Read Tibetan — པོད་སྐད་Tibetan Old Testament 2011 སྡེབ་ཐོན 9 Bible Online

སྡེབ་ཐོན 9 - Tibetan — པོད་སྐད་Tibetan Old Testament 2011 bible

སྡེབ་ཐོན 9

¹གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ཁྱོད་རང་རྒྱལ་པོའི་རྩར་ཕྱིན་ནས། ཨིབ་རི་པའི་དཀོན་མཆོག་གཙོ་བོ་དཀོན་མཆོག་གིས་གསུངས་པ། ངའི་མི་དམངས་རྣམས་ང་ལ་བསྙེན་བཀུར་བྱེད་ཕྱིར་གཏོང་ཞིག

²གལ་སྲིད་ད་དུང་དེ་ཚོར་འགྲོ་མ་བཅུག་ན།

³ངས་ཁྱོད་ཀྱི་དུད་འགྲོ་རྟ་དང་བོང་བུ་དང་རྔ་མོང་དང་བ་གླང་དང་ར་ལུག་སོགས་ལ་རིམས་ནད་དྲག་པོ་ཞིག་བཏང་ནས་ཁྱོད་ལ་ཆད་པ་གཏོང་རྒྱུ་ཡིན།

⁴ངས་ཨིསི་རཱཨེལ་པ་རྣམས་ཀྱི་དུད་འགྲོ་དང་། ཨི་ཇིབ་པ་རྣམས་ཀྱི་དུད་འགྲོའི་བར་ལ་ཁྱད་པ་ཞིག་དབྱེ་སྟེ། ཨིསི་རཱཨེལ་པ་རྣམས་ཀྱི་དུད་འགྲོའི་ནང་ནས་གཅིག་ཀྱང་ཤི་མི་ཡོང་།

⁵ང་གཙོ་བོ་དཀོན་མཆོག་གིས་བྱ་བ་འདི་དག་སང་ཉིན་རང་སྒྲུབ་ཡོང་ཞེས་དུས་མཚམས་ཤིག་བཀག་ཡོད།

⁶སང་ཉིན་གཙོ་བོ་དཀོན་མཆོག་རང་གི་བཀའ་གནང་བ་བཞིན། ཨི་ཇིབ་པ་རྣམས་ཀྱི་དུད་འགྲོ་ཐམས་ཅད་ཤིའོ། འོན་ཀྱང་ཨིསི་རཱཨེལ་པ་རྣམས་ཀྱི་དུད་འགྲོ་གཅིག་ཀྱང་མ་ཤི་བ་ཡིན་ནོ།

⁷རྒྱལ་པོས་བྱ་བ་གང་བྱུང་བར་བལྟ་རྟོགས་བྱེད་ཕྱིར་མི་བཏང་བ་དང་། དེ་ཚོས་རྒྱལ་པོ་ལ། ཨིསི་རཱཨེལ་པ་རྣམས་ཀྱི་དུད་འགྲོ་གཅིག་ཀྱང་ཤི་མི་འདུག འོན་ཀྱང་རྒྱལ་པོའི་སེམས་ད་དུང་གྱོང་རུ་ཕྱིན་ནས་མི་དམངས་རྣམས་འགྲོ་རུ་མ་བཅུག་གོ།

⁸དེ་ནས་གཙོ་བོ་དཀོན་མཆོག་གིས་མོ་ཤེ་དང་ཨ་རོན་ལ་གསུངས་པ། ཐབ་ནས་གོ་ཐལ་་སྦར་ར་གང་དོ་ཙམ་འཁྱེར་ནས། མོ་ཤེ་ཁྱོད་ཀྱིས་རྒྱལ་པོའི་མདུན་དུ་རླུང་ལ་གཏོར་ཞིག་དང་།

⁹གོ་ཐལ་དེ་ཨི་ཇིབ་ཀུན་ཏུ་ཐལ་བར་འགྱུར་ཞིང་། དེའི་རྐྱེན་གྱིས་ཨི་ཇིབ་གྱི་མི་དང་དུད་འགྲོ་གཉིས་ཀ་གཉན་འབུར་ཐོན་ནས་རྨ་ཆགས་ཡོང་ཞེས་བཀའ་གནང་ངོ་།

¹⁰དེར་བརྟེན་དེ་ཚོས་གོ་ཐལ་ཕྲན་བུས་བླངས་ནས་རྒྱལ་པོའི་མདུན་དུ་ལངས་ཏེ།་ མོ་ཤེས་དེ་རླུང་ལ་གཏོར་བ་དང་། མི་དང་དུད་འགྲོའི་སྟེང་གཉན་འབུར་ཐོན་ནས་རྨ་ཆགས་སོ།

¹¹ཨི་ཇིབ་པ་བྱིངས་དང་འདྲབ་མིག་འཕྲུལ་མཁན་ཚོ་ལའང་གཉན་འབུར་སོགས་འཐོན་པའི་རྐྱེན་གྱིས་དེ་ཚོ་མོ་ཤེའི་མདུན་དུ་གནས་མ་ཐུབ་བོ།

¹²འོན་ཀྱང་གཙོ་བོ་དཀོན་མཆོག་གིས་རྒྱལ་པོའི་སེམས་གྱོང་པོ་བཟོས་གནང་ངོ་། གཙོ་བོ་དཀོན་མཆོག་གིས་གསུངས་པ་བཞིན་རྒྱལ་པོས་མོ་ཤེ་དང་ཨ་རོན་གྱི་གཏམ་ལ་མ་ཉན་ནོ༎

¹³གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ཁྱོད་རང་སང་ཉིན་སྔ་པོར་རྒྱལ་པོའི་རྩར་ཕྱིན་ནས་སྨྲོས་ཤིག་ཨིབ་རི་པའི་དཀོན་མཆོག་གཙོ་བོ་དཀོན་མཆོག་གིས་གསུངས་པ། ངའི་མི་དམངས་རྣམས་ང་ལ་བསྙེན་བཀུར་བྱེད་ཕྱིར་གཏོང་ཞིག

¹⁴དེ་མིན་ད་ལན་ཁྱོད་ཀྱི་ལས་བྱེད་པ་དང་འབངས་རྣམས་ཀྱི་ཁར་མ་ཡིན་པར། ཁྱོད་ལའང་ཉེས་ཆད་གཏོང་རྒྱུ་ཡིན། དེ་ནས་ཁྱོད་ཀྱིས་ང་དང་འདྲ་བ་གཞན་སུའང་འཛམ་གླིང་འདིའི་ནང་མེད་པ་ཤེས་ཐུབ་ཡོང་།

¹⁵གལ་ཏེ་ངས་རང་གི་ལག་པ་བརྐྱངས་ནས་ཁྱོད་དང་ཁྱོད་ཀྱི་འབངས་རྣམས་ཀྱི་ཐོག་ཏུ་རིམས་ནད་གཏོང་བ་ཡིན་ན། ཁྱོད་ཚོ་ཆ་ཚང་འཇིགས་པར་ངེས་སོ།

¹⁶འོན་ཀྱང་ངའི་མཐུ་དང་ནུས་པ་མཐོང་ཐུབ་པའི་ཕྱིར་ངས་ཁྱོད་ཚོར་གསོན་པོར་གནས་བཅུག་པ་ཡིན། དེ་བཞིན་ངའི་སྙན་གྲགས་འཛམ་གླིང་ཡོངས་སུ་དར་བའི་ཕྱིར་དུ་ཡིན་ནོ།

¹⁷འོན་ཀྱང་ད་བར་ཁྱོད་གྱོང་པོ་བྱས་ནས་ངའི་མི་དམངས་འགྲོ་རུ་མ་བཅུག་པ་ཡིན་ནོ།

¹⁸ངས་དུས་ཚོད་དེ་རང་ལ་སེར་བ་ཧ་ཅང་དྲག་པོ་ཞིག་འབེབས་རྒྱུ་ཡིན། དེ་ལྟར་སེར་བ་ཨི་ཇིབ་ཀྱི་རྒྱལ་རབས་ནང་ནམ་ཡང་འབེབས་མེད་དོ།

¹⁹ད་ཕྱི་རུ་ཐང་ཀར་ཡོད་པའི་ཕྱུགས་ཟོག་ཚང་མ་དང་ཕྱི་རུ་ཇི་ཡོད་པ་ཚང་མ་ནང་དུ་བཀོང་བའི་བཀའ་གཏོང་ཞིག ཕྱི་ལོགས་སུ་ལུས་པའི་མི་དང་དུད་འགྲོ་ཚང་མ་སེར་བས་བརྡུང་ནས་ཤི་ཡོང་།

²⁰གཙོ་བོ་དཀོན་མཆོག་གིས་གང་གསུངས་པ་དེ་ཐོས་ནས། རྒྱལ་པོའི་ལས་བྱེད་པ་འགའ་ཤས་འཇིགས་ཏེ། དེ་ཚོས་རང་གི་དུད་འགྲོ་དང་བྲན་ཁོལ་རྣམས་ཁྱིམ་དུ་བཞག་གོ

²¹འོན་ཀྱང་མི་གཞན་ཚོས་གཙོ་བོ་དཀོན་མཆོག་གི་བཀའ་ལ་མ་རྩིས་པར་རང་གི་དུད་འགྲོ་དང་བྲན་ཁོལ་རྣམས་ལ་ཐང་ཁར་སློད་དོ།

²²དེ་ནས་གཙོ་བོ་དཀོན་མཆོ་ག་གིས་མོ་ཤེ་ལ་གསུངས་པ། ཨི་ཇིབ་ཡོངས་སུ་གསེར་བ་འབེབས་པ་དང་། མི་དང་དུད་འགྲོ་དང་གཞན་ཡང་རྩྭ་ཞིང་སྔོ་ཚོད་ཚང་མའི་སྟེང་དུ་སེར་བ་འབེབས་པའི་ཕྱིར་ཁྱོད་ཀྱི་ལག་པ་གནམ་གྱི་ཕྱོགས་སུ་རྐྱོངས་ཤིག་ཅེས་བཀའ་གནང་བས།

²³མོ་ཤེས་རང་གི་འཁར་རྒྱུག་དེ་གནམ་གྱི་ཕྱོགས་སུ་འཕྱར་བ་དང་། འབྲུག་སྐད་མཉམ་དུ་གཙོ་བོ་དཀོན་མཆོག་གིས་སེར་བ་གཏོང་གནང་ཞིང་། ས་གཞི་རུ་གློག་ཐོག་རྒྱབ་པ་དང་གཙོ་བོ་དཀོན་མཆོག་གིས་སེར་བ་དྲག་པོ་གཏོང་གནང་ངོ་།

²⁴ནམ་མཁར་གློག་འཁྱུགས་པ་དང་སེར་བ་དྲག་པོ་འབབ་བོ། ཨི་ཇིབ་ཀྱི་རྒྱལ་རབས་ནང་ད་བར་དེ་འདྲ་བྱུང་མེད་དོ།

²⁵ཨི་ཇིབ་ཀུན་ཏུ་ས་ཞིང་ཁག་ཏུ་ཡོད་པའི་མི་དང་དུད་འགྲོ་གཉིས་ཀར་སེར་བརྡུང་དྲག་པོས་བསད་ཅིང་། ཞིང་ཁའི་སྔོ་ཚོད་ཚང་མ་སེར་བས་མེད་པར་བྱས་ཏེ། ནགས་ཀྱི་ཤིང་སྡོང་ཚང་མ་ཆག་གོ།

²⁶ཨིསི་རཨེལ་པ་རྣམས་གནས་སྡོད་བྱེད་པའི་ས་གནས་གྷོ་ཤེན་གཅིག་པུར་སེར་བ་མ་བབས་སོ།

²⁷རྒྱལ་པོས་མོ་ཤེ་དང་ཨ་རོན་ལ་སྐད་བཏང་ནས། ད་ལན་ངས་སྡིག་པ་བྱས་པ་ཡིན། གཙོ་བོ་དཀོན་མཆོག་ནི་བདེན་པ་ཡིན་པས། ང་དང་ངའི་མི་དམངས་ཀྱི་ནོར་འཁྲུལ་བྱས་པ་ཡིན་ནོ།

²⁸ད་འབྲུག་སྐད་དང་སེར་བ་དྲག་པོ་འདི་འདྲ་ཆད་པའི་ཕྱིར་གཙོ་བོ་དཀོན་མཆོག་ལ་སྨོན་ལམ་ཐོབ་ཅིག ད་ཁྱོད་ཚོ་འདི་རུ་སྡོད་མི་དགོས། ངས་ཁྱོད་ཚོ་འགྲོ་ཆོག་པའི་ཁས་ལེན་བྱེད་ཀྱི་ཡིན་ཞེས་སྨྲས་སོ།

²⁹མོ་ཤེས་རྒྱལ་པོ་ལ། ད་ལྟ་གྲོང་ཁྱེར་གྱི་ཕྱི་ལོགས་སུ་ཕྱིན་མ་ཐག་ཏུ། ངས་ལག་པ་གནམ་ལ་ཡར་བཏེགས་ཏེ་གཙོ་བོ་དཀོན་མཆོག་ལ་སྨོན་ལམ་ཞུས་པའི་རྗེས་སུ་འབྲུག་སྐད་དང་སེར་བ་དྲག་པོ་འདི་དག་འཆད་ཡོང་། བྱབ་དེའི་སྒོ་ནས་ས་གཞི་འདི་ནི་གཙོ་བོ་དཀོན་མཆོག་གི་ཡིན་པ་དེ་ཁྱེད་ཀྱིས་ཤེས་རྟོགས་བྱེད་ཐུབ་ཡོང།

³⁰འོན་ཀྱང་ཁྱེད་དང་ཁྱེད་ཀྱི་ལས་བྱེད་པ་ཚོས་ད་དུང་དཀོན་མཆོག་གཙོ་བོ་དཀོན་མཆོག་ལ་འཇིགས་ཀྱི་མེད་པ་དེ་ངས་ཤེས་ཀྱི་ཡོད་ཅེས་སྨྲས་སོ།

³¹སྐབས་དེར་ནས་ཀྱི་སྙེ་མ་ཚོས་ཟིན་པ་དང་། སོ་མ་ར་རྩའི་མེ་ཏོག་ཤར་བཞིན་པའི་དུས་ཡིན་པས། ནས་དང་སོ་མ་ར་རྩ་གཉིས་ཀ་སེར་བས་ཡོངས་སུ་འཇིགས་སོ།

³²འོན་ཀྱང་གྲོ་ནི་ཐར་རོ། གང་ལ་ཟེར་ན། དེ་ནི་སྨིན་མེད་པ་ཡིན་ནོ།

³³དེ་ནས་མོ་ཤེ་རྒྱལ་པོའི་དྲུང་ནས་ཕྱི་རུ་ཐོན་ཞིང་། ལག་པ་གནམ་ལ་ཡར་བཏེགས་ཤིང་གཙོ་བོ་དཀོན་མཆོག་ལ་སྨོན་ལམ་ཞུས་པས། འབྲུག་སྐད་དང་སེར་བ་དྲག་པོ་དང་ཆར་པ་སོགས་ཡོངས་སུ་འཆད་དོ།

³⁴རྒྱལ་པོས་ཆར་པ་དང་སེར་བ་དང་འབྲུག་སྐད་ཆད་པ་མཐོང་ནས་ཡང་སྐྱར་སྡིག་པ་བྱས་སོ ཁོང་དང་ཁོང་གི་ལས་བྱེད་པ་ཚང་མ་སྔོན་ལྟར་སེམས་གྱོང་རུ་ཕྱིན་ནོ།

³⁵སྔར་གཅོ་བོ་དཀོན་མཆོག་གིས་མོ་ཤེ་ལ་གསུངས་པ་ལྟར། རྒྱལ་པོས་ཨིསི་རཱཨེལ་པ་རྣམས་ལ་འགྲོ་མ་བཅུག་གོ།