Read Tibetan — པོད་སྐད་Tibetan Old Testament 2011 ཡེ་ཤ་ཡཱ 54 Bible Online

ཡེ་ཤ་ཡཱ 54 - Tibetan — པོད་སྐད་Tibetan Old Testament 2011 bible

ཡེ་ཤ་ཡཱ 54

¹ཡེ་རུ་ཤ་ལེམ་ཁྱོད་ནི་བུད་མེད་མོ་གཤམ་འདྲ། འོན་ཀྱང་ད་ཁྱོད་དགའ་སྤྲོའི་སྐད་ཀྱི་གླུ་ལེན་ཞིག། བུད་མེད་གཏན་དུ་ཁྱོ་མཉམ་སྡོད་པ་ལས། ད་ནི་ཁྱོད་ལ་ཕྲུ་གུ་མང་བ་ཡོང་བར་འགྱུར།

²ཁྱོད་སྡོད་པའི་གུར་དེ་ཆེ་རུ་གཏོང་། ཐག་པ་རིང་དུ་བཏང་ནས་ཕུར་བརྟན་བཟོས།

³ས་ཕྱོགས་ཡོངས་ནས་ས་མཚམས་རྒྱ་བསྐྱེད་བྱེད། མི་རིགས་གཞན་གྱིས་ད་ལྟ་དབང་བའི་ས་ཆ་དེ། ཁྱོད་ཀྱི་མི་མང་རྣམས་ལ་ཕྱིར་ལོག་ཐོབ་པར་འགྱུར། ད་ལྟ་སྟོངས་པའི་གྲོང་རྣམས་མིས་ཁེངས་འགྱུར།

⁴ཁྱོད་མ་འཇིགས་ཞབས་འདྲེན་ནང་ཡང་མི་ཚུད། ཁྱོད་ལ་སུས་ཀྱང་དམའ་འབེབས་བྱེད་མི་འགྱུར། ཆུང་མ་ན་ཆུང་དམ་ཚིག་མི་གཙང་བ་དང་། ཡུག་མོའི་སྐབས་སུ་གཅིག་པོར་ལུས་པ་ཁྱོད་ཀྱིས་བརྗེད་ཡོང།

⁵བཀོད་པ་པོ་ནི་ཁྱོད་ཀྱི་ཁྱོ་ལྟར་འགྱུར། ཁོང་གི་མཚན་ནི་གཙོ་བོ་དཀོན་མཆོག་ཀུན་དབང་ཅན་ཡིན། ཨིསི་རཱཨེལ་གྱིི་དཀོན་མཆོག་དམ་པ་དེས། ཁོང་ནི་ཁྱོད་རང་སྐྱོབ་པར་མཛད་རྒྱུ་དང་། ཁོང་ནི་འཛམ་གླིང་ཡོངས་ཀྱི་རྒྱལ་པོ་ཡིན།

⁶ཨིསི་རཱཨེལ་ཁྱོད་ནི་ཁྱོ་ཡིས་སྤངས་ནས། སྡུག་བསྔལ་ནང་ཡོད་པ་ཆུང་མ་ན་ཆུང་ལྟར། འོན་ཀྱང་གཙོ་བོ་དཀོན་མཆོག་ཁོང་གིས་ནི། ཁྱོད་ལ་འབོད་ནས་ཁོང་གིས་བཀའ་འདི་གསུངས།

⁷དུས་ཡུན་ཐུང་ངུའི་རིང་ལ་ངས་ཁྱོད་སྤངས། བརྩེ་བ་ཆེན་པོས་ང་ཡིས་ཁྱོད་ལ་ཕྱིར་ལོག་ལེན་རྒྱུ་ཡིན།

⁸ང་ཡིས་ཁོང་ཁྲོ་ཁྱུག་ཙམ་ལངས་ནས་ཁ་བསྒྱུར་ན་ཡང་། ང་ཡིས་ཁྱོད་ལ་གཏན་གྱི་བརྩེ་བ་སྟོན་རྒྱུ་ཡིན། དེར་བརྟེན་ཁྱོད་ལ་སྐྱོབ་མཁན་གཙོ་བོ་དཀོན་མཆོག་ཁོང་གིས་བཀའ་འདི་གནང་།

⁹ནོ་ཨའི་དུས་སུ་ཡང་སྐྱར་ས་གཞི་འདིར། ཆུ་ལོག་མི་གཏོང་ང་ཡིས་དམ་བཅའ་བྱས། ད་ལྟ་སྐྱར་དུ་ཁོང་ཁྲོ་མི་བྱེད་དམ་བཅའ་བྱ་རྒྱུ་ཡིན། ང་ཡིས་ཁྱོད་ལ་བཀའ་སྐྱོན་ཡང་ན་ཉེས་ཆད་མི་གཏོང་ངོ་།

¹⁰རི་དང་རི་ཕྲན་རྣམས་འགྱལ་ན་ཡང་། ང་ཡི་བྱམས་པར་མཐའ་མེད་དོ། ང་ཡི་ཞི་བདེའི་དམ་བཅའ་ངས་གཏན་སྲུང་། ཁྱོད་ལ་བྱམས་མཁན་གཙོ་བོ་དཀོན་མཆོག་ཁོང་གིས་བཀའ་འདི་གནང་།

¹¹གཙོ་བོ་དཀོན་མཆོག་ཁོང་གིས་བཀའ་གནང་བ། ཀྱེ་ཡེ་རུ་ཤ་ལེམ་སྡུག་པོ་མྱོང་མཁན་དང་། སྐྱབས་མེད་སེམས་གསོ་མེད་པའི་གྲོང་ཁྱེར་ཁྱོད། ང་ཡི་རིན་ཆེན་རྡོ་ཡིས་རྩིག་རྨང་བཟོས།

¹²ཁྱོད་ཀྱི་སྤེའུ་པད་མ་ར་གས་བཞེངས། མེ་ལྟར་འབར་བའི་རྡོ་ཡིས་རྒྱལ་སྒོ་བཟོས། མཐའ་འཁོར་ལྕགས་རི་རིན་ཆེན་ནོར་བུས་བཟོས།

¹³ཁྱོད་ཀྱི་མི་མང་རྣམས་ལ་ང་རང་ཉིད་ཀྱིས་བསླབ། དེ་ཚོར་དར་རྒྱས་དང་ནི་ཞི་བདེ་བྱིན།

¹⁴ཁྲིམས་དྲང་བདེན་པས་ཁྱོད་ལ་སྟོབས་ཅན་བཟོ། ཁྱོད་ལ་མནར་གཅོད་འཇིགས་སྐྲག་ལས་བདེ་བ་རྙེད།

¹⁵སུ་ཡིས་ཁྱོད་ལ་འཐབ་པ་ཡིན་ན་ཡང་། ང་ཡི་བཀའ་ཁྲོལ་མེད་པར་ཁོས་བྱས་ཡོད། ཁྱོད་ལ་འཐབ་མཁན་རྣམས་ནི་ཕམ་པར་འགྱུར།

¹⁶མེ་ཡི་ཐབ་ལ་མཚོན་ཆ་བཟོ་མཁན་དང་། མགར་བ་དེ་བཞིན་ང་ཡིས་བཀོད་པ་ཡིན། མི་གསོད་ཆེད་དུ་མཚོན་ཆ་བེད་སྤྱོད་མཁན། དམག་མི་དེ་ཡང་ང་ཡིས་བཀོད་པ་ཡིན།

¹⁷འོན་ཀྱང་ཁྱོད་ལ་མཚོན་ཆ་ཇི་འདྲ་ཡིས། ཁྱོད་ལ་དེ་ཡིས་གནོད་པ་བྱེད་མི་ཐུབ། ཁྱོད་ལ་སྐྱོན་བཏགས་བྱེད་མི་ཚང་མ་ལ། ཁྱོད་ཀྱི་དེ་ལ་ལན་འདེབས་བྱེད་པར་འགྱུར། ང་ཡི་བྲན་པོ་ཚོར་སྐྱབས་ནས་རྒྱལ་ཁ་སྤྲོད། གཙོ་བོ་དཀོན་མཆོག་ཁོང་གིས་བཀའ་གནང་ངོ༎