Read Tibetan — པོད་སྐད་Tibetan Old Testament 2011 སྡེབ་ཐོན 31 Bible Online

སྡེབ་ཐོན 31 - Tibetan — པོད་སྐད་Tibetan Old Testament 2011 bible

སྡེབ་ཐོན 31

¹གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་བ།

²ངས་ཡ་ཧུ་དཱའི་སྡེ་རིགས་ནས་ཨུ་རིའི་བུའམ་ཧུར་གྱི་ཚ་བོ་བྷེ་ཛ་ལེལ་ལ་འདེམས་བསྐོས་བྱས་ཡོད།

³ཁོ་ལ་ངའི་ཐུགས་གཉིད་ཀྱི་བཀང་ཡོད། ཁོ་ལ་དྲན་དབང་དང་ལག་ཤེས་དང་མི་འདྲ་བའི་རིག་རྩལ་ཚང་མའི་འཇོན་ཐང་སྤྲད་ཡོད།

⁴གཞན་ཡང་བཟོ་རྟའི་འཆར་གཞི་བཀོད་ཆོག་སྐོར་དང་། བཟོ་རྟ་དེ་གསེར་དངུལ་དང་ལིའི་ཐོག་ཏུ་རྐོད་བརྒྱབ་པ་དང་།

⁵ཕྲ་རྒྱན་སྒྲིགས་པའི་ཕྱིར་བཅད་པ་དང་། ཤིང་ལ་རྐོས་བརྒྱབ་པ་དང་། གཞནཡང་ལག་ཤེས་མི་འདྲ་བ་ཚང་མའི་རིག་ཙལ་སྤྲད་ཡོད།

⁶ཁོ་མཉམ་དུ་ལས་བྱེད་པའི་ཕྱིར་ངས་དཱན་གྱི་སྡེ་རིགས་ནས་ཨ་ཧི་ས་མག་གི་བུ་ཨོ་ཧོ་ལི་ཨབ་ལ་འདམས་ཡོད། ངས་ཇི་ལྟར་བཀའ་འགོད་པ་བཞིན་བཟོ་བསྐྲུན་ཐུབ་ཕྱིར་ངས་རིག་རྩལ་ལྡན་པའི་བཟོ་པ་ཚང་མར་འབྱོན་སྟངས་ཆེན་པོ་སྤྲད་ཡོད།

⁷ཁོ་ཚོས་བཟོ་བསྐྲུན་བྱེད་དགོས་པའི་དངོས་པོ་རྣམས་ནི། ང་གནས་པའི་དབུ་གུར་དམ་དང་། དམ་བཅའི་སྒྲོམ་དང་དེའི་ཁེབས་དང་དབུ་གུར་དམ་པའི་དངོས་པོ་རྣམས་དང་།

⁸རྒྱ་ལྕོག་དང་དེའི་ཡོ་བྱད་རྣམས་དང་གསེར་བཙོ་མས་བཟོས་པའི་སྒྲོན་མེའི་བཏེགས་དང་། དེའི་ཡོ་བྱད་དང་། སྤོས་བདུག་པའི་མཆོད་ཁྲི་དང་།

⁹སྦྱིན་སྲེག་གི་འབུལ་བའི་མཆོད་ཁྲི་དང་དེའི་མཁོ་བྱད་རྣམས་དང་། གཞན་ཡང་ཁྲུས་གཞོང་དང་དེའི་ཞབས་ར་དང་།

¹⁰བླ་མའི་ཞབས་ཞུ་སྐབས་ཨ་རོན་དང་ཁོའི་བུ་ཚོས་གྱོན་དགོས་པའི་བླ་མའི་ཆོས་གོས་གཟི་བརྗིད་ཅན་དང་།

¹¹བསྔོ་འབུལ་གྱི་སྣུམ་དང་གནས་དམ་པའི་ཕྱིར་བདུག་སྤོས་དྲི་ཞིམ་བཅས་སོ། དངོས་རིགས་དེ་རྣམས་བཟོ་སྐབས་ངས་ཁྱོད་ལ་ཇི་ལྟར་སྨྲས་པ་བཞིན་ཁོ་ཚོས་དེ་ལྟར་བྱས་དགོས་སོ༎

¹²གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་བ།

¹³ཨིསི་རཱཨེལ་གྱི་མི་དམངས་རྣམས་ལ་སྨྲོས་ཤིག། ངའི་ངལ་གསོ་བའི་ཞག་དེ་སྲུང་རྩི་བྱེད་དགོས། གང་ཡིན་ཟེར་ན། དེ་ང་དང་ཁྱོད་རྣམས་ཀྱི་བར་དུས་རྟག་ཏུ་གནས་པའི་མངོན་རྟགས་མཚོན་བྱེད་ཅིག་ཡིན་པས། དེའི་སྒོ་ནས་ང་གཙོ་བོ་དཀོན་མཆོག་གིས་ཁྱོད་རྣམས་ངའི་མི་དམངས་ཀྱི་ཁོངས་སུ་གཏོགས་པར་བྱེད་པ་དེ་ཤེས་རྟོགས་བྱེད་ཐུབ་པའི་ཕྱིར་རོ།

¹⁴ཁྱོད་ཚོས་ངལ་གསོའི་ཉི་མ་དེ་ངེས་པར་དུ་སྲུང་རྩི་བྱེད་དགོས། གང་ཡིན་ཟེར་ན། ཉིན་མོ་དེ་ནི་དམ་པ་ཡིན་ནོ། མི་སུ་ཞིག་གིས་དེ་སྲུང་རྩི་མ་བྱས་པར་དེ་ཉིན་ལས་ཀ་བྱས་པ་ཡིན་ན། དེར་ཉེས་ཆད་སྲོག་ཐོག་གཏོང་རྒྱུ་དང་།

¹⁵ཁྱོད་ཚོས་ལས་བྱེད་པའི་ཕྱིར་ཉིན་ཞག་དྲུག་ཡོད་པ་དང་། ཉིན་བདུན་པ་དེ་ནི་ངལ་གསོའི་ཉི་མ་ཡིན་པས། དེ་ནི་ངའི་ཉིན་ཞག་དམ་པའོ། སུ་ཞིག་གིས་དེ་ཉིན་ལས་ཀ་བྱས་པ་ཡིན་ན་དེ་ལ་ཉེས་པ་སྲོག་ཐོག་ཏུ་གཏོང་དགོས།

¹⁶ཨིསི་རཱཨེལ་གྱི་མི་དམངས་ཚོས་ཉིན་ཞག་དེ་ནི་དམ་བཅའི་མངོན་རྟགས་སུ་སྲུང་རྩི་བྱེད་དགོས།

¹⁷དེ་ནི་ཨིསི་རཱཨེལ་གྱི་མི་མང་དང་ངའི་བར་ལ་གཏན་དུ་གནས་པའི་མངོན་རྟགས་ཞིག་ཡིན། གང་ཡིན་ཟེར་ན། ང་གཙོ་བོ་དཀོན་མཆོག་གིས་ནམ་མཁའ་དང་ས་གཞི་ཉིན་ཞག་དྲུག་གི་ནང་དུ་བཟོས་ཏེ། ཉིན་ཞག་བདུན་པར་ངས་ལས་ཀ་བར་མཚམས་བཞག་ནས་ངལ་གསོ་བ་ཡིན་ནོ།

¹⁸རི་བོ་སི་ནཨེའི་སྒང་དུ་དཀོན་མཆོག་གིས་མོ་ཤེ་ལ་བཀའ་མོལ་གནང་གྲུབ་རྗེས་དཀོན་མཆོག་རང་ཉིད་ཀྱིས་བྲིས་གནང་མཛད་པའི་བཀའ་ཁྲིམས་ཀྱི་རྡོ་ལེབ་གཉིས་ཁོ་ལ་གནང་ངོ་༎