Read Tibetan — པོད་སྐད་Tibetan Old Testament 2011 ཡེ་ཤ་ཡཱ 42 Bible Online

ཡེ་ཤ་ཡཱ 42 - Tibetan — པོད་སྐད་Tibetan Old Testament 2011 bible

ཡེ་ཤ་ཡཱ 42

¹གཙོ་བོ་དཀོན་མཆོག་ཁོང་གིས་བཀའ་གནང་བ། ང་ཡིས་ནུས་སྟོབས་བྱིན་པའི་ངའི་ཞབས་ཕྱི་འདིར། ང་ཡིས་དེ་ལ་འདམས་ཡོད། ཁོ་མཉམ་ང་ནི་དགའ། ང་ཡི་ཐུགས་ཉིད་ཁོའི་ནང་བཀང་ཡོད་པས། མི་རིགས་ཡོངས་ལ་ཁྲིམས་དྲང་སྤེལ་ཡོང་ངོ།

²ཁོ་ནི་སྐད་ཤུགས་མཐོ་པོར་མི་སྨྲའོ། རྒྱ་ལམ་ཁག་ཏུ་སྐད་ཤུགས་གཏམ་མི་གླེང།

³རྨད་པའི་འདམ་རྩྭ་དེ་ལ་ཁོ་ཡིས་མི་ཆག་གོ། ཞུ་མར་ཤི་གྲབ་ཡོད་ཀྱང་མ་བསད་དོ། ཁོང་གིས་ཚང་མར་གཏན་གྱི་ཁྲིམས་དྲང་འཁྱེར་ཡོང་ངོ།

⁴ཁོང་གི་རེ་བ་དང་ནི་སྙིང་སྟོབས་དེ་མི་རླག། ཁོང་གིིས་ས་གཞིར་ཁྲིམས་དྲང་འཇུག་པར་བྱ། གླིང་ཕྲན་ཚོས་ཁོང་གི་སློབ་སྟོན་སྒུག།

⁵དཀོན་མཆོག་ཁོང་གིས་མཐོ་རིས་བཀོད་ནས་དེ་བརྐྱངས་སོ། ཁོང་གིས་ས་གཞི་དང་དེར་གནས་རྣམས་ལ་བཀོད་གནང་ངོ་། ཚང་མར་སྲོག་དང་དབུགས་ནི་གནང་བར་མཛད། ད་ནི་དཀོན་མཆོག་གཙོ་བོ་དཀོན་མཆོག ཁོང་གིས་རང་གི་ཞབས་ཕྱིར་བཀའ་གནང་བ།

⁶ས་གཞིར་ཁྲིམས་དྲང་བྱེད་པའི་ཕྱིར་ང་གཙོ་བོ་དཀོན་མཆོག། ཁྱོད་ལ་བོས་ནས་ནུས་མཐུ་འབྱིན། ཁྱོད་རང་བརྒྱུད་ནས་ང་མི་མང་ཚང་མ། མཉམ་དུ་དམ་བཅའ་འཇོག་རྒྱུ་ཡིན། ཁྱོད་བརྒྱུད་མི་རིགས་ཡོངས་ལ་འོད་གསལ་འབྱིན།

⁷ཁྱོད་ཀྱིས་ལོང་བའི་མིག་ནི་འབྱེད་པར་འགྱུར། མུན་པའི་བཙོན་ནས་བཙོན་པ་རྣམས་སྒྲོལ་ལོ།

⁸གཙོ་བོ་དཀོན་མཆོག་ཁྱོད་ཀྱི་དཀོན་མཆོག་ང་རང་གཅིག་པུ་ཡིན། ང་ཡི་གཟི་བརྗིད་ལྷ་གཞན་ཚོར་མི་སྤྲད་དོ། ང་ཡི་བསྟོད་པར་འདྲ་སྐུར་ཚོ་ལ་མི་སྤྲོད་དོ།

⁹ང་ཡིས་ལུང་བསྟན་བདེན་པར་བྱུང་ཡོད་དོ། ད་ངས་བྱ་བ་གསར་པ་མ་བྱུང་སྔོན། དེ་ཚོའི་སྐོར་དེ་ཁྱོད་ལ་ཤོད་རྒྱུ་ཡིན༎

¹⁰གཙོ་བོ་དཀོན་མཆོག་ཁོང་ལ་མགུར་མ་གསར་པ་ཞིག་ལེན་ཞིག། འཛམ་གླིང་ཡོངས་ཀྱི་ཁོང་ལ་བསྟོད་དབྱངས་ལེན། ཁྱོད་རྣམས་རྒྱ་མཚོར་འགྲུལ་མཁན་ཁོང་ལ་བསྟོད། རྒྱ་མཚོའི་སེམས་ཅན་ཡོངས་ཀྱི་ཁོང་ལ་བསྟོད། གླིང་ཕྲན་རྣམས་དང་དེར་གནས་གཞས་ཐོང་ཞིག།

¹¹བྱེ་ཐང་དང་དེ་ཡི་གྲོང་རྣམས་དཀོན་མཆོག་ཁོང་ལ་བསྟོད། ཀེ་དར་མི་མང་ཁོང་ལ་བསྟོད་དུ་བཅུག། སེ་ལའི་གྲོང་ཁྱེར་ནང་དུ་སྡོད་མཁན་ཚོས། རི་བོའི་རྩེ་ནས་དགའ་བའི་སྐད་འབོད་ཅིག།

¹²གླིང་ཕྲན་རྣམས་སུ་གནས་མཁན་མི་མང་རྣམས། གཙོ་བོ་དཀོན་མཆོག་ཁོང་ལ་གཟི་བརྗིད་དང་བསྟོད་པ་ཕུལ་ཞིག།

¹³གཙོ་བོ་དཀོན་མཆོག་ཁོང་ནི་དཔའ་བོ་ལྟ་བུ་དམག་འདྲེན་ཕེབས། ཁོང་ནི་གཡུལ་དུ་གྲ་སྒྲིགས་ཐུགས་འདོད་ཡོད། ཁོང་གིས་དམག་སྐད་གཡུལ་གྱི་འབོད་སྒྲ་སྒྲོགས། ཁོང་གིས་དགྲ་བོའི་ཐོག་ཏུ་རང་ནུས་སྟོབས་སྟོན།

¹⁴དཀོན་མཆོག་ཁོང་གིས་བཀའ་གནང་བ། དུས་ཡུན་རིང་པོར་ང་ཡི་ཁ་རོག་བསྡད། ང་ཡིས་མི་མང་རྣམས་ལ་ལན་འདེབས་མེད། ད་ཆ་ལས་འགུལ་བྱེད་པའི་དུས་ལ་སླེབས་ནས་ཡོད། བུད་མེད་སྐྱེ་གཟེར་རྒྱབ་འདྲ་ངས་སྐད་འདོན།

¹⁵ང་ཡིས་རི་དང་རི་ཕྲན་རྣམས་ནི་མེད་པར་བཟོ། རྩ་དངཤིང་སྡོང་རྣམས་ནི་སྐམ་པར་བྱེད། ང་ཡིས་ལུང་གཤོང་རྒྱུག་ཆུ་བྱེ་ཐང་བཟོ། ཆུ་ཡི་རྫིང་བུ་རྣམས་ནི་སྐམ་པར་བྱས།

¹⁶ང་ཡིས་ང་ཡི་མི་མང་ལོང་བ་རྣམས། འགྲོ་མ་མྱོང་བའི་ལམ་དུ་སྣེ་འཁྲིད་བྱད། ང་ཡིས་དེ་ཚོའི་མུན་པར་འོད་དུ་འགྱུར། དེ་ཚོའི་མདུན་གྱི་ལམ་རྩུབ་འཇམ་པོར་བཟོ། དེ་ཚོ་རྣམས་ནི་ང་ཡི་ཞལ་བཞེས་ཡིན། ང་ཡིས་འགལ་མེད་དེ་རྣམས་སྲུང་རྒྱུ་ཡིན།

¹⁷འདྲ་སྐུར་ཡིད་ཆེས་བློས་འགེལ་བྱ་མཁན་རྣམས། འདྲ་སྐུར་དེ་ཚོའི་དཀོན་མཆོག་བརྗོད་མཁན་ཚོར། དམའ་འབེབས་དང་ནི་ཞབས་འདྲེན་གཏོང་རྒྱུ་ཡིན༎

¹⁸གཙོ་བོ་དཀོན་མཆོག་ཁོང་གིས་བཀའ་གནང་བ། ཁྱོད་ཚོ་མི་མང་འོན་པ་རྣམས་ཉོན་ཞིག། ཁྱོད་ཚོ་ལོང་བ་རྣམས་ནི་ཞིབ་མོར་ལྟོས།

¹⁹ང་ཡི་ཞབས་ཕྱི་ལས་ལྷག་པ། གཞན་དག་ལོང་བ་སུ་ཞིག་ཡོད་རེད་དམ། ང་ཡིས་བཏང་བའི་བང་ཆེན་ལས། གཞན་དག་འོན་པ་སུ་ཞིག་ཡོད་རེད་དམ།

²⁰ཨིསི་རཱཨེལ་ཁྱོད་ཀྱིས་མང་པོ་མཐོང་ཡོད་དོ། འོན་ཀྱང་དེ་ཡིས་ཁྱོད་ཀྱིས་ཅི་རྟོགས་སམ། ཁྱོད་ལ་ཉན་པའི་རྣ་བ་ཡོད་ན་ཡང། ཁྱོད་ཀྱིས་དངོས་འབྲེལ་ག་རེ་གོ་བྱུང་ངམ།

²¹གཙོ་བོ་དཀོན་མཆོག་ཁོང་ནི་སྐྱོབ་པ་གནང་རྒྱུར་ཐུགས་འདོད་ཆེན་པོ་ཡོད། དེར་བརྟེན་ཁོང་གི་ཁྲིམས་དང་སློབ་སྟོན་རྣམས་ཡར་ལ་བཏེགས། རང་གི་མི་མང་ནས་དེར་གུས་བརྩི་ཞུ་བར་འདོད།

²²འོན་ཀྱང་ཁོང་གི་མི་མང་བཅོམ་ནས་ཡོད། དེ་ཚོ་བཙོན་དོང་ནང་དུ་བཅུག་ནས་ཡོད། བཙོན་ཁང་ནང་དུ་ཡིབ་པར་གྱིས་བཅུག་ཡོད། ཇག་བཅོམ་དང་ནི་འཕྲོག་བཅོམ་ནང་ཚུད་ཡོད་པས། དེ་ཚོར་སྐྱོབ་རོགས་བྱེད་མི་སུ་ཡང་མེད།

²³ཁྱོད་ཚོའི་ནང་ནས་སུ་ཞིག་དེ་ལ་ཉན་ནམ། ད་ནས་ཟུང་ཁྱོད་ཚོས་ཟབ་ཟབ་ངང་ནས་ཉོན་ནམ།

²⁴ཡ་ཀོབ་ལ་ཇག་པར་སུས་སྤྲད་དམ། དཀོན་མཆོག་ཉིད་ཀྱིས་གནང་བ་ཡིན། ཁོང་གི་སྤྱན་སྔར་ང་ཚོས་སྡིག་པ་གྱིས། ང་ཚོ་ཁོང་གི་ཐུགས་འདོད་ལྟར་གནས་མེད། ཁོང་གིས་སློབ་སྟོན་གནང་བར་ཉན་མེད་དོ།

²⁵དེར་བརྟེན་ཁོང་གི་ཐུགས་ཁྲོའི་ནུས་པ་ང་ཚོར་འཚོར་རུ་འཇུག། དམག་གི་དཀའ་ངལ་མྱོང་བར་འཇུག་པ་གནང། ཁོང་གི་ཐུགས་ཁྲོ་མེ་ལྟར་འབར་བ་དེས། ཨིསི་རཱཨེལ་ཡོངས་ལ་འབར་རུ་འཇུག་ན་ཡང། ཇི་ལྟར་བྱུང་བ་ཡིན་པ་ང་ཚོས་མི་ཤེས་སོ། དེ་ནས་ང་ཚོས་སློབ་སྟོན་གང་ཡང་མ་ལེན་ནོ༎