Read Tibetan — པོད་སྐད་Tibetan Old Testament 2011 སྡེབ་ཐོན 36 Bible Online

སྡེབ་ཐོན 36 - Tibetan — པོད་སྐད་Tibetan Old Testament 2011 bible

སྡེབ་ཐོན 36

¹གཙོ་བོ་དཀོན་མཆོག་གིས་རྩལ་དང་དྲན་དབང་གནང་བའི་བྷེ་ཛ་ལེལ་དང་ཨོ་ཧོ་ལི་ཨབ་གཉིས་ཀྱི་གཙོས་པའི་གཞན་ཡང་ལག་ཤེས་མཁས་པ་ཚོས་དབུ་གུར་དམ་པ་བཞེངས་སྐབས་མཁོ་བའི་ཡོ་བྱད་རྣམས་གཙོ་བོ་དཀོན་མཆོག་གིས་ཇི་ལྟར་བཀའ་གནང་བ་བཞིན་བཟོ་དགོས་པ་ཡིན་ནོ༎

²མོ་ཤེས་བྷེ་ཛ་ལེལ་དང་ཨོ་ཧོ་ལི་ཨབ་གཉིས་ཀྱི་གཙོས་པའི་གཙོ་བོ་དཀོན་མཆོག་གིས་རིག་རྩ་ལགནང་བའི་ལག་བཟོ་མཁས་པ་རྣམས་དང་གཞན་ཡང་ཞབས་ཕྱི་ཞུ་འདོད་ཡོད་པ་རྣམས་ལ་འབོད་ནས་ལས་ཀ་འགོ་འཛུག་དགོས་ཅེས་སྨྲས་པ་དང་།

³ཁོ་ཚོས་མོ་ཤེའི་བརྒྱུད་ནས་ཨིསི་རཱཨེལ་པ་ཚོས་དབུ་གུར་དམ་པ་བཟོ་བའི་ཕྱིར་འཁྱེར་ཡོང་བའི་འབུལ་བ་རྣམས་རྩིས་ལེན་པ་རེད། ཨིསི་རཱཨེལ་པ་ཚོས་ཞོགས་ལྟར་རེ་བཞིན་འབུལ་བ་འཁྱེར་ནས་མོ་ཤེ་སར་ཡོང་ངོ་།

⁴ལས་བྱེད་པ་རིག་རྩལ་ལྡན་པའི་མི་རྣམས་རང་རང་གི་ལས་ཀ་བཞག་ནས་མོ་ཤེའི་རྩར་ཡོང་ངོ་།

⁵མོ་ཤེ་ལ། གཙོ་བོ་དཀོན་མཆོག་གིས་བཀའ་གནང་བའི་ལས་ཀའི་དོན་དུ་དགོས་མཁོ་ལས་ལྷག་པའི་འབུལ་བ་མི་དམངས་ཚོས་འཁྱེར་ཡོང་གི་འདུག་ཅེས་ཞུས་སོ།

⁶དེ་ནས་མོ་ཤེས་སྨྲས་པ། དབུ་གུར་དམ་པ་བཞེངས་པའི་ཆེད་དུ་སུས་ཀྱང་འབུལ་བ་འཁྱེར་ཡོང་མི་དགོས་ཅེས་སྒར་ཡོང་རྫོགས་ལ་བཀའ་བཏང་བས་མི་མང་ནས་སྐྱར་དུ་འབུལ་བ་འཁྱེར་མ་ཡོང་ངོ་།

⁷སྔོན་ནས་འཁྱེར་ཡོང་བའི་འབུལ་བ་དེ་རང་གི་ལྡང་བ་ཙམ་མ་ཟད། དགོས་མཁོ་ལས་ལྷག་པར་བྱུང་ཡོད་པ་རེད༎

⁸བཟོ་པ་མཁས་ཤོས་ཚོས་གཙོ་བོ་དཀོན་མཆོག་གནས་པའི་དབུ་གུར་དམ་པབཞེངས་སྐབས། ཁོ་ཚོས་བལ་སྔོན་པོ་དང་མུ་མན་དང་དམར་པོ་དང་བཅས་མཉམ་དུ་འཐག་པའི་ཀ་ཤི་ཀའི་རས་སྤུས་དག་དུམ་བུ་བཅུ་ལས་བཟོས་ཤིང་། དེར་ཀེ་རུབ་རྣམས་ཀྱི་འཚེམ་འདྲུག་རྒྱབ་པ་དང་།

⁹རས་ཀྱི་དུམ་བུ་དེ་རྣམས་རིང་ཚད་མི་ཊར་བཅུ་གཉིས་དང་ཞེང་ཚད་མི་ཊར་གཉིས་བཅས་ཚང་མ་ཆེ་ཆུང་གཅིག་པ་ཡིན་པ་དང་།

¹⁰ཁོ་ཚོས་རས་ཀྱི་དུམ་བུ་ལྔ་ཕྱོགས་གཅིག་ཏུ་འཚེམ་ཞིང་། དེ་འཕྲོས་དུམ་བུ་ལྔའང་དེ་བཞིན་བྱས་སོ།

¹¹ཁོ་ཚོས་གུར་གྱི་ཕྱི་ཁེབས་ཀྱི་མཐའ་གཉིས་སུ་རས་སྔོན་པོས་སྒྲོག་ཐག་བཟོས་ཏེ།

¹²སྒྲོག་ཐག་ལྔ་བཅུ་གུར་གྱི་གཞོགས་གཅིག་གི་དུམ་བུ་དང་པོར་འཚེམ་པ་དང་། དེ་བཞིན་སྒྲོག་ཐག་ལྔ་བཅུ་གཞོགས་གཉིས་པའི་དུམ་བུ་མཐའ་མར་ཕན་ཚུན་ཐད་ཀར་སྒྲིགས་ནས་འཚེམ་པ་དང་།

¹³ཁོ་ཚོས་རས་དུམ་བུ་དང་པོ་དང་གཉིས་པོ་དེ་ཕྱོགས་གཅིག་ཏུ་འབྲེལ་བའི་ཆེད་དུ་གསེར་གྱི་ལྕགས་ཀྱུ་ལྔ་བཅུ་བཟོས་སོ།

¹⁴དེ་ནས་ཁོ་ཚོས་ར་སྤུས་བཟོས་པའི་གོས་དུམ་བུ་བཅུ་གཉིས་ལས་དབུ་གུར་དམ་པའི་ཕྱི་ཁེབས་ཤིག་བཟོས་ཤིང་།

¹⁵དེ་ཚོའི་རིང་ཚད་མི་ཊར་བཅུ་གསུམ་དང་ཞེང་ཚད་མི་ཊར་གཉིས་བཅས་ཆེ་ཆུང་ཚང་མ་གཅིག་པ་ཡིན་པས།

¹⁶དུམ་བུ་ལྔ་ཕྱོགས་གཅིག་ཏུ་འཚེམ་པ་དང་འཕྲོས་དུམ་བུ་དྲུག་ཕྱོགས་གཞན་དུ་འཚེམ་པ་རེད།

¹⁷ཁོ་ཚོས་གཞོགས་གཅིག་གི་དུམ་བུ་མཐའ་མའི་མཐའ་འཁོར་ལ་སྒྲོག་ཐག་ལྔ་བཅུ་དང་དེ་བཞིན་གཞོགས་གཞན་དེའི་མཐའ་ལའང་སྒྲོག་ཐག་ལྔ་བཅུ་འཚེམ་པ་རེད།

¹⁸ཁོ་ཚོས་ཕྱི་ཁེབས་ཆ་ཚང་གཅིག་ཡོང་བའི་ཆེད་དུ་དུམ་བུ་ཆེན་པོ་གཉིས་པོ་དེ་ཕྱོགས་གཅིག་ཏུ་འབྲེལ་ཕྱིར་ལིའི་ལྕགས་ཀྱུ་ལྔ་བཅུ་བཟོས་ཤིང་།

¹⁹ཕྱི་ཁེབས་གཞན་ཀྱི་ལས་ཀའི་ཆེད་དུ་ལུག་ཐུག་གི་པགས་པ་རྒྱ་ཚོས་དམར་པོ་རྒྱབ་པ་ཞིག་དང་གཞན་ཡང་ཀོ་བ་སྤུས་དག་གཅིག་ལས་ཁེབས་གཉིས་པ་དེ་བཟོས་སོ།

²⁰ཁོ་ཚོས་དབུ་གུར་དམ་པའི་ཆེད་དུ་ཤིང་ཏིམ་ཤིང་ལས་སྒྲོམ་ལག་བཟོས་ཤིང་།

²¹སྒྲོམ་རེ་རེའི་མཐོ་ཚད་མི་ཊར་བཞི་དང་ཞེང་ཚད་སན་ཊི་མི་ཊར་དྲུག་ཅུ་རེ་དྲུག་བཅས་ཡོད་དོ།

²²སྒྲོམ་གཉིས་རེ་ལྷུ་སྒྲིགས་པའི་ཕྱིར་སྒྲོམ་ཚང་མར་ཁོག་གཟེར་གཉིས་རེ་བཟོས་ཡོད་པ་ཡིན་ནོ།

²³ཁོ་ཚོས་ལྷོ་ངོས་སུ་སྒྲོམ་ཉི་ཤུ་བཟོས་པ་དང་།

²⁴སྒྲོམ་རེ་རེའི་འོག་ཏུ་ཞབས་གདན་གཉིས་རེ་ཁོག་གཟེར་གཉིས་ཟིན་པའི་ཕྱིར་དངུལ་གྱི་ཞབས་གདན་ བཞི་བཅུ་བཟོས་སོ།

²⁵དེ་བཞིན་བྱང་ངོས་སུའང་དངུལ་གྱི་སྒྲོམ་ཉི་ཤུ་བཟོས་སོ།

²⁶སྒྲོམ་རེར་ཞབས་གདན་གཉིས་རེ་བྱས་པའི་དངུལ་གི་ཞབས་གདན་བཞི་བཅུ་བཟོས་སོ།

²⁷ནུབ་ངོས་སུ་དབུ་གུར་དམ་པའི་རྒྱབ་ལ་སྒྲོམ་དྲུག་བཟོས་པ་དང་།

²⁸ཟུར་རེར་སྒྲོམ་གཉིས་རེ་བཟོས་སོ།

²⁹སྒྲོམ་དེ་དག་ནི་མཐིལ་དུ་མཐུད་ཡོད་པ་དང་། རྩེ་མོ་བར་དུ་ཆང་མ་འབྲེལ་ཡོད་དོ། ཟུར་གཉིས་སུ་ཡོད་པའི་སྒྲོམ་གཉིས་པོ་དེའང་དེ་ལྟར་བཟོས་ཡོད་པ་རེད།

³⁰དེ་བཞིན་སྒྲོམ་བརྒྱད་དང་དངུལ་གྱི་ཞབས་གདན་བཅུ་དྲུག་བཅས་སྒྲོམ་རེ་རེའི་འོག་ཏུ་ཞབས་གདན་གཉིས་རེ་ཡོད་དོ།

³¹ཁོ་ཚོས་ཤིང་ཏིམ་ཤིང་ལས་སྒྲོམ་རྣམས་ཀྱི་རྒྱ་གྲམ་བཅོ་ལྔ་བཟོས་ཏེ། དབུ་གུར་དམ་པའི་ཕྱོགས་གཅིག་གི་སྒྲོམ་ལ་ལྔ་དང་།

³²ཕྱོགས་གཞན་གྱི་སྒྲོམ་གྱི་ཆེད་དུ་ལྔ་དང་། དེ་བཞིན་རྒྱབ་ཏུ་ནུབ་ངོས་ཀྱི་སྒྲོམ་ལ་ལྔ་ཡོད་པ་ཡིན་ནོ།

³³སྒྲོམ་རྣམས་ཀྱི་དཀྱིལ་དུ་ཡོད་པའི་རྒྱ་གྲམ་་དེ་བཞིན་དབུ་གུར་དམ་པའིི་མཐའ་གཅིག་ནས་གཞན་བར་ཁྱབ་ཡོད་ཅིང་།

³⁴སྒྲོམ་རྣམས་ལ་གསེར་གཡོག་པ་དང་། རྒྱ་གྲམ་་འཛིན་པའི་ཆེད་དུ་གསེར་གྱི་ཨ་ལོང་རྣམས་དགར་ཞིང། རྒྱ་གྲམ་་ལའང་དེ་བཞིན་གསེར་གཡོག་ཡོད་པ་རེད།

³⁵ཁོ་ཚོས་བལ་སྔོན་པོ་དང་མུ་མན་དང་དམར་པོ་བཅས་ལས་བཏགས་པའི་ཀ་ཤི་ཀའི་རས་སྤུས་ལེགས་ཤོས་གིས་ཡོལ་བ་བཟོས་ཏེ། དེར་ཀེ་རུབ་ཀྱི་འཚེམ་འདྲུག་རྒྱབ་ཡོད་དོ།

³⁶ཡོལ་བ་འཛིན་པའི་ཕྱིར་ཤིང་ཏིམ་ཤིང་གི་ཀ་བ་བཞི་བཟོས་ནས་དེར་གསེར་གཡོག་ཡོད་པ་དང་། དེར་གསེར་གྱི་ལྕགས་ཀྱུའང་དགར་རོ། ཀ་བ་དེ་དག་འཛིན་པའི་ཆེད་དུ་དངུལ་གྱི་ཞབས་གདན་བཞི་བཟོས་ཡོད་དོ།

³⁷དབུ་གུར་དམ་པའི་སྒོ་ལ་བལ་སྔོན་པོ་དང་མུ་མན་དང་དམར་པོ་བཅས་ལས་བཏགས་པའི་ཀ་ཤི་ཀའི་རས་སྤུས་དག་གི་ཡོལ་བ་བཟོས་ཏེ། དེར་འཚེམ་འདྲུབ་ཀྱིས་བརྒྱན་ཡོད་དོ་།

³⁸ཡོལ་བ་དེར་ལྕགས་ཀྱུ་ལྡན་པའི་ཀ་བ་ལྔ་བཟོས་ཤིང་། དེ་ཚོས་ཀ་བའི་རྩེ་དང་དེའི་སྒྲོག་ཐག་ལ་གསེར་གྱི་གཡོགས་པ་དང་། དེའི་ཞབས་གདན་ལྔ་ལིའི་བཟོས་སོ༎