Read Tibetan — པོད་སྐད་Tibetan Old Testament 2011 ཡེ་ཤ་ཡཱ 1 Bible Online

ཡེ་ཤ་ཡཱ 1 - Tibetan — པོད་སྐད་Tibetan Old Testament 2011 bible

ཡེ་ཤ་ཡཱ 1

¹མདོ་འདིའི་ནང་དཀོན་མཆོག་གིས་ཨ་མོཛའི་བུ་ཡེ་ཤ་ཡཱ་ལ་ཡ་ཧུ་དཱའི་རྒྱལ་པོ་རྣམས་ཨུ་ཛི་ཡཱ་དང་ཡོ་ཐམ་དང་ཨ་ཧཛ་དང་ཧེ་ཛི་ཀི་ཡཱ་བཅས་ཀྱི་སྲིད་སྐྱོངས་སྐབས་སུ་མངོན་པར་མཛད་པའི་ཡ་ཧུ་དཱ་དང་ཡེ་རུ་ཤ་ལེམ་གྱི་སྐོར་གསུང་འཕྲིན་ཁག་གསལ་ཡོད༎

²གཙོ་བོ་དཀོན་མཆོག་གིས། ཀྱེ་གནམ་དང་ས་གཞི་ངས་གང་སྨྲས་པར་ཉོན་ཞིག ངས་གསོ་སྐྱོང་བྱས་པའི་བུ་ཕྲུག་ཚོས་ང་ལ་ངོ་ལོག་བྱས་བྱུང།

³ཕྱུགས་ཟོག་སེམས་ཅན་ཚོས་ཀྱང་རང་གི་བདག་པོ་སུ་ཡིན་ཤེས་པ་མ་ཟད། བོང་བུ་ཚོས་རང་གི་སྦྱིན་བདག་གི་རྩ་ཆག་གང་དུ་སྤྲད་ཀྱི་ཡོད་པ་དེ་ཁོ་ཚོས་ཤེས་ཀྱི་ཡོད། འོན་ཀྱང་ངའི་ཨིསི་རཱཨེལ་མི་མང་ཚོས་མི་ཤེས་པ་དང་གང་ཡང་ཤེས་རྟོགས་བྱེད་མི་ཐུབ་ཅེས་བཀའ་གནང་ངོ།

⁴ཁྱོད་ནི་ཉེས་སྡིག་ཅན་གྱི་མི་རིགས་ངན་པ་ཁྱོད་ཚོ་རང་གི་སྡིག་པས་འཇིགས་པ་དང། ཁྱོད་ཚོའི་སྡིག་པས་ཁྱོད་ཚོ་ལ་མར་འདྲུད་ཡོད། ཁྱོ་ཚོས་གཙོ་བོ་དཀོན་མཆོག་ཨིསི་རཱཨེལ་གྱི་དམ་པའི་དཀོནམཆོག་སྤངས་ནས་རང་གི་རྒྱབ་བསྟན་ཡོད་དོ།

⁵ཁྱོད་ཚོས་ཁོང་ལ་ཅིའི་ཕྱིར་མུ་མཐུད་དེ་ངོ་རྒོལ་ཞུ་བར་བྱེད་དམ། ད་དུང་ཁྱོད་ཚོ་ཉེས་ཆད་མྱོང་བར་འདོད་དམ། ཀྱེ་ཨིསི་རཱཨེལ་པ་ཁྱོད་ཀྱི་མགོ་བོ་སྔོན་ནས་རྨ་ཡིས་གང་ཡོད་པ་དང། ཁྱོད་ཀྱི་སྙིང་དང་སེམས་ཉིད་ནད་གཞིས་མནར་དོ།

⁶ཁྱོད་ཀྱི་མགོ་ནས་རྐང་མཐིལ་བར་དུ་ནད་གཞི་མེད་པའི་གནས་ནི་གཅིག་ཀྱང་མེད། ཁྱོད་ཀྱི་ལུས་པོ་རྨ་རྗེས་དང་རྨ་ཁ་གསོ་རྒྱུ་མེད་པའི་རྨ་དང་ཤུ་བ་གང་ཞིང། དེ་ཚོ་གཙང་མ་བཟོས་མེད་ཅིང་རྨ་རས་ཀྱང་དཀྲིས་མེད་དོ། དེའི་ཁར་རྨ་སྨན་སོགས་བྱུག་མེད་པ་ཡིན་ནོ།

⁷ཁྱོད་ཚོའི་ཡུལ་ལུང་སྟོངས་ཤིང་གྲོང་ཁྱེར་མེས་འཚིགས་ཡོད་པ་དང། ཕྱི་རྒྱལ་བ་ཚོས་ཁྱོད་ཚོས་མཐོང་སར་ཁྱོད་ཚོའི་ས་ཆ་བཙན་འཕྲོག་དབང་བསྒྱུར་བྱས་ཏེ་གྱང་གོག་ཏུ་གཏོང་བར་བྱའོ།

⁸ཡེ་རུ་ཤ་ལེམ་གཅིག་པུ་ལྷག་ཡོད་དོ། འོན་ཀྱང་དེ་མཐའ་སྐོར་ཡོད། དེ་རྒུན་ཚལ་ནང་སྲུང་བྱ་བའི་ཁང་ཆུང་ངམ་ཀག་རའི་ཚལ་ཞིང་ཏུ་ཡབ་བཞིན་སྲུང་སྐྱོབ་མེད་པར་ལུས་ཡོད།

⁹གལ་ཏེ་ཀུན་དབང་ཅན་གྱི་གཙོ་བོ་དཀོན་མཆོག་གིས་མི་མང་ཁ་ཤས་ཚེ་ཐར་མ་གནང་བ་ཡིན་ན། ཡེ་རུ་ཤ་ལེམ་ནི་སོ་དྷོམ་དང་གོ་མོ་ར་ལྟ་བུ་ཆ་ཚང་ཤུལ་མེད་དུ་འགྱུར་ངེས་སོ།

¹⁰ཀྱེ་ཡེ་རུ་ཤ་ལེམ་ཁྱོད་ཀྱི་སྲིད་སྐྱོང་པ་ཚོ་དང་མི་མང་རྣམས་སོ་དྷོམ་པ་དང་གྷོ་མོ་རཱ་པ་བཞིན་ཡིན་པས། གཙོ་བོ་དཀོན་མཆོག་གིས་ཁྱོད་ལ་བཀའ་གང་གནང་བཞིན་ཡོད་པ་དེ་ལ་ཉོན་ཞིག ང་ཚོའི་དཀོན་མཆོག་གིས་ཇི་ལྟར་སློབ་སྟོན་གནང་བར་དོ་སྣང་བྱོས་ཤིག

¹¹ཁོང་གིས་བཀའ་གནང་བར། ཁྱོད་ཚོའི་བསམ་བློར་ཁྱོད་ཚོས་ང་ལ་ཕུལ་བཞིན་པའི་དམར་མཆོད་འདི་ཚོ་ལ་ངས་འདོད་ཀྱི་རེད་བསམ་གྱི་འདུག་གམ། ང་ལ་ཁྱོད་ཚོའི་ལུག་གི་སྦྱིན་སྲེག་གི་དམར་མཆོད་དང་ཡིད་དུ་འོང་བའི་སེམས་ཅན་རྣམས་ཀྱི་ཚིལ་ལུས་ཞེན་པ་ལོག་ཡོད། ང་ནི་བ་གླང་དང་ལུག་དང་རའི་ཁྲག་གིས་ཡིད་ཐང་ཆད་སོང།

¹²ཁྱོད་ཚོས་ང་ལ་མཆོད་པར་ཡོང་སྐབས་སུས་དེ་ཚོ་ངའི་སར་འཁྱེར་ཤོག་ཅེས་བརྗོད་བྱུང་ངམ། ཁྱོད་ཚོར་ངའི་མཆོད་ཁང་ནང་སུས་ཕར་ཆུར་འགྲུལ་དགོས་ཟེར་བརྗོད་བྱུང་ངམ།

¹³ཁྱོད་ཚོས་མཆོད་པ་འཁྱེར་ཡོང་བ་དེ་ཕན་མེད་ཡིན། ཁྱོད་ཚོས་བདུག་པའི་སྤོས་ཀྱི་དྲི་མར་ང་ཞེན་པ་ལོག་སོང། ངས་ཁྱོད་ཚོའི་ཟླ་བ་གསར་པའི་དུས་ཆེན་དང། ངལ་གསོ་བའི་ཞག་དུས་ཆེན་དང་གཞན་ཆོས་ཀྱི་འདུ་འཛོམས་ཁག་ལ་བཟོད་སྲན་བྱེད་མི་ཐུབ། དེ་ཚོ་ཚང་མ་ཁྱོད་ཚོའི་སྡིག་པས་ངན་སླད་དུ་འགྱུར་ཡོད་དོ།

¹⁴ཁྱོད་ཚོའི་ཟླ་བ་གསར་པའི་དུས་ཆེན་དང་ཉི་མ་དམ་པ་རྣམས་ལ་ངས་སྡང་པོ་བྱེད་པ་དང་། དེ་ཚོ་ངས་འཁུར་མ་ཐུབ་པའི་ཁུར་པོ་འཛི་པོ་ལྟ་བུ་ཆགས་ཡོད་དོ།

¹⁵ཁྱོད་ཚོས་ལག་པ་ཡར་འདེགས་ནས་གསོལ་བ་འདེབས་སྐབས་། ངས་ཁྱོད་ཚོར་མི་བསྟའོ། ཁྱོད་ཚོས་སྨོན་ལམ་ཇི་མང་རྒྱབ་ཡང་ངས་མི་ཉན་ནོ། གང་ལགས་ཟེར་ན། ཁྱོད་ཚོའི་ལག་པ་རྣམས་ཁྲག་གིས་བཏུམ་ཡོད་དོ།

¹⁶ཁྱོད་རང་ཚོ་གཙང་མ་ཁྲུས་ཤིག། ངས་མཐོང་སར་ཁྱོད་ཚོས་བྱས་པའི་བྱ་བ་ངན་རིགས་རྣམས་སྤངས་ནས་མཚམས་འཇོགས་བྱོས་ཤིག

¹⁷དྲང་བདེན་བྱ་རྒྱུར་སློབས་ཤིག། ཁྲིམས་དཔྱོད་དྲང་པོ་གཏོང་ཤིག་དང་། མནར་གཅོད་མྱོང་མཁན་ཚོར་རོགས་རམ་དང། ད་ཕྲུག་ཚོར་རང་གི་ཐོབ་ཐང་དང་ཡུག་མོ་ཚོར་སྲུང་སྐྱོབ་བྱོས་ཤིག་ཅེས་གསུངས་སོ།

¹⁸གཙོ་བོ་དཀོན་མཆོག་གིས། ད་ང་ཚོ་གནས་སྟངས་སྐོར་ལ་གྲོས་བསྡུར་བྱ་དགོས། ཁྱོད་ཚོ་སྡིག་པས་ཐིག་དམར་པོར་འགྱུར་ཡོད་ན་ཡང་ངས་ཁྱོད་ཚོ་ཁ་བ་ལྟར་དཀར་པོ་འཁྲུ་རྒྱུ་ཡིན། ཁྱོད་ཚོ་སྡིག་པའི་ཐིག་རྒྱ་སྨུག་ལྟར་ཡོད་ན་ཡང་ཁྱོད་ཚོ་བལ་ལྟར་དཀར་པོར་འགྱུར་ཡོང།

¹⁹གལ་སྲིད་ཁྱོད་ཚོས་ངའི་བཀའ་ལ་ཉན་པ་ཡིན་ན། ཁྱོད་ཚོའི་ས་ཞིང་ནས་ཐོན་པའི་འབྲས་བུ་བཟང་པོ་ཟ་བར་འགྱུར།

²⁰ཁྱོད་ཚོས་ང་ལ་ངོ་རྒོལ་བྱས་པ་ཡིན་ན། ཁྱོད་ཚོ་འཆི་བར་ངེས་སོ། ང་གཙོ་བོ་དཀོན་མཆོག་གིས་སྨྲས་པ་ཡིན་ཞེས་བཀའ་གནང་ངོ༎

²¹སྔར་དམ་ཚིག་ཅན་གྱི་གྲོང་ཁྱེར་དེ་ད་ཆ་སྨད་འཚོང་མའི་བྱ་སྤྱོད་བྱ་བཞིན་ཡོད། དུས་སྐབས་ཤིག་ལ་དེར་མི་དྲང་བདེན་རྣམས་ཀྱི་ཁེངས་ཡོད་པ་དང། ད་ཆ་དེར་མི་གསོད་མཁན་རྣམས་གཅིག་པོའི་ལྷག་ཡོད།

²²ཡེ་རུ་ཤ་ལེམ་ཁྱོད་སྔར་དངུལ་ལྟར་ཡོད་པ་ད་ཆ་ཕན་མེད་དུ་འགྱུར་ཡོད། སྔར་རྒུན་ཆང་ཞིམ་པོ་དང་འདྲ་བ་ཡོད་ཅིང་ད་ཆ་ཆུ་དང་འདྲ་བ་ཡིན་ནོ།

²³ཁྱོད་ཀྱི་འགོ་འཛིན་ཚོ་ངོ་ལོག་མཁན་དང་རྐུན་ཇག་གི་གྲོགས་པོ་ཡིན་པ་དང། རྔན་པ་དང་ལྐོག་རྔན་རྟག་ཏུ་ལེན་བཞིན་ཡོད། དེ་ཚོས་ཁྲིམས་ཁང་ནང་ད་ཕྲུག་ཚོར་སྲུང་སྐྱོབ་མི་བྱེད་པ་དང་ཡུག་མོ་ཚོའི་ཁ་མཆུར་ཉན་གྱི་མེད་དོ།

²⁴ད་ཀུན་དབང་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་མཐུ་སྟོབས་ཅན་གྱི་དཀོན་མཆོག་གིས་བཀའ་གནང་བར་ཉོན་ཞིག ངའི་དགྲ་བོ་ཁྱོད་ཐོག་ངས་དགྲ་ཤ་ལེན་རྒྱུ་ཡིན་པ་དང་ཁྱོད་ཀྱིས་ང་ལ་སླར་ཡང་དཀའ་ངལ་བཟོ་མི་ཐུབ་བོ།

²⁵ངས་ཁྱོད་ཐོག་ཉེས་ཆད་གཏོང་རྒྱུ་དང། ངས་གསེར་དངུལ་ཟང་ལྕགས་ནི་ལྷད་མེད་བཟོ་བ་ལྟར་ཁྱོད་ཚོ་ཡང་གཙང་མ་བཟོ་རྒྱུ་དང། ཁྱོད་ཚོའི་མི་གཙང་བ་ཚང་མ་ཕྱིར་འདོན་བྱ་རྒྱུ་ཡིན།

²⁶ཁྱོད་ཚོ་མཉམ་དུ་སྔར་ཡོད་པ་ལྟར་ངས་ཁྱོད་ཚོར་སྲིད་སྐྱོང་པ་དང་གྲོས་སྟོན་པ་རྣམས་སྤྲོད་རྒྱུ་ཡིན། དེ་ནས་ཡེ་རུ་ཤ་ལེམ་ནི་དྲང་བདེན་དང་དམ་ཚིག་ཅན་གྱི་གྲོང་ཁྱེར་ཞེས་གྲགས་པར་འགྱུར་རོ།

²⁷གཙོ་བོ་དཀོན་མཆོག་ནི་དྲང་བདེན་ཡིན་སྟབས། ཁོང་གིས་ཡེ་རུ་ཤ་ལེམ་དང་འགྱོད་བཤགས་ཕུལ་མཁན་རྣམས་སྐྱོབས་པར་གནང་ཡོང་ངོ།

²⁸འོན་ཀྱང་སྡིག་པ་བྱ་མཁན་དང་ཁོང་ལ་ངོ་ལོག་བྱ་མཁན་ཚང་མ་སྣུབ་པར་མཛད་རྒྱུ་དང་ཁོང་ལ་སྤོང་མཁན་རྣམས་གསོད་པར་མཛད་པར་འགྱུར་རོ།

²⁹ཁྱོད་ཚོས་ཤིང་སྡོང་རྣམས་ལ་མཆོད་པ་དང་ལྡུམ་ར་དམ་པ་རྣམས་འདེབས་པ་དེ་ལ་འགྱོད་པ་བསྐྱེད་པར་འགྱུར།

³⁰ཁྱོད་ཚོ་བེར་ཤིང་རྒས་ནས་རུལ་བར་འགྱུར་བ་དང་ཆུ་བླུགས་མཁན་མེད་པའི་ལྡུམ་ར་བཞིན་ཡལ་བར་འགྱུར།

³¹མེ་ཚག་གིས་སོག་མ་ལ་མེ་འབར་བ་ལྟར་མི་སྟོབས་ཤུགས་ཆེན་པོ་ཚོ་ཡང་དེ་ཚོའི་ལས་ངན་གྱིས་མེད་པར་བཟོ་བར་འགྱུར་བ་དང་སུས་ཀྱང་དེ་ཚོའི་འཇིགས་པ་ལ་འགོག་མི་ཐུབ་བོ༎