Read Tibetan — པོད་སྐད་Tibetan Old Testament 2011 སྡེབ་ཐོན 5 Bible Online

སྡེབ་ཐོན 5 - Tibetan — པོད་སྐད་Tibetan Old Testament 2011 bible

སྡེབ་ཐོན 5

¹དེ་རྗེས་མོ་ཤེ་དང་ཨ་རོན་ཨི་ཇིབ་ཀྱི་རྒྱལ་པོའི་མདུན་དུ་ཕྱིན་ནས་ཁོང་ལ། ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་གིས་ཁྱོད་ལ་གསུངས་པ། ངའི་མི་སྡེས་འབྲོག་སྟོང་ནང་དུ་ང་ལ་དགའ་སྟོན་ཞིག་བཤམས་ཕྱིར་དེ་དག་འགྲོར་ཆུགས་ཤིག་ཅེས་བཀའ་གནང་ཡོད་ཅེས་སྨྲས་སོ།

²རྒྱལ་པོས། གཙོ་བོ་དཀོན་མཆོག་དེ་སུ་ཡིན་ནམ། དེའི་སྐད་ཆ་ཉན་ནས་ངས་ཨིསི་རཱཨེལ་པ་ཚོ་ལ་ག་རེའི་དོན་དུ་འགྲོར་བཅུག་དགོས། ངས་གཙོ་བོ་དཀོན་མཆོག་དེ་ཤེས་ཀྱི་མེད། ངས་ཨིསི་རཱཨེལ་པ་རྣམས་འགྲོར་བཅུག་གི་མིན་ཞེས་སྨྲས་སོ།

³དེ་ཚོས་སྨྲས་པ། ཨིབ་རི་པའི་དཀོན་མཆོག་དེས་ང་ཚོར་མངོན་པར་གནང་བྱུང་། ང་ཚོས་གཙོ་བོ་དཀོན་མཆོག་ང་ཚོའི་དཀོན་མཆོག་ལ་དམར་མཆོད་འབུལ་ཕྱིར་ཉིན་གསུམ་གྱི་ལམ་དུ་འབྲོག་སྟོང་ནང་དུ་ང་ཚོ་གཏོང་བ་གནང་རོགས་གནང་། དེ་མིན་ཁོང་གིས་ང་ཚོར་ནད་ཡམས་སམ་དམག་གི་སྒོ་ནས་ཚར་བཅད་པར་འགྱུར་རོ།

⁴རྒྱལ་པོས། མོ་ཤེ་དང་ཨ་རོན་ལ་སྨྲས་པ། མི་མང་ལ་ལས་ཀ་བྱེད་མི་བཅུག་པ་དེ་གང་ཡིན་ནམ། བྲན་གཡོག་དང་བྲན་མོ་ཚོ་ལ་ལས་བྱེད་དུ་གཏོང་ཞིག

⁵ད་ལྟ་ལུང་པའི་ནང་ཁྱོད་ཚོའི་ཁ་གྲངས་ནི་ཨི་ཇིབ་པ་ལས་མང་དུ་ཕྱིན་ཡོད་པས། དེའི་ཁར་ཁྱོད་ཚོས་དེ་དག་ལ་ངལ་རྩོལ་བྱེད་མ་བཅུག་པར་བཀག་འདོད་དམ།

⁶ཉིན་དེ་རང་ལ་རྒྱལ་པོས་ཨི་ཇིབ་པ་བྲན་གཡོག་གི་མགོ་དཔོན་རྣམས་དང་ཨིསི་རཱཨེལ་པ་ལས་དཔོན་རྣམས་ལ་བཀའ་གནང་བ།

⁷ཁྱོད་ཚོས་ད་བར་སྟེར་བཞིན་པའི་ས་བག་བཟོ་བྱེད་ཀྱི་སོག་མ་དེ་དག་ཕྱིན་ཆད་མ་སྟེར་ཞིག དེ་ཚོས་སོ་སོས་འཚོལ་ནས་སོག་མ་འཁྱེར་ཡོང་དགོས་སོ།

⁸འོན་ཀྱང་དེ་སྔ་ཁོ་ཚོས་ས་བག་མང་ཉུང་ག་ཚོད་བཟོ་གི་ཡོད་པ་ད་ལྟའང་མ་ཉུང་དེ་ཙམ་རང་བཟོ་ཆུག་ཅིག གང་ལ་ཟེར་ན། དེ་ཚོས་ལས་ཀ་མ་སྒྱིད་པར་སྐད་འདོན་ཏེ་ང་ཚོའི་དཀོན་མཆོག་ལ་དམར་མཆོད་འབུལ་ཕྱིར་འགྲོར་བཅུག་རོགས་གནང་ཞེས་ཟེར་བའི་ཕྱིར་རོ།

⁹མི་རྣམས་ཀྱིས་སྐད་ཆ་རྗུན་མར་དོ་སྣང་མ་བྱེད་པའི་ཕྱིར་དེ་ཚོར་ངལ་རྩོལ་ལྗིད་པོ་བཀལ་དགོས་ཅེས་བཀའ་གནང་ངོ་།

¹⁰དེ་ནས་མི་མང་གི་མགོ་དཔོན་དང་ལས་བྱེད་པའི་འགོ་པ་རྣམས་ཕྱིན་ནས་ཨིསི་རཱཨེལ་པ་ཚོ་ལ་སྨྲས་པ། རྒྱལ་པོས་ད་ནས་བཟུང་ཁྱོད་ཚོར་སོག་མ་གནང་གི་མིན་ཞེས་གསུངས་ཡོད།

¹¹དེ་བས་ན་ཁྱོད་ཚོ་རང་ཉིད་ཕྱིན་ཏེ་ས་ཕྱོགས་གང་ནས་ཡིན་རུང་སོག་མ་སྒྲུབ་ཐབས་བྱོས་ཤིག འོན་ཀྱང་ས་བག་གི་ཚད་མང་ཉུང་ཅུང་ཟད་ཙམ་ཡང་ཆག་ཡང་བྱེད་མི་ཆོག་ཅེས་སྨྲས་སོ།

¹²དེ་ནས་མི་དམངས་རྣམས་སོག་མ་འཚོལ་ཕྱིར་ཨི་ཇིབ་ཀུན་ཏུ་ཕྱིན་ནོ།

¹³མགོ་དཔོན་རྣམས་ཀྱིས་དེ་ཚོར་བཙན་དབང་བྱེད་ཏེ་སྔར་སོག་མ་འབྱོར་དུས་ཁྱོད་ཚོས་ལས་ཀ་མང་ཉུང་ག་ཚོད་བྱེད་ཀྱི་ཡོད་པ་དེ་བཞིན་ད་ལྟའང་བྱས་ཏེ་སོ་སོའི་ཉིན་རེའི་ལས་ཚད་དེ་སྒྲུབ་པར་བྱོས་ཤིག་ཅེས་སྨྲས་སོ།

¹⁴དེ་ནས་ལས་བལྟག་སྤྱད་བྱེད་པའི་བསྐོ་བཞག་བྱས་པའི་ཨིསི་རཱཨེལ་པའི་ལས་དཔོན་རྣམས་ལ་ཨི་ཇིབ་པའི་བྲན་གཡོག་གི་མགོ་དཔོན་རྣམས་ཀྱིས་བརྡུང་ནས་དེ་དག་ལ། ཁྱོད་ཚོས་སྔར་བཞིན་ས་བག་མ་བཟོས་པར་དེ་གང་ཡིན་ནམ་ཞེས་སྨྲས་པས།

¹⁵ཨིསི་རཱཨེལ་གྱི་མགོ་དཔོན་རྣམས་རྒྱལ་པོའི་མདུན་དུ་ཕྱིན་ནས་ཞུས་པ། ཀྱེ་རྒྱལ་པོ་ཆེན་པོ། ཁྱེད་ཀྱིས་ང་ཚོའི་ཐོག་ཏུ་བཀའ་བཙན་པོ་འདི་འདྲ་ཅི་ལ་གནང་བཞིན་ཡོད་དམ།

¹⁶ང་ཚོར་སོག་མ་ཅིའང་མ་གནང་བའི་ཁར། ས་བག་བཟོ་དགོས་ཅེས་ཟེར་བ་དང་། ང་ཚོར་ཉེས་བརྡུང་བྱས་པའི་ནག་ཉེས་ནི་སྐུ་ཉིད་ཀྱི་ཞབས་ཕྱི་ཚོའི་ཁར་ཡོད་ཅེས་ཞུ་བ་ཕུལ་ཀྱང་།

¹⁷རྒྱལ་པོས་དེ་དག་ལ། ཁྱོད་ཚོ་ནི་ལེ་ལོ་ཅན་ཡིན་པས་ལས་མ་སྒྱིད་པར། ང་ཚོ་གཙོ་བོ་དཀོན་མཆོག་ལ་དམར་མཆོད་འབུལ་ཕྱིར་འགྲོར་བཅུག་རོགས་གནང་ཞེས་ཟེར་སྨྲས་སོ།

¹⁸ཁྱོད་ཚོ་ལས་ཀར་སོང་ཞིག། ཁྱོད་ཚོར་སོག་མ་ཡང་སྟེར་མི་ཡོང་། འོན་ཀྱང་ཁྱོད་ཚོས་ཉིན་རེར་བཟོ་དགོས་པའི་ས་བག་གི་ཁ་གྲངས་དེ་ཚང་བར་བྱེད་དགོས་ཅེས་བཀའ་གནང་ངོ་།

¹⁹ཉིན་རེར་བཟོ་དགོས་པའི་ས་བག་གི་གྲངས་ཆད་དེ་ལས་ཆག་ཡང་ཅི་ཡང་མེད་པའི་བཀའ་དེ་ཐོས་ནས། ཨིསི་རཱཨེལ་གྱི་འགོ་དཔོན་རྣམས་ཀྱིས་སེམས་ལ་ད་ང་ཚོ་དཀའ་ངལ་དྲག་པོ་ཞིག་གི་ནང་དུ་ཚུད་བཞག་ཅེས་ཧ་གོའོ།

²⁰དེ་ནས་ཁོ་ཚོ་རྒྱལ་པོའི་རྩར་ནས་ཕྱིར་ཐོན་པ་དང་། ལམ་དུ་ཁོ་ཚོ་ལ་སྒུག་ནས་བསྡད་ཡོད་པའི་མོ་ཤེ་དང་ཨ་རོན་འཕྲད་དོ།

²¹དེ་ཚོས་ཨ་རོན་དང་མོ་ཤེ་ལ། ཁྱོད་ཚོའིརྐྱེན་གྱིས་རྒྱལ་པོ་དང་དེའི་འཁོར་གཡོག་ཚོས་ང་ཚོར་སྡང་དགྲ་བྱེད་ཀྱི་ཡོད་པ་དེ་གཙོ་བོ་དཀོན་མཆོག་གིས་གཟིགས་ཡོད་པས། ཁོང་གིས་ཁྱོད་ཚོར་ཁྲིམས་གཅོད་གནང་བར་ཤོག ཁྱོད་ཚོས་དེ་ཚོ་ལ་ངེད་རྣམས་བསད་བའི་ཁ་འདྲི་ཞིག་སྤྲད་ཡོད་ཅེས་སྨྲས་སོ༎

²²དེ་ནས་མོ་ཤེས་གཙོ་བོ་དཀོན་མཆོག་གི་ཕྱོགས་སུ་ཁ་སྒྱུར་ནས་ཡང་སྐྱར་ཁོང་ལ། ཀྱེ་གཙོ་བོ་དཀོན་མཆོག་ཁྱེད་ཀྱིས་རང་གི་མི་འབངས་འདི་ལ་དཀའ་སྡུག་དྲག་པོ་འདི་འདྲ་ག་རེའི་དོན་ལ་གནང་བ་ཡིན་ནམ། ཁྱེད་ཀྱི་ང་ལ་ཅི་ཕྱིར་གཏོང་གནང་བ་ཡིན་ནམ།

²³ངས་ཁྱེད་ཀྱི་མཚན་གྱི་ངང་ནས་རྒྱལ་པོར་སྐད་ཆ་བཤད་པའི་ཉིན་མོ་ནས་བཟུང་། རྒྱལ་པོས་མི་དམངས་ལ་སྡུག་རྩུབ་ཆེ་རུ་བཏང་ཡོད། འོན་ཀྱང་ཁྱེད་ཀྱིས་དེ་ཚོར་སྐྱབས་པའི་ཆེད་དུ་གང་ཡང་གནང་མ་སོང་ཞེས་ཞུས་སོ༎