Read Tibetan — པོད་སྐད་Tibetan Old Testament 2011 ཡེ་ཤ་ཡཱ 10 Bible Online

ཡེ་ཤ་ཡཱ 10 - Tibetan — པོད་སྐད་Tibetan Old Testament 2011 bible

ཡེ་ཤ་ཡཱ 10

¹ཁྱོད་ཚོ་འཛིགས་ཡོད། ཁྱོད་ཚོས་ངའི་མི་མང་ལ་མནར་གཅོད་བྱེད་པའི་ཆེད་དྲང་མིན་པའི་ཁྲིམས་རྣམས་བཟོས་ཡོད་དོ།

²དེ་ལྟར་ཁྱོད་ཚོས་དབུལ་པོ་རྣམས་ཀྱི་ཐོབ་ཐང་དང་དེ་ཚོ་ལ་དྲང་བདེན་ཡོང་བར་བཀག་འགོག་བྱེད་ཀྱི་ཡོད་པ་དང། དེ་ལྟར་ཁྱོད་ཚོས་ཡུག་མོ་དང་ད་ཕྲུག་ཚོར་བདག་པའི་རྒྱུ་དངོས་སོགས་ལེན་གྱི་ཡོད་དོ།

³ཁྱོད་ཚོར་གཙོ་བོ་དཀོན་མཆོག་གིས་ཉེས་ཆད་གཏོང་གནང་སྐབས་ཁྱོད་ཚོས་ཅི་བྱེད་དམ། ཁོང་གིས་ཐག་རིང་ཡུལ་ནས་ཁྱོད་ཚོའི་ཐོག་ཏུ་རྐྱེན་ངན་འབེབས་གནང་ན་ཁྱོད་ཚོ་ཅི་བྱེད་དམ། ཁྱོད་ཚོ་སྐྱབས་རོགས་ཞུ་བར་གང་དུ་བྲོས་སམ། ཁྱོད་ཚོའི་རྒྱུ་ནོར་རྣམས་གང་དུ་སྦས་ཀྱི་ཡིན་ནམ།

⁴ཁྱོད་ཚོ་གཡུལ་དུ་གསོད་པ་དང་ཡང་ན་བཙོན་དུ་འཁྲིད་པར་བྱ། ད་དུང་ཡང་གཙོ་བོ་དཀོན་མཆོག་གི་ཐུགས་ཁྲོ་མ་ཞི་བས་ཉེས་ཆད་གཏོང་བར་ཁོང་གི་ཕྱག་བརྐྱངས་གནང་ཡོད་དོ༎

⁵གཙོ་བོ་དཀོན་མཆོག་གིས། ཀྱེ་ཨ་སུར། ངས་སུ་ལ་ཁྲོ་བ་ཚོར་ཉེས་ཆད་གཏོང་བའི་ཆེད་ཨ་སུར་ལ་དབྱུག་པ་བཞིན་དུ་བེད་སྤྱོད་བྱ་བཞིན་ཡོད།

⁶ང་ལ་ཁོང་ཁྲོ་སློང་མཁན་དཀོན་མཆོག་མེད་པའི་མི་རིགས་རྣམས་ལ་འཐབ་པའི་ཆེད་དུ་ངས་ཨ་སུར་ལ་གཏོང་ཡོད། ལམ་དུ་དུལ་ལྟར་མི་ཚོར་རྡོག་བརྫིས་གཏོང་བ་དང་འཕྲོག་བཅོམ་བྱེད་པར་ངས་དེ་ཚོར་གཏོང་བ་ཡིན་ཞེས་བཀའ་གནང་ངོ།

⁷འོན་ཀྱང་ཨ་སུར་པ་རྒྱལ་པོ་ཆེན་པོའི་རང་གི་ཐུགས་ལ་འཆར་གཞི་དྲག་པོ་ཁག་ཡོད་པ་དང། ཁོང་གིས་མི་རིགས་མང་པོ་མེད་པར་བཟོ་རྒྱུའི་ཐག་གཅོད་བྱེད་ཡོད་དོ།

⁸ཁོས་གཏམ་འདོད་བྱེད་བཞིན་སྨྲས་པ། ངའི་དམག་སྤྱི་རེ་རེ་རྒྱལ་པོ་ཡིན།

⁹ངས་ཀཱལ་ནོ་དང་ཀར་ཀེ་མིཤའི་གྲོང་ཁྱེར་རྣམས་དང་ཧ་མད་དང་ཨར་པད་ཀྱི་གྲོང་ཁྱེར་རྣམས་དབང་དུ་བསྡུས་པ་ཡིན། ངས་ས་མར་ཡ་དང་དྷ་མསེ་ཀསེ་ཡང་དབང་དུ་བསྡུས་པ་ཡིན་ནོ།

¹⁰ཡེ་རུ་ཤ་ལེམ་དང་ས་མར་ཡ་ལས་སྐུ་འདྲ་ཧ་ཅང་མང་བ་ཡོད་མཁན་དང་སྐུ་འདྲར་མཆོད་མཁན་རྒྱལ་ཁབ་ལ་ཆད་པ་གཏོང་རྒྱུར་ལག་པ་བརྐྱངས་ཡོད་དོ།

¹¹ས་མར་ཡ་དང་དེའི་སྐུ་འདྲ་ཚང་མ་མེད་པར་བཟོས་པ་ལྟར། ངས་ཡེ་རུ་ཤ་ལེམ་དུ་མཆོད་པའི་འདྲ་སྐུ་རྣམས་ལ་ཡང་དེ་ལྟར་བྱ་རྒྱུ་ཡིན་ཞེས་བཀའ་གནང་ངོ།

¹²འོན་ཀྱང་གཙོ་བོས། ངས་རི་བོ་ཛི་ཡོན་དང་ཡེ་རུ་ཤ་ལེམ་དུ་ཇི་ལྟར་བྱེད་བཞིན་པའི་རྗེས་སུ། ཨ་སུར་གྱི་རྒྱལ་པོ་ཆེན་པོའི་རང་བསྟོད་དང་ང་རྒྱལ་ལ་བརྟེན་ནས་ཁོ་ལ་ཆད་པ་གཏོང་རྒྱུ་ཡིན་ཞེས་བཀའ་གནང་ངོ།

¹³ཨ་སུར་གྱི་རྒྱལ་པོ་ཆེན་པོས་ངས་དེ་ཚོ་ཚང་མ་རང་ཉིད་ནས་བྱས་པ་ཡིན་ནོ། གང་ལ་ཟེར་ན། ང་སྟོབས་ཤུགས་ཆེན་པོ་དང་ཤེས་རབ་ཅན་དང་གཅང་པོ་བཅས་ཡིན། ངས་མི་མང་དབར་གྱི་ས་མཚམས་མེད་པར་བཟོས་པ་དང། དེ་ཚོས་བསགས་པའི་རྒྱུ་ནོར་རྣམས་བླངས་བ་ཡིན། ངས་བ་གླང་བཞིན་དེར་གནས་པའི་མི་མང་ལ་རྡོག་བརྫིས་བཏང་བ་ཡིན་ནོ།

¹⁴འཛམ་གླིང་གི་མི་རིགས་རྣམས་བྱིའུ་འི་ཚང་ལྟ་བུ་ཡིན་པ་དང། ངས་དེ་ཚོའི་རྒྱུ་ནོར་རྣམས་སྒོ་ང་བསྡུ་བ་ལྟར་ལས་སླ་པོ་བསྡུས་པ་ཡིན། ང་ལ་ཞེད་སྣང་བསྐུལ་བར་དེ་ཚོའི་ཤོག་པ་ཙམ་ཡང་ཀྲབ་ཀྲབ་བྱས་མེད་པ་དང་སྐད་རྒྱབ་པར་མཆུ་ལྟོ་ཡང་མ་ཕྱེས་སོ་ཅེས་རང་བསྟོད་བྱས་སོ།

¹⁵འོན་ཀྱང་གཙོ་བོ་དཀོན་མཆོག་གིས། སྟ་རེ་ཞིག་ལ་བེད་སྤྱོད་བྱ་མཁན་མི་དེ་ལས་སྟ་རེ་དེ་སྟོབས་ཆེ་བ་ཡོད་ཅེས་བརྗོད་ཐུབ་བམ། སོག་ལེ་ཞིག་ལ་བེད་སྤྱོད་བྱ་མཁན་མི་ཞིག་ལས་སོག་ལེ་གལ་ཆེ་བ་ཡོད་དམ། དབྱུག་པ་ཞིག་གིས་མི་ཡར་བཏེགས་པ་མ་ཡིན་ཞིང་མིས་དབྱུག་པ་ཡར་བཏེགས་པ་ཡིན་ཞེས་བཀའ་གནང་ངོ།

¹⁶ཀུན་དབང་ཅན་གྱི་གཙོ་བོ་དཀོན་མཆོག་གིས། ཟ་བཏུང་ལེགས་པོ་ཡོད་མཁན་ཚོར་ནད་གཞི་བཏང་ནས་ཉེས་ཆད་གཏོང་གནང་བ་དང། དེ་ཚོའི་ལུས་ལ་མེ་ཞིག་ཡང་ཡང་འབར་བར་འགྱུར་རོ།

¹⁷ཨིསི་རཱཨེལ་གྱི་འོད་དཀོན་མཆོག་ནི་མེ་རུ་འགྱུར་བ་དང། ཨིསི་རཱཨེལ་གྱི་དཀོན་མཆོག་དམ་པ་དེས་མེ་ལྕེར་འགྱུར་བ་དང། ཉི་མ་གཅིག་རང་ལ་ཚེར་མ་དང་སྦྱང་ཚེར་བཅས་ཚང་མ་བསྲེགས་པར་འགྱུར།

¹⁸ནད་ཚབ་ཆེ་བའི་མི་མེད་པར་བཟོ་བ་ལྟར་ཤིང་ནགས་རྣམས་དང་སྐྱེ་མོས་ཚལ་ལེགས་པོ་རྣམས་ཡོད་པ་རྣམས་ཆ་ཚང་མེད་པར་བཟོ་བར་འགྱུར་རོ།

¹⁹ཤིང་སྡོང་དེ་ལྟ་བུ་ཉུང་དུ་ཕྱིན་པའི་རྐྱེན་ལྷག་ལུས་རྣམས་ཕྲུ་གུ་ཞིག་གིས་ཀྱང་གྲངས་ཀ་རྒྱབ་ཐུབ་བོ༎

²⁰ཨིསི་རཱཨེལ་གྱི་མི་མང་གསོན་པོར་གནས་མཁན་ཚོས་དེ་ཚོ་ཧ་ལམ་རྩ་མེད་བཟོ་མཁན་གྱི་མི་རིགས་ལ་བློས་མི་འཁེལ་བའི་དུས་ཤིག་ཡོང་ངོ། དེ་ཚོས་ཏན་ཏན་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་དམ་པར་ཡིད་ཆེས་བྱེད་པར་འགྱུར།

²¹ཨིསི་རཱཨེལ་གྱི་མི་མང་འགའ་ཤས་ཀུན་དབང་དཀོན་མཆོག་གི་དྲུང་དུ་ཕྱིར་ལོག་པར་བྱའོ།

²²ཨིསི་རཱཨེལ་གྱི་མི་མང་རྣམས་རྒྱ་མཚོའི་ཁར་བྱེ་མ་ལྟར་ཧ་ཅང་མང་པོ་ཡོད་ན་ཡང། དེ་ཚོའི་ནང་ནས་གྲངས་ཉུང་ཉུང་ཞིག་ཕྱིར་ལོག་བྱའོ། མི་མང་འཇིགས་པར་བྱ་རྒྱུ་གྲ་སྒྲིགས་ཡོད་པ་དེ་ཏན་ཏན་འོས་པ་ཡིན་ནོ།

²³སྐུ་དབང་ཅན་གྱི་བླ་ན་མེད་པའི་གཙོ་བོ་དཀོན་མཆོག་གིས་ཡུལ་གྲུ་ཡོངས་སུ་ཇི་ལྟར་བཀའ་གནང་བ་ལྟར་འཇིགས་པ་འཁྱེར་ཡོང་བར་འགྱུར༎

²⁴སྐུ་དབང་ཅན་གྱི་བླ་ན་མེད་པའི་གཙོ་བོ་དཀོན་མཆོག་གིས་ཛི་ཡོན་དུ་སྡོད་པའི་ཁོང་གིས་མི་མང་རྣམས་ལ་སྔར་ཨི་ཇིབ་པ་ཚོས་བྱས་པ་ལྟར་ཨ་སུར་པ་ཚོས་མནར་གཅོད་བཏང་ན་ཡང་ཁྱོད་ཚོ་མ་འཇིགས་ཤིག

²⁵ངས་ཁྱོད་ཚོར་ཉེས་ཆད་གཏོང་ཟིན་པའི་དུས་ཡུན་ཐུང་ངུའི་རྗེས་སུ་དེ་ཚོ་མེད་པར་བཟོ་རྒྱུ་ཡིན།

²⁶ང་སྐུ་དབང་ཅན་གྱི་གཙོ་བོ་དཀོན་མཆོག་གིས་ཨོ་རེབ་ཀྱི་བྲག་རིར་མིད་ཡན་པའི་མི་མང་རྣམས་ལ་བརྡུང་བ་ལྟར་ངས་དེ་ཚོ་ལ་ཡང་ངའི་རྟ་ལྕག་གིས་བརྡུང་རྒྱུ་ཡིན། ངས་ཨི་ཇིབ་ལ་ཉེས་ཆད་བཏང་བ་ལྟར་ཨ་སུར་ལ་ཡང་ཉེས་ཆད་གཏོང་རྒྱུ་ཡིན་ནོ།

²⁷དུ་ཚོད་དེ་སླེབས་སྐབས་སུ། ངས་ཁྱོད་ཚོ་ལ་ཨ་སུར་གྱི་དབང་འོག་ནས་གློད་བཀྲོལ་གཏོང་རྒྱུ་ཡིན། དེ་ཚོའི་གཉའ་ཤིང་གིས་ཁྱོད་ཚོའི་དཔུང་པའི་སྟེང་དུ་དོད་པོར་ནམ་ཡང་མི་འགྱུར་ཞེས་བཀའ་གནང་ངོ༎

²⁸དགྲ་བོའི་དམག་དཔུང་གིས་ཨེ་གྲོང་ཁྱེར་དབང་བཟུང་བྱས་སོ། དེ་ཚོས་མིག་རོན་བརྒྱུད་ནས་ཐོན་ནོ། དེ་ཚོའི་མཁོ་ཆས་རྣམས་མིག་མཤ་རུ་བཞག་གོ

²⁹དེ་ཚོས་ལ་རྒྱབ་པ་དང་མཚན་མོར་གྷེ་བཱ་རུ་ཞག་སྡོད་བྱས་སོ། ར་མཱའི་གྲོང་ཁྱེར་གི་མི་མང་རྣམས་ཤིན་ཏུ་འཇིགས་པ་དང་རྒྱལ་པོ་ས་ཨུལ་གྱི་གྲོང་ཁྱེར་གྷི་བི་ཡེའི་མི་མང་རྣམས་བྲོས་སོ།

³⁰གྷལ་ལིམ་གྱི་མི་མང་ཚོ་སྐད་རྒྱོབ་ཅིག། ལའི་ཤའི་མི་མང་རྣམས་ཉོན་ཞིག། ཨ་ན་ཐོད་ཀྱི་མི་མང་ཚོ་ལན་རྒྱོབ་ཅིག།

³¹མད་མེ་ནཱའི་མི་མང་དང་གྷེ་བྷིམ་གྱི་མི་མང་རྣམས་རང་གི་སྲོག་གི་ཕྱིར་བྲོས་བཞིན་འདུག་གོ

³²དེ་རིང་དགྲ་བོ་རྣམས་ནོབ་ཀྱི་གྲོང་ཁྱེར་དུ་ཡོད་པ་དང་དེ་དག་གྲོང་ཁྱེར་ཡེ་རུ་ཤ་ལེམ་དུ་རི་བོ་ཛི་ཡོན་ལ་མུར་མཛོག་བསྟན་བཞིན་འདུག་གོ

³³ཤིང་སྡོང་ནས་ཡལ་ག་གཅོད་ནས་ཤུགས་ཀྱི་མར་ཟག་པ་ལྟར་དཀུན་དབང་ཅན་གྱི་གཙོ་བོ་དཀོན་མཆོག་གིས་དེ་ཚོ་ལ་ཡང་དེ་ལྟར་བྱ་རྒྱུ་ཡིན། ང་རྒྱལ་ཆེ་ཤོས་དང་གོ་གནས་མཐོ་པོ་རྣམས་མར་ཕབ་ནས་དམའ་འབེབས་མཛད་དོ།

³⁴ཤིང་ནགས་ཀྱི་དཀྱིལ་དུ་ཤིང་སྡོང་སྟ་རེ་གཅོད་པ་ལྟར་དུ། ལེ་བ་ནོན་གྱི་ཤིང་ལེགས་ཤོས་རྣམས་གཅོད་པ་ལྟར་དུ་གཙོ་བོ་དཀོན་མཆོག་གིས་དེ་ཚོ་གཅོད་པར་མཛད་པར་འགྱུར་རོ༎