Read Tibetan — པོད་སྐད་Tibetan Old Testament 2011 ཡེ་ཤ་ཡཱ 48 Bible Online

ཡེ་ཤ་ཡཱ 48 - Tibetan — པོད་སྐད་Tibetan Old Testament 2011 bible

ཡེ་ཤ་ཡཱ 48

¹ཨིསི་རཱཨེལ་གྱི་མི་མང་རྣམས་འདི་ལ་ཉན་པར་གྱིས། ཁྱོད་ཚོ་ཡ་ཧུ་དཱའི་རིགས་བརྒྱུད་འདི་ཉོན་ཞིག། ཁྱོད་ཚོས་གཙོ་བོ་དཀོན་མཆོག་མཚན་ལ་མནའ་བསྐྱེལ་ནས། ཨིསི་རཱཨེལ་གྱི་དཀོན་མཆོག་ལ་མཆོད་ཟེར། འོན་ཀྱང་ཁྱོད་ཀྱི་བརྗོད་པའི་ཚིག་མི་བདེན།

²ཁྱོད་ཚོ་གྲོང་ཁྱེར་དམ་པའི་ཡུལ་མི་ཡིན་པ་དང། ཀུན་དབང་ལྡན་པའི་གཙོ་བོ་དཀོན་མཆོག་ཁོང་གི་མཚན་ཡིན་པར། ཨིསི་རཱཨེལ་གྱིི་དཀོན་མཆོག་ལ་བློས་འགེལ་བྱེད་ཅེས་བརྗོད་རྒྱུར་སྤོབས་པ་བྱེད་དོ།

³གཙོ་བོ་དཀོན་མཆོག་ཁོང་གིས་ཨིསི་རཱཨེལ་ལ་གསུངས་པ། ཡུན་རིང་སྔོན་དུ་ཇི་ཡོང་ངས་ལུང་བསྟན། དེ་ནས་བློ་བུར་དེ་རྣམས་ཡོང་བར་བྱས།

⁴ལྕགས་ལྟར་མཁྲེགས་པོ་དང་དགུག་མི་ཐུབ་པའི་ལི་ལྟར། ཁྱོད་གྱོང་པོ་ཡོད་བ་ངས་ཤེས་སོ།

⁵ཁྱོད་ཀྱི་བླུག་པའི་སྐུ་དང་འདྲ་སྐུ་ཡིས། ཇི་བྱུང་གྱིས་པ་ཁྱོད་ཀྱིས་གྲགས་རྒྱུ་འགོགས་པའི་ཆེད། མ་བྱུང་སྔོན་དུ་གནས་ཚུལ་གསལ་སྒྲགས་ཀྱིས། ང་ཡིས་ཡུན་རིང་སྔོན་དུ་ཁྱོད་ཀྱི་མ་འོངས་ལུང་བསྟན་ཡོད།

⁶ང་ཡིས་ལུང་བསྟན་གྱིས་པ་རྣམས་ད་སྒྲུབ་ཡོད། ང་ཡི་ལུང་བསྟན་དངོས་བདེན་ཡིན་པ་ཁས་ལེན་དགོས། ང་ཡི་སྔོན་དུ་མ་བཤད་པའི་གནས་ཚུལ། ད་གནས་ཚུལ་གསར་པ་ཁག་ནི་ཁྱོད་ལ་གཤོད་རྒྱུ་ཡིན།

⁷འདས་པའི་རིང་ལ་དེ་ལྟར་བྱུང་མེད་དོ། ང་ཡིས་ད་ལྟ་གཞི་ནས་བྱུང་བར་བྱ། གལ་ཏེ་འདི་ནི་སྔོན་ནས་བྱུང་བ་ཡིན་ན། ཁྱོད་ཀྱིས་དེ་སྐོར་ཤེས་ནས་བརྗོད་པར་བྱེད།

⁸ཁྱོད་ནི་རྟག་ཏུ་ངོ་ལོག་མཁན་དུ་རྩིས། ཁྱོད་ལ་བློ་བཀལ་བྱ་མི་རུང་བ་ང་ཡིས་ཤེས། དེ་རྐྱེན་ཁྱོད་ཀྱིས་དེ་སྐོར་ནམ་ཡང་ཐོས་མེད་དོ། དེ་ཕྱིར་ཁྱོད་ཀྱིས་རྣ་བར་ཚིག་ཅིག་ཐོས་མེད་དོ།

⁹མི་མང་ང་ཡི་མཚན་ལ་བསྟོད་པའི་ཆེད། ང་ཡི་ཁྲོ་བར་བཟོད་ནས་འགོག་གིས་ཡོད། ངས་དེ་བཀག་ནས་ཁྱོད་ལ་འཇིགས་པར་མི་བཟོ་འོ།

¹⁰དངུལ་ནི་མེ་ནང་སྤུས་གཙང་བཟོ་བ་ལྟར། ང་ཡིས་ཁྱོད་ལ་མེ་ཡི་སྡུག་བསྔལ་ནང་དུ་ཚོད་བལྟ་བགྱིས། འོན་ཀྱང་ངས་ཁྱོད་ཕན་མེད་རྙེད་བྱུང།

¹¹ང་ཡིས་བྱ་རྒྱུ་དེ་ནི་ངའི་ཆེད་གྱིས། ང་ཡིས་ངའི་མཚན་མཐོང་མེད་འགྱུར་མི་འཇུག། ཡང་ན་ང་དང་རང་ཉིད་གཅིག་པུའི་གཟི་བརྗིད་དེ། གཞན་དང་མཉམ་དུ་བེད་སྤྱོད་བྱེད་མི་འཇུག།

¹²གཙོ་བོ་དཀོན་མཆོག་ཁོང་གིས་བཀའ་གནང་བ། ང་ཡིས་འབོད་པའི་མི་མང་ཨིསི་རཱཨེལ། ཁྱོད་ཚོ་རྣམས་ནི་ང་ལ་ཉོན་ཞིག་དང། ང་ནི་ཐོག་མཐའ་མེད་པའི་དཀོན་མཆོག་ཡིན། དཀོན་མཆོག་གཅིག་པུ་དེ་ནི་རང་ཉིད་ཡིན།

¹³ང་ཡི་ལག་གིས་ས་གཞིའི་རྨང་དེ་བཏིང། ལག་པས་མཐོ་རིས་རྣམས་ནི་བརྐྱངས་པ་ཡིན། ང་ཡི་ས་དང་ནམ་མཁར་སྐད་གཏོང་སྐབས། དེ་ཚོ་འཕྲལ་དུ་ཡོང་ནས་ངའི་དྲུང་བཅར།

¹⁴ཁྱོད་ཚོ་ཚང་མ་འཛོམས་ནས་ཉན་པར་གྱིས། ལྷ་ནི་སུ་ཞིག་གིས་ཀྱང་ལུང་མི་བསྟན། ང་ཡིས་འདམས་པའི་སྐྱེ་བོ་དེས། བྷེ་བྷི་ལོན་ལ་འཐབ་པར་བྱེད་པར་འགྱུར། ང་ཡི་ཇི་ལྟར་འདོད་པ་ཁོས་བྱེད་དོ།

¹⁵ཁོ་ལ་སྨྲ་ནས་འབོད་མཁན་ང་ཡིན་ནོ། ང་ཡིས་ཁོ་ལ་ཕྱི་རུ་སྣེ་ཁྲིད་བྱེད་ནས་ལམ་ལྷོང་སྤྲད་པ་ཡིན།

¹⁶ཁྱོད་རྣམས་ཉེ་བར་ཤོག་ལ་ང་ཡིས་བཤད་པར་ཉོན། སྔོན་ནས་ང་ཡིས་གསལ་པོར་བཤད་པ་དང། ང་ཡིས་གཏམ་རྣམས་གཏན་དུ་དངོས་བདེན་བྱུང་བ་བཟོས། (བླ་ན་མེད་པའིི་གཙོ་བོ་དཀོན་མཆོག་གིས་ཁོང་གི་ནུས་མཐུ་གནང་ནས་ང་ལ་གཏོང་གནང་ངོ།)

¹⁷ཨིསི་རཱཨེལ་པ་ཡི་དཀོན་མཆོག་དམ་པ་ཡིས། ཁྱོད་ཚོར་སྐྱོབ་མཁན་གཙོ་བོ་དཀོན་མཆོག་གིས་གསུངས། ཁྱོད་ཚོའི་ཕན་ཐོག་ཆེད་དུ་སློབ་སྟོན་མཁན། ཁྱོད་ཚོ་སྐྱོད་པའི་ལམ་དུ་འགྲོ་བར་བཀའ་བཀོད་མཁན། ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ང་ཡིན་ནོ།

¹⁸ཁྱོད་ཚོས་ང་ཡི་བཀའ་ལ་ཉན་འགྱུར་ན། བྱིན་རླབས་ཁྱོད་ཀྱི་ཆེད་དུ་རྒྱུགས་ནས་ཡོང་། རྒྱུགས་ཆུ་ལྟ་བུ་ནམ་ཡང་སྐམ་མིན་ཡོང་། རྒྱ་མཚོའི་མཐའ་རུ་རྦ་རླབས་རྒྱུགས་པ་བཞིན། རྒྱལ་ཁ་ཡང་ནི་ཁྱོད་སར་ཡོང་བར་བྱེད།

¹⁹ཁྱོད་ཀྱི་རིགས་བརྒྱུད་བྱེ་མ་ལྟ་བུར་མང། དེ་ཚོ་མི་འཇིགས་ང་ཡིས་ངས་བརྟེན་བྱེད།

²⁰བྷེ་བྷི་ལོན་ནས་ཐོན་སྟེ་རང་དབང་སོང། དགའ་བའི་གནས་ཚུལ་སྒྲོགས་ལ་ཡོངས་ཁྱབ་བྱོས། གཙོ་བོ་དཀོན་མཆོག་ཁོང་གིས་ཞབས་ཕྱི་ཡ་ཀོབ་ལ་སྐྱོབ།

²¹གཙོ་བོ་དཀོན་མཆོག་ཁོང་གིས་མི་མང་རྣམས། ཚ་དྲོད་ཆེན་པོ་བྱེ་ཐང་སྐམ་པོའི་བརྒྱུད། སྣེ་འཁྲིད་གནང་སྐབས་ཁོང་གི་དེ་ཚོ་ལ། སྐོམ་པའི་སྡུག་བསྔལ་ནམ་ཡང་མྱོང་མེད་དོ། དེ་ཚོའི་ཆེད་དུ་བྲག་ནས་ཆུ་འདོན་གནང། ཁོང་གིས་བྲག་དེ་རྟོལ་བས་ཆུ་རྒྱུགས་ཡོང་ངོ།

²²གཙོ་བོ་དཀོན་མཆོག་ཁོང་གིས་སྡིག་ཅན་རྣམས་ནི་བརྟན་པོ་མེད་ཅེས་གསུངས༎