Read Tibetan — པོད་སྐད་Tibetan Old Testament 2011 ཡོབ 4 Bible Online

ཡོབ 4 - Tibetan — པོད་སྐད་Tibetan Old Testament 2011 bible

ཡོབ 4

¹གལ་ཏེ་ང་ཡིས་ཁྱེད་ལ་གཏམ་སྨྲས་ན། ཁྱེད་ཀྱིས་ང་ལ་ཁོང་ཁྲོ་ཟ་ཡོང་ངམ། ང་སྐད་ཆ་མ་སྨྲས་སྡོད་ཐུབ་ཀྱི་མེད།

³མང་པོར་ཁྱེད་ཀྱི་སློབ་སྟོན་གནང་བ་དང་། ལག་པ་སྟོབས་མེད་རྣམས་ལ་སྟོབས་ཤུགས་གནང་།

⁴སུ་ཞིག་སྟོབས་མེད་རྣམས་ཀྱང་ཐང་ཆད་ནས། འགྱེལ་བ་ཡིན་ན་ཁྱེད་ཀྱིས་བཀའ་ཡིས་ཡར་ལང་བར་སེམས་ཤུགས་གནང་།

⁵ད་ལྟ་དཀའ་ངལ་འཕོག་པའི་རེ་མོས་ཁྱོད་ཡིན་པས། དེ་ལ་གདོང་ལེན་བྱ་རྒྱུར་ཧོན་འཐོར་ཡོད།

⁶ཁྱོད་ཀྱིས་དཀོན་མཆོག་ལ་མཆོད་པས། སྐུ་ཚེར་ཉེས་སྐྱོན་གང་ཡང་མེད་པ་དང་། ཡིད་ཆེས་རེ་བ་ཆེན་པོ་ཡོད་དགོས་སོ།

⁷ད་ནི་ཐུགས་ལ་དགོངས་ནས་བསྟན་རོགས་གནང་། དྲང་བདེན་མི་ནི་ག་དུས་འཇིག་ཡོད་དམ།

⁸མི་ཚོས་ས་ཞིང་ངན་པ་རྨོ་བ་དང་། དེ་ནང་ངན་པའི་ས་བོན་འདེབས་མཁན་ཚོས། ད་ཆ་དེ་ཚོས་རང་གི་བཏབ་པའི། ལོ་ཏོག་ངན་པ་བསྡུ་བ་ངས་མཐོང་བྱུང་།

⁹དཀོན་མཆོག་ཁོང་ནི་ཐུགས་ཁྲོའི་ངང། རླུང་འཚུབ་ལྟ་བུར་དེ་དག་མེད་པར་མཛད།

¹⁰མི་ངན་རྣམས་ཀྱིས་སེང་གེའི་ངར་སྐད་ལྟར། དྲག་པོར་འདོན་སྐབས་དཀོན་མཆོག་གིས། དེ་ཚོར་ངར་སྐད་མེད་པར་མཛད་པ་དང་། དེ་ཚོའི་སོ་ཡང་བཅག་པར་མཛད་གནང་ངོ་།

¹¹གང་ཡང་བསད་རྒྱུ་མ་ཐོབ་ནས། ཟ་རྒྱུ་མེད་པ་སེང་གེ་རྣམས་ལྟར་དེ་ཚོ་འཆི་བ་དང་། དེ་ཚོའི་བུ་ཕྲུག་ཚོ་ཁ་འཐོར་རོ།

¹²ཐེངས་གཅིག་གསང་བར་གཏམ་ཞིག་སླེབས། གཏམ་དེ་གསལ་པོ་མེད་པའི་ངས་གོ་དཀའ།

¹³མཚན་གྱི་རྨི་ལམ་འཚུབ་པོ་ལྟར་དེ་ཡིས་ངའི་གཉིད་དཀྲུགས།

¹⁴འཇིགས་སྣང་གིས་ང་འགུལ་ཞིང་འདར། གཟུགས་པོ་ཡོངས་རྫོགས་འཇིགས་པས་གཡོ་འགུལ་བྱས།

¹⁵འཇམ་པོའི་རླུང་ཞིག་ང་ཡི་གདོང་ལ་ཕོག། འཇིགས་ནས་ལུས་ཀྱི་བ་སྤུ་ཡར་ལངས་སོ།

¹⁶དེ་རུ་ང་ཡི་གཟུགས་དབྱིབས་ཞིག་མཐོང་བས། དེ་ནི་ཇི་འདྲ་ཡིན་པ་བརྗོད་མི་ཐུབ། དེ་ནས་ང་ཡིས་སྒྲ་ཆུང་ཞིག་ཐོས་བྱུང་།

¹⁷དཀོན་མཆོག་ཁོང་གི་སྤྱན་སྔ་རུ། མི་ནི་དྲང་བདེན་ཞིག་ཏུ་འགྱུར་སྲིད་དམ། རང་གི་བཀོད་པ་པོ་ཡི་སྤྱན་སྔ་རུ་མི་ཞིག་་དམ་པ་འབྱུང་ཐུབ་བམ།

¹⁸དཀོན་མཆོག་མཐོ་རིས་ཀྱི་ཞབས་ཕྱིར་ཡིད་མི་ཆེས། ཕོ་ཉ་ཚོ་ལ་སྐྱོན་ཞིག་ཡོད་པར་གཟིགས།

¹⁹ཉིད་ཀྱི་བསམ་བློར་ཁོང་གིས་འདམ་རྫབ་ཀྱི་སྲོག་ཆགས། ཡང་ན་མུག་པ་ལྟ་བུ་རྡོག་རྫི་གཏོང་ཐུབ་པའི་རྡུལ་གྱི་དངོས་པོར་ཡིད་ཆེས་གནང་སྲིད་དམ།

²⁰མི་ཞིག་སྔ་དྲོ་གསོན་པོ་ཡིན་ན་ཡང་། ཕྱི་དྲོ་མ་སླེབས་གོང་དུ་འཆི་བར་སྲིད།

²¹ཁོ་ལ་ཇི་ཡོད་པ་རྣམས་ཕྱིར་ལེན་ནས། ཤེས་རབ་མེད་པར་ཁོ་འཆིའོ༎