Read Tibetan — པོད་སྐད་Tibetan Old Testament 2011 ཡོབ 28 Bible Online

ཡོབ 28 - Tibetan — པོད་སྐད་Tibetan Old Testament 2011 bible

ཡོབ 28

¹དངུལ་འདོན་པའི་གཏེར་ཁ་རྣམས་ཡོད། གསེར་གཙང་མ་བཟོ་བའི་ས་གནས་རྣམས་ཡོད།

²ས་གཏེར་འདོན་པ་པོས་ས་ནས་ལྕགས་འདོན་པར་བྱེད། རྡོ་ཡི་ནང་ནས་ཟངས་བཞུ་བར་བྱེད།

³མི་ཚོས་མུན་པའི་གཏིང་དུ་འཚོལ་བར་བྱེད། དེ་ཚོས་ས་གཞི་གཏིང་དུ་འཚོལ་བར་བྱེད། དེ་ཚོས་མུན་པའི་ནང་དུ་བྲག་རྣམས་བྲུས།

⁴སུ་ཞིག་སྡོད་པ་ལས་ནི་ཐག་རིང་དང་། ཡང་ན་མི་ཡི་རྐང་པས་མ་གྲུལ་སར། མི་ཚོས་གཏེར་ཁའི་ཆེད་དུ་ཡུར་བ་བྲུས། དེ་ཚོས་ས་དོང་ནང་དུ་ཐག་པ་ལ། བཟུང་ནས་དབེན་པའི་ནང་དུ་ལས་བྱེད་དོ།

⁵ས་གཞི་སྟེང་དུ་ཁ་ཟས་སྐྱེས་ན་ཡང་། ས་གཞི་འདིའི་འོག་ཏུ་ཡོད་པའི་དངོས་པོ་རྣམས་ལ། མེ་ཡིས་མེད་པར་བཟོ་བར་བྱེད།

⁶ས་གཞིའི་རྡོ་ལ་ཨིན་དྲ་ནི་ལ་ཡོད། དེ་ཡི་རྡུལ་ནང་དུ་གསེར་ཡོད།

⁷བྱ་ཁྲ་རྣམས་ཀྱིས་གཏེར་གྱི་ལམ་མི་མཐོང་། དེ་ཡི་སྟེང་དུ་བྱ་རྒོད་ནམ་ཡང་འཕུར་མི་ཡོང་།

⁸སེང་གེ་ཡང་ན་འཇིགས་སྐྲག་ཅན་གྱི་སེམས་ཅན་ནི། དབེན་པའི་ལམ་གྱི་སྟེང་དུ་མི་འགྲུལ་ལོ།

⁹ས་གཏེར་འདོན་པ་པོས་བྲག་རི་མཁྲེགས་ཤོས་བརྐོ་བ་དང་། རི་བོའི་རྨང་གཞིར་བརྐོ་བར་བྱེད།

¹⁰དེ་ཚོས་བྲག་འོག་འགྲུལ་ལམ་བྲུས་པའི་སྐབས། དེ་ཚོར་རྩ་ཆེའི་རྡོ་རྣམས་རྙེད་པར་འགྱུར།

¹¹དེ་ཚོས་རྒྱུགས་ཆུའི་འབྱུང་ཁུང་བྲུས་པ་དང་། དེར་གང་སྦས་ནས་ཡོད་པ་རྣམས་གསལ་སྟོན་བྱས།

¹²འོན་ཀྱང་ཤེས་རབ་འཚོལ་ན་གང་དུ་རྙེད། ང་ཚོས་དྲན་དབང་གི་སློབ་སྦྱོང་གང་དུ་བྱེད་ཐུབ་བམ།

¹³མི་ཡི་ཁྲོད་དུ་ཤེས་རབ་མི་རྙེད་དོ། སུས་ཀྱང་དེ་ཡི་རིན་ཐང་ངོ་མ་མི་ཤེས་སོ།

¹⁴རྒྱ་མཚོ་དང་ནི་མཚོ་ཡི་གཏིང་རིང་ཐུང་ཚོས་སྨྲ། དེ་རུ་ཤེས་རབ་མི་རྙེད་དོ།

¹⁵དེ་ནི་གསེར་དང་དངུལ་གྱིས་ཉོ་མི་ཐུབ།

¹⁶གསེར་སྤུས་ལེགས་དང་ནི་ཕྲ་ལེགས་ཤོས་རྣམས་ཀྱི་ཀྱང་། དེ་ཡི་རིང་ཐང་འདྲ་མཚུངས་མཉམ་མི་ཐུབ།

¹⁷དེ་ནི་གསེར་དང་གསེར་གྱི་བུམ་པ་དང་། ལེགས་ཤོས་ཤེལ་ལས་རིན་གོང་ཆེ་བ་ཡོད།

¹⁸བྱུ་རུ་ཤེལ་དང་པད་མ་ར་ག་བཅས། དེ་ལས་ཤེས་རབ་རིན་ཐང་ལྷག་པར་ཆེ།

¹⁹པུསེ་པ་རག་དང་གསེར་བཙོ་མ་རིན་ཐང་དེས། ཤེས་རབ་ཀྱི་ནི་རིན་ཐང་འདྲན་མི་ཐུབ།

²⁰དེ་བས་ཤེས་རབས་ཀྱི་འབྱུང་ཁུངས་གང་དུ་ཡོད། ང་ཚོས་དྲན་དབང་གི་སློབ་སྦྱོང་གང་དུ་བྱེད་ཐུབ་བམ།

²¹གསོན་པོའི་སྲོག་ཆགས་ཀྱིས་ཀྱང་དེ་མཐོང་མི་ཐུབ། འཕུར་བའི་བྱིའུས་ཀྱང་ནི་མཐོང་མི་ཐུབ།

²²འཆི་བ་དང་ནི་འཇིགས་པ་དེ་ཚོ་ཡི། དཀྲོག་གཏམ་འབའ་ཞིག་ཐོས་པར་ཁས་ལེན་བྱེད།

²³དཀོན་མཆོག་གཅིག་པོས་ལམ་དེ་མཁྱེན་པ་དང་། ཤེས་རབ་གང་དུ་རྙེད་པའི་གནས་དེ་མཁྱེན།

²⁴གང་ལ་ཟེར་ན་ཁོང་གིས་ས་གཞིའི་མཐར། ནམ་མཁའི་འོག་ཏུ་ཡོད་པ་ཐམས་ཅད་གཟིགས།

²⁵དཀོན་མཆོག་ཁོང་གིས་རླུང་ལ་ནུས་སྟོབས་གནང་བའི་སྐབས། རྒྱ་མཚོའི་རྒྱ་ཁྱོན་ཇི་ཡོད་ཐག་ཆོད་གནང་།

²⁶ཁོང་གིས་ཆར་པ་གང་དུ་བབས་རྒྱུ་དང་། འབྲུག་གི་སྐད་ཀྱི་སྤྲིན་གྱི་ལམ་དེ་ནི། གང་དུ་རྒྱུགས་མིན་ཐག་ཆོད་གནང་ངོ།

²⁷དེ་སྐབས་ཁོང་གིས་ཤེས་རབ་གཟིགས་པ་དང་། དེ་ཡི་རིན་ཐང་སོགས་ལ་རྟགས་དཔྱད་གནང་། ཁོང་གིས་དེ་ལ་བཀའ་འཁྲོལ་གནང་།

²⁸དཀོན་མཆོག་ཁོང་གིས་མི་ཚོར་བཀའ་གནང་བས། ཁྱོད་ཚོར་ཤེས་རབ་དགོས་ན་གཙོ་བོ་ལ་གུས་བཀུར་བྱེད་དགོས། རྟོགས་པའི་ཆེད་དུ་ཁྱོད་ཚོས་ངེས་པར་དུ། ངན་པའི་ལས་རྣམས་སྤོང་དགོས༎