ།

¹¹འོན་ཀྱང་མོ་ཤེས་དཀོན་མཆོག་ལ། ཨིསི་རཱཨེལ་པ་རྣམས་ཨི་ཇིབ་ནས་ཕྱི་རོལ་དུ་འཁྲིད་གནང་མཁན་དང་། རྒྱལ་པོའི་མདུན་དུ་འགྲོ་ནུས་མཁན་ང་སུ་ཡིན་ནམ་ཞུས་སོ།

¹²ཁོང་གིས་ང་ངེས་པར་ཁྱོད་མཉམ་དུ་འགྲོགས་ཤིང་། ཁྱོད་ལ་ངས་བཏང་བའི་རྟགས་མཚན་མཚོན་ཆེད་དུ། ཁྱོད་ཀྱིས་མི་བརྒྱུད་དེ་རྣམས་ཨི་ཇིབ་ནས་བཏོན་པའི་རྗེས་སུ་ཁྱོད་ཚོས་རི་བོ་འདིའི་ཁར་དཀོན་མཆོག་ལ་བསྙེན་བཀུར་བྱེད་ཡོང་ཞེས་གསུངས་སོ།

¹³འོན་ཀྱང་མོ་ཤེས་དཀོན་མཆོག་ལ། གཟིགས་ཤིག། ངས་ཨིསི་རཱཨེལ་གྱི་མི་མང་རྣམས་ཀྱི་རྩར་ཕྱིན་ནས། ང་ནི་ཁྱོད་ཚོའི་ཕ་མེས་ཀྱི་དཀོན་མཆོག་ནས་ཁྱོད་ཚོའི་རྩར་མངགས་པ་ཡིན་ཞེས་བརྗོད་སྐབས། གལ་སྲིད་དེ་ཚོས་ང་ལ། འོ་ན་ཁོང་གི་མཚན་ལ་ག་རེ་ཞུ་བ་རེད་ཟེར་ན། ངས་ཁོ་ཚོར་ག་རེ་ལབ་དགོས་ཤེས་ཞུས་པས།

¹⁴དཀོན་མཆོག་གིས་མོ་ཤེ་ལ། ང་ནི་གང་ཡིན་པ་དེ་ཀ་རང་ཡིན་ཞེས་གསུངས་ཤིང་། ཨིསི་རཱཨེལ་གྱི་མི་བརྒྱུད་ལ་ང་གང་ཡིན་པ་དེ་ཀ་རང་ཡིན་ཟེར་བ་དེས་ང་ཁྱོད་ཚོའི་རྩར་བཏང་བ་ཡིན་ཞེས་སྨྲོས་ཤིག

¹⁵ཁྱོད་ཀྱིས་ཨིསི་རཱཨེལ་པ་ཚོ་ལ་ཁྱོད་ཚོའི་ཕ་མེས་ཚོའིིི་དཀོན་མཆོག ཨབ་ར་ཧམ་གྱི་དཀོན་མཆོག། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་དེས་ང་ལ་ཁྱོད་ཚོའི་རྩར་མངགས་པ་ཡིན་ཞེས་སྨྲོས་ཤིག ངའི་མིང་ནི་དུས་ཀུན་ཏུ་དེ་ཀ་རང་ཡིན་ཏེ། མི་རབས་ནས་མི་རབས་ཀྱི་མིང་དེའི་སྒོ་ནས་ང་ལ་དྲན་གསོ་བྱེད་པར་འགྱུར།

¹⁶ཁྱོད་སོང་ནས་ཨིསི་རཱཨེལ་གྱི་རྒན་པོ་རྣམས་ཕྱོགས་གཅིག་ཏུ་བསྡུས་ནས་དེ་ཚོར། ང་གཙོ་བོ་དཀོན་མཆོག་ཁོ་ཚོའི་ཕ་མེས་ཚོའི་དཀོན་མཆོག ཨབ་ར་ཧམ། ཨི་སཱག་དང་། ཡ་ཀོབ་ཀྱིདཀོན་མཆོག་དེ་ང་ལ་མངོན་པར་གྱུར་ནས་ཁོང་གིས་ང་ལ། ད་ང་ཁྱོད་ཚོའི་རྩར་འོངས་ཡོད་པས། ཁྱོད་ཚོར་ཨི་ཇིབ་དུ་དཀའ་སྡུག་གང་བྱུང་བ་ཚང་མ་ངས་མཐོང་ངོ་ཞེས་ཟེར་བ་དེ་ཁོ་ཚོར་སྨྲོས་ཤིག

¹⁷ཁྱོད་ཚོ་ཨི་ཇིབ་གྱི་དཀའ་ངལ་ནས་འདོན་ཏེ། ཀ་ནན་པ། ཧི་ཏི་པ། ཨ་མོར་པ། པེ་རི་ཛི་པ། ཧི་ཝི་པ་དང། ཡ་བུ་ཟི་པ་རྣམས་ཀྱི་ཡུལ་ཕྱུག་པོ་དང་ས་ལུད་འཛོམས་པོ་ཡོད་པ་དེར་ངེས་པར་འཁྲིད་ཀྱི་ཡིན།

¹⁸དེ་ཚོས་ཁྱོད་ཀྱིས་གང་ལབ་པ་དེར་ཉན་ཞིང་། ཁྱོད་རང་དང་ཨིསི་རཱཨེལ་པ་རྒན་པོ་རྣམས་ཨི་ཇིབ་གྱི་རྒྱལ་པོའི་རྩར་ཕྱིན་ནས་རྒྱལ་པོ་ལ། ཨིབ་རི་པའི་དཀོན་མཆོག་གཙོ་བོ་དཀོན་མཆོག་གིས་ང་ཚོ་ལ་མངོན་པར་མཛད་དོ། ད་ང་ཚོས་རང་གི་དཀོན་མཆོག་གཙོ་བོ་དཀོན་མཆོག་ལ་དམར་མཆོད་འབུལ་ཕྱིར་ཉིན་ཞག་གསུམ་གྱི་ལམ་བར་དུ་འབྲོག་སྟོང་དུ་འགྲོ་ཆོག་པ་ཞིག་གནང་རོགས་གནང་ཞེས་ཞུ་བ་འབུལ་ཞིག

¹⁹འོན་ཀྱང་ཨི་ཇིབ་གྱི་རྒྱལ་པོ་འུ་མ་ཐུག་བར་དུ་ཁྱོད་ཚོར་འགྲོར་མི་འཇུག་པ་དེ་ངས་ཤེས་སོ།

²⁰ངས་རང་གི་མཐུ་སྟོབས་བེད་སྤྱོད་བྱས་ནས་ཡ་མཚན་གྱི་ལྟས་བརྒྱུད་ནས་ཨི་ཇིབ་ལ་ཆད་པ་གཏོང་གི་ཡིན། དེ་རྗེས་ཁོས་ཁྱོད་ཚོར་འགྲོར་བཅུག་ཡོང་།

²¹ངས་ཨི་ཇིབ་པ་ཚོའི་སེམས་ལ་ཁྱོད་ཚོའི་ཐོག་ཏུ་གུས་ཞབས་སྐྱེད་བཅུག་ནས། ཁྱོད་ཚོ་ཡུལ་ནས་བཏོན་སྐབས་ལག་པ་སྟོང་པ་འགྲོ་དགོས་མི་ཡོང་།

²²ཨིསི་རཱཨེལ་པ་བུད་མེད་རེ་རེས་རང་གི་ཨི་ཇིབ་པ་ཁྱིམ་མཚེས་མ་དང་། རང་གི་ཁང་པའི་ནང་དུ་གནས་པའི་མགྲོན་པོ་བུད་མེད་རྣམས་ལ་དངུལ་དང་གསེར་གྱི་རྒྱན་ཆ་དང་གོས་སོགས་ལོང་བར་འགྱུར། ཁྱོད་ཚོས་དེ་དག་རང་གི་བུ་དང་བུ་མོ་རྣམས་ལ་བརྒྱན་ཏེ། ཁྱོད་ཚོས་ཨི་ཇིབ་པའི་རྒྱུ་ནོར་རྣམས་འཕྲོག་པར་འགྱུར་རོ་ཞེས་གསུངས་སོ༎