Read Tibetan — པོད་སྐད་Tibetan Old Testament 2011 སྡེབ་ཐོན 7 Bible Online

སྡེབ་ཐོན 7 - Tibetan — པོད་སྐད་Tibetan Old Testament 2011 bible

སྡེབ་ཐོན 7

¹གཙོ་བོ་དཀོན་མཆོག་གིས་མོ་ཤེ་ལ། ལྟོས་ཤིག། ངས་ཁྱོད་ནི་རྒྱལ་པོའི་མཐོང་སྣང་དུ་དཀོན་མཆོག་དང་མཚུངས་པ་བྱས་ཡོད། ཁྱོད་ཀྱི་ཨ་ཇོ་ཨ་རོན་ནི་ཁྱོད་ཀྱི་ལུང་སྟོན་པར་འགྱུར་ནས་སྐད་ཆ་བཤད་ཡོང་།

²ངས་ཁྱོད་ལ་གང་བཤད་པ་ཚང་མ་ཨ་རོན་ལ་སྨྲོས་ཤིག ཁོས་ཨིསི་རཱཨེལ་པ་རྣམས་ལ་ཨི་ཇིབ་ནས་འགྲོར་བཅུག་དགོས་ཅེས་རྒྱལ་པོ་ལ་ཞུ་དགོས།

³འོན་ཀྱང་ངས་རྒྱལ་པོའི་སེམས་གྱོང་པོ་བཟོས་ཏེ། ཨི་ཇིབ་ནང་ངས་ལྟས་ངོ་མཚར་ཆེ་བ་མང་པོ་སྟོན་གྱི་ཡིན།

⁴འོན་ཀྱང་རྒྱལ་པོས་ཁྱོད་ཚོའི་བཤད་པར་མི་ཉན་པ་དང་། ཨི་ཇིབ་གྱི་ཐོག་ཏུ་ངས་རང་གི་མཐུ་དང་ནུས་པ་སྟོན་ཏེ། དེ་ཚོའི་ཐོག་ཏུ་ཁྲིམས་གཅོད་དྲག་པོ་བཅད་ཅིང་། ངའི་མི་མང་ཨིསི་རཱཨེལ་པ་རྣམས་ཨི་ཇིབ་ནས་ངས་ཕྱིར་འདོན་པར་བྱའོ།

⁵ངས་ཨི་ཇིབ་པ་རྣམས་ཀྱི་ཐོག་ཏུ་ལག་པ་བརྐྱངས་ཤིང་དེ་ཚོའི་དཀྱིལ་ནས་ཨིསི་རཱཨེལ་པ་རྣམས་ཕྱིར་འདོན་པའི་ཚེ་ང་ནི་གཙོ་བོ་དཀོན་མཆོག་ཡིན་པ་དེ་ཨི་ཇིབ་པ་ཚོས་ཤེས་ཡོང་ཞེས་བཀའ་གནང་ངོ་།

⁶གཙོ་བོ་དཀོན་མཆོག་གིས་བཀའ་གནང་བ་བཞིན་དུ་མོ་ཤེ་དང་ཨ་རོན་གྱིས་བྱས་སོ།

⁷དེ་གཉིས་ཀྱིས་རྒྱལ་པོ་དང་གཏམ་བྱེད་སྐབས་མོ་ཤེ་ནི་ལོ་བརྒྱད་ཅུ་དང་ཨ་རོན་ནི་ལོ་བརྒྱད་ཅུ་གྱ་གསུམ་ཡིན་ནོ༎

⁸གཙོ་བོ་དཀོན་མཆོག་གིས་མོ་ཤེ་དང་ཨ་རོན་ལ།

⁹གལ་ཏེ་རྒྱལ་པོས་ཁྱོད་གཉིས་ལ། ལྟས་ཤིག་སྟོན་ཞིག་བརྗོད་ན། ཁྱོད་ཀྱིས་ཨ་རོན་གྱི་འཁར་རྒྱུག་དེ་བླངས་ནས་རྒྱལ་པོའི་མདུན་དུ་དབྱུགས་ཤིག་ཅེས་སྨྲོས་དང་། དེ་ནི་སྦྲུལ་ཞིག་ཏུ་འགྱུར་ཡོང་ཞེས་བཀའ་གནང་ངོ་།

¹⁰དེར་བརྟེན་མོ་ཤེ་དང་ཨ་རོན་རྒྱལ་པོའི་མདུན་དུ་ཕྱིན་ནས། གཙོ་བོ་དཀོན་མཆོག་གིས་བཀའ་གནང་བ་བཞིན་བྱས་ཏེ་ཨ་རོན་གྱིས་འཁར་རྒྱུག་དེ་རྒྱལ་པོ་དང་དེའི་འཁོར་གཡོག་རྣམས་ཀྱི་མདུན་དུ་འཕངས་པས་དེ་སྦྲུལ་ཞིག་ཏུ་འགྱུར་ཏོ།

¹¹དེ་ནས་རྒྱལ་པོས་ཀྱང་མི་མཁས་པ་དང་རྫུས་འཕྲུལ་མཁན་རྣམས་སྐད་བཏང་ནས། དེ་ཚོས་ཀྱང་རྫུ་འཕྲུལ་གྱི་སྒོ་ནས་དེ་བཞིན་དུ་བྱས་སོ།

¹²དེ་ཚོས་ཀྱང་སོ་སོའི་འཁར་རྒྱུག་འཕངས་པས་དེ་དག་སྦྲུལ་དུ་སྒྱུར་རོ། འོན་ཀྱང་ཨ་རོན་གྱི་འཁར་རྒྱུག་གིས་དེ་ཚོའི་འཁར་རྒྱུག་རྣམས་མིག་གོ

¹³ད་དུང་རྒྱལ་པོའི་སེམས་གྱོང་པོར་གྱུར་ནས་གཙོ་བོ་དཀོན་མཆོག་གིས་གསུངས་པ་བཞིན་རྒྱལ་པོས་དེ་ཚོའི་གཏམ་ལ་མ་ཉན་ནོ༎

¹⁴དེ་ནས་གཙོ་བོ་དཀོན་མཆོག་གིས་མོ་ཤེ་ལ་གསུངས་པ། རྒྱལ་པོའི་སེམས་གྱོང་པོར་ཕྱིན་ཡོད་པས། ཁོས་ཨིསི་རཱཨེལ་པ་ཚོ་ལ་གཏོང་བ་མེད།

¹⁵རྒྱལ་པོ་ཞོགས་པ་སྔ་པོ་ན་ཨེལ་གཙང་པོའི་ཉེ་འགྲམ་དུ་ཕེབས་སྐབས་དེར་ཁོ་ལ་འཕྲད་ཕྱིར་དེར་སོང་ཞིག སྔར་སྦྲུལ་དུ་འགྱུར་བའི་འཁར་རྒྱུག་དེ་འཁྱེར་ནས་དེར་ཁོ་ལ་སྒུག་སྡོད་ཅིག

¹⁶དེ་ནས་རྒྱལ་པོ་ལ་འདི་ལྟར་སྨྲོས་ཤིག། ཨིབ་རི་པའི་དཀོན་མཆོག་གཙོ་བོ་དཀོན་མཆོག་གིས་ང་ཁྱེད་ཀྱི་དྲུང་དུ་གཏོང་བ་གནང་ཞིང་། ཁོང་གིས་ཁྱེད་ལ། ཁོང་གི་མི་དམངས་རྣམས་འབྲོག་སྟོང་དུ་ཁོང་ལ་བསྙེན་བཀུར་བྱེད་ཕྱིར་གཏོང་ཞིག་ཅེས་བཀའ་གནང་བྱུང་། འོན་ཀྱང་ད་བར་ཁྱེད་ཀྱིས་ཁོང་གི་བཀའ་ལ་རྩིས་མེད་ཞུས་ཡོད་པ་ཡིན་ནོ།

¹⁷གཙོ་བོ་དཀོན་མཆོག་གིས་གསུངས་པ། ཁོང་གི་མཛད་པ་རྣམས་ཁྱེད་ཀྱིས་མཐོང་ནས་ཁོང་གཙོ་བོ་དཀོན་མཆོག་ཡིན་པ་དེ་ཤེས་ཐུབ་ཡོང་། ལྟོས་ཤིག་ངའི་ལག་པར་ཡོད་པའི་འཁར་རྒྱུག་དེ་ན་ཨེལ་གཙང་ཆུའི་ཁར་ཞུས་དུས་གཙང་ཆུ་དེ་ཁྲག་ཏུ་འགྱུར་ཡོང་།

¹⁸གཙང་པོའི་ཉ་རྣམས་ཤི་བ་དང་། གཙང་ཆུ་ལ་དྲི་ངན་དྲོ་བས། ཨི་ཇིབ་པ་རྣམས་གཙང་ཆུ་དེ་ལས་འཐུང་མི་ཐུབ་ཅེས་སྨྲོས་ཤིག

¹⁹གཙོ་བོ་དཀོན་མཆོག་གིས་མོ་ཤེ་ལ། ཁྱོད་ཀྱི་ཨ་ཇོ་ཨ་རོན་ལ། འཁར་རྒྱུག་དེ་འཁྱེར་ནས་ཨི་ཇིབ་གྱི་གཙང་པོ་ཡོད་ཚད་དང་། ཡུར་པོ་རྣམས་དང་། རྫིང་བུ་རྣམས་དང་། གཞན་ཡང་ཁྲོན་པ་ཐམས་ཅད་ཁྲག་ཏུ་འགྱུར་བའི་ཕྱིར་དེ་ཚོའི་སྟེང་དུ་ལག་པ་རྐྱོངས་ཤིག་ཅེས་སྨྲོས་ཤིག ཨི་ཇིབ་ཀྱི་ཤིང་གི་སྣོད་དང་། རྡོ་སྣོད་ཡོད་ཚད་ནང་ལ་ཁྲག་ཤ་སྟག་ཡོད་པ་འབྱུང་ཡོང་ཞེས་བཀའ་གནང་ངོ་།

²⁰དེ་ནས་མོ་ཤེ་དང་ཨ་རོན་གྱིས་གཙོ་བོ་དཀོན་མཆོག་གིས་བཀའ་གནང་བ་བཞིན་བྱས་སོ། རྒྱལ་པོ་དང་འཁོར་གཡོག་རྣམས་ཀྱི་མདུན་དུ་ཨ་རོན་གྱིས་འཁར་རྒྱུག་དེ་ཡར་ཀྱག་ནས་གཙང་པོ་ན་ཨེལ་ཁར་ཞུས་པས། གཙང་པོའི་ཆུ་རྣམས་ཁྲག་ཏུ་འགྱུར་རོ།

²¹གཙང་པོའི་ཉ་རྣམས་ཤི་ནས། དེར་དྲི་མ་ངན་པ་བྱུང་ནས། ཨི་ཇིབ་པ་ཚོས་ཆུ་དེ་འཐུང་མ་ཐུབ་བོ། ཨི་ཇིབ་ཀུན་ཏུ་ག་ས་ག་ལ་ཆུ་ཆང་མ་ཁྲག་ཏུ་འགྱུར་རོ།

²²རྒྱལ་པོའི་མིག་འཕྲུལ་མཁན་རྣམས་ཀྱིས་ཀྱང་རྫུ་འཕྲུལ་གྱི་སྒོ་ནས་དེ་བཞིན་བྱས་སོ། གཙོ་བོ་དཀོན་མཆོག་གིས་གསུངས་པ་བཞིན་རྒྱལ་པོའི་སེམས་ད་དུང་གྱོང་བར་ཕྱིན་པས། རྒྱལ་པོས་མོ་ཤེ་དང་ཨ་རོན་གྱི་གཏམ་ལ་མ་ཉན་ནོ།

²³གནས་ཚུལ་གང་བྱུང་བ་དེ་ལ་དོ་སྣང་མ་བྱས་པར། ཁོང་རང་གི་ཕོ་བྲང་དུ་ལོག་གོ།

²⁴ཨི་ཇིབ་པ་ཐམས་ཅད་གཙང་ཆུ་འཐུང་མ་ཐུབ་པར་གཙང་པོའི་ཉེ་འགྲམ་དུ་ཆུ་འཚོལ་ཕྱིར་ས་བྲུས་སོ།

²⁵གཙོ་བོ་དཀོན་མཆོག་གིས་གཙང་ཆུ་ཁྲག་ཏུ་སྒྱུར་གནང་ནས་ཉིན་ཞག་བདུན་ཕྱིན་ནོ༎