Read Tibetan — པོད་སྐད་Tibetan Old Testament 2011 གསུང་མགུར 20 Bible Online

གསུང་མགུར 20 - Tibetan — པོད་སྐད་Tibetan Old Testament 2011 bible

གསུང་མགུར 20

¹ཁྱེད་རང་དཀའ་ངལ་ནང་དུ་ཚུད་པའི་སྐབས། གཙོ་བོ་དཀོན་མཆོག་གིས་ཁྱོད་ལ་བཀའ་ལན་གནང་བར་ཤོག། ཡ་ཀོབ་ཉིད་ཀྱི་དཀོན་མཆོག་དེ་ཉིད་ཀྱིས། ཁྱེད་ལ་སྲུང་སྐྱོབ་བཙན་པོ་གནང་བར་ཤོག།

²ཉིད་ཀྱི་མཆོད་ཁང་ནང་ནས་ཁྱོད་རང་ལ། མགོན་དང་སྐྱབས་གྲོགས་ཁོང་གིས་གནང་བར་ཤོག། རི་བོ་ཛི་ཡོན་ཕྱོགས་ནས་ཁྱོད་ལ་སྐྱབས་གྲོགས་མཛད་པར་ཤོག།

³ཁྱོད་ཀྱིས་འབུལ་བ་རྣམས་ལ་ཁོང་གི་ངོས་ལེན་གནང་བར་ཤོག། ཁྱོད་ཀྱི་དམར་མཆོད་རྣམས་ལ་ཐུགས་སེམས་མཉེས་པར་ཤོག།

⁴ཁྱོད་ཀྱི་རེ་འདུན་ཚང་མ་སྒྲུབ་མཛད་དེ། ཁྱོད་ཀྱི་འཆར་གཞིར་ལམ་འགྲོ་ཡོང་བར་ཤོག།

⁵དེ་ནས་ང་ཚོས་ཁྱོད་ཀྱི་རྒྱལ་ཁ་ལ་བརྟེན་ནས། དགའ་བའི་སྐད་འབོད་ཆེན་པོ་སྒྲོག་པར་བྱ། ང་ཚོས་རང་གི་དཀོན་མཆོག་དེ་ཉིད་ལ། བསྟོད་བསྔགས་ཞུས་ཏེ་ཁྱོད་ཀྱི་རྒྱལ་ཁའི་སྐོར། དགའ་སྟོན་ཆེན་པོས་བརྩི་སྲུང་གྱིས་པར་བྱ། ཁྱོད་ཀྱི་ཞུ་འབོད་ཚང་མར་གཙོ་བོ་དཀོན་མཆོག་ཡིས། བཀའ་ལན་གསལ་པོར་ཁྱོད་ལ་གནང་བར་ཤོག།

⁶ཉིད་ཀྱིས་འདེམས་བསྐོས་མཛད་པའི་རྒྱལ་པོ་ལ། གཙོ་བོ་དཀོན་མཆོག་གིས་རྒྱལ་ཁ་གནང་བ་ད་ངེས་ཤེས། མཐོ་རིས་དམ་པའི་གནས་ནས་ཁོང་ཉིད་ཀྱིས། དེ་ལ་བཀའ་ལན་ཁོང་གིས་གནང་། ཁོང་གི་ཉིད་ཀྱི་མཐུ་དང་ནུས་པ་ཡིས། དེ་ལ་རྒྱལ་ཁ་ཆེན་པོ་གནང་བར་འགྱུར།

⁷འགའ་ཞིག་གིས་ནི་དམག་གི་ཤིང་རྟ་དང་། འགའ་རེས་རྟ་ཚོགས་མང་པོར་བློ་བཅོལ་ལོ། འོན་ཀྱང་ང་ཚོས་རང་གི་གཙོ་བོ་དཀོན་མཆོག་གི། མཐུ་དང་ནུས་སྟོབས་ཁོ་ནར་བློ་བཅོལ་བྱ།

⁸སྐྱེ་བོ་དེ་འདྲ་རྐང་པ་འཁོན་ཏེ་འགྱེལ། འོན་ཀྱང་ང་ཚོ་ལངས་ཤིང་བརྟན་པོར་གནས།

⁹ཀྱེ་གཙོ་བོ་དཀོན་མཆོག་ཁྱེད་ཀྱིས་རྒྱལ་པོ་ལ། རྒྱལ་ཁ་གནང་ཞིང་ང་ཚོའི་ཞུ་འབོད་ལ། ཉིད་ཀྱིས་བཀའ་ལན་གནང་བར་མཛོད༎