Read Tibetan — པོད་སྐད་Tibetan Old Testament 2011 གསུང་མགུར 147 Bible Online

གསུང་མགུར 147 - Tibetan — པོད་སྐད་Tibetan Old Testament 2011 bible

གསུང་མགུར 147

¹གཙོ་བོ་དཀོན་མཆོག་ལ་ནི་བསྟོད་པ་ཕུལ་ཞིག། ང་ཚོའི་དཀོན་མཆོག་ལ་ནི་བསྟོད་དབྱངས་འབུལ་རྒྱུ་ལེགས། ཁོང་ལ་བསྟོད་རྒྱུ་དེ་ནི་ཡིད་དུ་འོང་བ་དང་འོས་པ་ཡིན།

²གཙོ་བོ་དཀོན་མཆོག་གིས་ཡེ་རུ་ཤ་ལེམ་སྐྱར་དུ་བཟོས་གནང་ཞིང་། བཙན་བྱོལ་བ་རྣམས་ལ་ཁོང་གིས་ཕྱིར་འཁྲིད་ཕེབས་བཞིན་འདུག།

³སེམས་ཆགས་པ་རྣམས་ལ་ཁོང་གིས་གསོ་གནང་ངོ་། དེ་ཚོས་རྨ་ལ་ཁོང་གིས་རྨ་རས་དཀྲི་བར་མཛད།

⁴ཁོང་གིས་སྐར་མའི་ཚོགས་ཀྱི་གྲངས་ཐག་བཅད་གནང་ཡོད་ཅིང་། སྐར་མ་རེ་རེ་ལ་ནི་མིང་ཡང་བཏགས་ཡོད་དོ།

⁵ང་ཚོའི་དཀོན་མཆོག་ཆེ་ཞིང་མཐུ་སྟོབས་ལྡན་པ་ལགས། ཁོང་གི་ཤེས་རབ་དེ་ལ་སུས་ཀྱང་ཚད་མི་ཐུབ།

⁶ཉམ་ཆུང་ཚུལ་ལྡན་རྣམས་ལ་ཁོང་གིས་ཡར་འདེགས་ཤིང་། འོན་ཀྱང་ངན་པར་ས་གཞིར་དབྱུགས་ནས་དུམ་བུར་བཟོས།

⁷གཙོ་བོ་དཀོན་མཆོག་ལ་ནི་བསྟོད་པའི་མགུར་མ་ལེན། ང་ཚོའི་དཀོན་མཆོག་ལ་ནི་པི་ཝང་གིས་གླུ་དབྱངས་ལེན།

⁸ཁོང་གིས་ནམ་མཁར་སྤྲིན་གྱི་ཡོངས་སུ་ཁྱབ་པར་གནང་། ས་གཞི་ཡོངས་སུ་ཁོང་གིས་ཆར་ཆུ་གཏོང་གནང་ཞིང་། ཁོང་གིས་རི་བོ་རྣམས་སུ་རྩ་རྣམས་སྐྱེས་སུ་བཅུག།

⁹ཁོང་གི་སེམས་ཅན་རྣམས་ལ་ཁ་ཟས་གནང་བ་དང་། ཕོ་རོག་ཕྲུ་གུ་སྐད་འབོད་བྱེད་དུས་ཁོང་གིས་དེ་ཚོར་ཟས་སྦྱིན་ནོ།

¹⁰ཁོང་ནི་སྟོབས་དང་ལྡན་པའི་རྟ་ལ་ཐུགས་མི་མཉེས། དམག་མི་དཔའ་བོ་རྣམས་ལ་ཡང་ཐུགས་མི་མཉེས་སོ།

¹¹འོན་ཀྱང་ཁོང་ལ་གུས་བཀུར་བྱེད་མཁན་དང། ཁོང་གི་རྒྱུན་ལྡན་ཐུགས་བརྩེར་བློ་གཏད་བྱེད་མི་རྣམས་ལ་ཐུགས་མཉེས་སོ།

¹²ཀྱེ་ཡེ་རུ་ཤ་ལེམ་གཙོ་བོ་དཀོན་མཆོག་ལ་བསྟོད་ཅིག། ཀྱེ་ཛི་ཡོན་ཁྱོད་ཀྱི་དཀོན་མཆོག་ལ་བསྟོད་ཅིག།

¹³ཁོང་གིས་ཁྱོད་ཚོའི་སྒོ་རྣམས་བརྟན་པོར་འཇོག་གནང་ཞིང་། ཁོང་གིས་ཁྱོད་ཀྱི་མི་ཚོར་བྱིན་རླབས་གནང་ངོ།

¹⁴ཁོང་གིས་ཁྱོད་ཀྱི་ས་མཚམས་དེ་ཚོ་བརྟན་པོ་འཇོག་གནང་བ་དང་། གྲོ་བཅུད་བཟང་ཤོས་ཁྱོད་ལ་ཚིམ་པར་མཛད་པར་འགྱུར།

¹⁵ཁོང་གིས་ས་གཞི་ལ་བཀའ་བཀོད་གནང་བ་དང་། ལམ་སང་དེ་ཚོས་ཁོང་གི་བཀའ་ལ་སྲུང་བར་བྱས།

¹⁶ཁོང་གིས་མལ་གཟན་དང་འདྲ་བ་གངས་བཀྲམས་བཅུག་ཅིང་། ཐལ་བ་འདྲ་བ་བ་མོ་སྟོར་གནང་ངོ་།

¹⁷སེར་བ་རྡོ་ཧྲུག་ལྟ་བུ་ཁོང་གིས་ཕབ་པ་དང་། ཁོང་གིས་བཏང་བའི་གྲང་མོ་སུ་ཡི་བཟོད་མི་ཐུབ།

¹⁸དེ་ནས་ཁོང་གིས་བཀའ་རྒྱ་གནང་བས་གངས་ནི་བཞུར། ཁོང་གིས་རླུང་བཏང་བས་ཆུ་ནི་རྒྱུག།

¹⁹རང་གི་མི་འབངས་ལ་ཁོང་གིས་རང་གི་འཕྲིན་གནང་བ་དང་། ཨིསི་རཱཨེལ་ལ་ནི་རང་གི་བཀའ་ཁྲིམས་གནང་ངོ་།

²⁰མི་རིགས་གཞན་ལ་ཁོང་གི་དེ་འདྲ་གནང་མེད་ཅིང་། ཁོང་གི་བཀའ་ཁྲིམས་རྣམས་དེ་ཚོས་མི་ཤེས་སོ། གཙོ་བོ་དཀོན་མཆོག་ལ་བསྟོད་བསྔོགས་ཤིག།