Read Tibetan — པོད་སྐད་Tibetan Old Testament 2011 གསུང་མགུར 17 Bible Online

གསུང་མགུར 17 - Tibetan — པོད་སྐད་Tibetan Old Testament 2011 bible

གསུང་མགུར 17

¹ཉེ་རིང་མེད་པར་ཁྲིམས་དྲང་ཡོང་བའི་ཕྱིར། གཙོ་བོ་དཀོནམཆོག་ཁྱེད་ལ་ཁོ་བོ་ཡིས། ཞུ་འདུན་བྱས་པར་གསན་ཆོག་མཛད་པ་གནང་། སྐྱབས་གྲོགས་ཞུས་པའི་སྐད་འབོད་དྲང་པོ་ལ། ཉིད་ཀྱིས་གསན་ཆོག་ངེས་པར་མཛད་པ་གནང་།

²ཁྱེད་ཀྱིས་དྲང་པོ་གང་ཡིན་མཁྱེན་པས་ན། ང་ཡི་ཕྱོགས་གཏོགས་གནང་སྟེ་ཁྲིམས་གཅོད་མཛོད།

³ཁྱེད་ཀྱིས་ང་ཡི་སེམས་གཤིས་མཁྱེན་ཡོད་པས། ཁྱེད་ནི་མཚན་མོར་ངའི་རྩར་ཕྱག་ཕེབས་ཤིང་། ང་ལ་བརྟགས་དཔྱད་ཞིབ་པར་མཛད་གནང་སྟེ། ངའི་ནང་འདོད་ངན་གང་ཡང་མ་རྙེད་དོ།

⁴ང་ནི་སྐྱེ་བོ་གཞན་དང་འདྲ་མིན་གྱིས། ཁ་ནས་ཚིག་ངན་གཅིག་ཀྱང་མི་སྨྲ་བར། ཁྱེད་ཀྱི་བཀའ་རྒྱ་ཡོངས་རྫོགས་བརྩི་སྲུང་ཞུས། དྲག་ཤུལ་གྱི་ལམ་དུ་ང་ནི་འབྲངས་མེད་དོ།

⁵ང་ནི་རྒྱུན་དུ་ཁྱེད་ཀྱི་ལམ་ནང་འགྲུལ། ལམ་མཆོག་དེ་ལས་ནམ་ཡང་འཛོལ་མེད་དོ།

⁶ང་ནི་ཀྱེ་དཀོན་མཆོག་ཁྱེད་ལ་གསོལ་བ་འདེབས། གང་ལགས་ཟེར་ན་ང་ལ་ཁྱེད་ཉིད་ཀྱིས། གསན་ཆོག་མཛད་དེ་བཀའ་ལན་གནང་བར་མཛད། དེ་བས་ང་ཡི་ཕྱོགས་སུ་ཞལ་བསྒྱུར་ཏེ། ང་ཡིས་ཞུ་བའི་ཚིག་ལ་གསན་པར་མཛོད།

⁷ཁྱེད་ཀྱི་ངོ་མཚར་ཆེ་བའི་ཐུགས་བརྩེ་དེ། མངོན་པར་མཛད་དེ་ང་ལ་སྐྱབས་གྲོགས་གནང་། ང་ནི་ཁྱེད་ཀྱི་ཕྱོགས་སུ་གནས་པར་བརྟེན། དགྲ་བོའི་ཉེན་ལས་ཡོངས་སུ་ཐར་བར་འགྱུར།

⁸ཉིད་ཀྱི་སྤྱན་གྱི་འབྲས་བུར་སྲུང་སྐྱོབ་མཛད་པ་བཞིན། ང་ལའང་དེ་བཞིན་སྐྱབས་གྲོགས་མཛད་དུ་གསོལ། ངན་པས་ང་ལ་འཐབ་རྒོལ་བྱེད་པའི་སྐབས། ཉིད་ཀྱི་ཤོག་གྲིབ་འོག་ཏུ་སྦས་པར་མཛོད། དགྲ་བོ་གདུག་པ་ཅན་གྱིས་མཐའ་ནས་བསྐོར།

¹⁰དེ་ཚོའི་སེམས་ནང་སྙིང་རྗེ་གང་ཡང་མེད། ཁ་ནས་ང་རྒྱལ་ཆེ་བའི་གཏམ་བརྗོད་དོ།

¹¹ང་ནི་ས་ཕྱོགས་གང་དུ་ཁ་བསྒྱུར་ཀྱང་། དེ་ཚོ་ང་ཡི་ཕྱོགས་བཞིར་མཐའ་བསྐོར་ཞིང་། ང་ལ་འགྲིལ་བར་བྱེད་པའི་གོ་སྐབས་འཚོལ།

¹²དེ་ཚོས་ང་ལ་དུམ་བུར་བཟོ་བའི་ཕྱིར། སེང་གེ་བཞིན་དུ་ལམ་སྒུག་བྱེད་ནས་བསྡད།

¹³གཙོ་བོ་དཀོན་མཆོག་ད་ནི་ཁྱེད་ཕེབས་ཏེ། ང་ཡི་དགྲ་བོར་འཐབ་རྒོལ་མཛད་གནང་ཞིང་། དེ་ཚོ་ཡོངས་སུ་ཕམ་པར་མཛད་དུ་གསོལ། ཁྱེད་ཀྱི་རལ་གྲིའི་སྒོ་ནས་བདག་ཉིད་ལ། ངན་པའི་ལག་ནས་སྐྱབས་གྲོགས་མཛད་དུ་གསོལ།

¹⁴ཚེ་འདིར་མཁོ་བའི་རྒྱུ་དངོས་ཇི་ཡོད་རྣམས། ཐོབ་མཁན་མི་ལས་ང་ལ་སྐྱོབ་ཏུ་གསོལ། ཉིད་ཀྱིས་དེ་ཚོའི་དོན་དུ་གསོག་འཇོག་པའི། དཀའ་འཚེ་དྲག་པོས་དེ་ཚོར་ཉེས་ཆད་མཛོད། ཆད་པ་དེ་ནི་དེ་ཆོའི་བུ་བརྒྱུད་བར་དུ་འདངས་ངེས་དང་། ཚ་བོ་ཚ་མོའི་ཆེད་དུ་ཡང་ལྷག་འཕྲོས་ལུས་པར་ཤོག།

¹⁵འོན་ཀྱང་ངས་ནི་ཉེས་པ་བྱས་མེད་པས། ཁྱེད་ཀྱི་ཞལ་ངོ་ངེས་པར་མཇལ་བར་འགྱུར། གཉིད་ནས་བསད་སྐབས་སུ། སྐུ་ཉིད་ང་དང་འགྲོགས་པའི་ཉམས་སྣང་གིས། ང་ཡི་སེམས་ནི་དགའ་སྤྲོའི་ཡོངས་སུ་ཁྱབ༎