Read Tibetan — པོད་སྐད་Tibetan Old Testament 2011 ལེགས་བཤད 22 Bible Online

ལེགས་བཤད 22 - Tibetan — པོད་སྐད་Tibetan Old Testament 2011 bible

ལེགས་བཤད 22

¹ཁྱོད་ཀྱིས་སྙན་གྲགས་བཟང་པོ་དང་རྒྱུ་ནོར་མང་པོ་གཉིས་ཀྱི་དབར་འདམ་དགོས་ན། སྙན་གྲགས་བཟང་པོ་དེ་འདམས་དགོས་སོ།

²ཕྱུག་པོ་དང་དབུལ་པོ་གཉིས་ཀར་འདྲ་མཚུངས་ཡོད་པ་ནི། གཙོ་བོ་དཀོན་མཆོག་གིས་དེ་ཚོ་གཉིས་ཀ་བཟོས་གནང་བ་ཡིན་ནོ།

³བསམ་ཤེས་ཡོད་པའི་མི་ཚོས་དཀའ་སྡུག་ཡོང་བ་མཐོང་བ་དང་མཐར་བར་བྱེད་དོ། འོན་ཀྱང་མི་བསམ་མེད་ཞིག་གིས་དེའི་ནང་འགྲོ་བསྐྱོད་བྱེད་པ་དང་རྗེས་སུ་འགྱོད་པ་བྱེད་དོ།

⁴གཙོ་བོ་དཀོན་མཆོག་གི་བཀའ་ལ་ཉན་ནས་ཉམ་ཆུང་གྱིས་པ་ཡིན་ན་ཁྱོད་ལ་རྒྱུ་ནོར་དང་གུས་ཞབས་དང་ཚེ་རིང་པོ་ཐོབ་པར་འགྱུར་རོ།

⁵ཁྱོད་ཀྱིས་རང་གི་སྲོག་ལ་བརྩེ་ཞིང་ཡོད་ན། སྤྱོད་ངན་གྱི་ལམ་དུ་ཡོད་པའི་རྙི་ལས་ཐག་རིང་སྡོད་ཅིག

⁶ཕྲུ་གུ་ཚོ་ལ་ཇི་ལྟར་འཚོ་དགོས་བསླབ་པ་ཡིན་ན། དེ་ཚོའི་མི་ཚེའི་རིང་དེ་དྲན་པར་བྱེད་དོ།

⁷མི་དབུལ་པོ་ཚོ་ནི་ཕྱུག་པོ་ཚོའི་ཚེ་གཡོག་ཡིན་ནོ། དངུལ་གཡར་བ་ཡིན་ན་ཁྱོད་གཡར་སྐྱིན་གཏོང་མཁན་གྱི་ཚེ་གཡོག་ཏུ་འགྱུར།

⁸ཁྱོད་ཀྱི་དྲང་མིན་གྱི་ས་བོན་འདེབས་པ་ཡིན་ན་རྐྱེན་ངན་སྐྱེས་བ་དང་། ཁྱོད་ཀྱིས་གཞན་ལ་གནར་གཅོད་བྱ་རྒྱུ་རྫོགས་པར་འགྱུར་རོ།

⁹གཏོང་ཕོད་ཅན་འགྱུར་ནས་རང་གི་ཁ་ཟས་དེ་དབུལ་པོ་མཉམ་དུ་བགོས་ཤིག་དང་། ཁྱོད་ལ་བྱིན་རློབ་ཐོབ་པར་འགྱུར།

¹⁰མི་རང་མཐོང་ཅན་རྣམས་ཐར་སྐྲོད་གཏོང་ལ། རྩོད་གླེང་འཁྲུགས་རྩོད་དང་མིང་འབོད་བཅས་རྫོགས་པར་འགྱུར་རོ།

¹¹ཁྱོད་ཀྱིས་སེམས་གཙང་མ་དང་བྱམས་བརྩེའི་གཏམ་ལ་བརྩེ་བ་བྱེད་བཞིན་ཡོད་ན། རྒྱལ་པོ་ཡང་ཁྱོད་ཀྱི་གྲོགས་པོར་འགྱུར་རོ།

¹²གཙོ་བོ་དཀོན་མཆོག་གིས་རྫུན་ཤོད་མཁན་གྱི་གཏམ་ལ་འགག་པ་གནང་ནས་བདེན་པར་སྲུང་སྐྱོབ་གནང་ངོ་།

¹³མི་ལེ་ལོ་ཅན་ཁྱིམ་ནང་བསྡད་པ་དང་། ཁོས་ཁོ་ཕྱི་རུ་སོང་བ་ཡིན་ན་སེང་གེས་ཟའོ་ཟེར་རོ།

¹⁴ལོག་གཡེམ་ནི་རྙི་ཞིག་ཡིན་པ་དང་། དེས་གཙོ་བོ་དཀོན་མཆོག་གི་ཁྲོ་བ་མཛད་མཁན་ཚོ་ལ་བཟུང་བར་བྱེད་དོ།

¹⁵ཕྲུ་གུ་ཚོས་རང་བཞིན་གྱི་ལྐུགས་པ་དང་དོ་སྣང་མེད་པའི་བྱ་བ་བྱེད་དོ། འོན་ཀྱང་ཉེས་རྡུང་ལེགས་པ་ཞིག་གི་སྤྱོད་ལམ་ཇི་ལྟར་བྱེད་དགོས་པ་སློབ་པར་བྱེད་དོ།

¹⁶ཁྱོད་ཀྱིས་ཕྱུག་པོ་ལ་བྱ་དགའ་བྱིན་པ་དང་། ཡང་ན་ཕྱུག་པོ་འགྱུར་བའི་ཆེད་དུ་དབུལ་པོར་མནར་གཅོད་བཏང་བ་ཡིན་ན། ཁྱོད་རང་ཉིད་དབུལ་པོར་འགྱུར་རོ༎

¹⁷ཉོན་ཞིག། ངས་ཁྱོད་ལ་སྐྱེ་བོ་ཤེས་རབ་ལྡན་པ་ཚོས་གསུངས་ཡོད་པ་བསླབ་པར་བྱའོ། དེ་ཚོའི་སློབ་སྟོན་རྣམས་ལ་སྦྱོངས་དར་གྱིས་ཤིག

¹⁸ཁྱོད་ཀྱིས་དེ་ཚོ་དྲན་ནས་ངག་ཐོག་ནས་མཛོད་ཐུབ་ན་དགའ་བར་འགྱུར་རོ།

¹⁹ང་ནི་ཁྱོད་ཀྱིས་གཙོ་བོ་དཀོན་མཆོག་ལ་བློ་བཅོལ་བར་འདོད་དོ། དེ་བས་ན་ད་ལྟ་ངས་དེ་ཚོ་ཁྱོད་ལ་བརྗོད་བཞིན་ཡོད་དོ།

²⁰ངས་ཁྱོད་ཀྱི་ཆེད་དུ་གཏམ་དཔེ་སུམ་བཅུ་བྲིས་ཡོད་དོ། དེ་ཚོ་ནང་ཡོན་ཏན་དང་བསླབ་བྱ་བཟང་པོ་ཡོད་དོ།

²¹དེ་ཚོས་ཁྱོད་ལ་དངོས་སུ་དྲང་བདེན་ཇི་ཡིན་པ་དེ་སློབ་པར་བྱེད་དོ། དེ་ནས་ཁྱོད་ལ་གཏོང་མཁན་ཚོར་ཁྱོད་ཀྱིས་ལན་དྲང་པོ་སྤྲད་ཐུབ་ཡོང༎

²²ཁྱོད་ཀྱིས་ལེན་ཐུབ་ཀྱི་འདུག་བསམ་ནས་དབུལ་པོའི་ཁེ་ཕན་མ་ལེན་ཞིག ཁྲིམས་ཁང་ནས་སྐྱབས་མེད་ལུས་པ་ཚོ་ལས་ཁེ་ཕན་མ་ལེན་ཞིག

²³གཙོ་བོ་དཀོན་མཆོག་གིས་དེ་ཚོའི་ཆེད་དུ་ཁ་མཆུ་རྩོད་པར་མཇད་པ་དང་། སུ་ཞིག་གི་འཇིགས་ནང་བསྐུལ་ན་དེ་ལ་ཁོང་གིས་འཇིགས་ནང་བསྐུལ་བར་མཛད་དོ༎

²⁴སྐྱེ་བོ་ངར་པོ་རླུང་ལངས་པོ་ཚོར་གྲོགས་པོ་མ་བཟོ་ཞིག

²⁵ཁྱོད་ཀྱིས་དེ་ཚོའི་གོམ་སྲོལ་སྦྱངས་བ་དང་དེ་ལ་བསྒྱུར་བ་གཏོང་མ་ཐུབ་པ་ཡོང་སྲིད་དོ༎

²⁶སུ་ཞིག་གིས་བུ་ལོན་གྱི་ཁས་ལེན་བྱེད་འགྱུར་མནའ་མ་སྐྱེལ་ཞིག

²⁷ཁྱོད་ཀྱིས་དེ་འཇལ་མ་ཐུབ་ན་དེ་ཚོས་ཁྱོད་ཀྱི་ཉལ་ཁྲི་ཡང་འཁྱེར་བར་བྱེད་དོ༎

²⁸ཁྱོད་ཀྱི་མེས་པོ་ཚོས་བཙུག་པའི་ས་མཚམས་རྙིང་པའི་རྡོ་མ་སྤོས་ཤིག།

²⁹ལས་བཟང་པོ་བྱ་མཁན་གྱི་མི་ཞིག་ང་ལ་སྟོན་དང་། ངས་ཁྱོད་ལ་མི་མང་ཆེ་བ་ལས་ལྷག་པ་རྒྱལ་པོའི་རོགས་པ་འོས་པ་ཞིག་སྟོན་པར་བྱའོ༎