Read Tibetan — པོད་སྐད་Tibetan Old Testament 2011 གསུང་གླུ 2 Bible Online

གསུང་གླུ 2 - Tibetan — པོད་སྐད་Tibetan Old Testament 2011 bible

གསུང་གླུ 2

¹ང་ནི་ཤ་རོན་ལུང་གཤོང་མེ་ཏོག་དང་། རི་ཡི་ལུང་གཤོང་ཀུ་མུད་མེ་ཏོག་ཡིན།

²ཚེར་མའི་ཁྲོད་ཀྱི་ཀུ་མུད་མེ་ཏོག་འདྲ། ང་ཡི་སྙིང་སྡུག་བུད་མེད་ཁྲོད་དུ་ཡིན།

³ནགས་ཀྱི་སྡོང་པོའི་ཁྲོད་ཀྱི་ཀུ་ཤུའི་ཤིང་སྡོང་ལྟར། སྐྱེས་པ་གཞན་དང་བསྡུར་ན་ང་ཡི་བརྩེ་ལྡན་ལེགས་ཤོས་ཡིན། ང་ནི་དེ་ཡི་བསིལ་གྲིབ་འོག་སྡོད་དགའ། དེ་ཡི་ཤིང་ཏོག་དྲོ་བ་མངར་ཞིང་འདུག།

⁴ཁོང་གིས་ང་ལ་ཐུགས་སྤྲོའི་ཁང་དུ་འཁྲིད། དེ་རུ་ངའི་སྟེང་བརྩེ་བའི་དར་ཆ་བསྒྲེངས།

⁵རྒུན་འབྲུམ་གྱིས་ནི་ངའི་སྟོབས་སླར་གསོ་བྱོས། ཀུ་ཤུ་དེ་ཡིས་ང་ཡི་ངལ་དུབ་སངས་ཞིག། ང་ཡི་བརྩེ་བའི་ནུས་པ་ཞན་དུ་འགྱུར།

⁶ཁོང་གི་ཕྱག་གཡོན་ང་ཡི་མགོའི་འོག་ཡོད། ཕྱག་གཡས་པ་ཡིས་ང་ལ་བྱམས་བརྩེ་མཛད།

⁷ཡེ་རུ་ཤ་ལེམ་བུད་མེད་ཚོ་ངར་མནའ་སྐྱོལ། ང་གཉིས་བརྩེ་བར་བར་ཆད་མི་ཡོང་ཕྱིར། འཁྱུགས་པའི་ཤ་བ་དང་གནའ་བའི་མནའ་སྐྱེལ་ཞིག།

⁸ང་ཡི་བརྩེ་ལྡན་སྐད་དེ་ཐོས་ཤིང་འདུག། ཁོང་ནི་རི་བོའི་སྟེང་ནས་ངའི་སར་རྒྱུགས། རི་ཕྲན་རྒལ་ཞིང་རྒྱུགས་ནས་ཕེབས་བཞིན་འདུག།

⁹ང་ཡི་བརྩེ་ལྡན་གནའ་ལྟར་ཤ་ཕོ་གཞོན་འདྲ། ཁོང་ནི་རྩིག་པའི་ཉེ་འགྲམ་ལངས་ནས་འདུག། ཁོང་གིས་སྒེ་ཁུང་ནས་ནང་དུ་བལྟ་བཞིན་འདུག། རྒྱ་ཁྲ་ནང་ནས་གབ་ནས་བལྟ་བཞིན་འདུག།

¹⁰ང་ཡི་བརྩེ་ལྡན་ང་ལ་གཏམ་ལབ་བོ། ང་ཡི་བརྩེ་ལྡན་ཤོག་ཅིག། ང་ཡི་སྙིང་སྡུག་ང་དང་མཉམ་དུ་ཤོག།

¹¹དགུན་ཁ་ཡོལ་ནས་ཆར་པ་ཡང་ཆད་འདུག།

¹²གྲོང་གསེབ་ཁུལ་དུ་མེ་ཏོག་འཛུམ་ཞིང་ཤར། འདི་ནི་གླུ་གཞས་བཏང་བའི་དུས་ཚོད་ཡིན། ཞིང་ནང་ཕུག་རོན་གཞས་བཏང་བ་ཐོས་བཞིན་འདུག།

¹³ཁ་སུར་འབྲས་བུ་སྨིན་འགོ་ཚུགས་བཞིན་འདུག། རླུང་གི་ནང་དུ་འཛུམ་བཞད་རྒུན་ཤིང་དྲི་ཞིམ་ཁེངས། ང་ཡི་བརྩེ་ལྡན་ངའི་སར་ཤོག། ང་ཡི་སྙིང་སྡུག་ང་དང་མཉམ་དུ་ཤོག།

¹⁴ཁྱོད་ནི་བྲག་གསེབ་ཡིབ་པའི་ཕུག་རོན་འདྲ། ང་ལ་ཁྱོད་ཀྱི་ཡིད་འོང་གདོང་མཐོང་འཇུག། ཁྱོད་ཀྱི་བློ་མགུ་སྐད་དེ་ངར་ཐོས་འཇུག།

¹⁵རྒུན་ཚལ་མེ་ཏོག་འཇིགས་པར་བྱེད་པའི་སྔོན། ཝ་མོ་ཆུང་ཆུང་རྣམས་ལ་བཟུང་བར་གྱིས།

¹⁶བརྩེ་ལྡན་ང་ཡི་ཡིན་ཞིང་ང་ཁོའི་ཡིན། ཁོ་ཡིས་ཁྱུ་ཚོགས་ཀུ་མུད་མེ་ཏོག་ཁྲོད་འཚོ་ཞིང་འདུག།

¹⁷ཞོག་པའི་རླུང་རྒྱབ་བཞིན་པའི་བར་དུ་དང་། མུན་ནག་མ་ཡལ་བར་དུ་འཚོ་སྐྱོངས་བྱེད། ང་ཡི་སྙིང་སྡུག་ཁྱོད་ནི་གནའ་བར་ལྟར། བེ་ཐར་རི་ཡི་ཤ་ཕོ་ལྟར་ལོག་ཤོག།