Read Tibetan — པོད་སྐད་Tibetan Old Testament 2011 འཆད་པ་པོ 1 Bible Online

འཆད་པ་པོ 1 - Tibetan — པོད་སྐད་Tibetan Old Testament 2011 bible

འཆད་པ་པོ 1

¹འདི་རྣམས་དཱ་བིད་ཀྱི་སྲས་སློབ་དཔོན་ཡེ་རུ་ཤ་ལེམ་གྱི་རྒྱལ་པོ་ཡིན་པ་དེའི་བཀའ་ཡིན་ནོ།

²སློབ་དཔོན་གྱི་གསུངས་པ། མི་ཚེ་ལ་སྙིང་པོ་མེད་ཅིང་སྙིང་པོ་རྩ་བ་ནས་མེད་དོ།

³ཁྱོད་ཀྱི་མི་ཚེའི་ནང་ལས་བྱེད་པ་དང་ངལ་རྩོལ་བྱེད་བཞིན་མི་ཚེ་དེས་ཁྱོད་ལ་ཕན་ཐོག་ཅི་བྱུང་ངམ།

⁴མི་རབས་ཡོང་བ་དང་མི་རབས་ཕྱིན་ན་ཡང། འཛམ་གླིང་འདི་འགྱུར་བ་མེད་པར་རྒྱུན་དུ་གནས་སོ།

⁵ཉི་མ་ཤར་བ་དང་ཉི་མ་དེ་ནུབ་པར་འགྱུར། དེ་ནས་སླར་ཡང་ཤར་བའི་གནས་སུ་ལོག་ནས། ཡང་ཤར་བར་འགྱུར།

⁶རླུང་ནི་ལྷོ་དང་བྱང་ནས་རྒྱབ་པ་དང་བསྐོར་བ་རྒྱབ་བཞིན་སླར་ཕྱིར་ཡོང་བར་བྱེད་དོ།

⁷གཙང་པོ་ཐམས་ཅད་རྒྱ་མཚོའི་ནང་རྒྱུག་ན་ཡང། རྒྱ་མཚོ་ནི་ནམ་ཡང་མི་ཁེངས་སོ། ཆུ་དེ་ཐོག་མར་གཙང་པོ་ཡོད་སར་ཕྱིར་ལོག་འགྲོ་བ་དང་སླར་ཡང་སྔར་བཞིན་རྒྱུག་པར་བྱེད་དོ།

⁸དེ་ཚང་མ་ནི་ཚིག་གི་བརྗོད་མི་ཐུབ་པའི་ཐང་ཆད་པའི་གནས་སྟངས་སུ་འགྱུར། ང་ཚོའི་མིག་གི་མཐོང་ནས་ནམ་ཡང་ཚིམ་པར་མི་འགྱུར་རོ། ང་ཚོའི་རྣ་བས་ཐོས་ནས་ནམ་ཡང་ཚིམ་མི་ཡོང་།

⁹སྔར་ཇི་བྱུང་བ་སླར་ཡང་དེ་ལྟར་བྱུང་བར་འགྱུར། སྔོན་དུ་ཇི་བྱེད་པ་ལྟར་སླར་ཡང་དེ་ལྟར་བྱེད་པར་འགྱུར། འཛམ་གླིང་ཚང་མའི་ནང་གསར་པ་གང་ཡང་མེད་དོ།

¹⁰དེ་ཚོས་སྨྲས་པ། ལྟོས་དང། འདིར་གསར་པ་ཞིག་འདུག་ཅེས་བརྗོད་ན་ཡང། དེ་ནི་མིན་ནོ། དེ་ཚོ་ཚང་མ་ནི་ང་ཚོ་མ་སྐྱེས་པའི་དུས་རིང་སྔོན་དུ་བྱུང་ཟིན་ཡོད།

¹¹འདས་པའི་རིང་ཇི་འདྲ་བྱུང་བ་སུས་ཀྱང་མི་དྲན་པ་དང། མ་འོངས་པར་ད་ལྟ་དང་དེའི་རིང་ཇི་འདྲ་བྱུང་བ་ཧ་མི་གོའོ༎

¹²སློབ་དཔོན་ང་རང་ནི་ཡེ་རུ་ཤ་ལེམ་དུ་ཨིསི་རཱཨེལ་གྱི་རྒྱལ་པོ་བྱེད་བཞིན་ཡོད།

¹³ངས་འཛམ་གླིང་འདིའི་ནང་གང་གྱིས་པ་ཚང་མར་རྟགས་དཔྱད་བྱས་ནས་སློབ་སྦྱོངས་བྱ་རྒྱུའི་ཐག་ཆོད་གྱིས་པ་ཡིན་ནོ། དཀོན་མཆོག་གིས་ང་ཚོའི་སྟེང་ཁུར་པོ་ལྗིད་པོ་འཛོག་གནང་ཡོད།

¹⁴འཛམ་གླིང་འདིའི་ནང་ལ་ལས་ཇི་གྱིས་པ་ཚང་མ་ངས་མཐོང་བྱུང། ངས་དེ་ཚོ་ཚང་མ་ལ་སྙིང་པོ་མེད་པ་དང་རླུང་ལ་དེད་པ་དང་འདྲའོ་ཞེས་བརྗོད་རྒྱུ་ཡིན།

¹⁵ཁྱོད་ཀྱིས་སྐྱོག་སྐྱོག་ཞིག་འདྲོང་པོ་བཟོ་མི་ཐུབ་པ་དང། ཁྱོད་ཀྱིས་དངོས་པོ་མེད་པ་ཞིག་ལ་གྲངས་རྩིས་མི་ཐུབ་བོ།

¹⁶ངས་རང་གི་སེམས་ལ་ངའི་སྔོན་དུ་ཡེ་རུ་ཤ་ལེམ་དུ་རྒྱལ་སྲིད་སྐྱོངས་མཁན་སུ་འདྲ་ཞིག་ང་ལས་ཀྱང་སྐྱེ་བོ་རླབས་ཆེན་དང་ཤེས་རབ་ཅན་ཞིག་བྱུང་མེད་དོ། ངས་དངོས་སུ་ཤེས་རབ་དང་ཡོན་ཏན་ཇི་ཡིན་པ་དེ་ངས་ཤེས་ཀྱི་ཡོད་བཅས་སྨྲས་པ་ཡིན།

¹⁷ང་རང་གིས་ཡོན་ཏན་དང་གླེན་པའི་ཁྱད་པ་དང་ཤེས་རབ་དང་བླུན་པོའི་ཁྱད་པ་ལ་སྦྱངས་རྒྱུར་ཐག་ཆོད་ཟིན་པ་ཡིན་ནོ། འོན་ཀྱང་དེ་ནི་རླུང་ལ་རྗེས་དེད་བྱེད་པ་དང་འདྲ་བ་ངས་ཤེས་བྱུང།

¹⁸ཇི་ལྟར་ཁྱོད་ནི་ཤེས་རབ་དང་ལྡན་པས་ཁྱོད་ལ་སེམས་འཁྲལ་མང་བ་བྱུང་བར་འགྱུར་རོ། ཁྱོད་ཀྱིས་ཇི་ལྟར་མང་ཙམ་ཤེས་པས་དེ་ཙམ་ཁྱོད་ལ་དཀའ་ངལ་མང་བ་བྱུང་བར་འགྱུར་རོ༎